Որպես լրագրող` դաս քաղեցի, որ երբեք չփորձեմ որևէ մեկին հրեշ ներկայացնել. հուշեր Վազգեն Սարգսյանի մասին

Վազգեն Սարգսյանի հետ աշխատանքը խիստ բարդ էր, որովհետև նա միանշանակ անձնավորություն չէր, և իր հետ կապված վեճերն ավելի շատ էին, քան խաղաղ պահերը: Tert.am-ի հետ զրույցում այս մասին ասաց «Առավոտ» լրատվական կայքի խմբագիր Աննա Իսրայելյանը:

«Եթե նայեք ժամանակի մամուլը, ապա նրա մասին շատ քիչ կգտնեք դրական հրապարակումներ. ավելի շատ էին բացասական հրապարակումները»,-ասաց նա և նշեց, որ հիմա արդեն արժեվորվում է Վազգեն Սարգսյանի դերը ՀՀ պատմության, բանակի կայացման մեջ:

«Սակայն որպես լրագրող` այս ամեն ինչից մի դաս քաղեցի, որ ձևակերպել էր այժմ էլ պաշտոնավարող պաշտոնյաներից մեկը, ով ասել էր` դուք լրագրողներով այնքան հրեշ ներկայացրեցիք Վազգեն Սարգսյանին, որ գտնվեց մեկը, ով մտածեց` եթե այդ հրեշից ազատի ժողովրդին, ժողովրդի վիճակը կթեթևանա: Որպես լրագրող` դաս քաղեցի, որ երբեք չփորձեմ որևէ մեկին հրեշ ներկայացնել: Հիմա մեր քաղաքականության մեջ ակնհայտ է, որ ո'չ հրեշներ կան, ո'չ էլ` հրեշտակներ»,-ասաց Աննա Իսրայելյանը և նշեց, թե մի կողմ է թողնում այն, թե որքանով էր Նաիրի Հունանյանի գործողությունները միայն դրանով պայմանավորված:

«Ինձ համար մինչև այսօր էլ հարցական է մնում, թե որքանով էր իր գործողություններն ինքնաբուխ: Ես կարդացել եմ «27»-ի գործի բոլոր հատորները և գիտեմ, որ համենայն դեպս` իր մտադրությունների մասին հայտնած տեղեկությունները բավարար էին, որ հնարավոր լիներ կանխել կատարվածը: Սակայն ինչ է արվել այդ ուղղությամբ`ես չգիտեմ, քանի որ գործի մի քանի հատորներ գաղտնի էին: Քանի դեռ դրանց ծանոթ չեմ ու չգիտեմ ինչ է արվել, չեմ կարող գնահատականներ տալ»,-ասաց նա:

Հարցին, թե այսօր քաղաքական էլիտան դասեր քաղե՞լ է հոկտեմբերի 27-ից, Աննա Իսրայելյանը պատասխանեց.«Չեմ կարծում, որ քաղել է, որովհետև այսօր էլ բռնությամբ հարցեր լուծելու կոչեր են հնչում: Կան առանձին միավորումներ, որոնք չեն բացառում բռնությունը` որպես հարցերի լուծման միջոց, իսկ սա նշանակում է, որ 15 տարի առաջ տեղի ունեցածից մեր հանրությունը, այնուամենայնիվ, եզրակացություններ չի արել` փորձելով ինչ-որ բան հանգուցալուծել այդ եղանակով»:

«Հայ Արտ» մշակութային կենտրոնի տնօրեն, Վազգեն Սարգսյանի գրչակից ընկեր Ռիտա Շառոյանը գտնում է, որ մենք ապրող հերոսներին չենք մեծարել, և մեր վերաբերմունքը եղել է «գնա մեռի` արի սիրեմ» սկզբունքով:

Ռիտա Շառոյանը պատմեց, որ երբ Վազգեն Սարգսյանի «Հացի փորձություն» պատմվածքների ժողովածուն էր լույս տեսել, նա անմիջապես գնել է այն և մեկ օրում կարդացել: «Այդ գիրքն ինձ համար դարձավ ապրելու բանաձև»,-ասաց նա և նշեց, որ այդ մասին նամակով գրել է Վազգեն Սարգսյանին:

«Վազգեն Սարգսյանը հաճախ գալիս էր գրողների միություն, որի տարածքում գրողների սրճարան կար, որտեղ հավաքվում էին գրողները: Վազգեն Սարգսյանն իր առաջին քայլերն էր անում «Գրական թերթում» և իր հետ բերել էր հերթական պատմվածքը. բոլորի վերաբերմունքը շատ հիացական էր: Լույս տեսնելուց հետո Վազգեն Սարգսյանն ամբողջ կոլեկտիվին հրավիրեց իրենց տուն` Արարատ: Անմոռանալի օր անցկացրեցինք և վերջում Վազգեն Սարգսյանի մայրը` տիկին Գրետան հրաշալի երգ է երգեց»,-պատմեց Ռիտա Շառոյանը:

Խոսելով Վազգեն Սարգսյանի բնավորության առանձնահատկությունների մասին` նա ասաց.«Նա շատ վճռական մարդ էր, մի բան, որ ասում էր, անմիջապես կատարում էր, շատ սրամիտ էր, բարեգութ, ժպտերես, ընկերասեր, համեստ»:

Հիշեցնենք, որ 15 տարի է անցել 1999 թվականի հոկտեմբերի 27-ին տեղի ունեցած ողբերգական իրադարձություններից: Այդ օրը 5 ահաբեկիչ ձեռք բարձրացրին երկրի պետական խորհրդանիշների վրա:

 Զինված ահաբեկիչների խումբը, Նաիրի Հունանյանի գլխավորությամբ, ներխուժեց խորհրդարան և գնդակահարեց Ազգային ժողովի նախագահին, վարչապետին, Ազգային ժողովի փոխնախագահներին, պետնախարարին, պատգամավորների:

Սպանվեց 8 հոգի` Ազգային ժողովի նախագահ Կարեն Դեմիրճյանը, վարչապետ Վազգեն Սարգսյանը, ԱԺ փոխնախագահներ Յուրի Բախշյանը, Ռուբեն Միրոյանը, պետնախարար Լեոնարդ Պետրոսյանը, պատգամավորներ Հենրիկ Աբրահամյանը, Արմենակ Արմենակյանը, Հենրիկ Քոթանյանը: