Դժգոհություններ վճարովի ավտոկայանատեղիներից. քաղաքապետարանը նման բողոքները համարում է ուղղորդված

Օրերս մի խումբ վարորդներ Ազգային ժողովի մոտ բողոքի ակցիա էին կազմակերպել կարմիր գծանշումներով առանձնացված վճարովի ավտոկայանատեղիների կապակցությամբ՝ նշելով, որ շատերը չեն կարող մի ժամ կայանելու դիմաց վազել բանկ ու կատարել դրամական փոխանցումները:
 

Վարորդների բողոքները լսած «Բարգավաճ Հայաստան» խմբակցության քարտուղար Նաիրա Զոհրաբյանը Tert.am-ի հետ զրույցում ասաց, որ մոտ 600 հազար մարդու առնչվող այս կարգը պետք է մշտական ու գիտահանրամատչելի իրազեկում ունենա, ինչպես օրինակ՝ ընտրությունների ժամանակ ցուցադրվող սոցիալական տեսահոլովակները:

«Քաղաքապետարանի ինչ-որ ներկայացուցիչ շաբաթը 1-2 օր ինչ-որ ասուլիս է տալիս և ինչ-որ կարգեր է բացատրում … Ինքս երեկ հերթական ասուլիսներից մեկը լսեցի ու հասկացա, որ քաղաքացին պետք է sms-ով արագ ինչ-որ գումար փոխանցի կամ արագ վազի բանկ, վճարումներ կատարի: Սա կատարյալ աբսուրդ է: Մարդիկ պարտավոր չեն նստել ու հեռուստացույց նայել ու սպասել՝ քաղաքապետարանի ինչ-որ աշխատակից ինչ-որ բան կասի՞, թե չէ: Եթե քաղաքապետարանին թվում է, թե բոլորը բանուգործները թողած սպասում են, թե քաղաքապետարանի Տրանսպորտի վարչության պետը երբ է ասուլիս տալու, չարաչար սխալվում են»,- ասաց Նաիրա Զոհրաբյանը:

Հիշեցնենք, որ հուլիսի 1-ից մայրաքաղաքում կգործի վճարովի ավտոկայանատեղիների կազմակերպման նոր ընթացակարգ և, ըստ նոր կարգի, վճարովի կայանատեղիներում կայանման դիմաց գումար չի գանձվում մինչև 5 րոպե տևողությամբ կանգառ կատարելու դեպքում, 5 րոպեից ավելի մինչև մեկ ժամ կանգնելու դեպքում վճարման չափը կազմում է 100, մեկ օրվա համար 500, մեկ շաբաթվա համար 1000, մեկ ամսվա համար 2000 դրամ, մեկ տարվա համար՝ 12000 դրամ: Երեկոյան ժամը 24:00-ից մինչև առավոտյան ժամը 9:00-ն կայանելու համար գումար չի գանձվում: Գործում է նաև տարեկան կտրվածքով վճարումների համակարգ:

Իսկ վճարումները կատարվելու են բացառապես անկանխիկ եղանակով, նաև՝ SMS հաղորդագրությամբ կամ բանկերում, վճարահաշվարկային կազմակերպությունների, տերմինալների կամ սպասարկող կազմակերպության էլեկտրոնային կայքի միջոցով:

Հիշեցնենք նաև, որ կայանման դիմաց չվճարելն առաջացնում է տուգանքի նշանակում` նվազագույն աշխատավարձի հնգապատիկի չափով:

ԲՀԿ-ական պատգամավորի խոսքով՝ եղել են մարդիկ, որոնք բողոքել են, որ, օրինակ, sms գրել չգիտեն: Պատգամավորը ճշտել էր, որ կայանատեղիների վճարումների համար սահմանված տուգանքները չեն գործելու մինչև այս տարվա օգոստոսի 1-ը, այս իրողությունը, դարձյալ շատերը չգիտեն:

Նաիրա Զոհրաբյանը նկատեց, որ փոխարենը քաղաքացին հիմա գիտի, որ տարիներ շարունակ այն փողոցներում ու բակերում, որտեղ կայանել է իր մեքենան, մի գիշերում կարմիր գծեր են քաշել և որ այսուհետ դրա համար ինքը պարտավոր է վճարել:


Նաիրա Զոհրաբյանը հավելեց, որ «Փարկինգ Սիթի Սերվիս» ընկերությունը, որը մայրաքաղաքում վճարովի ավտոկայանատեղիների ծառայություն մատուցող միակ ընկերությունն է, ստեղծվելով մրցույթի հայտարարումից 1-2 ամիս առաջ, միայնակ է մասնակցել «ափալ-թափալ» կազմակերպված մրցույթին:

«Եվ հիմա քաղաքապետարանը բոլոր հարցերը վերահասցեագրում է այդ կազմակերպությանը՝ ասելով, որ իրենք ունեն միայն վերահսկողական ֆունկցիա»,- նշեց Զոհրաբյանը:

Սակայն, ըստ պատգամավորի, ամենամեծ խնդիրը կապված է օրենսդրության հետ: Բանն այն է, որ տուրք չվճարելն առաջացնում է օրենքով սահմանված պատասխանատվություն:

«Սակայն մենք այդ օրենքը չունենք, որ նման դեպքերում քաղաքացին կանչվում է պատասխանատվության: Բացի այդ, անհայտ է՝ եթե ինչ-որ մեկը կայանել է իր մեքենան այդ կարմիր գծերի վրա, ինչ-որ մեկը՝ այս «Փարկինգ Սիթի Սերվիս» կազմակերպությունը պատասխանատվություն կրու՞մ է: Այսինքն՝ իմ մեքենան այնտեղ որպես ի՞նչ է կայանված. որպես պատա՞նդ, թե՞ հսկվող մեքենա, որի դեպքում, եթե մեքենային ինչ-որ վնաս է հասցվում, իրենք կրում են պատասխանատվություն»,- իր մտահոգություններն արտահայտեց պատգամավորը:

Որպես ամփոփում պատգամավորը հավելեց. «Մեկ բան հստակ է. սա արվել է ինչ-որ մեկին արտոնյալ բիզնես տալու համար: Մենք, իհարկե, պարզելու ենք, թե ով է այդ արտոնյալը: Բերեմ այդ արտոնություններից մի օրինակ՝ եթե դու կայանում ես ու չես վճարում, այդ կազմակերպությունն իրավունք ունի ոստիկանությունից նկարող սարքերի միջոցով ստանալ տեղեկատվություն, ինչպես նաև այդ մեքենայի տիրոջ հասցեն, անուն-ազգանունը: Ցո՛ւյց տվեք ինձ այդ օրենքը, որ այդ կազմակերպությունը նման լիազորություն ունի: Այսինքն՝ առանց օրենսդրական ու իրավական հիմքի ուզում են փող աշխատել: Չի ստացվելու, սա շատ մեծ աղմուկի է վերածվելու»:

Նշենք, որ երեկ Երևանի ավագանու նիստին ԲՀԿ ավագանին այս հարցը բարձրացրել է:

Tert.am-ի հետ զրույցում Երևանի քաղաքապետարանի Հասարակայնության հետ կապերի վարչության պետ Արթուր Գևորգյանը՝ հայտնելով, որ «Փարկինգ Սիթի Սերվիս» ընկերության տեսահոլովակները հեռարձակվում են հինգ առաջատար հեռուստաընկերություններով, ավելացրեց. « Ես այստեղ որևէ բան չեմ տեսնում, ես շատ ավելի հակված եմ մտածելու, որ այդ դժգոհությունն ուղղորդված է: Կար ժամանակ, որ էդ գումարները հավաքում էին ու դրանք գնում էին չգիտեմ, թե ուր: Մարդիկ զրկվել են այդ փողի աղբյուրից և մարդկանց ձեռք չի տալիս, որ այդ գումարները գալիս են համայնքային բյուջե»:

Արթուր Գևորգյանը առաջարկեց նաև մի ոչ բարդ թվաբանական գործողություն կատարել՝ մեկ օրվա մեջ «ստայանշիկին» տրվող մեկանգամյա 200 դրամը բազմապատկել ամսվա 30 օրերով և մեկ ամսվա համար ստացվող 6000 դրամը համեմատել մեկ տարվա համար գանձվող 12 000 դրամի հետ:

Ի պատասխան հարցադրման, թե նախկին կարգն, այնուամենայնիվ, 5000 մարդու հացի խնդիր էր լուծում, Արթուր Գևորգյանը բարկացավ՝ ասելով. «Այն ժամանակ բոլորը՝ լրատվամիջոցները, քաղաքական գործիչները չէին ասում՝ «երկիրը երկիր չի, կարգուկանոն չկա, չգիտես ում ես վճարում»: Ասում էին չէ՞»:

Արթուր Գևորգյանի կարծիքով՝ հիմա այդ երաշխիքը, որ գումարներն անհայտ տեղ չեն մտնում, երաշխավորվում է հենց էլեկտրոնային միջոցների ներդմամբ, որն էլ ապահովելու է վերահսկելիություն ու թափանցիկություն:

Ինչ վերաբերում է հարցին, որ մարդը SMS գրել չգիտի, ապա դա  Գևորգյանը համարում է երեսպաշտություն:


«Եթե SMS գրել չգիտի, ուրեմն՝ թող դուրս գա՝ տերմինալում վճարի կամ թող, ի վերջո, վճարովի կայանատեղիում չկանգնեցի»,- վրդովված ասաց պաշտոնյան:

«Աքիլլես» ավտովարորդների կազմակերպության նախագահ Էդուարդ Հովհաննիսյանը ևս համաձայն չէր Արթուր Գևորգյանի հետ և ասաց. «Մարդիկ կան՝ ո՛չ ինտերնետ գիտեն, ո՛չ SMS գրել գիտեն, ո՛չ էլեկտրոնային փոստ, ո՛չ էլ տերմինալ: Կամ ի՞նչ է նշանակում՝ «թող ուրեմն կարմիր գծի վրա չկանգնեցնեն», ախպեր ջան, ես ո՛չ կամպյուտեր ունեմ, ո՛չ բջջային: Որտե՞ղ է գրած, որ քաղաքացին պարտադիր պետք է իմանա էդ բոլոր բաները»: