Որևէ իշխանություն չի համաձայնի վերահսկողական լծակներ տրամադրել ընդդիմությանը. Գագիկ Ջհանգիրյան

ԱԺ «Հայ ազգային կոնգրես» խմբակցության պատգամավոր, նախկին զինդատախազ Գագիկ Ջհանգիրյանը Tert.am-ի հետ զրույցում նկատեց, թե չի հավատում, որ կգտնվի մի իշխանություն, որը կհամաձայնվի վերահսկողական լծակներ տրամադրել ընդդիմությանը։ Ըստ նրա՝ դա բարի ցանկություններից ժանրից է։

«Ես չեմ հավատում մի իշխանության, որը կգա ու վերահսկողական բոլոր լծակները կամ լծակների մեծ մասը կտա ընդդիմությանը, այդպիսի իշխանություն չեմ տեսել, կներեք ինձ, և դա բարի ցանկությունների ժանրից է։ Եթե ընդդիմությունն ասում է՝ լավ, դուք մեծամասնություն եք, բոլոր վերահսկողական բոլոր լծակները տվեք մեզ... իհարկե կան երկրներ, որտեղ Վերահսկիչ պալատի նախագահի պաշտոնը կամ չգիտեմ մեկ այլ վերահսկողական մարմին օրենքով կամ Սահմանադրությամբ տրվում է ընդդիմությանը, բայց մեզ մոտ այդպիսի ավանդույթներ չի եղել»,- նշեց նա։

Ավելին՝ ըստ Գագիկ Ջհանգիրյանի՝ իշխանությունը վերցնում է ոչ միայն այն, ինչ իրենց ընտրությամբ է հասնում, այլ նաև վերցնում է ավելին։ «Հիմա ուզում եք իշխանությունն ինքն իրեն վերահսկելու լծակները տա ընդդիմությանը, դա այդպես, շատ կներեք ինձ, չեմ ուզում այդ հարցի հեղինակներին նեղացրած լինեմ (նկատի ունի ՀՅԴ–ին և «Ժառանգությանը»), բայց դա շատ երևակայական պատկերացում է։ Մեծ երևակայություն պետք է ունենալ, որպեսզի այդպիսի առաջարկություններ անել»,-ասաց նա։

Հարցին, թե ՀՀ վարչապետ Հովիկ Աբրահամյանն ասաց, որ դեմ չէ վերահսկողական լծակները տրամադրել ընդդիմությանը, բայց հավելեց, թե ընդդիմությունն այն վիճակում չէ, որ նրան լիազորություններ վստահվեն, ՀԱԿ պատգամավորը պատասխանեց, թե դա ընդամենը պատճառ է հարցից խուսափելու համար։

«Ես կարծում եմ, որ ընդդիմությունը երբեք էլ այդ վիճակին չի լինի, որ նրան վստահեն, որովհետև եթե չեն վստահում՝ պատճառներ միշտ էլ գտնում են, իսկ իշխանությունն այն վիճակո՞ւմ է, որ իրեն վստահում են, հա՞։ Ես կարծում եմ այստեղ էլ շատ մեծ վերապահումներ կա»,-ասաց նա։

Ինչ վերաբերում է նախագահ Սերժ Սարգսյանի հայտարարությանը, որով նա ընդդիմությանն ու իշխանություններին համեմատում էր մարդու աջ և ձախ ձեռքերի հետ և նշում, որ նրանք պետք է համագործակցեն, ապա նախկին զինդատախազը նկատեց, թե դա շատ լավ առաջարկ է, որը, ցավոք, միայն խոսք է։

«Շատ լավ բան է, որ պետությունն ընկավում է որպես օրգանիզմ՝ և՛ ընդդիմությունը, և՛ իշխանությունը՝ որպես տարբեր ձեռքեր, նույն կենդանի օրգանիզմի, բայց խոսքերն ասելը մի բան է, իրական կյանքն այլ բան։ Այդ ինչպե՞ս է, որ աջ ձեռքը միշտ ձախ ձեռքին նեղում է, բանտերն է գցում, ասենք գործից է հանում, հետապնդում է, այդ ո՞նց է, որ ձախ ձեռքն է միշտ արտագաղթում, ինչի՞ իշխանությունը չի արտագաղթում և ընդհակառակը փթթում, հարստանում է։ Ասելը լավ է, ես նորմալ եմ վերաբերվում, այդպիսին պետք է լիներ, բայց իրականում ծայրահեղ անհավասար պայմանների մեջ են՝ և՛ իրավական, և՛ փաստացի, և՛ նյութական։ Դուք լսե՞լ եք, որ որևէ պաշտոնյա իր պաշտոնից դուրս գալու դիմում գրի և արտագաղթի, եթե, իհարկե, նրա նկատմամբ քրեական հետապնդում չեն սկսել»,-հարցրեց նա և նշեց, որ առանց ձախ ձեռքի մարդը խեղված մարդ է։

Հարցին, թե խեղված չի՞ նաև այն, որ մեր պարագայում ի դեմս այլընտրանք համարվող «Բարգավաճ Հայաստան» կուսակցության քաղաքական դաշտն ունի երեք ձեռք, Ջհանգիրյանն արձագանքեց. «Դա դուք եք այդպես մեկնաբանում, ես կարծում եմ՝ այս քառյակի ձևաչափի մեջ բաժանել երրորդ ձեռք, չորրորդ ձեռք չկա, առայժմ չկա, թե ինչ կլինի, ես չգիտեմ, բայց առայժմ չկա»։

Անդրադառնալով իշխանությունների սահմանադրական բարեփոփոումներ իրականացնելու նախաձեռնությանը, Գագիկ Ջհանգիրյանը նշեց, թե ինքը մեծ հարցականի տակ կդներ բուն սահմանադրական բբարեփոխումների իրականացման խնդիրը։

«Այնպես չէ, որ իշխանություններն արդեն որոշել են և դա իրականացնում են, որովհետև տրամաբանական կլիներ, որ հայեցակարգի ստեղծումից անմիջապես հետո ստեղծվեր աշխատանքային խումբ, դրան ներգրավեին քաղաքական ուժեր և այլն, և այլն, այդ բոլորը չկա, այնպես որ ես այն կարծիքին չեմ, որ իշխանությունը ցանկանում է նախաձեռնել սահմանադրական բարեփոխում»,– ավելացրեց նա։

Խոսելով հայեցակարգի հատկապես այն դրույթի մասին, որը վերաբերում էր անցում խորհրդարանական հանրապետության մոդելին, ՀԱԿ պատգամավորը նշեց, որ իր կարծիքով՝ դա հստակ «մեսիջ էր կամ խայծ»՝ ուղղված մի քանի քաղաքական ուժերի։

«Ձեզ հայտնի և այդ ամբողջ հայեցակարգի մշակման և, հատկապես, պառլամենտական մոդելի ընդգրկումը հայեցակարգի մեջ՝ մի նպատակ ուներ, այսպես խաթարել քառյակի համագործակցությունը, բնականաբար, քառյակից երկուսը կամ ավելի ուժերը համաձայնվեին խորհրդականին, պետք է մտնեին այդ բովանդակային աշխատանքի մեջ՝ փաստորեն դուրս գալով պառլամենտական համագործակցությունից կամ ձևաչափից»,-նշեց նա։

Իսկ թե ճշտող հարցին, թե ինչպե՞ս պետք է խաթարեր, պատգամավորը բացատրեց. «Որովհետև քառյակի հայտնի գործընկերը (ԲՀԿ – Tert.am) այդ իրականացումը մերժեց այս պահին»։

Գագիկ Ջհանգիրյանի պնդմամբ՝ «երկրի այսօրվա ճգնաժամային վիճակի մեջ Սահմանադրությունն ամենաքիչն է մեղավոր. «Ավելի լուրջ մեղավորներ ու պատասխանատուներ կան, որոնք պետք է ուղղակի կատարեն Սահմանադրությունը, իսկ Սահմանադրությունը չեն կատարում, ձեզ համար նորո՞ւյթ է, որ Սահմանադրությունը չեն կատարում, ես այդ հայտնագործության հեղինակային իրավունքը չեմ ուզում յուրացնել, դա, երևի թե, ուրիշներին է պատկանում»։

ՀԱԿ պատգամավորն ընդգծեց, թե Սահմանադրությունը ևս կատարելագործման և բարելավման կարիք ունեցող իրավական փաստաթուղթ է, բայց այդ կարիքը, ըստ նրա, պետք է լուրջ քննարկվի և գիտակցվի։

«Վատ է, որ ամեն նախագահ փորձում է Սահմանադրություն ձևել կամ ընդունել՝ անկախ նրանից, ում մտքին ինչպիսի փաստարկներ կան։ Սահմանադրությունն այն եզակի պետական, քաղաքական փաստաթուղթն է, որ դրա շատ փոփոխելը, շատ ձևափոխելը երբեք լավ բանի չի հանգեցնի։ Պարզագույն մի սկզբունք ասեմ՝ հարգանք Սահմանդրության նկատմամբ։ Եթե մենք այդ սկզբունքն ուզում ենք, որ տիրապետող դառնա, նախ իշխանությունները պետք է պաշտպանեն Սահմանդրությունը, այնուհետև նաև քաղաքացիները և մենք չպետք է օրումեջ Սահմանադրություն փոխենք»։

Ի պատասխան պնդման, որ Սահմանադրության փոփոխություններն անհրաժեշտ են, եթե ցանկանում ենք իրավական պետություն ձևավորել, Գագիկ Ջհանգիրյանն արձագանքեց. «Մեր Սահմանադրության մեջ արդեն գրած է, որ ՀՀ-ն իրավական պետություն է ... մենք արդեն վաղուց պետք է իրավական պետություն լինեինք, և այդ դրույթը գրված է 1995թ-ի Սահմանադրության խմբագրման մեջ, այնպես որ մենք պետք է ապահովենք այս գրածները և Սահմանադրության մեջ հռչակած մարդու և քաղաքացու հիմնարար իրավունքներն ու ազատությունները, իշխանությունների բաժանման սկզբունքը հազար ու մի դրույթներ, և ոչ թե հաճախակի փոխենք այդ դրույթները»։