Սահմանադրությունում ցանկացած փոփոխություն կարող են ձևակերպել իբր թե ընդունվել է. իրավապաշտպանը դեմ է, ՀՅԴ պատգամավորը՝ կողմ

Իրավապաշտպան Արտակ Զեյնալյանը հավանական է համարում այն, որ սահմանադրական բարեփոխումների անվան տակ Սերժ Սարգսյանը նպատակ ունի կառավարման համակարգը դարձնել խորհրդարանական և արհեստականորեն երկարաձգել իր պաշտոնավարումը։ Միևնույն ժամանակ, ըստ նրա, այսօր նախագահին առընթեր սահմանադրական բարեփոխումների մասնագիտական հանձնաժողով ստեղծելու ոչ ժամանակն էր, ոչ էլ իմաստ ուներ դրան գնալու։

«Երկրի առաջ այնքան կարևոր հարցեր կան ծառացած, որ դրա ժամանակը չէր և ընդհանրապես դրա իմաստն էլ չկար, բայց միևնույնն է, իրենք ինչ ուզեն՝ կգրեն և ինչքան ուզեն՝ կխփեն։ Անիմաստ բան է դա, ձևական, որը բովանդակություն չունի»,-Tert.am-ի հետ զրույցում ասաց իրավապաշտպանը և հավելեց, որ ցանկացած փոփոխություն կարող են ձևակերպել «իբր թե ընդունվել է»։

«Հայ հեղափոխական դաշնակցություն» խմբակցության պատգամավոր Արծվիկ Մինասյանը այլ կարծիքի է։ Ըստ նրա, եթե կառավարման համակարգը դարձվի խորհրդարանական, դա կլինի միայն հօգուտ ժողովրդի՝ անկախ նրանից, թե այսօր նախագահն ով է։

Այն դիտարկմանը, թե այդուհանդերձ ՀՀԿ մամուլի խոսնակ, ԱԺ փոխխոսնակ Էդուարդ Շարմազանովը նշել է, որ կառավարման համակարգի փոփոխության հարց իշխանության օրակարգում չկա, Արծվիկ Մինասյանը նկատեց, թե շատ վատ է, որ չկա։

«Ես շատ կուզենայի, որ օրակարգում դրված լինի, սա սկզբունքային հարց է, անկախ նրանից, թե այսօր նախագահն ով է և ինչ արժեքների է դավանում։ Պառլամետական կառավարությունն այսօր միակ ճիշտ ձևն է, որը հնարավորություն կտա նախ չեզոքացնել քաղաքական մենաշնորհի ինստիտուտը, երկրորդ՝ երկիրը փոխելու բազմակարծության միջոցով կայուն զարգացման հարթությունում, և վերջապես երրորդ կարևոր փաստը՝ միանձյա որոշումից անցում կկատարվի ընդհանրական դիքրորոշման սկզբունքին»,-Tert.am-ի հետ զրույցում ասաց ՀՅԴ պատգամավորը և ընդգծեց, թե խորհրդարանական կառավարման ձևին անցնելուց հետո ինչ համակարգ կձևավորվի՝ արդեն այլ հարց է։

«Որովհետև պառլամենտական էլ ունի տարբեր ձևեր, կարող է պահպանվել նախագահի ինստիտուտը՝ ոչ թե անմիջական ժողովրդի կողմից ընտրվելու միջոցով, այլ պառլամենտի, կարող է նաև ժողովրդի կողմից ընտրվի, բայց լիազորությունների բաշխում լինի և այլն, բայց փաստն այն է, որ պառլամենտական կառավարումն աշխարհի մասշտաբով ցույց է տվել իր կենսագործունեությունը: Չկա որևէ երկիր որտեղ պառլամենտական ձևը վերցնի, և մարդու իրավունքների գործոնը չդառնա առաջնահերթ, դուք չեք կարող նման փորձ բերել»,-նշեց նա։

Ինչ վերաբերվում է այն տեսակետներին, թե հավանական է, որ Սերժ Սարգսյանը դրանով իր պաշտոնավարման ժամկետն է ավելացնում, Արծվիկ Մինասյանը պատասխանեց. «Չեմ ուզում դա կապել ներկա նախագահի դիրքորոշման հետ։ Ավելին ասեմ, նման համակարգին անցնելու դեմ էր արտահայտվել առաջին հերթին հենց Սերժ Սարգսյանը»։

Արծվիկ Մինասյանը բացի այդ նկատում է, որ Սերժ Սարգսյանի հրամանագրում սահմանադրական փոփոխության մեկ հարցն է միայն վերաբերվում կառավարման համակարգի փոփոխությանը, ըստ նրա, բազմաթիվ այլ հարցեր էլ կան։

«Այդ թվում նաև պառլամենտական վերահսկողության հարցը, քաղաքացիների հիմնական իրավունքների իրականացման սահմանադրական երաշխավորման համակարգը: Դատական համակարգում, օրինակ, ես գտնում եմ, որ Հայաստանում չի կարող երկու բարձրագույն դատական ատյան լինել՝ սահմանադրական և վճռաբեկ դատարան։ Մենք պետք է ունենանք այնպիսի սահմանդրական փոփոխություններ, որոնք կապահովեն իրական ընտրական արդյունքների գործընթաց։ Այսօր մեր սահմանդրությունը չի երաշխավորում դա, այն մեծամասամբ դեկլարատիվ է, սահմանում է իրավունքներ, սակայն դրանց իրականացման սահմանադրական մեխանիզմները նշված չեն։ Խոսում է իշխանություների հավասարակշռման մասին, բայց սահմանադրական նորմերը թերի են այդ զսպումները ապահովելու հարցում, արդյունքում մեր Սահմանադրությունն ակամայից դառնում է մի փաստաթուղթ, որն իրականության հետ որևէ առնչություն չունի»,-պնդեց նա։

Ամփոփելով Արծվիկ Մինասյանը նշեց, որ ՀՅԴ-ն ողջունում է սահմանադրական փոփոխություններ իրականացնելու իշխանության ցանկությունը՝ կախված նրանից, թե ինչ բովանդակություն դա կունենա։ «Թե մեր, ընդդիմության մյուս հատվածի, քաղաքացիական սեկտորի մասնակցությունենրը ինչքանով կլսվեն, դրան համապատասխան էլ մեր դիրքորոշումները կհայտնենք»,-ասաց նա։

Իսկ թե նրան չի մտահոգում, որ հանձնաժողովում ընդդիմության ներկայացուցիչ չկա, ՀՅԴ պատգամավորը նշեց, որ դաշնակցությունը մտադիր է ստեղծել առանձին հանձնախումբ, որպեսզի ստեղծեն սեփական մշակված փաթեթը և այն նույնպես կառաջարկեն։