Երևանի քաղաքապետը լինելու է Արմեն Մարտիրոսյանը. Րաֆֆի Հովհաննիսյան (տեսանյութ)

Կախված նրանից, թե ով կլինի «Երևանի ավագանու ընտրություններին «Ժառանգություն» կուսակցության ցուցակի առաջին համարը, պայմանավորված է, թե ով է լինելու Երևանի հաջորդ քաղաքապետը: Այսօր Ազատության հրապարակում լրագրողների հետ հանդիպմանը հայտարարեց «Ժառանգություն» կուսակցության առաջնորդ Րաֆֆի Հովհաննիսյանը։ 


Ազատության հրապարակում Րաֆֆի Հովհաննիսյանի հրավիրած մամուլի ասուլիսի ժամանակ հրապարակվեց կուսակցության «Բարև Երևան» անունը կրող Երևանի ավագանու ընտրությունների ցուցակը, որը ինչպես նշեց Րաֆֆի Հովհաննիսյանը, «ժառանգություն», «Ժողովրդավարական հայրենիք» ու «Ժողովրդավարական ուղի», «Պահպանողական», «Շրջադարձ», «Հասկ» կուսակցությունների համատեղ ցուցակն է:

Ավելի ուշ, երբ «Ժառանգություն» կուսակցության մամուլի խոսնակ Հովսեփ Խուրշուդյանը հրապարակեց ցուցակը, նշելով, որ դրանում ընդգրկված են գիտնականներ, մշակութային գործիչներ, լրագրողներ և քաղաքացիական այլ ակտիվիստներ, Րաֆֆի Հովհաննիսյանը հայտարարեց, որ Երևանի հաջորդ քաղաքապետը լինելու է «Ժառանգության» փոխնախագահ Արմեն Մարտիրոսյանը, ով գլխավորում է ցուցակը:


Ներկայացնում ենք ցուցակի առաջին 20 անունները.
 

1.Արմեն Մարտիրոսյան
2. Անահիտ Բախշյան
3. Մեսրոպ Մովսեսյան
4. Ստյոպա Սաֆարյան
5. Գագիկ Բաղդասարյան,
6. Արթուր Գասպարյան
7. Դավիթ Սանասարյան
8. Արթուր Իսպիրյան
9. Կարլեն Ալեքսանյան
10. Անի Քոչար
11. Թաթուլ Մկրտչյան
12. Ալեն Սիմոնյան
13. Հովսեփ Խուրշուդյան
14. Սուսաննա Մուրադյան
15. Սիմոն Ղունաղչյան
16. Իզաբելլա Աբգարյան
17. Ռշտուն Մարտիրոսյան
18. Աննա Ուզունյան
19. Սուսաննա Բարխուդարյան
20. Դանիել Իոնեսյան


Ինքը՝ Րաֆֆի Հովհաննիսյանը, չկա այդ ցուցակում, քանի որ նախագահական ընտրություններից հետո ունի ժողովրդի կամքով ամրագրված այլ պարտականություն, որը պատրաստ է իրացնել մինչև վերջ:


Նա նշեց, որ ի տարբերություն ուրիշ կուսակցությունների, որոնք գերադասեցին «խավարը անիծել»՝ դժգոհել ընտրական արատավոր համակարգից և չմասնակցել, հիմա փոխել են դիրքորոշումը: «Գուցե հիմա ազատ արդար է, ես չգիտեմ»,- նկատեց Րաֆֆի Հովհաննիսյանը:


Նա ավելացրեց, թե «Ժառանգության» դրոշը խոնարհելով, փորձեցին հասարակական քաղաքական լայն դաշտն ի մի բերել՝ միավորվել, բայց, ցավոք, կուսակցությունները գերադասեցին «անձամբ» մասնակցել:
Այսուհանդերձ, Րաֆֆի Հովհաննիսյանը հույս ունի, որ համագործակցությունը կլինի ընտրություններից հետո՝ ավագանու շրջանակներում:


«Կեղծարար հիմնական ուժը փետրվար 18-ին հենց պարոն Սարգսյանի ղեկավարած կուսակցությունն է ՝ հարակից կրիմինալ պաշտոնական և ոչ պաշտոնական շառավիղներով, և այդ կուսակցությունից որևէ մեկը վերևից ներքև չի կարող խոսել ազատ, արդար սահմանադրական ընտրությունների մասին, կանխատեսել մայիսի 5–ի ընտրությունների որակն ու արդյունքը»,- ասաց Րաֆֆի Հովհաննիսյանը և ավելացրեց, որ այլևս չի լինելու, որ «էլի փորձեցին, ստել, թագավորել»:


Սա նրա մեկնաբանությունն էր նախագահ Սերժ Սարգսյանի այն հայտարարությանը, որ Երևանի ավագանու ընտրություններն իրենց թափանցիկությամբ կգերազանցեն նախագահական ընտրությունների որակը:


Նա նշեց՝ «Մեր համազգային զարթոնքը չի փոխարինելու քաղաքապետի ընտրություններին, այլ այդ պայքարի շարունակության ճակատներից սոսկ մեկն է լինելու:


«Մենք կարևորում ենք յուրաքանչյուր ընտրություն, հասկանում ենք իրականությունը, որի մեջ բոլորս ապրում ենք, մենք փոխելու ենք և արդեն փոխել ենք իրականությունը, բայց դա պետք է տանենք մինչև տրամաբանական ավարտ և քաղաք առ քաղաք, գյուղ առ գյուղ Սահմանադրության երկրորդ հոդվածը պիտի բանեցնենք այս իշխանության վրա»,- ասաց նա։ Րաֆֆի Հովհաննիսյանը նշեց, որ հասել է ժողովրդի սահմանադրական պայքարի հանգրվանին և ավելացրեց, որ ապրիլի 9-ը դառնալու է Նոր Հայաստանի ծնունդը։


«Ժառանգության» առաջնորդը նշեց, որ ապրիլի 9-ին՝ Սերժ Սարգսյանի երդմնակալության օրը, գործողությունների ծրագիր չկա, կամփոփեն ավելի ուշ: Սակայն նա վստահ է, որ ապրիլի 9-ին ոչ թե 540 000, այլ շատ ավելի մարդ կմասնակցի իր «երդմնակալության» արարողությանը։


«Արդեն որակն ապահովված է, իսկ այդ օրը արդեն կլինի մեծ քանակ, իսկ դրանից հետո, թող ոչ մեկն ինձ և մեր ժողովրդին չսպառնա, քանի որ մեր ժողովուրդն իր իրավունքի մեջ է՝ խաղաղ, սահմանադրական պայքար է տանում և ոչ մի դեպքում իր դեմ չպետք է բարձրանա ոստիկանի, իրավապահի ձեռքը»,- ասաց նա։


Անդրադառնալով Սերժ Սարգսյանի հետ հնարավոր քննարկումներ սկսելուն՝ Րաֆֆի Հովհաննիսյանը հիշեցրեց, որ արդեն ասել է՝ այսքանից հետո անգամ պատրաստ է հարմար վայրում հանդիպել, լսել մյուս կողմից առաջարկները:


«Եթե իրենք համապետական լուծում ունեմ, ես պատրաստ եմ, եթե չէ, միայն այս Օպերայի շենքում հրապարակային ուղիղ հանդիպումը կլինի, որն անհրաժեշտ է, որ այլևս նախագահական նստավայրից ստերի շարան, թույլի նման չբանեցնեն»,-ասաց նա։
Համապետական առաջարկը, ըստ Րաֆֆի Հովհաննիսյանի, քաղաքական առևտուր չէ, այլ անկեղծ փորձ է՝ հասկանալու համար, որ իրենք մեկ ժողովուրդ են։


Րաֆֆի Հովհաննիսյանն էլ իր հերթին հրապարակավ կներկայացնի իրենց մոտեցումները և ծրարով ներկայացնի Սերժ Սարգսյանին։

 

Րաֆֆի Հովհաննիսյանը խոսեց նաև հոր՝ Ռիչարդ Հովհաննիսյանի և մոր՝ Վարդիթեր Կոճոլոզյան-Հովհաննիսյանի այցի նպատակների մասին։


«Ռիչարդը և Վարդիթերը ինձ տվել են հայեցի կրթություն, հայկական դպրոց չեմ գնացել և իրենք են տվել լեզվի, պետականության, ազգի նկատմամբ նվիրման դասերը։ Ինձ համար մեծ օրհնանք է, որ նրանք միացել են զորակցելու։ Ծնողական մտահոգություն կար, որը ես փարատեցի»,- ընդգծեց նա՝ կատակելով, որ մայրը իր հացադուլ հայտարարելու համար նույնիսկ մխիթարվելու պատճառ ունի, քանի որ միշտ անհանգստացել է իր գիրությամբ։


Նա ավելացրեց, որ Հայաստանում Ռիչարդն ու Վարդիթերը տեսան ճշմարտությունը, թե ստի ու կեղծիքի վերջնական պարտությունը որտեղ է:

Ասուլիսի ընթացքում Րաֆֆի Հովհաննիսյանը ծանոթացրեց առաջիկա անելիքներին ու ծրագրերին: Վաղը նշանակված է հերթական հանրահավաքը, որտեղ Րաֆֆի Հովհաննիսյանը իր և մեր ժողովրդի զգալի մեծամասնության անունից վերջին առաջարկը կներկայացնի Սերժ Սարգսյանին:


Հաջորդ ուրբաթ նշանակված հանրահավաքին կլինեն ավելի շատ քաղաքական ելույթներ, և «Ժառանգության» առաջնորդը նշեց, որ հարթակի վրա կլինեն ամենալայն զանգվածների ներկայացուցիչները. խաղաղ պայմաններում զոհված զինվորների հարազատներ, դատարանների որոշմամբ սեփականությունից զրկված անձինք և այլք:


Իսկ Քաղաքացիական բաց խորհրդի վերջին՝ տասներորդ նիստից հետո Րաֆֆի Հովհաննիսյանը կամփոփի բոլոր առաջարկները և կհամադրի դրանք սեփական մոտեցումների հետ: