Տղամարդկային բանավեճ է տեղի ունեցել. Հովհաննես Մարգարյանը Գ. Ծառուկյանի և Ա. Բաղդասարյանի վեճի մասին

ԱԺ «Օրինաց երկիր» խմբակցության պատգամավոր Հովհաննես Մարգարյանը չի հերքում, որ երեկ «Զվարթնոց» օդանավակայանում «Բարգավաճ Հայաստան» խմբակցության ղեկավար Գագիկ Ծառուկյանի և Ազգային անվտանգության խորհրդի քարտուղար Արթուր Բաղդասարյանի միջև տեղի է ունեցել միջադեպ, որը, նրա խոսքով՝ եղել է տղամարդկային բանավեճ։

Հովհաննես Մարգարյանը նշեց, որ վեճը պատճառը եղել է Հայաստանի վոլեյբոլի ֆեդերացայի նախագահի պաշտոնում Արթուր Բաղդասարյանի առաջադրումը, ապա ավելացրեց, որ երկուսն էլ իրենց կարծիքներով կոռեկտ ձևով հեռացել են, իսկ խնդիրը կապված է եղել նաև Սպորտի նախարարության գործառույթների հետ:

«Ես ընթացակարգերին ծանոթ չեմ, բայց մի բան գիտեմ հաստատ և վստահեցնում եմ ձեզ, որ Սպորտի նախարարությունը՝ որպես պատկան մարմին Կառավարության կողմից կոչված է այս ընթացակարգերը պաշտպանելու: Եղել է ընտրություն … բոլորս գիտենք, որ սպորտաձևերում պաշտոնատար անձանց լրացուցիչ ներգրավվածությունը միայն օգուտ կբերի այդ ոլորտի զարգացմանը, և եթե այս առումով նկատի ունենանք, որ ՌԴ-ում Արթուր Բաղդասարյանի գործընկերը նույնպես Վոլեյբոլի ֆեդերացիայի նախագահն է, փոխադարձ համագործակցությունը միմիայն կնպաստի մեր երկրի այդ սպորտաձևի զարգացմանը, կարծում եմ՝ ոլորտի տարբեր ներկայացուցիչներ արդեն խոսում են այդ մասին, որ լրացուցիչ ֆինանսական հոսքեր կներգրավվեն, Ռուսաստանը բավական կաջակցի տարբեր ծրագրերում: այնպես որ դա միայն ողջունելի է»,– ասել է պատգամավորը:

«Կոռեկտ չեմ համարում մանրամասնել, հաճախ քաղաքական բանավեճը կարող է վերաճել նաև տղամարդկային բանավեճի և ավարտվել է բանավեճը կոռեկտության սահմաններում և, ըստ էության, կարելի է ասել, որ երկուստեք իրենց կարծիքը հիմք ընդունելով բաժանվել են, այսինքն հեռացել են օդակայանից՝ տանելով իրենց կարծիքը»,-նշեց նա։

Նշենք, որ ըստ տարածված տեղեկությունների՝ նախագահի օդանավի վայրէջք կատարելուց առաջ Արթուր Բաղդասարյանն ու Գագիկ Ծառուկյանը փողոցային ամենավերջին հայհոյանքներով իրար հետ վեճի են բռնվել:

Ըստ Հովհաննես Մարգարյանի՝ շատերը փորձում են շահարկել։ «Շատերը փորձում են պղտոր ջրում ձուկ որսալ, իրականությունը լղոզել, ես մի բան գիտեմ՝ այսօրվա դրությամբ մայր հասկացությունը բոլոր տղամարդկանց համար սրբություն է, չեմ կարծում, որ որևէ մեկը թույլատրի նման հայհոյանքներ։ Կարծում եմ, որ չի էլ եղել, ես հպարտ եմ Արթուր Բաղդասարյանի և՛ ներկայով և՛ անցյալով, քաղաքական գործիչ, ով գրագետ, երիտասարդ, խիզախ, համարձակ է և իր անցած ճանապարհով արժանապատվության, պատվի, համարձակության ... ես իր անցած ողջ ճանապարհը տեսել եմ, գիտեմ, և բոլոր տղամարդկային, և՛ քաղաքական, և՛ առավել ևս բարոյական կողմերը»,- նշեց նա։

Հարցին, թե այս պահին ինչ հարաբերություն ունեն նրանք իրար հետ և արդյոք վեճից հետո այլևս միմյանց հետ չեն խոսում, ՕԵԿ պատգամավորը պատասխանեց. «Ես տեղյակ չեմ, չեմ կարող պատասխանել, բայց կարծում եմ, որ բոլորս էլ պիտի նպաստենք, որ որոշակի դեպքերում, երբ քաղաքական գործիչների միջև որոշակի դեպքեր լինում է, նյարդերը տեղի են տալիս, նպաստենք, որ հաշտ-համերաշխ ավարտվի, ի վերջո իրենք հաշտությամբ բաժանվել են՝ ուղղակի յուրաքանչյուրն այդ հարցի շուրջ մնալով իր կարծիքին»։

ՕԵԿ–ական պատգամավորը նշեց, թե գործը բռունցքներին չի հասել, դա ապատեղեկատվություն է: «Հայաստանի իրականության մեջ երբ տասնյակ պաշտոնյաներ ներկա են եղել, կարծում եմ՝ եթե իրականության, ճշմարտության հետ աղերս լիներ, այդ մասին բոլորին հայտնի կլիներ»,- նշեց նա։

Հարցին, թե Սերժ Սարգսյանը տեղյակ եղե՞լ է միջադեպի մասին, Հովհաննես Մարգարյանը պատասխանեց. «Կարծում եմ, բոլորն են տեղյակ»: