Հանրապետության հրապարակում հանրահավաքին ելույթ ունեցողները հայտարարեցին՝ պայքարը շարունակվելու է (տեսանյութեր, լուսանկարներ)

23։30

Բազմաթիվ ֆեյսբուքյան օգտատերեր իրենց էջերում հրապարակում են կաթսաներով և շերեփներով ակցիայի տեսանյութեր:

Հիշեցնենք, որ այսօր Հանրապետության հրապարակում տեղի ունեցած հանրահավաքի ժամանակ Երևանի ավագանու «Ելք» խմբակցության անդամ Զարուհի Բաթոյանի առաջարկով հայտարարվել էր «Կաթսա-շերեփ» ակցիայի մասին. քաղաքացիները ժամը 23:00-ին իրենց պատուհաններից պետք է դուրս հանեին կաթսաները և հարվածեին շերեփներով։

21։28 

«Քաղաքացիական պայմանագիր» կուսակցության անդամ Ռուբեն Ռուբինյանը Հանրապետության հրապարակում հավաքված քաղաքացիներին կոչ արեց ժամը 22:00-ից հետո չմնալ փողոցներում: 

«Ժամը 10-ից հետո ոչ ոք փողոցում չի մնում: Փոքրիկ համերգից հետո բոլորս գնում ենք տուն: Սոնա Շահգելդյանը ելույթ կունենա, որից հետո բոլորս գնում ենք տուն: Ով ժամը 22:30-ից հետո մնաց փողոցում և գործողություններ կատարեց, նա մեզ հետ կապ չունի»,- հայտարարեց նա:

Սոնա Շահգելդյանը երգեց բանակի հիմնը՝ «Երազ իմ երկիր, հայրենի» երգը, որի ժամանակ քաղաքացիները ըստ ավանդույթի վառեցին հեռախոսների լույսերը և սկսեցին միասին երգել:


21:13 

Նիկոլ Փաշինյանի կինը՝ Աննա Հակոբյանը Հանրապետության հրապարակում ընթացող հանրահավաքին իր խոսքում ասաց, որ չպետք է շեղվել ի սկզբանե հայտարարվածից՝ խաղաղ անհնազանդությունից և շարունակել պայքարն այնքան ժամանակ, մինչև Սերժ Սարգսյանը հրաժարականի դիմում չստորագրի: 

«Սե՛րժ Սարգսյան, ես Ձեզ խնդրում եմ՝ շուտ արեք այդ բանը: Չնայած մենք դեմ չենք վայելել այս իրավիճակը, որ կատարվում է Երևանի փողոցներում, դա մեզ միայն ու միայն հաճույք է պատճառում: Բայց ես խնդրում եմ, մի՛ վտանգեք պետությունը և օր առաջ կատարեք ձեր քայլը»,- ասաց նա:

Իր խոսքի վերջում Աննա Հակոբյանը հավաքվածներից խնդրեց ողջունել այս պահին անազատության մեջ գտնվող բոլոր ցուցարարներին:



21։ 05

Ելույթ ունեցավ դերասան Հովհաննես Ազոյանը՝  նշելով, որ ստիպված է խոսել, քանի որ Նիկոլը հրապարակում չէ։

«Մարտի 1 այլևս չի լինելու: Որովհետև «Մարտի 1-ի» զոհերը մեզ նվիրեցին կյանք: Մեզ նվիրեցին ապրելու իրավունք, մեզ նվիրեցին քաղաքակիրթ ապրելու իրավունք: Հիմա մեր գործը, մեր իմաստը գոյության քաղաքակիրթ ապրելն է: Որովհետև մեր պայքարն էլ քաղաքակիրթ երկիր ունենալն է: 

Քաղաքակիրթ հասարակություն ունենալն է, քաղաքակիրթ մարդ լինելն է»,-Հովհաննես Ազոյանը հարցրեց՝ ինչ է մեզ խանգարում՝ լինել այնքան քաղաքակիրթ, որ քաղաքակիրթ աշխարհը չհանդուրժի, որ երիտասարդությանը վնասեն: 

Նա հրապարակի մասնակիցներին խնդրեց ավելի քաղաքակիրթ, շատ ավելի քաղաքակիրթ լինել, քան 1 վայրկյան առաջ:

«Խնդրում եմ՝ պահեք ձեզ շատ քաղաքակիրթ»,-Հովհաննես Ազոյանը իր խոսքը հավելեց՝ ասելով՝ կեցցե քաղաքակիրթ Հայաստանը:

21։00 

Սերժ Սարգսյանի վարչապետության դեմ պայքարի կազմակերպիչներից Մարիա Կարապետյանը հավաքվածներին ինքնակազմակերպվելու կոչեր արեց: Նա նշեց, որ վաղվանից աշխատանքի նման պետք է գնալ հեղափոխության: Մարիա Կարապետյանը նաև հորդորեց ինքնակազմակերպվել մասնագիտական խմբերի միջոցով՝ բժիշկներ, մանկավարժներ: 

«Այս օրերի ընթացքում մենք յուրացրել ենք մեր փողոցը, մենք հաղթահարել ենք վախը, հուսահատությունը և անտարբերության մթնոլորտ՝ խաղաղ անհնազանդության մեթոդով, որովհետև այն անպարտելի է: Այս օրերի ընթացքում հաջողվել է նաև մեր և ոստիկանության միջև ջրբաժանը փոքրացնել: Նրանք հասկացել ենք, որ մենք գտնվում ենք նույն նավի մեջ: Ոստիկա՛ն, զենքդ դիր և միացիր մեզ»,- հայտարարեց Մարիա Կարապետյանը:

«Մենք նաև ակցիայի ձև ենք մտածել: Այսօր երեկոյան ժամը 11-ին, երբ արդեն տանը կլինեք, բոլորդ ձեր պատուհաններից հանեք կաթսաները և շերեփները և հնչեցրեք Սերժ Սարգսյանի վերջին զանգը»,- ասաց նա:

Նշենք, որ հարթակին մոտեցավ «Երկիր Ծիրանի» կուսակցության նախագահ Զարուհի Փոստանջյանը, սակայն նրան թույլ չտվեցին ելույթ ունենալ՝ «հե-ռա-ցիր» վանկարկումներով: 

Քիչ հետո Նիկոլ Փաշինյանի կինը՝ Աննա Հակոբյանը, ամբիոնից ու ներողություն խնդրեց  Զարուհի Փոստանջյանից միջադեպի համար: 

«Պատճառն այն էր, որ նա մինչև շարժումն սկսելը հայտարարում էր, որ Նիկոլ Փաշինյանը ծախված է»,-հավելեց Աննա Հակոբյանը:

20։41

Նիկոլ Փաշինյանի ձերբակալությունից հետո ի հայտ է եկել նոր կարգախոս՝ առաջնորդը ես եմ, որը հրապարակը վանկարկում էր:

Հանրահավաքը վարող Ռուբեն Ռուբինյանը հայտարարելով, որ իրեն մոտենում են տարբեր քաղաքական ուժերի ներկայացուցիչներ և ցանկանում ելույթ ունենալ:

«Ես ուզում եմ բացատրել, թե ինչով է պայմանավորված մեր այսքան սելեկտիվ մոտեցումը, որովհետև շատ կարևոր է, որ այս հարթակից հնչեն միանման, տրամաբանական ելույթներ: Ես խնդրում եմ բոլոր քաղաքական ուժերին, գործիչներին չնեղանալ, սա հստակության խնդիր է, իսկ հստակությունը այսպիսի գործերում կարևորագույն պահանջ է: Բոլոր այն ընդդիմադիր ուժերին, որոնք ցանկանում են միանալ մեր շարժմանը, ես անձամբ պատրաստ եմ հանդիպել և խոսել: Եթե ազատության մեջ լինեմ»,-ասաց երիտասարդը։

Ապա հրապարակին ողջույնի խոսք հղեց դերասան Նիկոլայ Եղիազարյանը:

«Ողջույն, իմ միասնական և հպարտ ժողովուրդ: Հպարտ եմ, որ ձեզնից մեկն եմ, հպարտ եմ, որ մենք մեկն ենք, բայց մենք շատ ենք: Ու ավելի ենք շատանալու: Եվ մեր քայլը մեկն է՝ միացում և քայլ առաջ»,-ասաց դերասանը:

20։10 

Ուսանող Դավիթ Պետրոսյանը հանրահավաքի ժամանակ հայտարարեց, որ իրենք շարունակելու են դասադուլ իրականացնել: Նա ընդգծեց, որ եթե շարժման ակտիվ անդամներից ինչ-որ մեկին ձերբակալում են, դա չի նշանակում, որ իրենք հեռանում ենք մեր հաղթանակից:

«Շատ կարևոր է, որ մենք շարունակենք մեր խաղաղ անհնազանդությունը: Սա արդեն մեր արժանապատվության համար պայքար է: Իշխանություններն ամեն ինչ անում են, որպեսզի սադրեն, բայց մենք շատ մոտ ենք հաղթանակին, քանի որ ամեն հատվածում ժողովուրդն ինքնակազմակերպվում է: Մենք պետք է շարունակենք ապակենտրոնացված շարժումը: Ժողովուրդն ապացուցեց, որ ազատ անկախ երկրում պետք է ապրենք»,- ասաց Դավիթ Պետրոսյանը: 

20։04 

Հանրապետության հրապարակում ընթացող հանրահավաքի ամբիոնից հայտարարվեց, որ ամեն առավոտ ժամը 8:15-ից սկսած տեղի են ունենալու ինքնաբուխ հավաքներ: Կոչ արվեց մարզերի բնակիչներին գալ Երևան, իսկ եթե չեն կարողանում, ապա թող իրենց քաղաքներում բողոքի գործողություններ իրականացնեն: 

«Ամեն օր գործողությունները ըստ ավանդույթի պետք է ավարտվեն Հանրապետության հրապարակում: Չենք մոռանում դասադուլների և գործադուլների մասին: Այս պրոցեսը այսուհետև մեր միակ գործն և մեր դասը: Եթե կհայտնվեն ինչ-որ քաղաքական գործիչներ, նրանց կոչերը տարբերվեն մեր մարտավարությունից, հեռացրեք նրանց: Այս մարտավարության դեմ խաղ չկա»,- հայտարարեց «Քաղաքացիական պայմանագիր» կուսակցության խոսնակ Ռուբեն Ռուբինյանը:

20։00

Քիչ առաջ Հանրապետության հրապարակում մեկնարկեց Սերժ Սարգսյանի վարչապետության դեմ հանրահավաքը:

Մեկնարկին աղավնիներ բաց թողնվեցին՝ ի նշան խաղաղության:

ԱԺ «Ելք» խմբակցության պատգամավոր, «Քաղաքացիական պայմանագիր» կուսակցության անդամ Լենա Նազարյանը հրապարակում հավաքված ցուցարարներին կոչ արեց գիշերը չմնալ փողոցում՝ անվտանգության նկատառումներից ելնելով:

Նա ևս մեկ անգամ կոչ արեց ոչ մի դեպքում բախման չգնալ ոստիկանության հետ: Հանրապետության հրապարակում հավաքված ցուցարարները վանկարկում են՝ «Նիկոլ, Նիկոլ», «ազատություն», «խաղաղություն»: 

Ցույցի կազմակերպիչները նաև հայտարարեցին, որ վաղը առավոտվանից շարունակվելու են իրականացվել քաղաքացիական խաղաղ անհնազանդության գործողություններ ամբողջ Հանրապետության տարածքում. «Մենք ամեն օր անելու ենք դա, մինչև Սերժ Սարգսյանը չընկրկի: Մենք այլևս չենք պարտվելու, ՀՀ քաղաքացին հաղթելու է»։

18։32 

Ցուցարարներն այս պահին տարբեր փողոցներով շարժվում են դեպի Հանրապետության Հրապարակ։

Նրանց թվում է նաև «Ժառանգություն» կուսակցության նախագահ Րաֆֆի Հովհաննիսյանը, ով իրավիճակը որակեց ճգնաժամային և բեկումնային։

«Հրաշալի այս երիտասարդական շարժման երրորդ էշելոնը լինելու պատիվը ունեմ ես և պարզապես հպարտանում եմ այդ վճռականությամբ, խաղաղասիրությամբ, սահմանադրականությամբ, որով օժտված է այս շարժումը: Այս շարժումն արդեն 20 և ավելի տարի գնում է տարբեր ղեկավարների առաջնորդությամբ: Իսկ այս փուլը առաջնորդեց Նիկոլ Փաշինյանը։ Սա պայքար է երիտասարդության, Հայաստանի ապագայի համար, և այլ հեռանկար չի կարող ունենալ, քան պարոն Սերժ Սարգսյանի հրաժարականը»,-ասաց նա, իսկ անցնող ցուցարարները նրան ողջունեցին «այո՛» բացականչություններով:

Րաֆֆի Հովհաննիսյանը հայտարարեց, որ Սերժ Սարգսյանը պետք է հասկանա այս վիճակի բախտորոշ լինելը, հրաժարական տա, և ժամանկավոր կառավարություն ստեղծվի և վերջում նոր ընտրակարգով ժողովրդավարական ընտրություններ անցկացվեն:


 

«Եվ Սերժ Սարգսյանը նաև պիտի հասկանա, որ միջազգային հանրությունը հետևում է այս իրադարձություններին, Հանրապետական կուսակցությունը՝ իր ղեկավարությամբ, ԵԺԿ անդամ է. ես այսօր դիմել եմ ԵԺԿ-ին և նաև միջազգային կազմակերպություններին՝ հարց դնել, թե արդյոք նման ղեկավար ունեցող կուսակցությունը կարող է մնալ ԵԺԿ-ի կազմում»,-հավելեց նա և նկատեց, որ հայ ժողովուրդն այսօր աննախադեպ միացյալ է: 

Հրապարակում արդեն բավականին շատ մարդ է հավաքված։ Նշենք, որ հրապարակում է «Երկիր Ծիրանի» կուսակցության նախագահ Զարուհի Փոստանջյանը, ով հանդես եկավ ելույթով։

17:20

ՔՊ անդամ Ալեն Սիմոնյանը Շենգավիթի ոստիկանության բաժանմունքի առաջ հավաքված բազմահազարանոց ցուցարարներին կոչ արեց շարժվել դեպի Հանրապետության հրապարակ: Նշենք, որ ժամը 19:00-ին այստեղ հայտարարվել է, որ հանրահավաք կանցկացվի:

Ցուցարարներն արդեն շարժվում են դեպի Հանրապետության հրապարակ: 

16:36

Շենգավիթի ոստիկանության բաժանմունքի առաջ հավաքված բազմահազարանոց ցուցարարների առաջ ելույթ ունեցավ ՔՊ անդամ Ալեն Սիմոնյանը:

Նա  կոչ արեց շարունակել անհնազանդության գործողությունները բոլոր քաղաքներում ու փողոցներում: Նա կոչ արեց ժամը 19:00-ին հավաքվել Հանրապետության հրապարակում:

«Այսօր այն, ինչ փորձեցին անել, չստացվեց: Բռնելով պատգամավորներին՝ հույս ունեին, որ դուք դուրս չեք գա և այստեղ չեք լինի, բայց տարբեր փողոցներ, մայրուղիներ լիքն են հայ ժողովրդով»,- ասաց նա և կոչ արեց՝ հեռու մնան ոստիկանությունից:



«Իշխանությունն այսօրվա հանդիպումից հետո ցայտնոտի մեջ է, չգիտեն՝ ինչ անեն, չեն հասկանում, որ Հայաստանը երբեք էլ նույնը չի լինելու: Ուղղակի չեն գիտակցել դա, Սերժ Սարգսյանը չի հասկանում՝ ինչ է կատարվում երկրում»,- հայտարարեց նա:

Ալեն Սիմոնյանը նշեց, որ իրենք Նժդեհի փողոցում կսպասեն որոշ ժամանակ և ապա  կշարժվեն Հանրապետության հրապարակ, որտեղ տեղի է  ունենալու հանրահավաք:

Ալեն Սիմոնյանը իշխանություններին կոչ արեց, որ ազատ արձակեն պատգամավորներին, քանի որ ինքը վստահ չէ, որ կարող է նման բազմաքանակ քաղաքացիներին առաջնորդել:

16:13

Ոստիկանության Շենգավիթի բաժանմունքում բազմաթիվ նոր ցուցարարներ միացան: Ոստիկանության ուժերը բաժանմունքը շրջափակել են՝ թույլ չտալով մոտենալ ցուցարարներին:

Հավաքվածներից ոմանք ասացին, թե տեղեկություն ունեն, որ Նիկոլ Փաշինյանը ևս Շենգավիթի ոստիկանության բաժանմունքում է:


15:58

«Էրեբունի ԲԿ»-ի տնօրեն Միքայել Մանուկյանը Ազատության հետ զրույցում ասաց, որ 11 քաղաքացի է տեղափոխվել ԲԿ, որոնցից  մեկը ոստիկան է: 

ԲԿ տնօրենն ասաց, որ 8 քաղաքացի արդեն դուրս է  գրվել հիվանդանոցից, 4-ի մոտ եղել է  ճնշման տատանում, բարձր ճնշում են ունեցել, 4 հոգու մոտ փոքր վերքեր: «Նրանց համապատասխան վիրաբուժական մշակումից հետո դուրս են գրվել»,-ասաց նա:

Միքայել Մանուկյանն ասաց, որ 3 երիտասարդ դեռևս հիվանդանոցում են՝ 21,25 և 27 տարեկան, որոնք ունենք գլխի վրա վերքեր: «Բուժօգնություն է ցուցաբերվել, լուրջ վնասումներ չկան, մեկ ժամ հետո կարող են ուղարկել տուն»,- ասաց նա:


15:47

Ցուցարարների մեծ խումբը, որն առաջնորդ չունի, շարժվում է դեպի Էրեբունի վարչական շրջան: Մեկ այլ խումբ էլ հավաքվել է Ոստիկանության Շենգավիթի բաժնում, որտեղ գտնվում են ԱԺ երկու պատգամավորները՝ Սասուն Միքայելյանը և Արարատ Միրզոյանը:

Փաստաբան Նիկոլայ Բաղդասարյանը Ազատության հետ զրույցում ասել է, որ ինքը երկու պատգամավորների կողքին է, նրանց խուզարկել են, և որևէ անօրինական է իր չի հայտնաբերվել:

Նիկոլ Փաշինյանի պահման վայրը դեռևս հայտնի չէ:








15:39

Քիչ առաջ իր ֆեյսբուքյան էջում ՔՊ անդամ Տիգրան Ավինյանը գրառում է կատարել՝ տեղեկացնելով, որ ժամը 19:00-ին Հանրապետության հրապարակում տեղի կունենա հանրահավաք:


15:20

Պատգամավոր Արարատ Միրզոյանի մոտ է այս պահին գտնվում փաստաբան Նիկոլայ Բաղդասարյանը:

Նա իր ֆեյսբուքյան էջով ուղիղ եթեր էր մտել:

Նա հարցրեց Արարատ Միրզոյանից, թե ինչ հիմքով են իրենց ոստիկանության բաժնում պահում, Միրզոյանը պատասխանեց, որ ասել են, թե սպասում ենք քննիչներին:

Միրզոյանը նաև ասաց, որ քննիչները եկել են: Այնուհետև ուղիղ եթերը ընդհատվեց, ըստ ամենայնի փաստաբանը ուղիղ եթեր էր մտել գաղտնի:


15:13

Բազմամարդ ցույցը հասավ ոստիկանության Շենգավիթի բաժանմունքի մոտ և միացավ այստեղ հավաքված ավելի փոքրաթիվ խմբին: Նրանք ծափերով բացականչում են. «Ոստիկանը մերն է»:

Նշենք, որ այստեղ են գտնվում պատգամավորներ Սասուն Միքայելյանը և Արարատ Միրզոյանը:

ՔՊ վարչության անդամ Զարուհի Բոթոյանն իր ֆեյսբուքյան էջում գրել է, որ նա գտնվում է Էրեբունի ոստիկանության բաժանմունքում:

15:08

Էրեբունի վարչական շրջանում ոստիկանները ավելի քիչ թվով մնացած ցուցարարների շարքերից երկու քաղաքացու բերման ենթարկեցին:


15:05

ՀՀ ՀՔԾ քննիչի վարույթում քննվող քրեական գործի շրջանակներում հանցագործության կատարումը կանխելու նպատակով Օրենքով սահմանված կարգի խախտմամբ հավաք դիտավորությամբ կազմակերպելու և անցկացնելու անմիջականորեն ծագած կասկածանքով, ՀՀ Սահմանադրության 96-րդ հոդվածի 2-րդ մասի պահանջների պահպանմամբ, ձերբակալվել են ՀՀ Ազգային Ժողովի պատգամավորներ Նիկոլ Փաշինյանը, Արարատ Միրզոյանը և Սասուն Միքայելյանը:

14:48

Էրեբունի վարչական շրջանում «Շանթ» հեռուստաընկերության Հորիզոն լրատվականի լրագրող Արտակ Ղուլյանին ծեծի են ենթարկել:

Լրագրողը պատմեց, որ իրեն ծեծել են խմբով մարդիկ:

«Այստեղ Արշակ անվամբ մականունավորներ կան, իրենց տղաներն են եղել»,- ասաց նա և նշեց, որ որևէ ոստիկան չի միջամտել: «Ինձ ծեծում էին, իսկ ոստիկանությունն ուղղակի կողքի վրա կանգնած էր»,- ասաց նա:

Ցուցարարաներից պատմեցին, որ էրեբունիում շենքերի բակերից դուրս են եկել մի քանի տասնյակ դիմակավորված քաղաքացիական հագուստով անձինք, քարերով ու շշերով հարձակվել ցուցարարների վրա:

Ցուցարարը պատմեց, որ քաղաքացիներից էլ տուժածներ կային:






14:38

Ցուցարարների բազմամարդ խումբն այս պահին գտնվում է Մանկավարժական համալսարանի հարակից հատվածում: Ցույցն առաջնորդող Ալեն Սիմոնյանը հայտարարեց, որ իրենց մեկ այլ խումբ է միանում: Նա հայտարարեց, որ Խանջյան փողոցով է երթը շարժվելու:

Նշենք, որ ժամը 13:00-ի դրությամբ մոտ 50 մարդ է բերվել ոստիկանության բաժանմունքներ:




14:27

Հանրային ռադիոյի կայքից տեղեկանում ենք, որ այսօր Արցախ-Էրեբունի խաչմերուկում ցուցարարների դեմ գործողությունների ընթացքում հատուկ միջոցների կիրառումից վնասվածք է ստացել նաև «Ռադիոլուրի» թղթակից Լիանա Եղիազարյանը։

Նա կարողացել է հասնել Ռադիոտուն, որտեղ և շտապօգնության աշխատակիցները օգնություն են ցուցաբերել՝ խորհուրդ տալով գնալ հիվանդանոց։




14:18

Իրավապաշտպան Ավետիք Իշխանյանը ևս ցուցարարների հետ է: Ալեն Սիմոնյանը հավաքվածերին տեղեկացրեց, որ շարժվում են Մաշտոցի պողոտա:

Զուգահեռ Շենգավիթում ցուցարարաների ու ոստիկանների միջև հրմշտոց է սկսվել: Ցուցարարները հայտարարում են, որ չտրվեն սադրանքներին և բարձրացնում ձեռքերը:


14:12

Քաղաքապետարանի առջևից բազմամարդ երթը շարժվում է դեպի Հաղթանակի կամուրջ: ՔՊ անդամ Ալեն Սիմոյանը կոչ արեց երթը շարունակել և պահաջեց, որ ոստիկանների հետ որևէ շփում չլինի:




14:10

Փաստաբան Նիկոլայ Բաղդասարյանը քիչ առաջ դուրս եկավ Շենգավիթի ոստիկանության բաժնից, որտեղ բերման ենթարկվածներ կան: Նա ասաց, որ պատգամավոր Արարատ Միրզոյանն էլ գտնվում է ներսում, ում հետ թույլ չեն տվել որպես փաստաբան տեսակցել:

Նշենք, որ մինչ այս պահը տեղեկություն չկա, թե որտեղ է պատգամավոր Նիկոլ Փաշինյանը: Ոստիկանությունը հրաժարվում է տեղեկություն հաղորդել նրա գտնվելու վայրի մասին:



14:03

Ցուցարարների մեծ խումբ երթով հասավ Հանրապետության հրապարակ: Ոստիկանները, շղթա կազմած, հրապարակի կենտրոնից քաղաքացիներին պահանջում են դուրս գալ, որոշ ցուցարարներ բերման են ենթարկվում:




13:42

Ցուցարարներից մեկը պահանջեց դիմակավոր ոստիկաններից հանել դիմակները:

«Եթե ճիշտ բանի համար եք դրել, ինչո՞ւ եք դիմակ դրել, հանե՛ք, ինչո՞ւ եք դրել»,- հայտարարեց նա:

Ոստիկանության գնդապետն ընդառաջ գնալով ցուցարարի կոչին՝ հրամայեց հանել դիմակները:




13:38

Ոստիկանները Մաշտոցի պողոտայում փակել են փողոցը:

Նրանք հոգևորականներից պահանջում են, որ խորհուրդ տան ցուցարարներին գնալ «տներով»:

Ցուցարարներից դերասանուհի Ելենա Բորիսենկոն ասաց, որ իրենք չունեն առաջնորդ, և սա խաղաղ ցույց է, և պահանջեց թույլ տալ շարունակել քայլերթը:

Ոստիկանները պահանջում են լրացուցիչ լարվածություն չստեղծել:

Քաղաքացիներին տարբեր փողոցներից բերման ենթարկելու գործողությունները շարունակվում են:

13:31

Փաստաբան Հարություն Բաղդասարյանին ոստիկանները թույլ չեն տալիս տեսակցել իր պաշտպանյալների հետ: Նա հայտարարեց, թե եկել է պատգամավորներ Արարատ Միզոյանի և Սասուն Միքայելյանի շահերը պաշտպանելու, սակայն շուրջ 15 րոպե է՝ սպասում է:

«Փոխանցե՛ք, որ պաշտպանը սպասում է իր պաշտպանյալին»,- ասաց նա:
Ոստիկանները շարունակում են թույլ չտալ՝ նշելով, թե ըստ կարգի կարող է բողոքարկել:


13:26

Էրեբունուց վերադարձած ցուցարարները շարժվում են Մաշտոցի պողոտայով: Նրանք շրջանցեցին Հանրապետության հրապարակը, որտեղ մեծաթիվ ոստիկանական ուժեր են կուտակված:

Նշենք, որ մեկ այլ խումբ էլ Էրեբունի վարչական շրջանում է երթ անցկացնում:


13:24

Կառավարության շենքը շրջափակված է մեծաթիվ ոստիկաններով: Ոստիկանները շղթա կազմած փորձում են ցուցարարաներին ցրել: 



13:13

Ոստիկանները մեծ ուժեր են կուտակել Հանրապետության հրապարակում և թույլ չեն տալիս՝ քաղաքացիները հավաքվեն այստեղ:

Ոստիկանները Կառավարության շենքի շուրջ պատ են կազմել:

Ոստիկանները բարձրախոսով նախազգուշացնում են, որ հավաքն անօրինական է, հավաքին մասնակցող մարդիկ ենթակա են պատասխաատվության:

Նրանք պահանջում են հեռանալ Հանրապետության հրապարակից: Մինչդեռ քաղաքացիները սուլելով են արձագանքում Ոստիկանության նախազգուշացմանը և չեն հեռանում:

Ոստիկանությունը կրկին մեծ ուժեր է կուտակում:



13:08

Ամիրյան փողոցում ևս քաղաքացիներ են բերման ենթարկվում: Tert.am-ի թղթակիցը հաղորդում է, որ այստեղից արդեն 4 քաղաքացու են ոստիկանները բերման ենթարկել: Քաղաքացիները հերթական անգամ փորձում են փողոցը ակցիաններով փակել:






12:55

Իրավիճակը լարված է նաև Երևանի Ամիրյան փողոցում: Ոստիկանների հարյուրավոր կուտակումներ են նկատվում քաղաքի տարբեր հատվածներում: 



12:54

ԱԺ պատգամավոր Արարատ Միրզոյանն իր ֆեյսբուքյան էջում կոչ է անում քաղաքացիներին դուրս գալ փողոց:

«Բոլորին, բոլորին, բոլորին. դո՛ւրս եկեք փողոց, մի քիչ ա մնացել։ Դուրս եկեք փողոց, հենց հիմա է անձամբ ձեր դուրս գալու պահը»,- գրել է նա:


12:48

Ցուցարարները բաժանվել են երկու խմբի, մի խումբը շարժվում է Արշակունյաց պողոտայով: Մեկ այլ խումբ Էրեբունի վարչական շրջանում է շարունակում քայլերթը:


12:34

ԱԺ պատգամավոր Արարատ Միրզոյանն իր ֆեյսբուքյան էջում գրել է.

««Ելքից» ինձ, Նիկոլին, Սասունին ու լիքը մարդու ապօրինաբար ու բռնի ուժով բռնել են»:

Հիշեցնենք, որ նրանք ԱԺ պատգամավորներ են և ունեն անձեռնմխելիություն:

Նշենք, որ Հայաստանի Հանրապետությունում անձի ան¬ձեռնմխելիությանը երաշխավորվում է ՀՀ Սահմանադրություն, 96-րդ հոդվածով. 2. 

Պատգամավորի նկատմամբ քրեական հետապնդում կարող է հարուցվել միայն Ազգային ժողովի համաձայնությամբ: Պատգամավորն առանց Ազգային ժողովի համաձայնության չի կարող զրկվել ազատությունից, բացառությամբ երբ նա բռնվել է հանցանք կատարելու պահին կամ անմիջապես դրանից հետո: Այս դեպքում ազատությունից զրկելը չի կարող տևել յոթանասուներկու ժամից ավելի: Պատգամավորին ազատությունից զրկելու մասին անհապաղ տեղեկացվում է Ազգային ժողովի նախագահը:

12:17

Ցուցարարները Արցախի փողոցից քայլում են դեպի Հանրապետության հրապարակ: Արցախի փողոցը լքում են նաև ոստիկանները:


12:10

Ցույցի վայր է ժամանել Փաշինյանի կինը` Աննա Հակոբյանը:

Նա ասաց, որ տեղյակ չէ, թե ամուսնուն ուր են տանում: Նա ասաց, որ այս պահին գալիս էր ցույցի մասնակցելու, քանի որ ճանապարհները փակ էին, նա միայն այստեղ իմացավ, որ Փաշինյանին տարել են:

«Ձեզանից եմ ուզում ինֆորմացիա ստանալ»,- ասաց նա:

Աննա Հակոբյանն ասաց, որ իր և երեխաների անվտանգության համար մտավախություն չունի:

Նշենք, որ բացի պատգամավորներ Նիկոլ Փաշինյանից ու Սասուն Միքայելյանից, տարածքից ոստիկանները տարել են նաև Արարատ Միրզոյանին:

Կրկին մարդ է վատացել: Փորձում են առաջին բուժօգնություն ցուցաբերել:

 


12:00

Ոստիկանությունը դադար առնելուց հետո պատ է կազմում և կրկին ուժ գործադրում ցուցարարների նկատմամբ:

Քաղաքացիներից մեկը վատացել է, պարզ չէ՝ նա տուժել է բախումից, թե ինքնազգացողությունն է վատացել: Շտապօգնություն են պահանջում: Նրան տեղափոխեցին հիվանդանոց:

Ոստիկանությունից ասում են, թե ավելի ուշ կմեկնաբանեն Փաշինյանի կարգավիճակը, արդյոք նա բերման է ենթարկվել, թե ոչ:






11:53

Դիմակավորված ոստիկանները ցույցի վայրից բռնի ուժով տարան նաև Սասուն Միքայելյանին:


11:51

Սասուն Միքայելյանը կոչ արեց ցուցարարներին, որ տեղերից չշարժվեն:

«Սպասե՛ք, ոչ մեկից չվախենալ, ոչ մի տեղ չգնալ: Սարգսյանն ուլտիմատում է տալիս մեր ազատությանը, ցույցին: Կոչ եմ անում մնալ տեղերում, համախմբվենք Երևանում: Համախմբվենք, Նիկոլին ազատենք»,- ասաց նա:




11:47

Ոստիկանական պատի առաջ կանգնած ցուցարարներին փորձում է բախման չտանել Սասուն Միքայելյանը:

Նրանք բաց ձեռքերն են ցուցադրում:

Հիշեցնենք, որ Փաշինյանն անձեռնմխելիություն ունի:

Նշենք, որ բացի Նիկոլ Փաշինյանից այլ բերման ենթարկված էլ կան:

11:43

Ուժայինները տարել են Նիկոլ Փաշինյանին: 

Դրությունը ծայրահեղ լարված է Երևանի Արցախի փողոցում: 

Ոստիկանությունը հատուկ միջոցներ է կիրառում: 

11:16

Քայլերթի ընթացքում Նիկոլ Փաշինյանը, կանգնելով ոստիկանական պատի առաջ, կոչ արեց նրանց որևէ հրաման չկատարել:

«Կոչ եմ անում որևէ ձևով չկատարել այդ ոչ ադեկվատ մարդու հրամանները, որովհետև նա չի հասկանում իրավիճակը, գտնվում է հիստերիկ նոպայի վիճակում: Կոչ եմ անում՝ մեր հայրենիքը հանկարծ չզոհաբերեք նրա կոռումպացված կլանին, տղե՛րք, սա ձեր երեխաների, ընտանիքների ճակատագրի հարցն է, վա՛յր դրեք ձեր զենքերը և միացեք ժողովրդին: Սա ձեր պատասխանատվությունն է ՀՀ ժողովրդի և պետության առաջ»,- հայտարարեց նա:


11:03

Նիկոլ Փաշինյանը հազարավոր ցուցարարների առաջնորդում է Տիգրան Մեծի պողոտայով: Նրա գլխավորությամբ բողոքի գործողությունները տեղի են ունենալու, ինչպես նախապես հայտարարվել էր, Էրեբունի վարչական շրջանում:

Փաշինյանը կոչ արեց քաղաքացիներին շարունակել, եռակի բազմապատկել անհնազանդության գործողությունները և նոր թափ հաղորդել շարժմանը:  

10:48

Մարտի մեկի հիշատակումը նշանակում է, որ Սերժ Սարգսյանը չի տիրապետում իրավիճակին. Սերժ Սարգսյանի հետ կարճատև հանդիպումից հետո  հավաքված լրագրողների հարցին ի պատասխան ասաց Նիկոլ Փաշինյանը:  

«Ես շատ հստակ ձևակերպել եմ, թե ինչի համար եմ այսօր առավոտյան գալիս Մարիոթ հյուրանոց, կետ-կետ ճշտել եմ, թե արդյոք իրար ճիշտ ենք հասկանում, ասել են, որ այո՛, ճիշտ ենք հասկանում, խոսելու ենք Սերժ Սարգսյանի անցնցում  հեռացման մասին»,- ասաց նա:

Հարցին, թե մտավախություն չունի, որ ուժի կիրառման կդիմեն, Նիկոլ Փաշինյանը պատասխանեց.

«ՀՀ-ի ուժային կառույցների ներկայացուցիչները պետք է հասկանան, որ Սերժ Սարգսյանը իրականության զգացումը կորցրել է, և չկատարեն նրա հրամանները: Նա գտնվում է  անհավասարակշիռ, հիստերիկ վիճակում, և ուժային կառույցները պետք է գիտակցեն, որ ներվային վիճակում գտնվող մարդու հրամանները չպետք է կատարել»:  

Փաշինյանը համոզմունք հայտնեց, որ ոստիկանությունը չի կրակի սեփական ժողովրդի վրա, և «Մարտի մեկ» չի կարող կրկնվել:  

«Ոստիկանությունը չի կարող սեփական ժողովրդի վրա կրակել, այսօր ՀՀ-ում չկա այդպիսի ոստիկանություն: Ես ասում եմ՝ Մարտի մեկի հետ համեմատություններն իզուր են, որովհետև այս քաղաքական պրոցեսում Սերժ Սարգսյանը մենակ է մնացել, իսկ ՀՀ-ի և Սփյուռքի ճնշող մեծամասնությունը մասնակցում է այս գործողությանը»,- ասաց նա:

----------------------------------------

Նիկոլ Փաշինյանը Սերժ Սարգսյանի հեռանալուց հետո հայտարարեց՝ պետք է արձանագրել, որ սա ապացույց է, որ Սերժ Սարգսյանը լավ չի տիրապետում հանրապետությունում ստեղծված իրավիճակին:

«ՀՀ քաղաքացիներին կոչ եմ անում կրկնակի թափով գործողությունների անցնել: Շարունակել զանգվածային անհնազանդությունների գործողությունները և այսօր՝ ժամը 19:00-ին, հանրահավաքին գալ:  Սերժ Սարգսյանը ադեկվատության զգացումը կորցրել է, լավ չի տիրապետում իրավիճակին, ճնշումները շարունակենք, քանի դեռ Սարգսյանը համարժեքության զգացումը չի վերականգնել»,- ասաց նա:  

Նիկոլ Փաշինյանը լրագրողների հետ զրույցում շեշտեց, որ ինքը չի եկել խոսելու «Ելք» խմբակցության անունից, այլ եկել է խոսելու ժողովրդի անունից, ինչի համար լիազորված է:

«Սերժ Սարգսյանը պետք է անհապաղ հրաժարական տա: Երբ ասում են անդառնալի հետևանքներից խուսափել, եթե նրանք չեն ուզում, որ խնդիրներ առաջանան և ազգային անվտանգության ոլորտում պրոբլեմներ լինեն, այսօր երեկոյան, հիմա իսկ պարտավոր է  հրաժարական տա: Համոզված եմ, որ ժողովուրդն իր պայքարով հասնելու է այդ հանգրվանին»,- ասաց նա: 

Հարցին, թե պատրաստ է էլի հանդիպել, Նիկոլ Փաշինյանը պատասխանեց. «Ես ասել եմ, որ պատրաստ եմ քննարկել իշխանությունից իր հեռացման պայմանները խաղաղ ու անցնցում, որ պահից ընդունեց, ես պատրաստ եմ ընդունել դա»,- ասաց նա:

Նիկոլ Փաշինյանը հանդիպումից հետո դուրս եկավ հյուրանոցի առջև հավաքվածների մոտ: Նրան դիմավորեցին ծափողջյուններով: