«Թուրքիայի փոփոխության չափանիշը Ցեղասպանության ճանաչումն է»,– Դինքին մեջբերում է ՀՅԴ–ական գործիչը

««Էրգենեկոն» կազմակերպությունը համաձայն չէ հայ–թուրքական հարաբերությունների հաստատմանը, և այդ ձերբակալությունները, եթե իշխանությունները մինչև վերջ գնան, կարող են Թուրքիան տանել դեպի բավական լուրջ ապակայունացում կամ, գուցե, հանգեցնեն լուրջ փոփոխությունների, որը հույս կարթնացնի, թե հայ–թուրքական հարաբերությունները կարող են լավանալ»,– այսօր «Ուրբաթ» ակումբում հրավիրված ասուլիսի ժամանակ հայտարարել է ՀՅԴ քաղաքական հարցերի և Հայ դատի գրասենյակի պատասխանատու Կիրո Մանոյանը՝ անդրադառնալով հայ–թուրքական հարաբերություններին, ինչպես նաև «Էրգենեկոն» կազմակերպության անդամների ձերբակալություններին։

Այսօր՝ Հրանտ Դինքի մահվան 2–րդ տարելիցին, հայաստանյան լրագրողները փորձել են դաշնակցական գործչի կարծիքն իմանալ, թե արդյոք Դինքի արտահայտած միտքը, թե Թուրքիայում փոփոխությունները ներքևից պետք է լինեն, այսօր իրականություն է դառնում։

«Շատ վստահ չեմ, որ հեղափոխությունները Թուրքայում միշտ ներքևից են եղել։ Հիմա էլ ինչ–որ փոփոխություններ տեղի են ունենում, բայց չէի ասի՝ ներքևից, որովհետև Թուրքիան՝ որպես ամբողջատիրական համակարգ, այդ ներքևից շարժվելը սահմանափակ է։ Կան տարբեր շրջանակներ, որոնք բարեփոխումների կողմնակից են։ Մեկը հենց հայերից ներողություն խնդրելու նախաձեռնողների մեծ մասը։ Բայց կարծում եմ, որ Դինքի մոտեցումն այն էր, որ հակառակ տարբեր խնդիրներում կարող էինք չհամաձայնվել, բայց այդ հարցում Թուրքիայի փոփոխության չափանիշը Հայոց ցեղասպանության ճանաչումն է։ Այն օրը, երբ Թուրքիան ամբողջությամբ ճանաչի Հայոց ցեղասպանությունը, ոչ թե ձևական բաներ անի, այդ օրը կարելի է հավատալ կամ առնվազն հույս ունենալ, որ Թուրքիան փոխվել է կամ փոխվում է։ Սա այն կետն է, որ Թուրքիայում ապրող նրան իրենց ընկեր համարողները, այդ նույն աղերսագրի նախաձեռնողները, փաստորեն, ցեղասպնություն բառը չօգտագործելով, անտեսեցին Դինքի այդ մոտեցումը»,– պատասխանել է Հայ դատի գրասենյակի պատասխանատուն։

Հայոց ցեղասպանության ուսումնասիրության նպատակով հայ–թուրք պատմաբանների հանձնաժողով ստեղծելու մասին հարցին Կիրո Մանոյանը պատասխանել է, թե ցանկացած նախաձեռնություն, որը կասկածի տակ կարող է դնել Հայոց ցեղասպանության փաստը, ՀՅԴ–ի համար ընդունելի չէ։