Նիկոլ Փաշինյանի «Պայմանագիրը» Արմեն Աշոտյանը համարում է քաղաքացիական ռեսուրսի օգտագործման փորձ՝ նոր միավորի ստեղծման ճանապարհին

Այն, ինչ փորձում է նախաձեռնել Նիկոլ Փաշինյանն իր այսօր հրապարակված «Քաղաքացիական պայմանագրի» նախագծով՝ փաստացի քաղաքացիական ռեսուրսի և ներուժի օգտագործման և կազմակերպման փորձ է մի պատգամավորի կողմից, որի քաղաքական մոտեցումները գնալով տեսանելիորեն սկսում են տարբերվել այն քաղաքական մոտեցումներից, որոնցով նա ընտրվել է պատգամավոր:

Tert.am-ի հետ հարցազրույցում նման կերպ արտահայտեց իր վերաբերմունքը  Հայաստանի Հանրապետական կուսակցության փոխնախագահ, Կրթության և գիտության նախարար Արմեն Աշոտյանը՝ պատասխանելով «Հայ ազգային կոնգրեսի» անդամ, ԱԺ պատգամավոր Նիկոլ Փաշինյանի՝ այսօր «Հայկական ժամանակ» օրաթերթում ներկայացված «Քաղաքացիական պայմանագրի» վերաբերյալ մեր հարցերին:

Հիշեցնենք, որ փաստաթղթի նախագիծը ներառում է «հանուն ազատ և երջանիկ Հայաստանի մղվող պայքարի, դրա խնդիրների, նպատակների և միջոցների մասին պատկերացումների ուրվագծում», իսկ բազմաթիվ դետալների ձևակերպումը թողնված է ընթացիկ, աշխատանքային ապագային:
 

Հիշեցնենք նաև, որ այս փաստաթղթի մշակման մասին Նիկոլ Փաշինյանը հայտարարել էր իր «Ground zero» կոչվող և դրան նախորդած ՝«Քաղաքական տարին մեկնարկելիս» հոդվածներում, որոնցում առաջ էր քաշել պայքարը զրոյից սկսելու թեզը:

-Պարոն Աշոտյան, հասցրե՞լ եք ծանոթանալ Պայմանագրի նախագծին, եթե, այո, ի՞նչ դիտարկումներ ունեք այս առնչությամբ:

-Կատարվում է այն, ինչ կանխատեսվեց և բարձրաձայնվեց մի քանի ամիս առաջ՝ Ազգային ժողովում կառավարության ծրագրի քննարկման ընթացքում իմ կողմից: Ես բառացիորեն կես տարի առաջ ԱԺ ամբիոնից հայտարարեցի, որ եթե խորհրդարանական ընդդիմությունը չկարողանա իշխանություններին համարժեք գործընկեր ընդդիմախոս լինել երկրի առջև ծառացած քաղաքական, մշակութային, տնտեսական օրակարգերը ձևավորելու հարցում, ապա իշխանությունը կունենա այլընտրանք՝ ի դեմս քաղաքացիական հասարակության: Եվ այն, ինչ փորձում է նախաձեռնել Նիկոլ Փաշինյանը, փաստացի քաղաքացիական ռեսուրսի և ներուժի օգտագործման և կազմակերպման փորձ է մի պատգամավորի կողմից, որի քաղաքական մոտեցումները գնալով տեսանելիորեն սկսում են տարբերվել այն քաղաքական մոտեցումներից, որոնցով նա ընտրվել է պատգամավոր: Կարծում եմ՝ սա փորձ է՝ հավաքել որոշակի կրիտիկական զանգված և ինչու չէ՝ վաղը մյուս օրն այս պլատֆորմի վրա կառուցել քաղաքական որոշակի նոր միավորի ստեղծման նախագիծ:

-Ձեր ասածից կարելի՞ է եզրակացնել, որ դեռևս ՀԱԿ անդամ և ՀԱԿ անդամ մնալու խոստում տվող Նիկոլ Փաշինյանը ՀԱԿ-ին զուգահեռ նոր ձևաչափ է ստեղծում և, ինչու ոչ, առաջնորդության հայտ է ներկայացնում:

-Ներքաղաքական պայքարի իմաստով, իհարկե, ինձ հետաքրքիր է՝ ինչ է կատարվում ՀԱԿ-ում, թեպետ դա ՀԱԿ-ի ներքին գործն է: Բայց գնալով տեղեկատվական արտահոսքերը ներքին խմորումների մասին վկայում են, որ գալիք տարիների ընթացքում, հատկապես նախագահական մրցապայքարից անփառունակ հրաժարվելու քայլից հետո ՀԱԿ-ի էլեկտորալ բազայի և ՀԱԿ-ում գործող մի շարք հրապարակային դեմքերի շուրջ հնարավոր է վերաձևավորել ընդդիմադիր էլեկտորատը և ստանալ նոր քաղաքական միավորներ, որոնք պարոն Փաշինյանի մատնանշած «Ground zero»-ի տրամաբանության շրջանակներում են և կկարողանան մոտակա տարիներին լցնել այն քաղաքական վակուումը, որն առաջանում է ընդդիմադիր քաղաքական դաշտում՝ ի դեմ ՀԱԿ-ի նախկին էլեկտորատի:

-Իսկ այդ քաղաքական վակուումը, ըստ Ձեզ, ինչո՞ւ Նիկոլ Փաշինյանը չփորձեց լցնել նախագահական ընտրություններին առաջադրվելով:

-Նախ ասեմ, որ այս պահին արտահայտում եմ փորձագիտական կարծիքներ և խոսում եմ որպես քաղաքագետ և ոչ թե ՀՀԿ փոխնախագահ կամ ՀՀԿ անդամ:Սա կարևոր է, որպեսզի մեկնաբանություններս չենթարկվեն քաղաքական շահարկումների:
Կարծում եմ, որ Նիկոլ Փաշինյանն իր մարտավարության մեջ սպասել է, որպեսզի գալիք նախագահական ընտրություններն ամբողջությամբ զրոյացնեն ՀԱԿ-ի նախկինում եղած քաղաքական պոտենցիալը, որպեսզի նա առավել մեծ բարոյական ու քաղաքական իրավունքներ ունենա՝ իր սեփական պրոյեկտը սկսելու: Բոլոր դեպքերում, ես ողջունում եմ քաղաքացիական հասարակության ակտիվացումը Հայաստանում, առհասարակ, և տվյալ պարագայում նաև՝ քաղհասարակությունից դեպի քաղաքական միավորներ տրանսֆորմացիոն պրոյեկտները, որոնցից առաջինը, կարծես, Նիկոլի պրոյեկտն է:

-Բայց քաղհասարակության պայքարը նոր չէ Հայաստանի համար, հիշե՛նք Մաշտոցի պուրակը…

-Ես հենց դրա մասին եմ խոսում, խոսում եմ քաղաքացիական հասարակության տրանսֆորմացիայի մասին: Աներկբա է, որ դրա դերը մեր երկրում աճել է, և մենք տեսել ենք, թե ինչպես է պետությունը հաշվի նստում հանրության համար հետաքրքրություն հարուցող դեպքերի շուրջ ահազանգող քաղաքացիական հասարակության հետ: Կոնկրետ այս առաջարկը, կարծես թե, առաջին հրապարակային առաջարկն էր՝ քաղաքացիական հասարակության մի հատվածի ներուժը համախմբելու, օգտագործելու քաղաքացիական նախաձեռնությամբ փաթեթավորելու՝ դեպի քաղաքականություն տանելու նպատակով:

-Դուք ողջունում եք, մինչդեռ այսպիսի տողեր կան, որ ընդդիմության իշխանության հասնելը պետք է լինի խաղաղ ճանապարհով, օգտագործվում է նաև «թավշյա հեղափոխություն» բառակապակցությունը:

-Այս պահին ես չեմ կատարում տվյալ Պայմանագրի բառային վերլուծություն, ես կատարում եմ քաղաքական գործընթացների վերլուծություն: Իհարկե, այնտեղ կան բազմաթիվ դրույթներ, որոնք առանձին-առանձին, հետո, եթե այս միավորն իրականություն դառնա և կշիռ ներկայացնի, հարկ կլինի դնել քաղաքական բանավեճի օրակարգ: Այս պահին ես վերլուծում եմ երևույթներ և ոչ թե կոնկրետ ձևակերպումներ ու բառակապակցություններ, որոնք տեղ են գտել Պայմանագրի մեջ: Սրանք դետալներ են: Ինձ հետաքրքրում է երևույթը: Եթե դրա շուրջ, ըստ Նիկոլ Փաշինյանի, կստեղծվի ինչ-որ կրիտիկական զանգված, կհավաքվեն բավարար չափով այս արժեքները կիսող քաղաքացիներ և կկարողանան դառնալ կազմակերպված ինքնուրույն քաղաքական միավոր, այդ դեպքում հնարավոր է որոշ հարցադրումներ տեղափոխվեն քաղաքական բանավեճի հարթություն: