Շանթ Հարությունյանը ցանկանում է հեղափոխություն անել, որպեսզի հայրենիքի առաջ իրեն ճիշտ պահած լինի (տեսանյութ)

«Ցեղակրոն» կուսակցության նախագահ Շանթ Հարությունյանը Tert.am –ի հետ զրույցում մանրամասնել է իր հայտարարած հեղափոխության շարժառիթները, դրա ժամկետները:

«Հիմա, եթե հասարակության մեջ կլինեն բավարար թվով մարդիկ, որոնք կգտնեն, որ հեղափոխությունն է միակ ճանապարհը ու իրենք պատրաստ են դուրս գալ փողոց՝ ընդհուպ մեռնելու , այդ դեպքում ընթացքը ցույց կտա»,- ասում է Շանթ Հարությունյանը:

- Պարոն Հարությունյան, ինչո՞ւ մի օր որոշեցիք հեղափոխություն անել:

- Ես հեղափոխության կոչով հանդես չեմ եկել, ես հայտարարել եմ, որ դուրս եմ եկել հեղափոխության: Ես կոչ ոչ մեկին չեմ անում, ես մտածում եմ՝ այնպիսին է երկրի վիճակը, որ միայն հեղափոխությունը կարող է նորմալացնել երկիրը ու ով այդպես կարծում է, ինքն էլ կարող է դուրս գալ հեղափոխության: Իսկ մյուս մասը հարցի, որ ասում եք՝ ինչու, ոնց, ե՞րբ որոշեցի…

- Ինչո՞ւ որոշեցիք հենց հիմա:

- Դա հիմա չեմ որոշել: Երկու տարի առաջ եմ որոշել, 2011 թվին «Երկիր մեդիա»-ով հայտարարել եմ, որ 2013–ին Հայաստանում կանենք հեղափոխություն և իմ որոշումն էլ կատարում եմ:

- Պարոն Հարությունյան, ի՞նչ երաշխիքներ ունեք, որ Ձեզ կհաջողվի անել այն, ինչը չհաջողվեց նախորդներին՝ Լևոն Տեր-Պետրոսյանին, Րաֆֆի Հովհաննիսյանին:

- Իմ երաշխիքը նրանում չէ, որ կհաջողվի, թե չէ, իմ երաշխիքը նրանում է, որ միակ ճանապարհը սա է, ու ես եթե ուզում եմ իմ խղճի հետ հաշտ լինել, իմ հայրենիքի առաջ ինձ ճիշտ պահած լինել, իմ երկրի արժանապատվության համար, ի վերջո,պատրաստ եմ գնալ այդ հեղափոխությանը ու թեկուզ մեռնեմ: Չնայած, կարծում եմ, որ հաղթելու համար ռեալ շանսեր կա ու իրականացնելու այն իդեալները, որոնց համար պատրաստ եմ մեռնելու: Բայց այնպես որ, որևէ մեկը երաշխիք տա, որ աշխարհում որևէ հեղափոխական ասի՝ մենք սկսում ենք ու հաղթելու ենք … տեսականորեն, այո՛, վստահ եմ, որ եթե հայ ազգը չի մեռելու, ուրեմն միակ ճանապարհն այն է, որ մի օր հեղափոխությունը հաղթելու է, դրա համար չի մեռնելու: Հաղափոխությունը միայն իշխանափոխություն չէ, հեղափոխությունը արժեքների փոփոխություն է, աշխարհայացքի ու արժեքների փոփոխություն է: Սա անհրաժեշտ է, թե չէ հայ ազգը կմեռնի: Ու պետական ստրուկտուրան չոչնչացնի, ինքը կփլվի, կմարի, օրինակ՝ Հռոմը թշնամու ձեռքով չի կործանվել, այն հեղափոխության կարիք է ունեցել, չի կարողացել այդ վերաարժևորումն անել, արժեքների գնահատումը, այսինքն՝ հեղափոխությունը: Վերջին 2000 տարում մի քանի հազար ժողովուրդներ են վերացել, հարյուրավոր ու տասնյակ պետություններ, հզոր, որովհետև ունակ չեն եղել ներսից ոչ թե բարեփոխվել, այլ հեղափոխվել։ Հիմա ուզում եմ ասել, որ չկա որևէ հեղափոխություն հաղթած, որ իրենք հարյուր տոկոսով վստահ են եղել, որ հաղթելու են, բայց հավատացել են, որ միակ փրկությունը դա է, այդ հավատը բերել է հաղթանակի: Այդ հավատը իսկապես միշտ բերում է հաղթանակի: Ես անձամբ հավատում եմ դրան, դրա համար հավատում եմ նաև հնարավոր հաղթանակին, բայց քանի որ ես Սասունցի Դավիթը չեմ, ոչ էլ Տորք Անգեղը ես չեմ կարող… եթե իմանամ, որ աշխարհում եղել է մի երկիր, որտեղ մի հոգի ժողովրդին փրկել է, ես վստահ կասեի, որ ես եմ, բայց ոչ մի տեղ չկա, դա մենակ լեգենդներում է եղել՝ Տորք անգեղն ու Սասունցի Դավիթը: Ես էլ ո՛չ Տորք Անգեղն եմ, ո՛չ էլ Սասունցի Դավիթը:

Հասարակ հեղափոխությունն էլ անհատական դրսևորում չէ, հեղափոխությունն ինքը հանրային դրսևորում է՝ հասարակական , ժողովրդական, քաղաքացիական: Հիմա եթե հասարակության մեջ կլինեն բավարար թվով մարդիկ, որոնք կգտնեն, որ հեղափոխությունն է միակ ճանապարհը ու իրենք պատրաստ են դուրս գալ փողոց՝ ընդհուպ մեռնելու, այդ դեպքում ընթացքը ցույց կտա: Մի օր կգաք՝ մի 15-20 օր հետո, եթե ավարտված չլինի արդեն հեղափոխությունը հաղթանակով, այդ ժամանակ նույնիսկ կարող է ժամն ու օրն ասեմ, որովհետև իմ համար հաղթելու ու պարտվելու շանսերը նույն հավանականության մեջ են՝ կարելի է հաղթել մի քանի ժամ հետո, կարելի է… ուրիշ բան ասեմ՝ դեկտեմբերի 2-ին իմ մաքսիմալ ծրագիրն է, դեկտեմբերի 2-ին պետք է Հայաստանում իշխանություն չլինի: Ու պետք է Պուտինը տեղից տեղ փախնի այդ օրը, եթե այստեղ լինի, իր թիկնազորը չի իմանալու՝ այս շենքից տանի այն շենքը, թե այն շենքից՝ այն շենքը: Վերջում Սերժ Սարգսյանին էլ է հետը տանելու:

Այսօրվա դրությամբ ինձ համար վերջին ժամկետը հեղափոխության էսօրվա դրությամբ դեկտեմբերի 2-ն է, եթե Պուտինը գա, եթե 7-ին գա, ուրեմն 7-ն է, ուրիշ բան չունեմ ասելու:

- Ի՞նչ քայլեր եք պատրաստվում անել:

- Ձեզ ինչ, ԿԳԲ–ն է ուղարկե՞լ: Գնացեք հեղափոխությունների մասին կարդացե՛ք, տեսեք՝ ինչպես են հեղափոխություններ լինում, մտածեք ու գրեք:

- Ձեր անունով ֆեյսբուքյան խումբ է բացվել միանալու կոչով, Դո՞ւք եք հեղինակը:

- Ես չեմ բացել, ես ոչ մեկին կոչ չեմ անում միանալ: Կան ընկերներ, որոնք ցանկացել են միանալ, իրենք են բացել: Այդ հեղափոխությունն անհատական է, քանի որ քաղաքացիական է, դա կոլեկտիվ պատասխանատվություն չի ենթադրում, դա միտինգը չէ, չգիտեմ ինչը չէ, դա անհատական պատասխանատվության հարց է, որովհետև ինքը հղի է վտանգներով՝ մարդու կյանքի հետ կապված: Չես կարող ասել, որ զոհեր չեն լինի, եթե դրա անունը հեղափոխություն է, իսկ եթե զոհի հարց կա, Շանթը չի վերցնի իր վրա պատասխանատվություն և մարդկանց ասի՝«եկե՛ք, միացե՛ք»: Ոչ թե նրա համար, որ Շանթը վախկոտ է, այլ ասում է, որ եթե մարդը ունի գիտակցություն ու պատրաստ է մեռնել իր իրավունքների համար, թող միանա:

Ֆեյսբուքյան խմբերը ընկերներս են բացել, ես դա քարոզչամիջոց եմ համարում, որովհետև լրատվամիջոցները կարան մեր նախաձեռնած հեղափոխությունը բլոկադայի մեջ գցեն, իսկ ֆեյսբուքը կարող է մեզ օգնել:

- Հիմա պայքարող խմբեր կան, եթե առաջարկեն Ձեզ միանալ իրենց, ի՞նչ որոշում կընդունեք:

- Ինչի՞ն միանամ, արտահերթ ընտրություններ պահանջողների՞ն: Հա՞: Օրինակ՝ հեղափոխություն ուզող լիներ, կգայի, կմիանայի, չի եղել, այսքան սպասել եմ, այդ բոլոր նախաձեռնող խմբերին ... ես դեմ եմ ընտրություններին Հայաստանում, որովհետև ինձ չեմ ուզում էշի տեղ դնել, արտահերթ ընտրություններ էլ չեմ ուզում պահանջել: Ու նմանատիպ բաներ, ծրագրեր ներկայացնեմ կառավարությանը, թքած ունեմ, իրենք պարտավոր են իրենք ծրագիր ներկայացնել, բա ո՞նց են ընտրվել, թե՞ ոչխարի տեղ են դրել: Ասենք ես ասեմ՝ գիտե՞ք, որ իմ ծրագրերը քննարկեք, լավ կլինի: Ընդհանրապես մի՛ արեք իմ ծրագրերը, գնացե՛ք ձերը արեք, հենա, արել եք, տեսել ենք, դժգոհ ենք:

- Իսկ եթե իրենք պատրաստակամություն հայտնեն միանալ Ձեզ, օրինակ՝ Րաֆֆի Հովհաննիսյանը:

- Րաֆֆի Հովհաննիսյանը գա որպես քաղաքացի, Արմեն Մարտիրոսյանը գա, չգիտեմ Պողոս Պետրոսյանը… մեր հարևան Րաֆֆի Հովհաննիսյանի՞ն եք ասում, թե քաղաքական գործիչ Րաֆֆի Հովհաննիսյանին:

- Բնականաբար, քաղաքական գործիչ։

- Է ինձ համար ի՞նչ տարբերություն, քաղաքացիներ են, ուզում են, թող գան, ոնց որ ասեք ՝մի պլանքյաշ գա միանա, ասեմ մի արի՞, դա նույն բանն Է, որ Րաֆֆի Հովհաննիսյանը գա միանա:

Ես դիմում եմ բոլորին ու ոչ մեկին: Նա, ով գտնում է, որ այս երկիրը միայն հեղափոխությամբ կարող է դզվել ու ունի վստահություն իմ նման տղերքի կամ ինքն իր վրա, ինքը կարող է գալ–ասել՝ ախպեր ճիշտ ա, ես էլ եմ եկել: Ես գտնում եմ, որ տղերքը պիտի գան էդպես ասեն:

- Իսկ քաղաքական գործիչներ այս ընթացքում այցելե՞լ են Ձեզ:

-Ոչ, ոչ մեկն էլ չի այցելել ու չեմ էլ սպասում, որ այցելեն:

- Ժամկետ նշեցիք մինչև դեկտեմբեր ամիս, մինչ այդ Ձեզ այս հրապարակո՞ւմ կտեսնենք:

- Անպայման, գիշեր–ցերեկ կտեսնեք՝ չհաշված էն պահերը, որ կարող ա զուգարան կամ լողանալու գնացած լինեմ: