Արամ Սարգսյանը ցավում է Լևոն Տեր-Պետրոսյանի համար

Եռյակում եղած յուրաքանչյուր ուժ առանձին պլաններ ունի, իմ գնահատականներով այսօր իրականանում է միայն Գագիկ Ծառուկյանի նախանշած պլանները, իր խոսքից է կախված ամեն ինչ, և նա դա չի թաքցնում, այլ ցուցադրում է: Այս մասին լրագրողների հետ զրույցում ասաց «Հանրապետություն» կուսակցության նախագահ Արամ Զավենի Սարգսյանը:

«Գագիկ Ծառուկյանին խորհուրդ կտայի քիչ երրորդ դեմքով ինքն իր մասին խոսեր, սիրուն չի և հանրահավաքներից առաջ լավ կաներ բանավոր խոսքը պատրաստեր»,-ասաց նա:

Արամ Սարգսյանը գտնում է, որ այսօր Գագիկ Ծառուկյանի մոտեցումներն իրականացան, որովհետև ինքը դարձավ հստակ ընդդիմադիր զանգվածի լիդեր` ոչ իշխանություն լինելով, քանի որ նա նույնիսկ չի էլ ընդունել, որ ինքը ընդդիմադիր է:

«Ոչ իշխանություն լինելով նա ապահովեց հասարակական զանգված, որը նրան ընդունի որպես Հայաստանի Հանրապետության հաջորդ նախագահի թեկնածու: Գագիկ Ծառուկյանի ասածները շատ անմեղ բաներ էին, պարզապես վերջին խոսքն իրենն է, ինքը վերջին հանրահավաքով ապացուցեց, որ մարդ բերողն ինքն է, և մարդիկ գալիս են իրեն լսելու, ոչ թե մյուսներին: Դա ինձ համար տխուր էր, տխուր էր Լևոն Տեր-Պետրոսյանի և Ստեփան Դեմիրճյանի համար: Ես անկեղծ սրտի ցավ ունեմ, չէի ցանկանա դա տեսնել»:

Անդրադառնալով ՀԱԿ-ի և ԲՀԿ-ի նույն հարթակում գտնվելուն, Արամ Սարգսյանը հիշեցրեց.«Նախ ասեմ, որ ԲՀԿ նախագահ Գագիկ Ծառուկյանը 2003 թվականին ամբողջ ուժով իր շրջապատով պաշտպանել է Ռոբերտ Քոչարյանին, իսկ 2008 թվականին էլ կոալիցիայի մաս է կազմել Սերժ Սարգսյանի հետ: Այդ կուսակցության անդամ Վարդան Օսկանյանն արդարացնում էր դիվանագիտական մակարդակներով այն սպանդը, որը տեղի ունեցավ Մարտի 1–ին: Ասեմ ավելին` մարտի մեկից հետո Ռոբերտ Քոչարյանը էկրանների առաջ ստելով բոլորին համոզում էր, որ ինչ-որ մարդիկ դուրս են եկել մեքենաների հետևից, կրակել են ոստիկանների վրա և թաքնվել: Սակայն այդ մարդկանցից որևէ մեկին նա չգտավ` իր դատախազական անօրինական մեխանիզմներով»:

Նա նշեց, որ Վարդան Օսկանյանն էլ Քոչարյանի ասածներն արդարացնում էր միջազգային հանրության առաջ, առ այսօր ներողություն չի խնդրել և իշխանափոխություն է ցանկանում:

«Սակայն կա մի երրորդ հիմնական խնդիր` բոլոր այդ ուժերը իրենք Հայաստանի զարգացումը տեսնում են Եվրասիական միության շրջանակներում: Այսինքն` իրենք ուզում են, որ Հայաստանում ընտրությունները լինեն այնպես, ինչպես Ղազախստանում, Ռուսաստանում, Բելառուսում, այսինքն` չլինի ընդդիմություն, քանի որ այդ երկրներում չկա ընդդիմություն»,- ասաց նա և նշեց, որ այստեղի ընդդիմությունը պետք է, որ նման բան չցանկանա:

«Իսկ եթե Հայաստանը Եվրասիական տնտեսական շրջանակներում է գործելու, ապա ինչ նշանակություն ունի, թե երկրի նախագահը ով է, երկրի նախագահը Պուտինն է: Ես տեսնում եմ, որ հիմա շատերը` թեկուզ իշխանական շրջապատում «շեֆ» ասում են Պուտինին»,- ասաց նա:

Tert.am-ի հարցին, թե ինչպես կհակադարձեք Լևոն Տեր-Պետրոսյանի որոշ ընդդիմադիր ուժերին մարգինալ ուժեր համարելուն և այն ասածին, որ ընդդիմության ընդդիմությունը Սերժ Սարգսյանի բարեկամն է, Արամ Սարգսյանը նշեց.«Այդ ասածի մեջ շատ լուրջ հակասություն կա: Եթե մենք մարգինալներ ենք, ջղաձիգներ ենք, ուրեմն կա՛մ մենք ընդդիմադիր չենք, որից ինքը զայրանում է, կա՛մ ինքը հակասում է իրեն` թե չի կարելի ընդդիմադիրն ընդդիմադիրին քննադատի: Այս ասածի և պահվածքի մեջ հստակ հակասություն կա: Ես չէի ցանկանա Լևոն Տեր-Պետրոսյանի որևէ ասած դնել քննադատել, մեկնաբանել, շատ երկար, դժվարին ճանապարհ ենք անցել և ճիշտ չեն այդպիսի ձևակերպումները»,-ասաց նա:

Արամ Սարգսյանը նշեց, որ հստակ կարող է ասել, որ իրենք ընդդիմադիր են Ռուսաստանի գործող իշխանությանը, որովհետև դեմ են Եվրասիական միությանը և հասկանալի համարեց` Ռուսաստանի իշխանության տարբեր էլեմենտների, մամուլի կողմից իրենց քննադատելը:

«Մենք դեմ ենք իշխանությանը, և իշխանությունն էլ մեզ կարող է քննադատել, ջղաձիգներ անվանել, տարբեր պիտակներ տալ, սա էլ ինձ համար հասկանալի է, սակայն երբ որ դրանում մեզ քննադատում են հարթակում կանգնած ուժերը, դա ինձ համար անհասկանալի է»,-ասաց նա:

Հարցին, թե ինչով եք պայմանավորում Լևոն Տեր-Պետրոսյանի վերաբերմունքի փոփոխությունը, Արամ Սարգսյանը պատասխանեց.«Մարդիկ կան, ովքեր պարտվել չեն սիրում, պարզապես չեն կարողանում պարտվել: Իմ կարծիքով՝ Լևոն-Տեր Պետրոսյանը միայն այդ առումով ցանկանում է հաղթած լինել` ցանկացած գնով: Ես իրեն հաջողություն եմ մաղթում»,-ասաց նա և նշեց, թե գտնում է, որ Լևոն Տեր-Պետրոսյանը երիտասարդական ազարտի մեջ է գտնվում:

Մեկ այլ լրագրողի հարցին ի պատասխան` «Հանրապետություն» կուսակցության ղեկավարը նշեց, թե ինքը նեղսրտում է, որ իշխանափոխություն չեղավ 2003 թվականին, ինչի մեղավորը նաև ինքն է։ Նա նաև նեղսրտում է, որ իշխանափոխություն չեղավ 2008 թվականին, ինչ մեղավորներից մեկը դարձյալ ինքն է և ինչի համար ներողություն է խնդրում:

«Ես նեղսրտում եմ, որ 2013 թվականի Րաֆֆի Հովհաննիսյանի հանրահավաքներին իշխանափոխություն չեղավ, ինչի համար էլի նաև ես էի մեղավոր` իմ չափով: Ես նեղսրտում եմ, որ հիմա էլ չի լինելու այդ իշխանափոխությունը, սա բայղուշություն չհամարեք, սակայն փորձս է ասում: Բոլոր երեք դեպքերում էլ անհաջողությունը եղել է մի խնդրից` բոլորն էլ ցանկացել են հաղթանակը բերել Մոսկվայից, իսկ Մոսկվան հաղթանակը տալիս է գործող իշխանությանը, դա թող դաս լինի»,– ասաց նա:

Արամ Սարգսյանը նաև նկատեց, որ Ռուսաստանի գործող իշխանությունները հայտարարել են, որ իրենք, ի տարբերություն արևմուտքի, աշխատել և աշխատելու են գործող իշխանությունների հետ: Ինքը՝ Արամ Սարգսյանը, Հայաստանի ապագան տեսնում է Եվրոպական Միության հետ` ասոցացման համաձայնագիրը ստորագրելով:


Արամ Սարգսյանը չբացառեց Ռոբերտ Քոչարյանի` եռյակի միջոցով հավանական վերադարձը` հիշեցնելով, որ Գագիկ Ծառուկյանը հայտարարել է, թե Ռոբերտ Քոչարյանը այն անհատն է, ով իրավունք, արժանիքներ ունի հետ վերադառնալու: «Կոնկրետ ՀԱԿ-ի մասով կասկածում եմ, ՀԱԿ-ը չի գնա դրան, բայց ԲՀԿ-ն, որն այսօր ինքն է վճարում և խմում շամպայնը, կարող է բերել, չեմ բացառում»,-հավելեց նա: