«Մենք գերի չենք։ Եթե լավ փաստաթուղթ չեղավ, չենք ստորագրի». ԱԺ նախագահը ՄՄ-ին անդամակցելու մասին

ԱԺ նախագահ Հովիկ Աբրահամյանն այսօր ԱԺ–ում լրագրողների հարցին պատասխանելով հայտարարեց, որ եթե Մաքսային միության պայմանագիրը ՀՀ-ի շահերին դեմ լինի, ապա այն չի ստորագրվի։

«Մենք գերի չենք, եթե լավ փաստաթուղթ չեղավ, մենք չենք ստորագրի, դա նախնական փաստաթուղթ է, կարող է լինի փաստաթուղթն ու Ազգային ժողովը չքվեարկի»,- ասաց նա;

ԱԺ նախագահն անհիմն համարեց այն տեսակետները, թե բանակցությունների սեղանին դրված էր ԼՂ ճանաչման հարցը։ «Դա իրականությանը չի համապատասխանում։ Մաքսային միությանը միանալուց հետո պետք է սկսվի մեծ գործընթաց, պետք է քննարկվեն պայմանագրերը, ձևաչափերը, փաստաթղթերը»,-ասաց նա։

Ինչ վերաբերում է ԵՄ-ի հետ հարաբերությունների զարգացմանը, ապա ըստ Հովիկ Աբրահամյանի, իրենք շարունակելու են համատեղ աշխատել ԵՄ–ի հետ։

«Ռուսաստանը երբեք չի ասել, որ մենք չենք կարող հարաբերություններ զարգացնել Եվրամիության հետ, մենք անկախ երկիր ենք, իշխանություն, որը որոշում է իր արտաքին քաղաքականությունը»,– ասաց նա։

« Մենք շարունակելու ենք մեր համատեղ աշխատանքը Եվրամիության հետ, շարունակելու ենք Հայաստանի Հանրապետությունում իրականացող բարեփոխումների գործընթացը:Մենք շարունակելու ենք հանդիպել, բանակցել Եվրամիության հետ, որը ձեռնտու է Հայաստանի շահերին»,- ասաց նա։

Դիտարկմանը, որ եվրոպացի գործընկերները չեն ցանկանում, ինչի մասին հայտարարել է ԵՄ-ի հանձնակատար Շտեֆան Ֆյուլեն, ԱԺ նախագահն արձագանքեց. «Եթե ինքն ասում է ինքը չի ուզում, դա իր գործն է: Իրենք ասել են, որ կան հակասություններ, մենք կքննարկենք, միգուցե, հակասությունները վերացվեն, կյանքը ցույց կտա, ժամանակը ցույց կտա, մենք ուզում ենք, որ մեր երկիրը զարգանա, գնա առաջ»։

Հարցին, թե այդուհանդերձ կնախաստորագրվի համաձայնագիրը, ԱԺ նախագահը պատասխանեց. «Կյանքը ցույց կտա, կստորագրվի, թե ոչ»:

Հովիկ Աբրահամյանը նաև հստակեցրեց, թե իրենք խոսել են Ասոցացման համաձայնագրի մասին, մինչդեռ Խորը և համապարփակ ազատ առևտրի գոտին այլ հարց է։


«Մենք ասում ենք, որ Մաքսային միությունը չի հակասում Ասոցացման համաձայնագրին։ ՀՀ իշխանությունները կողմնակից են նախաստորգրելու Ասոցացման համաձայնագիրը»,- նշեց նա, իսկ ԵՄ բարձրաստիճան պաշտոնյանների կողմից տրվող կոշտ գնահատականներին, որ ՀՀ իշխանության նկատմամբ Ռուսաստանը ճնշումներ է գործադրել, նշեց. «Ես որևէ ճնշման ներկա չեմ եղել, որևիցե մեկը մեզ չի ստիպել անդամակցել Մաքսային միությանը»։

ԱԺ նախագահը նշեց, որ Մաքսային միությանը միանալու որոշման մասին իրենք խոսել են ՀՀ նախագահի հետո, ՕԵԿ-ի հետ ևս խոսել են: «Դա մենք քննարկել ենք, և ես դա ասել եմ»,-ընդգծեց նա։

Դիտարկմանը, թե ՕԵԿ-ը հերքել է դա, նա արձագանքեց. «Չի հերքել, դուք եք հերքել: Բա ես մեղավո՞ր եմ, որ հստակ չեն ասում: Մենք քննարկել ենք ու տվել ենք մեր համաձայնությունը, ազնիվ ու արդար չէ, որ տեղյակ են ու չեն ասում, որ տեղյակ են: Միշտ էլ այդ մասին խոսվել է: Ես ուզում եմ արձանագրեք, որ յուրաքանչյուր պայմանագիր պետք է լինի մեր պետության շահերից»:

Հարցին, թե չորս տարի շարունակ չէի՞ն գիտակցում, որ Մաքսային միությունը բխում է մեր երկրի շահերից, ԱԺ նախագահը պատասխանեց. «Իսկ ո՞վ ասաց, որ ես չէի գիտակցում... բայց Մաքսային միությունը չորս տարի է ստեղծվե՞լ է: Անիմաստ ու անհիմն խոսում եք»,-ասաց նա և ևս մեկ անգամ կրկնեց, որ Հայաստանը ցանկություն ունի ԵՄ-ի հետ ասոցացման համաձայնագիրը ստորագրելու:


«Ես զարմանում եմ, որ դուք մտածում եք, որ հանրապետության նախագահը մի քայլ կանի, որ չի բխի իշխանության շահերից»,– եզրափակեց Հովիկ Աբրահամյանը: