Այս քարոզարշավում արժեզրկվեց նախագահական ընտրությունների ինստիտուտը. Արթուր Սաքունց

Հելսինկյան ասոցիացիայի Վանաձորի գրասենյակի ղեկավար Արթուր Սաքունցը, այսօր լրագրողների հետ հանդիպմանն ամփոփելով արդեն ավարտվող նախընտրական քարոզարշավը, ասաց, որ նախագահական քարոզարշավի ժամանակ արժեզրկվեց նախագահական ինստիտուտը։ 

Ըստ իրավապաշտպանի՝ նման գնահատական տալու համար նրա հիմք են տալիս մրցակցային ոչ հավասար պայմանները, իշխող թեկնածուին այլընտրանք չլինելու փաստ կամ ավելի ճիշտ՝ քաղաքական վակուումը, որի պատճառ հանդիսացան նաև «Հայ ազգային կոնգրեսի», «Բարգավաճ Հայաստանի» և «Հայ հեղափոխական դաշնակցության» կողմից թեկնածուների չառաջադրումը։ Ըստ նրա՝ սա քաղաքական դաշտի անգործության և քաղաքական գործընթացների զրոյացման միտում էր։

«Այս իմաստով զարմանալի է որոշ կուսակցությունների կոչերը, որ եկե՛ք, մասնակցե՛ք, բայց դեմ քվեարկեք, որովհետև սա ուղղված իշխող կուսակցության շահերի դամ։ Առհասարակ, այս ընտրություններին մասնակցության տոկոս ապահովելու բոլոր միտումները բխում են իշխանության շահերից, որ «եկե՛ք,«կողմ» կքվեարկեք՝ «դեմ»», կապ չունի, մենակ եկեք»,-հայտարարեց իրավապաշտպանը։

Սա նրա համեմատությունն էր 2008-ի նախագահական ընտրությունների հետ, երբ նրա խոսքով՝ կար գաղափարախոսական այլընտրանք, երբ ընտրությունների արդյունքների դեմ բողոքողները դուրս եկան փողոց, երբ իշխանությունները դիմեցին ռեպրեսիվ քայլերի, բերման ենթարկեցին ակտիվիստներ, խոչընդոտեցին «Հայ ազգային կոնգրես» ընդդիմադիր դաշինքի առաջնորդ Լևոն Տեր–Պետրոսյանի հանդիպումները խոչընդոտվում էին։

Վանաձորի հելսինկյան քաղաքացիական ասամբլեան երկարաժամկետ դիտարկում է իրականացրել Վանաձորում և Իջևանում, և Արթուր Սաքունցը, այսօր ամփոփելով մշտադիտարկման արդյունքները, նշեց, որ այս նախընտրական քարոզարշավին գործող նախագահ, ՀՀ նախագահի թեկնածու Սերժ Սարգսյանի օգտին կիրառվել է վարչական ռեսուրս։

Նրա խոսքով՝ անհասկանալի է եղել նաև կուսակցական և տեղական ինքնակառավարման մարմինների վարչական, մարդկային և ֆինանսական ռեսուրսների սահմանազատումը, թե որտեղ է սկսվում կուսակցականը և վերջանում տեղական ինքնակառավարման մարմնինը և հակառակը։ Այսինքն՝ ըստ Արթուր Սաքունցի, անհասկանալի է եղել, մարզային իշխանությունները կուսակցակա՞ն, թե՞ ՏԻՄ բենզինով ու մեքենաներով են եկել հանդիպումների։

«Սերժ Սարգսյանի հանդիպումների ժամանակ մարդկանց կտրում են ուսումնական և կրթական պրոցեսից։ Վանաձորի մանկավարժականի ռեկտորը, որը ակնհայտորեն քարոզչություն էր իրականացնում Սերժ Սարգսյանի օգտին, նկատողություն ստացավ, բայց մարզպետը քարոզում է, քաղաքապետը քարոզում է։ Իրենք կարող են ասել, որ գտնվում են պարապուրդի մեջ, բայց միևնույն է՝ նրանք ընկալվում են որպես իշխանություն»,– ասաց նա։

Իրավապաշտպանը նաև նշեց, որ «Օրինաց երկիր» կուսակցության ղեկավար Արթուր Բաղդասարյանի՝ Աբելյանի անվան թատրոնում հանդիպման ժամանակ էլ էին մարդկանց հարկադրաբար բերել։

Հելսինկյան ասոցիացիայի Վանաձորի գրասենյակում գործում է թեժ գիծ, որտեղ զանգահարողները իրավապաշտպաններին հայտնում են առաջարկվող ընտրակաշառքների մասին։ Արթուր Սաքունցն ասաց, որ գրասենյակը տիրապետում է թե՛ թվերին, և թե՛ սխեմաներին, սակայն ավելացրեց, որ ահազանգերի հեղինակները, վախենալով իրենց ապագայի համար, գերադասում են մնալ անանուն։

Իրավապաշտպանի ձևակերպմամբ, ընտրակաշառքը Վանաձորում սկսվում է 7 000-ից և հասնում 30 000-ի՝ կախված նրանից, թե որ թաղամասերում է բաժանվում։ Գործող «հենակետեր» էլ կան, տնակային և առանձին բնակարանների տեսքով, որտեղ մարդիկ «իրենց տնից» են բաժանում կաշառքը»։

Կազմակերպությունը նաև տվյալներ ունի, որ Արդարադատության նախարարությունը պետական ռեգիստրից պահանջել է գործող նախագահի օգտին քվեարկողների ցուցակ, նույնը նաև Վանաձորի երկու դպրոցներում։