«Հարսնաքարի» գործով հարցաքննությունները սուրճի գավաթի շուրջ զրույց են հիշեցնում. փաստաբան

ՀՀ ոստիկանության Քննչական գլխավոր վարչության, հատկապես, կարևոր գործերի քննության բաժինը մերժել է Վահե Ավետյանի հոր՝ տուժողի իրավահաջորդի ներկայացուցիչներ Տիգրան Եգորյանի և Լուսինե Հակոբյանի միջնորդությունները:
Այս մասին Tert.am–ին հայտնեց Վահե Ավետյանի իրավահաջորդի շահերի ներկայացուցիչ Տիգրան Եգորյանը:


Տեղեկացնենք, միջնորդությունները հետևյալն են, որպես կասկածյալ գործում ներգրավել Հայաստանի ֆուտբոլի ֆեդերացիայի նախագահ Ռուբեն Հայրապետյանին, Վահե Ավետյանին մահ պատճառած խմբին առաջադրված մեղադրանք վերաորակել առավել ծանր՝ սպանության հոդվածով ( որի համար նախատեսվում է մինչև 20 տարի կամ ցմահ ազատազրկում -Tert.am ), նշանակել դիակի դատաբժշկական կրկնակի հանձնաժողովային փորձաքննություն՝ «հաշվի առնելով դատաբժշկական եզրակացության որոշ սխալ հետևություններ»:

Հիշեցնենք, որ Ռուբեն Հայրապետյանի ընտանիքին պատկանող «Հարսնաքար» ռեստորանային համալիրում, հունիսի 17-ին՝ ժամը 23-ի սահմաններում, Վահե Ավետյանին դաժան ծեծի ենթարկելու փաստով հարուցվել է քրեական գործ՝ ՀՀ քրեական օրենսգրքի 112 հոդվածի 1-ին մասով. «Դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որևէ օրգանի կամ օրգանի ֆունկցիայի կորուստ…», ապա այն փոխվեց 112-րդ հոդվածի 2-րդ մասի 6-րդ և 14-րդ կետերով (այն է՝ դիտավորությամբ առողջությանը ծանր մարմնական վնաս պատճառելը, որը կատարվել է մի խումբ անձանց կամ կազմակերպված խմբի կողմից և անզգուշությամբ առաջացրել է տուժողի մահ), 113-րդ հոդվածի 2-րդ մասի 1-ին և 3-րդ կետերով (այն է՝ դիտավորությամբ առողջությանը միջին ծանրության վնաս պատճառելը), և 118-րդ հոդվածով (այն է՝ ծեծելը կամ այլ բռնի գործողություններ կատարելը):

Թեև տուժողի իրավահաջորդները դեռ չեն ստացել մերժման մասին որոշումը, սակայն փաստաբաններին այդ մասին հայտնել է քննչական խմբի ղեկավար Ռուբեն Մկրտչյանը հեռախոսազանգի միջոցով, այս մասին Tert.am–ի հետ զրույցում ասաց Տիգրան Եգորյանը:


Նախ, փաստաբաններն ակնհայտորեն դժգոհ են դատաբժշկական փորձագետների՝ Վահե Ավետյանի ծանր վնասվածքներին տված որակումներից. «Այդ վնասվածքները, որոնք որակվում են «ծանր», դրանք տվյալ դեպքում հանգեցրել են մահվան: Էստեղ մեծ տարբերություն կա, և մենք միջնորդում ենք, որ արարքը որակվի սպանություն հետևյալ ծանրացուցիչ հանգամանքներով՝ կազմակերպված խմբի կողմից և առանձնակի դաժանությամբ և խուլիգանական դրդումներով կատարված, որի համար նախատեսվում է մինչև 20 տարի կամ ցմահ ազատազրկում»,- ասաց Տիգրան Եգորյանը:


Կրկնակի հանձնաժողովային փորձաքննություն նշանակելու պահանջի «մեխն» այն է, որ, ըստ փաստաբանների, Վահե Ավետյանի մոտ՝ հիվանդանոց ընդունվելիս, համակարգչային հետազոտություն անցկացնելիս, արդեն իսկ հայտնաբերվել են այն ախտանիշները, որոնք վկայում են գլխուղեղի մահվան մասին. թաց շնչառություն, հավասար լայնացած և միջին գծով ֆիքսված բիբեր, կոռնեալ ռեֆլեքսների և ցավային գրգիռների ռեակցիայի բացակայություն, դիֆուզ աքսոնալ ախտահարում և այլն: Այսինքն՝ Վահե Ավետյանի մահը վրա է հասել ոչ թե հիվանդության զարգացման ընթացքում, այլ կյանքի հետ անհամատեղելի վնասվածներ ստանալու արդյունքում:


Տիգրան Եգորյանի խոսքով՝ այն, որ «քննչական մարմինը» պարծենում է, թե բոլորին մեղադրանք է առաջադրված, և որ, ըստ մեղադրանքի, 6-ից յուրաքանչյուրի արարքը լրացրել է մյուսինը, ապա ստացվում է, որ բոլոր մեղադրյալներին պետք է մեղադրանք առաջադրվեր սպանության հոդվածով:

Ավելին, գործի նյութերին ծանոթացած փաստաբանների վրա վկաների ու կասկածյալների հարցաքննությունները մի բաժակ սուրճի գավաթի շուրջ զրույցի տպավորություն են թողնում: Այսպես, ըստ Տիգրան Եգորյանի, անհասկանալի է, թե ինչո՞ւ նախաքննության մարմինն ուշադրություն չի դարձնում այն հանգամանքին, որ մի շարք վկաներ դեպքի օրը՝ ժամը 22:19-ից մինչև 22:23-ը ընկած ժամանակահատվածում, ստացել են 10, 20, 25, 15 վայրկյանանոց զանգեր: Օրինակ, կա Խնջոյան ազգանունով մեկը, որին, այդ ժամանակահատվածում, 9 անգամ զանգ է ուղղվել: Ի դեպ, քննիչի առաջադրած բոլոր հարցերին նրանք տվել են՝ «չեմ հիշում» կամ «չի տպավորվել, թե ինչ ենք խոսել» պատասխանները:

Ըստ Տիգրան Եգորյանի՝ քննիչը պարտավոր էր նման պատասխանների դեպքում լրացուցիչ հարցեր տալ:
Հիշեցնենք, որ հունիսի 17-ին «Հարսնաքար» ռեստորանային համալիրում տեղի ունեցած մահվան ելքով միջադեպի արդյունքում հարուցված քրեական գործի շրջանակներում մեղադրվում են 6 հոգի՝ Գարիկ Մարգարյանը, Արթուր Բաբլոյանը, Դավիթ Ադամյանը, Արման Բաղդասարյանը, Արման Խաչատրյանը, Նորայր Հայրապետյանը:


Տուժողի իրավահաջորդի շահերի ներկայացուցիչը նշեց նաև, որ գործում առկա չեն Նորայր Հայրապետյանի «ԱրմենՏելի» հեռախոսազանգերի վերծանումները, ինչը, ըստ փաստաբանի շատ լուրջ կասկածների տեղիք է տալիս, որովհետև նրա հեռախոսահամարին զանգահարել է Գարիկ Մարգարյանը:


«Կասկած կա, որ իր «ԱրմենՏելի» հեռախոսահամարով շատ ավելի լուրջ զանգեր են տեղի ունեցել, որոնք տվյալ հանցագործության հետ կապված մեզ կտան լուրջ տեղեկություններ: Բայց նախաքննության մարմնի կողմից այդ հեռախոսազանգերի վերծանումները չեն պահանջվել»,- տեղեկացրեց Տիգրան Եգորյանը՝ հավելով, որ գործի նյութերում չկան նաև Ռուբեն Հայրապետյանի հեռախոսազանգերի վերծանումները:


Փաստաբաններ Եգորյանն ու Հակոբյանը ունեն փաստեր, համաձայն որոնց քրեական գործով անցնող առաքիչ Արթուր Բաբլոյանը հունիսի 19-ի առավոտյան զանգահարել է Ռուբեն Հայրապետյանի հոր՝ Ռաֆիկ Հայրապետյանի անունով գրանցված բնակարանի հեռախոսահամարով, ինչի կապակցությամբ ևս ոչ մի հարցաքննություն չի արվել:


Եվ վերջապես, փաստաբանները միջնորդել են, որպեսզի Ռուբեն Հայրապետյանը ներգրավվի որպես կասկածյալ. «Լուրջ կասկածներ են հարուցում ինչպես նրա տված բացատրություններն ու ցուցմունքները, այնպես էլ դրանց վերաբերյալ քննիչի հետաքրքրությունը, այսինքն՝ դրա բացակայությունը: Եվ վերջապես, դրանց հակասական բնույթը »,- ասաց Տիգրան Եգորյանը՝ հավելելով, որ այս առումով ամենամեծ կասկածն այն է, որ հինգ մեղադրյալները դեպքի ողջ օրը ուղեկցել են Ռուբեն Հայրապետյանին: