Երևանի ավագանու նորընտիր անդամների առաջին նիստում «Բարև Երևան» դաշինքը փորձեց դրսևորել իրեն որպես ընդդիմություն (տեսանյութ)

Երևանի ավագանու նորընտիր անդամների այսօր կայացած առաջին նիստին ավագանու «Հանրապետական» և «Բարգավաճ Հայաստան» խմբակցությունից բացի մասնակցում էին նաև «Բարև Երևան» դաշինքի 5 անդամները. Ստյոպա Սաֆարյանն առաջին տոնական նիստին բացակայում էր, սակայն նրա գործընկերներն ավագանու առաջին նիստին իսկ չթաքցրեցին իրենց ընդդիմադիր կեցվածքը, ինչը հանգեցրեց փոքրիկ կոնֆլիկտի ՀՀԿ ավագանու անդամների հետ։

Նիստը սկսեց Երևանի քաղաքապետարանի համար հիմն դարձած «Երևան-Էրեբունի» երգով։  Հոտնկայս հիմնը լսելուց հետո նիստը վարող ՀՀԿ ավագանու ցուցակով ընտրված անդամ Աստղիկ Գևորգյանը անուն առ անուն ներկայացրեց բոլոր ավագանու խմբակցությունների անդամներին, ըստ որի՝ ընտրված ավագանու անդամներից ներկա էին՝ ՀՀԿ ցուցակից 42 անդամ, ԲՀԿ-ից՝ 17 անդամ և «Բարև Երևան» դաշինքից 6 անդամ։

Աստղիկ Գևորգյանը հայտարարեց, թե քանի որ ՀՀԿ-ն ստացել է ավագանու տեղերի 50 %-ից ավելին, ուստի համապատասխան օրենքի՝ ցուցակը գլխավորող Տարոն Անդրանիկի Մարգարյանն օրենքի ուժով համարվում է ընտրված՝ Երևանի քաղաքապետի պաշտոնում։ «Հրավիրում եմ զբաղեցնել քաղաքապետի Ձեր տեղը»,-հայտարարեց նա։

Տարոն Մարգարյանը մինչ կվերաստանձներ պաշտոնը՝ շարունակելու նիստի վարումը, հանդես եկավ ելույթի խոսքով՝ ավագանու առաջին նստաշրջանի կապակցությամբ՝ շնորհավորելով ավագանու անդամներին։

«Ողջունում եմ նրանց, ովքեր առաջին անգամ են ավագանի ընտրվել, նաև «Բարև Երևան» դաշինքի մուտքը»,- ասաց նա և նշեց, որ բոլորն այստեղ են տարբեր ծրագրերով, բայց ընդհանուր նպատակով։

Տարոն Մարգարյանը նաև շնորհակալություն հայտնեց՝ մայրաքաղաքի բնակչությանը ստացած վստահության քվեի համար։ «Վստահեցնում եմ, որ երևանցու հույսերն անպայման արդարացնելու եմ»,- ասաց նա և ապա անցավ օրակարգային հարցերին՝ ժամանակավոր հաշվիչ հանձնաժողովի ձևավորում, երդման արարողության հետ կապված հարցեր, ավագանու ղեկավարների, քարտուղարության անդամների նաև հանձնաժողովների նախագահների ընտրություն։

«Բարև Երևան» դաշինքի ղեկավար ընտրված Անահիտ Բախշյանը զարմացավ. «Օրակարգը չեք հաստատելո՞ւ»։ Տարոն Մարգարյանը նշեց, որ քանի որ առաջին նիստն է, այդ իսկ պատճառով՝ ոչ։ Պատասխանը համոզիչ չէր։ Ավագանու անդամներն անցան արդեն քվեարկության միջոցով հանձնաժողովների նախագահների առաջարկություններին և քվեարկությանը, ինչին հրաժարվեց մասնակցել «Բարև Երևան» դաշինքը։

«Կեղծված ընտրությունների արդյունքով այսպիսի ավագանին չի համապատասխանում, այդ իսկ պատճառով խմբակցությունը չի մասնակցում քվեարկությանը»,- հայտարարեց Արմեն Մարտիրոսյանը։

Տարոն Մարգարյանը խնդրեց, որ խմբակցության ղեկավարը, այսինքն՝ Անահիտ Բախշյանը խոսի։

Այնուհետև ամբողջ նիստին ընդդիմադիր ավագանիները հանդես էին գալիս ռեպլիկներով, ինչին ՀՀԿ-ականներից մեկի նյարդերը տեղի տվեցին։ «Էդ հայտարարությունն ո՞վ արեց, թե «նայած ով ոնց կպահի»»,- հարցրեց նա։ «Բարև Երևան» դաշինքի անդամ Գագիկ Բաղդասարյանը վրա բերեց. «Նախագահողին լսեք, ռազբորկի չենք եկել»։

Այնուհետև ելույթի խոսք ասաց նաև ԲՀԿ ավագանու խմբակցության ղեկավար ընտրված Թամարա Պողոսյանը։ «Առաջին սկզբունքն այն պետք է լինի, որ քննարկումներին մասնակից դարձնել նաև երևանցուն»,- ասաց նա։

Քանի որ խմբակցությունը հնարավորություն ուներ ղեկավարել մեկ հանձնաժողով, Թամարա Պողոսյանն առաջարկեց. «Մշակույթի, կրթության և գիտության հանձնաժողովի ղեկավար առաջադրել Թամարա Պողոսյանին»։ Ինքնառաջադրումը քվեարկությամբ հաստատվեց։  Հաջորդ նիստը որոշվեց անցկացնել 2013թ. սեպտեմբերի 10-ին։