Եվրոպան մեզ ոչինչ չի առաջարկում, բայց ասում է ընտրեք. ըստ Վաղարշակ Հարությունյանի Հայաստանի շահը Ռուսաստանի առաջարկն է

Հայաստանն ինքը պետք է որոշի, ի վերջո, որտեղ է իր շահը՝ Եվրամիության հետ համագործակցության շրջանակներո՞ւմ, թե Մաքսային միության, իսկ հետագայում՝ գուցե և Եվրասիական միության հետ. Tert.am-ի հետ զրույցում ասաց ՀՀ պաշտպանության նախկին նախարար, գեներալ-լեյտենանտ Վաղարշակ Հարությունյանը, ում համոզմամբ՝ Հայաստանի շահը Ռուսաստանի կողմից առաջարկվող Մաքսային միության կազմում ընդգրկվելու պարագայում ավելի շոշափելի կլինի, քան ԵՄ-ի հետ համագործակցության դեպքում, որը մեզ եղածից ավել բան չի առաջարկում, բայց ասում է ընտրեք:

«Հայաստանն ինքը պետք է որոշի՝ գնահատելով այսօրվա ստեղծված իրավիճակը, գնահատելով գլոբալ համաշխարհային զարգացումները: Այդ հարցը բարդ է, այստեղ մեր կողմից պետք է շատ հստակ իրավիճակը գնահատվի. ի՞նչն է բխում Հայաստանի շահերից և գումարային շահով որոշում կայացնի։ Օրինակ՝ անվտանգության, տնտեսության համար ո՞րն է օգուտ, ի՞նչ զարգացումներ կլինեն դրանից հետո տարածաշրջանում»,- հարցադրումներ արեց նա:

Մինչդեռ, ըստ պաշտպանության նախկին նախարարի՝ Հայաստանի շահերն այսօր ապացուցում են իրական ստորագրված փաստաթղթերը և հարաբերությունները. «Այսօր հայ-ռուսական հարաբերություններն են ապահովում մեր անվտանգությունը, հայ-ռուսական հարաբերություններ են ապահովում մեր էներգետիկան և առևտուրը: Այնպես որ, այստեղ ցանկության հարց չի։ Իրականությունը հետևյալն է, որ մենք այսօր ամբողջովին մեր կապերը հաստատել ենք Ռուսաստանի հետ»:

Ինչ վերաբերվում է Եվրոպային, ապա ըստ նրա՝ այնտեղ, ըստ էության, լուրջ առաջարկ էլ չկա: «Եվրասիական միությանն ու Եվրամիությանն անդամագրվելու խնդիր այսօր չկա: Եվրամիությունը չի առաջարկում Հայաստանին անդամակցել, նա չի ասում, որ Հայաստանի անվտանգությունը կապահովեմ, չկա նման խնդիր: Մյուս կողմից կա առաջարկ, մտնել Մաքսային միություն, որն ունի տնտեսական կոնկրետ առավելություններ մեզ համար»,- ասաց նա, իսկ դիտարկմանը, թե այդուհանդերձ չպետք է մոռանալ, որ Հայաստանը Ռուսաստանի հետ սահման չունի, պատասխանեց. «Սահման չունենք, բայց որ ասում ենք ԵՄ-ին ենք անդամակցում, նրանց հետ ավելի հեռու ենք և սահման չունենք»,- ասաց նա և թվարկեց, թե ինչ կտա մեզ Ռուսաստանի առաջարկն ընդունելու պարագայում:

«Պետք է քննարկվի, թե ինչ է տալիս մեզ: Մաքսային միության դեպքում՝ գազի գինը վաճառվում է ներքին գներով, դա հասկացեք ինչ գին է, տարեկան ասենք, Բելառուսում 180 դոլարով են ստանում, իսկ մենք՝ 270, հետագայում դեռ էլի կթանկացնեն: Եթե չես մաքսայնացնում, ապա միայն գազի վրա Հայաստանը տարեկան կկորցնի մոտ 300 մլն դոլար»,- ասաց նա:

Վաղարշակ Հարությունյանը նշեց, թե Հայաստանը չի խուսափում Եվրոպայի հետ տարբեր հարաբերություններ ունենալ: «Մենք Եվրախորհրդի անդամ ենք, ՆԱՏՕ-ի հետ ենք համագործակցում, բայց Եվրոպան այսօր ավելին չի էլ առաջարկում, բայց ասում է ընտրեք կամ դուք ստորագրում եք Ազատ առևտրի գոտու պայմանագիրը, կամ Մաքսային միությանը: Բայց դա ի՞նչ է նշանակում։ Նշանակում է, որ եթե դա ստորագրում ենք, ո՞վ է հետագայում ապահովում մեր անվտանգությունը, ո՞վ»,- հարցրեց նա:

Դիտարկմանը, թե ըստ տարածված կարծիքի, Ռուսաստանն իր առաջարկով չի՞ փորձում երկարաժամկետ հատվածում հարցականի տակ դնել Հայաստանի անկախության հարցը, Վաղարշակ Հարությունյանը պատասխանեց. «Ի՞նչ է նշանակում անկախության հարցը։ Երբ մենք Եվրախորհրդի անդամ ենք դարձել, մեր առջև ԵՄ-ն պահանջներ չի՞ դնում, դա անկախության կորուստ չի՞: Կորուստ է չէ՞, երբ մեզ ասում են, որ պիտի ընդունեք այս օրենքը, այս սեռական փոքրամասնություններին աջակցեք, հասկանում եք չէ՞, իսկ Ռուսաստանում նման բան չկա: ԱՊՀ երկրներում չկա որևէ մի մարմին, որը պարտադրում է Հայաստանին օրենք ընդունել կամ այլ բաներ: Եթե օբյեկտիվ նայում ենք, որտեղ է մեր շահը, ապա այդ առումով որպես ԵՄ-ի անդամ ավելի շատ կորուստներ կունենանք»,- եզրափակեց նա: