Մեր ձեռքի տակ հսկայածավալ նյութեր կան, որոնք շուտով կտրամադրենք իրավապահ մարմիններին. վարչապետի՝ կոռուպցիայի դեմ պայքարի գծով օգնական

Մայիսի 8-ից  հուլիսի 20-ն ընկած ժամանակահատվածում հայտնաբերված 29 մլրդ դրամի իրավախախտումների մեջ մտնում են այն բացահայտումները, որոնք կատարել են ԱԱԾ–ը, Ոստիկանությունը, Քննչական կոմիտեն և ՀՔԾ-ն:

Tert.am-ի հետ զրույցում նման հայտարարություն արեց վարչապետի՝ կոռուպցիայի դեմ պայքարի գծով օգնական Արեն Մկրտչյանը: Նրա խոսքով՝ չարաշահումների զգալի հատվածը հիմնականում  մամուլում մեծ արձագանք  են ստացել:

«Այո՛, կան մանր դեպքեր, որոնք հանրության շրջանում մեծ աղմուկ չեն բարձրացրել, բայց ընդհանուր տեսակարար կշռի մեջ արտացոլված են: Այսինքն՝ ներառում են բոլոր դեպքերը, այդ թվում՝ «Երևան Սիթի»-ում սկզբնական շրջանում կատարված դեպքերը, Վաչագան Ղազարյանի հետ կապված բացահայտումները և այլն»,- ասաց նա:

Արեն Մկրտչյանն ուսումնասիրությունների մասին մանրամասներ չի ցանկանում հաղորդել, բայց չի բացառում, որ հանրությունը կարող է նոր քրեական գործերի մասին լսել: Նրա խոսքով՝ խնդիրներ կան բոլոր ոլորտներում, որոշ տեղերում նույնիսկ նախարարներն են հավելյալ ստուգումներ սկսել ու չարաշահումներ հայտնաբերել: Ըստ նրա՝ չկա մի գերակա ուղղություն, որտեղ, այսպես ասած, ֆիքսված են, քանի որ տեղեկատվություն ստանում ենք ամենատարբեր ոլորտներից:

«Թիրախների մասին ինֆորմացիա չեմ կարող տալ, նյութեր են հավաքագրվում, առաջիկայում չի բացառվում, որ լինեն քրեական գործեր: Եթե ես նախապես  ուղղություններն ասեմ, ապա նախաքննության հավաքագրման աշխատանքներին կխանգարեմ, որովհետև այդ ոլորտներում տեղեկատվություն կսկսեն քողարկել, և մեր աշխատանքն ավելի կբարդանա: Վստահաբար կարող եմ ասել, որ մեր ձեռքի տակ հսկայածավալ նյութեր կան, հենց այս պահին էլ աշխատանքներ են տարվում, ինֆորմացիա է գեներացվում, որը կփոխանցվի իրավապահներին: Չեմ կարող հստակ ասել, որ քրգործեր կլինեն. եթե իրավապահ մարմինները գտնեն, որ քրեական գործ հարուցելու հիմքեր են տեսնում այդ տեղեկատվության մեջ, ուրեմն կհարուցեն: Մեր խնդիրն ահազանգելը, ֆիքսելն ու դրանք իրավապահներին փոխանցելն է, մենք չենք կարող խախտել անմեղության կանխավարկածը, քանի որ Գործադիրի կողմից ճնշում կլինի իրավապահ համակարգի վրա»,- ընդգծեց Արեն Մկրտչյանը:

Վարչապետի՝ կոռուպցիայի դեմ պայքարի գծով օգնականը նշեց, որ սկզբնական շրջանում զարմանում էին բացահայտումներից, սակայն այս ընթացքում արդեն հասցրին սովորել չզարմանալ: Նա նաև համակարծիք չէ այն տեսակետի հետ, որ մինչ այս արված բացահայտումներում չկան կոռուպցիոն լուրջ սխեմաներ:

«Սպասե՛ք նոր բացահայտումների, քանի որ ամեն վայրկյան աշխատում ենք, սակայն ժամկետների, ծավալների ու ոլորտի մասին որևէ հստակ բան չեմ կարող ասել: Պրոցեսը ընթացքի մեջ է, կարող է ամբողջ գործ բացահայտելու համար պահանջվի 10 օր, իսկ մեկ դետալ բացահայտելու համար՝ մի ամիս, և այլն»,- հավելեց նա:

Ինչ վերաբերում է հավաքագրված գումարը բյուջե ներմուծելուն, Արեն Մկրտչյանն ասաց, թե իրենց գլխավոր նպատակն ու թիրախն այն է, որ հավաքագրված գումարները գնան բյուջե: Նա նկատեց, որ 29,2 մլրդ դրամի իրավախախտումը 1.5 ամիս տևած աշխատանքի ժամանակ են հավաքագրել: Մկրտչյանի խոսքով՝ երբ ամբողջությամբ վերականգնված կլինեն գումարները, արդեն Կառավարությունը կորոշի, թե իրականում ինչ գերակա ուղղություններ կան:

«Խնդիրները բազմաթիվ են, հավատացե՛ք՝ ծախսելու տեղ հաստատ կլինի: Մեր գլխավոր նպատակն է, որ ՀՀ քաղաքացին կյանքի որակի փոփոխություն զգա, այսինքն՝ թղթերի վրա թվեր չենք նկարելու ու տնտեսական աճ ցույց տանք, բայց փողոցում լրիվ այլ իրավիճակ լինի: Պետք է փողոցում առկա իրավիճակը, մարդկանց տներում առկա իրավիճակն արտացոլված լինի մեր ներկայացրած թվերում»,-եզրափակեց Արեն Մկրտչյանը: