Tbilisi Events հայկական բջջային հավելվածը շուտով կգործի վրացական շուկայում

Շնորհիվ hայաստանյան ՏՏ ոլորտում ամենահաջողված նախագծերից մեկի՝ Yerevan Events-ի, արդեն 3 տարի է երևանցիներն ու քաղաքի հյուրերն ունեն մայրաքաղաքի մշակութային, ժամանցային և այլ միջոցառումների, իրադարձությունների իրենց «գրպանի» ուղեցույցը:

Ընդլայնելով գործունեության աշխարհագրությունը՝ ընկերությունը 2018 թվականի երրորդ եռամսյակում պլանավորում է մուտք գործել վրացական շուկա և այժմ Թբիլիսի քաղաքի բնակիչներին, հյուրերին ներկայացնել հայկական արտադրության, բայց արդեն Թբիլիսիի և քիչ ուշ նաև Բաթում քաղաքի միջոցառումները ներառող Tbilisi Events բջջային հավելվածը:

Բիզնեսի անցած ճանապարհի, առանձնահատկությունների և առաջիկա ծրագրերի մասին Tert.am-ը զրուցել է «Սպրինտ Կենտրոն» ընկերության հիմնադիր, Yerevan Events, Tbilisi Events նախագծերի հեղինակ Արթուր Կարճիկյանի հետ:

-Կպատմե՞ք՝ ինչպես առաջացավ այս նախագծի ստեղծման գաղափարը։

-Գիտեք, ժամանցի կազմակերպումն այսօր ակտուալ է բոլոր երկրներում: Փորձելով լուծել այդ խնդիրը՝ Երևանում ծնվեց նախագծի իրականցման գաղափարը, և 2015թ.-ին ստեղծեցինք երևանյան միջոցառումների կենտրոնացված հարթակը՝ Yerevan Events-ը: Մեր նպատակը եղել է տեղեկատվության տարածման ժամանակակից գործիքների միջոցով ակտիվացնել Երևանյան մշակութային և ժամանցային կյանքը ինչպես քաղաքի բնակիչների, այնպես էլ Երևանի այցելուների և հյուրերի համար: Yerevan Events նախագիծն ունի մի քանի հարթակ՝ iOS, Android համակարգերի համար նախատեսված բջջային հավելվածներ և Yerevanevents.am կայքը, որոնք, օգտատերերն անվճար բեռնելով կամ այցելելով, առանց որևէ դժվարության կարող են գտնել այդ օրվա կամ սպասվող նախընտրելի միջոցառումները:

Հաշվի առնելով, որ Թբիլիսին, նրան կից քաղաքներն աչքի են ընկնում տարաբնույթ միջոցառումների քանակով, զբոսաշրջիկների մեծ հոսքով՝ ուսումնասիրություններ կատարեցինք և տեսանք, որ ժամանցի կազմակերպման այս նույն խնդիրը առկա է նաև հարևան երկրում՝ Վրաստանում: Եվ մենք չհապաղեցինք ու ներկայացանք վրացական շուկայում արդեն Tbilisi Events-ով: Դեռ 2017-ի աշնանը գրանցեցինք Tbilisi Events ապրանքանիշը և համանուն tblisievents.ge հասցեն: Այս պահին տարվում են աշխատանքներ և շուտով Tbilisi Events հավելվածն ու կայքը պատրաստ կլինեն:

-Ովքե՞ր են օգտվում Yerevan Events և Tbilisi Events հավելվածներից:

- Հավելվածները նախատեսված են տվյալ քաղաքի մշակութային, ժամանցային, բիզնես և այլ միջոցառումներով, իրադարձություններով հետաքրքրվողների համար: Թե´ Yerevan Events–ում, թե´ Tbilisi Events-ում ներկայացված են համապատասխան քաղաքների մշակութային և ժամանցային անցուդարձը՝ համերգներ, ցուցահանդեսներ, թատերական ներկայացումներ, կինոցուցադրություններ, երեկույթներ, փառատոններ, տարատեսակ բիզնես-իրադարձություններ և այլն:

Յուրաքանչյուր օգտատեր հավելվածներում առկա գործիքների օգնությամբ կարող է գտնել ցանկալի միջոցառումն ըստ ամսաթվի, մոտ գտնվելու վայրի, ինչպես նաև ծանոթանալ թե՛ առանձին հաստատության սպասվելիք, թե՛ տարբեր հաստատությունների կողմից կոնկրետ օրը նախատեսվող բոլոր միջոցառումներին:

Yerevan Events և Tbilisi Events հավելվածները հասանելի են ինչպես հայերեն և վրացերեն, այնպես էլ ռուսերեն և անգլերեն լեզուներով, արդյունքում հավելվածները շատ պահանջված են զբոսաշրջիկների շրջանում: Հավելվածները նաև խնայում են օգտատերերի ժամանակը՝ նախապես կարճ հաղորդագրությունների միջոցով տեղեկացնելով միջոցառումների մասին:

- Իսկ ի՞նչ են առաջարկում Yerevan Events և Tbilisi events նախագծերը բիզնեսին:

-Հավելվածները յուրատեսակ կամուրջ են միջոցառումներ առաջարկող կազմակերպությունների և միջոցառումներով հետաքրքրվողների միջև: Մեր գործընկերներ կազմակերպությունները՝ ակումբները, թատրոնները, պրոդյուսերական ընկերությունները և այլն, այս նախագծերի միջոցով հնարավորություն ունեն թիրախային լսարաններին ներկայացնել իրենց առաջարկները, ինչպես նաև բջջային հաղորդագրությունների, էլեկտրոնային նամակների, սոցիալական ցանցերի և այլ գործիքների օգնությամբ ծանուցել իրենց նորությունների, միջոցառումների, իրադարձությունների մասին:

-Ի՞նչ կազմակերպությունների հետ եք համագործակցում, և ովքե՞ր կարող են դառնալ Ձեզ գործընկեր:

-Մեր նախագծի նպատակն է ընդգրկել և ներկայացնել քաղաքային բոլոր միջոցառումները, ուստի մեր կոմերցիոն քաղաքականությունն է՝ հարթակը դարձնել հասանելի ամենափոքրերից մինչև խոշոր կազմակերպություններին: Համագործակցության միակ նախապայմանն այն է, որ հավելվածում ներկայացված հաստատությունը պարբերաբար հանդես գա միջոցառումներով։ Yerevan Events-ի շրջանակներում այս պահին աշխատում ենք գրեթե բոլոր միջոցառում ներկայացնող կազմակերպությունների հետ՝ համերգասրահներ, թատրոններ, թանգարաններ, երաժշտական ակումբներ, փաբեր, հյուրանոցներ ռեստորաններ և այլն: Մենք ունենք լուծումներ նաև պրոդյուսերական կենտրոնների համար՝ մեկանգամյա համերգների առաջխաղացում և գովազդ:

Նույն մոդելով աշխատում ենք նաև Թբիլիսիում, այս պահին արդեն ունենք գործընկերներ և ակտիվ բանակցություններ ենք վարում տարբեր կազմակերպությունների հետ:

-Ի՞նչ նորություններ են սպասվում ապագայում:

-Վրաստանում ներկայացվող հավելվածում շուտով ներառված կլինեն նաև Բաթումի քաղաքի միջոցառումները, քանի որ ամառն այնտեղ բավական ակտիվ է, կավարտենք նաև tblisievents.ge կայքի ծրագրավորման աշխատանքները:

Այս պահին մենք փնտրում ենք ներդրողներ նախագիծն այլ երկրներում իրականացնելու համար: Շնորհիվ մեր փորձի և լուծումների մեր կողմից առաջարկվող մոդելը հնարավոր է տեղայնացնել և ներմուծել աշխարհի ցանկացած կետում գտնվող բոլոր այն քաղաքներում, որտեղ միջոցառումներ են իրականացվում: Ուստի այն աչքի է ընկնում և´ ներդրումային գրավչությամբ, և´ արդյունավետությամբ: