Հացի գինը կամայականորեն թանկանում է. ՏՄՊՊՀ-ն պնդում է՝ անելիք չունի, ՀԿ նախագահը հակադարձում է՝ գլուխները պատով են տվել

Հացի գինը խանութներում կամայականորեն թանկանում է, իսկ Տնտեսական մրցակցության պաշտպանության պետական հանձնաժողովը պնդում է, որ այն վերահսկելը իր գործառույթների մեջ չի մտնում։ Tert.am-ը շրջել է խանութներով և քաղաքացիներից փորձել է պարզել` հացի գնի թանկացում նկատե՞լ են, և եթե այո, ապա ինչքա՞ն է այն կազմել:

Քաղաքացիներից մեկը՝ Աննա Գրիգորյանը, նշեց, որ ինքը Նոր Նորքի զանգվածում է ապրում և իրենց մոտակա խանութում հացը թանկացել է 30 դրամով։ Քիչ չէին նաև այն պնդումները, որ հացի թանկացում չեն նկատել։ Որոշ քաղաքացիներ էլ նշում էին, որ հացը թանկացել է 10-ից 20 դրամով։

Օրինակ՝ սուպերմարկետներից մեկում գնորդն արձանագրել էր, որ հացի գինը 20 դրամով ավելացել է, չնայած նույն տեղից մենեջերը մեզ հետ զրույցում խուսափեց պատասխանել՝ թանկացումներ եղե՞լ են, թե՞ ոչ։

«Ես չգիտեմ, սաղ նորմալ ա»,- ասաց նա, սակայն նրան ընդհատեց արդեն վճարման կետում կանգնած տիկինը և, հացը ցույց տալով՝ նշեց, որ եթե առաջ ինքը նույն այդ հացը 180 դրամով էր գնում, այսօր արդեն այն դարձել է 200 դրամ։

Tert.am–ի այցելած երկրորդ սուպերմարկետում գինն անփոփոխ էր մնացել։ Մենեջերը նշեց, որ իրենց մոտ թանկացումներ դեռ չեն եղել։ Հացի թանկացում ենք նկատել մարզերում, մասնավորապես Արարատի մարզի Մասիս քաղաքի որոշ խանութներում հացի մի քանի տեսակների գինը 20-30 դրամով ավելացել է:

Տնտեսական մրցակցության պաշտպանության հանձնաժողովի մամուլի քարտուղար Գայանե Սահակյանը Tert.am-ի հարցին, թե ով պետք է վերահսկի և զսպի հացի շուկայում նման կամայական թանկացումները, պատասխանեց, որ՝ ոչ ՏՄՊՊՀ-ն։

«Հանձնաժողովը հացի շուկայում վերահսկողություն չի իրականացնում, քանի որ այս շուկայում չկան գերիշխող տնտեսվարողներ, այստեղ գործում են հարյուրավոր՝ երկու երեք, գուցե ավելի շատ տնտեսվարողներ, և սա համարվում է ազատ մրցակցային ինքնակարգավորվող շուկա, քանի որ, ինչպես նշեցի, այստեղ չկան տնտեսվարողներ, որոնք խոշոր դիրք զբաղեցնեն»,- ասաց նա և շարունակեց, որ ՏՄՊՊՀ-ն զբաղվում է միայն մենաշնորհային դիրք պարունակող ապրանաքատեսակների հարցով։

«Հանձնաժողովին տրված լիազորությունների շրջանակում մենք կարող ենք վերահսկողություն իրականացնել այն շուկաներում, որտեղ տնտեսվարողը զբաղեցնում է շուկայի 1/3-րդից ավելին։ Նման տնտեսվարողներ հացի շուկայում չկան»,- ասաց նա և և նշեց, որ ինքը չի կարող ասել, թե ով է զսպող կառույցն այս պարագայում։

Թե ի վերջո ո՞վ պետք է վերահսկի հացի շուկայի նման խառնաշփոթը՝ «Սպառողների միություն» ՀԿ-ի նախագահ Արմեն Պողոսյանը նշում է. «Դրան ներկա վիճակում սահմանափակում չկա, եթե ճիշտ վճարեն հարկերը, այդ էլ կլինի իրենց սահմանափակող հանգամանքը։ Եթե հիմնավորված չէ, պետք է պատժվեն»։ Հարցին՝ թե ո՞ր կառույցը պետք է որոշի՝ պատժելու ենթակա՞ է տվյալ տնտեսվարողը, թե՞ ոչ, ՀԿ նախագահը մատնացույց արեց ՏՄՊՊՀ-ին։ Մենք նրան փոխանցեցինք հանձնաժողովի դիրքորոշումը, որ իրենք այդ հարցում լիազորություններ չունեն։ Արմեն Պողոսյանը հակադարձեց. «ՏՄՊՊՀ-ն գլուխը քարն է տվել, բա ո՞վ ունի։ Դա իրենց վրայից գործը քցելու եղանակ է։ Հա, գերակայողների հետ պետք է զբաղվեն, բայց ալյուրը գերակայող չի հա՞, իրանց կարծիքով։ Վաճառողների մեջ չկա, բայց ալյուր ներկրողների մեջ էլ հո կա՞, նույն շղթան չի՞։ Նույնն ա, ներկողները տարածում են և ցանցը գործում է, վերջում այդ գումարը նորից հավաքվում է ներկրողի մոտ, չէ՞, բա չեղա՞վ գերակայող դիրք»,- ասաց նա։

Բացի ՏՄՊՊՀ-ից, ըստ Արմեն Պողոսյանի, կարգավորման գործոն պետք է հանդիսանա նաև Պետեկամուտների կոմիտեն։

«Նա է նայում հասույթները, ծախսերը, հարկերը, եթե ամեն ինչ նորմալ է, ուրեմն նորմալ է, բայց եթե շատ է ծախել, բայց հարկը քիչ է բայց տալիս, ուրեմն պետք է պատժվի»,- ասաց նա և եզրակացրեց, որ, փաստորեն, այդ երկու մարմիները «օպտիմիալ ռեժիմով չեն աշխատում։

«Առայժմ այդպես կմնա, մինչև որոշեն, թե ինչ է լինելու»,- ասաց նա և հիշեցրեց, որ այս գործում այլ մարմիններ էլ պետք է լինեն։

«Կա նաև վարչապետի վերահսկողության և նախագահի վերահսկողության ծառայություն։ Իմիջայլոց, ես գրել եմ նախագահին հենց հացի վերաբերյալ և չկա ոչ մի ռեակցիա, գրել եմ, որ հացի և շաքարավազի ստուգում պետք է անցկացնեն, այն առումով, որ գինը և քաշն իրար չեն համապատասխանում, պարզ և հստակ գրել եմ ու ասել, որ պետք է համատեղ ստուգումներ սկսենք, բայց մինչև հիմա ոչ մի արձագանք չկա»,- նշեց նա։

Լուսանկարը՝ lragir.am-ի