ԱԺ ընտրությունները և դրանից բխող տարեվերջյան նախընտրական շրջանը. ՀԱԿ անդամն ամփոփում է տարին

«Հայ ազգային կոնգրեսի» անդամ, տնտեսագետ Վահագն Խաչատրյանը անցնող տարվա ամենակարևոր իրադարձությունը ոչ մրցակցային և կեղծված խորհրդարանական ընտրություններն է համարում, որի տրամաբանական շարունակությունն այն է, ինչ այսօր կա: 

«Գնահատականի առումով հիշեցնեմ, որ նույնիսկ եվրոպական դիտորդները գնահատեցին, որ ընտրություններ, որպես այդպիսին, տեղի չեն ունեցել, որովհետև մրցակցային հնարավորությունները հավասար չեն եղել՝ կաշառք, իշխանության կողմից ադմինիստրատիվ լծակների կիրառում, նաև ցուցակները, որոնք հիմք հանդիսացան արդյունքների կեղծմանը»,-Tert.am-ի հետ տարին ամփոփեց ՀԱԿ անդամը և նշեց, որ արդյունքում ոչ թե քաղաքացին ընտրեց, այլ այն համակարգը, որի ղեկավարը հենց իշխանությունն է:

Այս ամենից հետո նա նկատեց, որ դա էլ իր հերթին ծնեց արտագաղթի նման աճը: «ՀՀ քաղաքացին չի ուզում ապրել մեր երկրում, այսինքն՝ ուզում է երկրից դուրս գալ, արտագաղթել, որովհետև երկու ամիս առաջ արված վերջին հարցումները՝ պարզելու թե որն է արտագաղթի պատճառը, ցույց տվեցին, որ եթե նախկինում 85 տոկոսը գնում էր աշխատանք չլինելու պատճառով, այս տարի նրանք կազմում են 60 տոկոսը, այսինքն՝ 40 տոկոսը գտնում է արդարության պակասից»,- ասաց նա:

Հաջորդ կարևոր փաստն, ըստ նրա, այն էր, ինչ տեղի ունեցավ տարեվերջին՝ նախագահական ընտրություններին առաջադրվելու հետ կապված:

«Երբ որ պարզվեց, որ իսկապես Սերժ Սարգսյանը լուրջ մրցակից չունի: Ես չեմ ուզում վիրավորել այն մարդկանց, ովքեր պատրաստվում են մասնակցել այս ընտրական ֆարսին, բայց իրականությունն այդպիսին է»,- ասաց նա:

«Մենք հիմա ունենք այնպիսի իրավիճակ, որ կարծես թե նախագահական ընտրությունների արդյունքներն արդեն պարզ են, բայց թե ինչ թվերով դա կարտահայտվի՝ կիմանանք մեկուկես ամսից: Բայց արձանագրենք, որ 12-ը փակվում է, բայց ՀՀ քաղաքացուն հույս չի տալի, չի նշում այն ուղիները, որը կխոստանա ավելի լավ ապագա»,- ասաց նա:

Իշխանական որոշ գործիչների առկա իրավիճակից ստացած հրճվանքը՝ Վահագն Խաչատրյանը բնական է համարում, բայց փորձում հասկացնել, որ նախկին ժամանակաշրջանին, այսինքն՝ խորհրդային կարգերին վերադառնալը, լավ բան չի խոստանում: «Իրենք էլ պետք է հասկանան, որ այսպես չի լինում, և իրենք էլ կվերադառնան նախկին ժամանակաշրջան՝ նույն խորհրդային տարիներ: Թող հիշենք, թե քանի հոգի էին մասնակցում այդ ընտրություններին, մարդիկ ուղղակի չէին մասնակցում, բայց իշխանությունը ընտրվում էր 99 տոկոս ձայնով: Բայց, ի վերջո, ինչ եղավ՝ խորհրդային համակարգը չկարողացավ մրցել համաշխարհային մրցակցությանը»,-հիշեցրեց ՀԱԿ անդամը և ավելացրեց, որ եթե այսօր էլ ուզում են այդպիսի համակարգով երկիրը կործանեն, ապա դա արդեն նույն իշխանության խնդիրն է:

«Ի վերջո, ո՞ւմ են ուզում խաբեն: Իրենք ամեն օր այդ կեղտի մեջ են, նկատի ունեմ համակարգը, քանի որ այդ համակարգը դրան է հանգեցնում՝ հարկ չվճարել, կաշառք, տալ, առօրյա կյանքում օրենքից դուրս գործողություններ անել»,- ասաց նա:
Վահագն Խաչատրյանը զարմանում է, որ առկա ոչ մրցակցային վիճակը նրանք համարում են հաղթանակ: «Միգուցե իրենց ծրագրի շրջանակներում սա հաղթանակ է. բայց պետության և քաղաքացու համար հաղթանակ չի կարող լինել, հաղթանակ, երբ բոլորը մասնակցում են երկրում տիրող գործընթացին, և արձանագրվում է, որ մրցակցային պայմաններում երկիրն ունի իշխանություն, նոր համակարգ, որն ուղղված կլինի քաղաքացու բարեկեցությունը զարգացնելուն»,- ասաց նա:

Մինչդեռ նրա պնդմամբ՝ այսօր քաղաքացին ականատես է իշխանության վերարտադրման: «Իշխանությունը վերարտադրվում է իր համար, որը միայն կաշխատի միայն իր բարեկեցությունը բարձրացնելու համար»,- ասաց նա և նշեց, որ տարեվերջին նույնիսկ ֆինանսների նախարարի հայտարարությունն այդ մասին է վկայում: «Երբ ասաց, որ 7 տոկոս տնտեսական աճ են ապահովել, բայց աղքատությունը չի պակասել և ընդամենը 2 տոկոսով է աղքատությունը կպակասի: Բայց ո՞նց կլինի սա, ի՞նչ է նշանակում 7 տոկոսով զարգացում, ո՞ւր ա գնում, ո՞ւմ գրպանները»,- ասաց նա:

Այս ամենից հետո նա նշում է, որ կա՛մ պետք է համակերպվեն ստեղծված վիճակի հետ, կա՛մ վերակազմավորվեն և իրենց ձայնը բարձրացնեն, կա՛մ էլ շարունակեն կիսատ –պռատ գործը: «Խոսքը վերաբերում է նաև Կոնգրեսի անդամներին, իրենց շարժմանը, իրենց ակտիվությամբ ելք փնտրեն և իշխանությանը չթողնեն, որպեսզի վերընտրվի: Մեր խնդիրը, որ չի լուծվել 12-ին և չի լուծվելու 13-ին այն է, որ մեր քաղաքացուն զրկել են իշխանություն ձևավորելու իր սահմանադրական իրավունքից: Այս խնդիրը պետք է դառնա առաջնային, և այս շրջանակներում կարողանանք համախոհներ գտնել»,- եզրափակեց նա: