Մեր դիվանագիտական ճակատը մոտակա ամիսներին հենց Եվրախորհրդարանն է, ոչ թե՝ ԵԽԽՎ-ն. Արմեն Աշոտյան

ԵԽԽՎ-ում հայկական պատվիրակության անդամ Գևորգ Կոստանյանը դուրս է եկել պատվիրակության կազմից, քանի որ ԵԽԽՎ ազգային պատվիրակության անդամի և Մարդու իրավունքների եվրոպական դատարանում Հայաստանի ներկայացուցչի պարտականությունները անհամատեղելի են։ Մամուլում տեղեկատվություն էր տարածվել, որ նրան փոխարինելու է ԱԺ «Հայաստանի Հանրապետական» խմբակցության պատգամավոր Ռուստամ Մախմուդյանը։

Tert.am-ը ԱԺ «Հայաստանի Հանրապետական» խմբակցության պատգամավոր, Արտաքին հարաբերութունների մշտական հանձնաժողովի նախագահ Արմեն Աշոտյանից հետաքրքրվեց՝ պաշտոնապես հաստատվա՞ծ է արդեն, թե ով է փոխարինելու Գևորգ Կոստանյանին, Արմեն Աշոտյանը պատասխանեց.

«ԵԽԽՎ պատվիրակությունները հաստատվում են Ազգային ժողովի կողմից` ըստ խմբակցությունների տված առաջարկների: Կարծում եմ` ԱԺ խորհրդի մոտակա նիստերից մեկում այս հարցը կքննարկվի։ Բոլոր դեպքերում, նման հարցում միշտ մոտեցել ենք գործի արդյունավետությունը բարձրացնելու հրամայականով` տալ այնպիսի մարդկանց անուններ, որոնք օգտակար կլինեն խորհրդարանական դիվանագիտությանը և Հայաստանի շահերի առաջխաղացմանը»,-շեշտեց նա։

Արմեն Աշոտյանը պատասխանեց նաև լրագրողների հարցերին խորհրդարանական դիվանագիտության պասիվության վերաբերյալ։ Նա ընդգծեց, որ երբ միջազգային հարթակներում խոսում ես բացառապես քո խնդիրներից, անհետաքրքիր ես դառնում, եթե պատրաստ չես կիսել աշխարհի խնդիրները:

«Միայն հայկական հարցերը չեն, որ պետք է դառնան քննարկման կիզակետ, իսկ սուր ելույթ ունենալն ու որևէ մեկի «պորտը տեղը դնելը» մնացել է անցած դարում, իրեն սպառել է։ Այսօր խորհրդարանական դիվանագիտությունը պահանջում է աշխարհի լեզվով խոսել աշխարհի հետ և լինել հետաքրքիր: Շատ կարևոր է փորձել զերծ մնալ ներքին լսարանի դոմինանտիվ ախտանիշից»,-շեշտեց նա։

Tert.am-ը Արմեն Աշոտյանից հետաքրքրվեց նաև ԵԽԽՎ -ում հայկական պատվիրակության անելիքներից՝ Ադրբեջանի լոբբինգին հակազդելու մասով։

«Կոռուպցիոն վերջին սկանդալը, որ ծագեց և զարգանում է ԵԽԽՎ-ում՝ Ստրասբուրգում, որտեղ լումա ունի նաև Ադրբեջանը, բերում է նրան, որ գալիք 2-3 տարիների ընթացքում ԵԽԽՎ-ում, որտեղ այս հանցավոր մեխանիզմը բացահայտվեց և պատժման ընթացքում է, այլևս ադրբեջանական մեծ ագրեսիվ գործողությունների հնարավորությունները սահմանափակ են լինելու, և ադրբեջանական դիվանագիտության հիմնական հարվածն արդեն տեղափոխվում է Ստրասբուրգից դեպի Բրյուսել:

Հիմնական թիրախը, խորհրդարանական դիվանագիտության պաշտպանական գիծն այսօր մեզ համար դառնում է Եվրոպական խորհրդարանը և այդ խորհրդարանից բխող ձևաչափերը` Եվրոնեսթը, այլ միջազգային կառույցները, որտեղ Բրյուսելը` որպես ԵՄ, ներկայացված է: Այսինքն` ակնկալել ադրբեջանական լոբբինգի սրացումներ Բրյուսելում, Եվրախորհրդարանում, որովհետև մեր ստույգ տեղեկություններով` կոռուպցիոն մեքենան, որ աշխատում էր Ադրբեջանի մասին դրական կարծիք և որոշումներ կայացնելու ուղղությամբ, այսօր Ստրասբուրգից տեղափոխվում է Բրյուսել։ Բրյուսելում ակտիվացել են ադրբեջանական լոբբիստները, ադրբեջանական պատվիրակություններն այցելում են Բրյուսել, և մեր ճակատը մոտակա ամիսներին հենց Եվրախորհրդարանն է, ոչ թե՝ ԵԽԽՎ-ն»,-մանրամասնեց նա։

Արմեն Աշոտյանը չպատասխանեց այն հարցին, թե արդյոք միջազգային հարթակներում անհրաժեշտ չէ՞ բարձրացնել նաև ՌԴ-ի կողմից Ադրբեջանին զինելու հարցը: Ինչ վերաբերում է Ադրբեջանի կողմից ՌԴ-ին նոր հարձակողական զենքի խմբաքանակի մատակարարմանը, ապա պատգամավորն ասաց, որ նախարար Վիգեն Սարգսյանն այդ հարցին անդրադարձել է, այն մտահոգիչ համարելով՝ հաշվի առնելով Ադրբեջանի ռազմատենչ քաղաքականությունը։

«Զինադադարի խախտման դեպքերն արդեն տարերային բնույթ չեն կրում: Փառք հայոց բանակին, որ պատասխան գործողություններով կարողանում է սահմանափակել, սանձել ադրբեջանական լոկալ ագրեսիան, բայց մի կարևոր հանգամանք հաշվի առնենք`  Հայաստանի համար ամեն մարդ արժեք է, ամեն զինվոր, որ մահանում է այդ գործողությունների ժամանակ, արժեք է, որովհետև և՛ մենք ենք քիչ, և՛ մարդկային կյանքի գինը Հայաստանում շատ ավելի բարձր է:

Ադրբեջանում, որտեղ չկան ժողովրդավարական ինստիտուտներ, որտեղ մամուլը փակ է, որտեղ մարդկանց շատ հաճախ վերաբերվում են ոչ թե որպես անհատականությունների, այլ՝ հոտի, այդ կորուստների գինն իրենց համար ազդեցություն չունի: Հետևաբար` մենք համակարգչային խաղ չենք խաղում, որ ասենք` մեր կողմից մահացել է X թվով զինվոր, բայց իրենց կողմից մահացել է 10X»: