Հեռուստաընկերությունների վերաբերյալ կոչը ճիշտ չէր, երկրի ղեկավարի կողմից  տեսակետ արտահայտելը բնական է. վարչապետի գրառման մասին կարծիքները տարբեր են

«Առավոտ» օրաթերթի առցանց տարբերակի խմբագիր Աննա Իսրայելյանի կարծիքով՝ վարչապետի՝ հեռուստաընկերություններին ուղղված կոչը ճիշտ չէր։

«Ճիշտ կլինի, որ պարոն Փաշինյանն ունկնդիր լինի այն կոչին, որը Երևանի պետական համալսարանում արեց իր կինը՝ Աննա Հակոբյանը՝ «թողեք մամուլն աշխատի»»,-Tert.am-ի հետ զրույցում ասաց նա:

Հիշեցնենք, որ վարչապետ Նիկոլ Փաշինյանը նախօրեին իր ֆեյսբուքյան էջում կատարած գրառման մեջ նշել էր, որ որոշ հեռուստաընկերություններ հակապետական քարոզչություն են իրականացնում՝ «օգտվելով խոսքի ազատության անսահմանափակ հնարավորությունից»։

«Սա թերևս այն դեպքերից է, երբ իշխանության բարեկրթությունը ոմանք կրկին ու կրկին շփոթում են թուլության կամ միամտության հետ։ Մի՛ արեք։ Պարզապես մի՛ արեք»,- գրել էր վարչապետը։

Tert.am-ի հետ զրույցում վարչապետի մամուլի քարտուղար Արման Եղոյանը՝ պատասխանելով հարցին, թե ինչ նկատի ուներ և որ հեռուստաընկերությանը նկատի ուներ Նիկոլ Փաշինյանը, ասել էր, որ խոսքն այն մասին չէ, որ իշխանություններին չեն կարող քննադատել։

«Հասցեատերերի վերաբերյալ վարչապետի գրառմանն ավելացնելու ոչինչ չունեմ, սակայն կարող եմ ասել, որ խոսքն իշխանություններին քննադատության մասին չէ»,- հայտարարել էր Արման Եղոյանը:

Աննա Իսրայելյանն ասաց, որ իսկապես չգիտի, թե որ հեռուստաընկերությունն է, ինչ քարոզչություն է. «Բայց, ընդհանուր առմամբ, կարծում եմ, որ ճիշտ չէ, որ վարչապետը կամ որևէ պետական պաշտոնյա մամուլի դեմ այդպիսի կոչերով հանդես գա: Առանց այդ էլ նոր իշխանության ձևավորումից հետո լրատվամիջոցները չափազանց վատ պայմաններում են գործում, երբ ցանկացած քննադատական խոսք փորձ է արվում լռեցնել նոր իշխանության աջակիցների կողմից: Ես գիտեմ, որ դա կազմակերպված չէ, ինքնաբուխ է, մարդիկ իսկապես ուզում են պաշտպանել, բայց այս պայմաններում պետական պաշտոնյայի կողմից հավելյալ մի խոսքն առավել կսաստկացնի մթնոլորտը»։

Ժուռնալիստների «Ասպարեզ» ակումբի նախագահ Լևոն Բարսեղյանը, սակայն, վարչապետի կոչում ԶԼՄ-ների սահմանափակում չի տեսնում: Ըստ նրա՝ սահմանափակում կարող էր լինել հրամանը, կարգադրությունը:

«Նիկոլ Փաշինյանը նկատել է և իր նկատածն է ասում: Վարչապետն իր կարծիքն է ասել, համարում եմ, որ արտահայտվելու իրավունք ունի: Պատկերացրեք՝ նույնիսկ վարչապետը, երկրի ղեկավարը, կարող է կարծիք ունենալ: Տեսակետը որևէ կերպ հրամայական կամ կարգադրություն չէ, մանավանդ, որ նա նման լիազորություններ չունի: Համարում եմ, որ բնական է պարբերաբար կարծիք հայտնելը տարբեր բաների մասին: Եթե դիտավորություն ունենար սահմանափակելու՝ կոչեր չէիք լսի, կսահմանափակեր և վերջ, չէինք իմանա»,- ասաց Լևոն Բարսեղյանը:

Հեռուստաընկերությունների մասին վարչապետի գրառմանն արձագանքել է նաև Խոսքի ազատության պաշտպանության կոմիտեն: ԽԱՊԿ հայտարարության մեջ, մասնավորապես, ասվում է, որ ցանկացած իշխանություն պետք է առավել հանդուրժողական վերաբերմունք ցուցաբերի լրատվամիջոցների հրապարակումների և դրանցում տեղ գտած գնահատականների նկատմամբ։

Ըստ կոմիտեի՝ վարչապետ Նիկոլ Փաշինյանի գործածած «հակապետական քարոզչություն» և «մի՛ արեք, պարզապես մի՛ արեք» կոչը կարող է գնահատվել որպես միջամտություն հեռուստաընկերությունների գործունեությանը կառավարության ղեկավարի կողմից։

«Թերևս տեղին կլիներ, եթե վարչապետը մատնանշեր իր նկատի ունեցած հեռուստաընկերությունների հաղորդումներում էթիկական նորմերի բացահայտ խախտումները և դիմեր ԶԼՄ-ների ինքնակարգավորման դիտորդ մարմնին՝ փորձագիտական եզրակացություն ստանալու համար։ Սա լավագույն նախադեպը կարող էր դառնալ մեր հեղափոխական երկրում ԶԼՄ-ներին վերաբերող վեճերը լուծելու համար»,- ասվում է հաղորդագրությունում: