Գալուստ Սահակյանը՝ խնամիական կապերի, քառյակի և իր՝ ԱԺ նախագահ դառնալու հավանականության մասին

ԱԺ «Հանրապետական» խմբակցության ղեկավար Գալուստ Սահակյանը Tert.am-ի հետ զրույցում խոսելով նոր վարչապետից՝ նշեց, որ չնայած նրան տրված կադրային քաղաքականության ազատությանը, հին կառավարության ծրագրերից կտրուկ շեղումներ չեն լինի, բայց մեթոդիկա կմշակվի, որ ավելի արագ հնարավորություն ստեղծվի՝ բնակչության կենցաղը բարելավելու համար։ Գալուստ Սահակյանն անդրադարձավ նաև իր՝ ԱԺ նախագահի թեկնածու լինելու հավանականությանը՝ նշելով, թե շատ լավ չի զգում, որ իր անունը շրջանառվում է, որովհետև «իր տեսակը չի սիրում շրջանառվել»։ Ինչ վերաբերում է նրան, որ հաշվի առնելով Հովիկ Աբրահամյանի և Գագիկ Ծառուկյանի խնամիական կապերը՝ «այլընտրանքն» այլևս չի լինի նախկինի պես կառավարության քննադատը, Գալուստ Սահակյանը նշեց, որ քննադատությունը չի ենթադրում, որ ՀՀԿ-ականը ընդդիմությունից աղջիկ չպետք է ուզի։

- Պարոն Սահակյան ի՞նչ ակնկալիքներ պետք է ունենա հասարակությունը նոր վարչապետից, այն դեպքում, երբ Նախագահի հանձնարարականն այդքան էլ նախորդ կառավարության ծրագրից կտրուկ շեղում չի նախատեսում։

- Բնականաբար կտրուկ շեղումներ ծրագրից չեն լինի, բայց ասեմ, որ կատարման գործընթացներում խնդիրը հետևյալն է, որ պետք է մեթոդիկա մշակվի, որ ավելի արագ հնարավորություն ընձեռվի թե՛ տնտեսության առումով, թե՛ ազգաբնակչության կենցաղի բարելավման ապահովման առումով։

- Փաստորեն Հովիկ Աբրահամյա՞նն էր բոլորի համար ընդունելի, նշվում է, որ նա կարող է բոլոր սուր անկյունները հարթել, դո՞ւք էլ նման համոզման եք։

-Ասեմ հետևյալը, որ Հովիկ Աբրահամյանի և՛ բնավորության գիծը, և՛ կենսափորձն այնպիսին է, որ ցանկացած խնդիր, որ առաջանում է, նա փորձում է լուծումներ գտնել և հանդիպումներ է կազմակերպում։ Սա հնարավորություն է տալիս, որպեսզի վերջին հաշվով մասնակից դարձնի նաև նրանց, ովքեր որևիցե խնդրի շահագրգիռ կողմ են հանդիսանում, այսինքն՝ քննարկումների ծավալների մեծացման ճանապարհով կգնա։

-Պարո՛ն Սահակյան, քառյակի ճակատագիրը նոր վարչապետից հետո ի՞նչ կլինի։ Հովիկ Աբրահամյանի ընտրությամբ կարելի՞ է ասել, որ քառյակն այլևս կենսունակ չէ։

-Դուք՝ լրագրողներդ, քառյակ ասելով դարձրեցիք քաղաքական կառույց, նման քաղաքական կառույց չէր կարող լինել, ընդամենը մեկ խնդրի շուրջ էին հավաքվել, դա կառավարության հրաժարականն էր։ Կառավարության հրաժարականից հետո դեռևս օրակարգ չեն կարողանում ձևավորել, իրենք մեկ սկզբունքի համար էին համախմբվել։ Ես կարծում եմ՝ այս օրերին էլ հանդիպումներ լինում են, ու դուք էլ եք տեղյակ հանդիպումներից, պարզապես նոր օրակարգ՝ հետագա ճանապարհն անցնելու, դեռևս չի ձևավորել։

-Պարոն Սահակյան, իսկ ո՞վ կփոխարինի Հովիկ Աբրահամյանին ԱԺ-ում։

-Դա հիմնականում պատգամավորների առաջարկությամբ է լինում, այս պահին 131 պատգամավոր կարող են թեկնածություն առաջադրել։ Ցանկացած պատգամավոր կարող է և՛ ինքնաառաջադրվել, և՛ կարող է մյուսի համար առաջադրում կատարել։

-Բայց ամեն դեպքում մեծամասնությունն է չէ՞ որոշում։

-Դե բնական է, կորոշեն ու ՀՀԿ-ն կքննարկի, այսօր ՀՀԿ-ն չի քննարկել։

-Ձեր անունն էլ է շրջանառվում։

-Ես շատ լավ չեմ զգում, որ շրջանառվում է, որովհետև իմ տեսակը չի սիրում շրջանառվել։

-Ամեն դեպքում Ձեզ տեսնում են, դուք դեմ չեք լինի։

-Ինձ որևէ առաջարկ չի եղել, ոչ էլ ՀՀԿ-ում այդ հարցը քննարկվել է։

-Պարո՛ն Սահակյան, Հովիկ Աբրահամյանի տեղափոխությունը կառավարության շահա՞ծն էր , թե ԱԺ-ի կորուստը։

-Իհարկե ԱԺ-ն կորուստ ունեցավ, որովհետև կարողացել էր խորամուխ լինել մինչև վերջ և հնարավորինս կարողանում էր տիրապետելի դարձնել քաղաքական հարթակը։ Այդ իմաստով կորուստ էր, բայց միևնույն ժամանակ շահեկան էր կառավարության համար, որովհետև ինքն աշխատել է փոխվարչապետ և շատ լավ գիտի ամբողջ Հայաստանը գյուղ առ գյուղ, տեղ առ տեղ և աշխատանքում օպերատիվ է, այսինքն՝ կառավարությունը կշահի։

- Իսկ կառավարությունում կադրային ջարդ կլինի՞։

-Չեմ կարծում, որ կադրային ջարդի մասին խոսք կարող է լինել։

-Նշվել է, որ կադրային քաղաքականության ազատություն Հովիկ Աբրահամյանին տրվելու է։

- Այն կադրերը, որոնք սովորաբար աշխատում են, բնականաբար նրանց որևէ բան չի լինի և ապահովված կլինեն։ Վերջին հաշվով, ես կարծում եմ՝ Հովիկ Աբրահամյանն արագացված տեմպերով այն ծրագրերը, որոնք ունի կառավարությունը, պետք է կարողանա իրագործել, իսկ դրա համար հիմնական գործիքը աշխատող կադրն է։ Կարծում եմ՝ վարչապետը պետք է թիմ ձևավորի, և այն գործառույթները, որ դրված է վարչապետի վրա՝ իրականացվի, իսկ որևէ նախարար, եթե եղել է նախարար, այսօր չլինի, դա չի նշանակում, որ նա անգործ է մնալու և իր թիմին օգուտ չի բերելու։

-Պարոն Սահակյան անդրադառնանք կոալիցիային։ ՕԵԿ-ը չի հերքում, որ հնարավոր է՝ այլևս չի ցանկանում լինել կոալիցիայում։ Դա հնարավոր համարո՞ւմ եք, որ ՀՀԿ-ն առանց կոալիցիա կազմելու՝ կառավարություն ձևավորի։

-Ճիշտն ասած՝ ես չեմ տեսել նման հայտարարություն, բայց ՀՀԿ-ի սկզբունքը դեռևս 99 թ.-ից սկսած հետևյալն է, որ մենք փորձում ենք կոնսոլիդացնել քաղաքական ուժերը և մասնակից դարձնել պետական շինարարության աշխատանքներում։ Մնացածն արդեն քաղաքական ուժերի տրամադրությունից է կախված։ Իսկ ինչ վերաբերվում է խնդիրները լուծելուն կամ առաջանցիկ դարձնելուն, ՀՀԿ-ն 70 պատգամավոր ունի, այնպես որ լուրջ և վճռորոշ կուսակցություն է, բայց մենք նաև գտնում ենք, որ եթե այլ քաղաքական ուժերը մասնակից դառնան, բնականաբար ավելի հնարավոր է բարեփոխումները կատարելության հասցնել։ Այսինքն՝ ուզում ենք, որ բոլորը զբաղվեն պետության շինարարությամբ։

- Հովիկ Աբրահամյանը հայտարարել էր, որ ՀՅԴ-ի և ԲՀԿ-ի հետ շարունակվում են կոնսուլտացիաները։ Բայց ԲՀԿ-ն փաստորեն հայտարարեց, որ չեն մտնում կոալիցիա, իսկ նրանք, ովքեր կմտնեն՝ կհեռացվեն։ Այսինքն՝ պատասխանատվությունից խուսափո՞ւմ են։

-Հիմա էլ կառավարությունում այդ կուսակցությունից շատ-շատ աշխատողեր կան ընդհանուր առմամբ։ Իսկ եթե խոսքը վերաբերվում է նախարարներին, եթե կուսակցությունը որոշի, որ մաս է կազմում գործող ծրագրերին, բնականաբար՝ ամբողջովին կմտնի, իսկ անհատն ինքն է որոշում։ Տեսակետի առումով երեկ ԲՀԿ-ն արդեն հայտարարեց, որ չի մտնի, բայց դա չի նշանակում, որ ԲՀԿ-ի հետ խռով ենք և պետք է հարցեր չքննարկենք, քաղաքականությունը բանակցային պրոցես է։

-Իսկ Դաշնակցությա՞ն հարցում։

-Դաշնակցությունից դեռևս պատասխան չեն տվել, կարծում եմ՝ մի քանի օրից իրենք էլ, ըստ երևույթին, կարձագանքեն։

-Իսկ նրանց առաջարկված 7 կետերը ձեզ համար ընդունելի՞ են։

-Բնականաբար առաջարկված բոլոր կետերը միանգամից ընդունել հնարավոր չէ, ինչ-որ չափով, ինչպես իրենք են հայտարարում, այն չափով համագործակցությունը կլինի, որ չափով մենք իրենց ծրագրային դրույթները կներառենք ընդհանուր մեր ծրագրերի մեջ։

-Պարոն Սահակյան, տեսակետներ կան, որ Հովիկ Աբրահամյանին վարչապետ նշանակելով՝ խորհրդարանում կտրուկ կպակասեն քննադատությունները՝ ուղղված գործադիրն, և չի լինի այնպես, ինչ կար նախկին վարչապետի դեպքում, համամի՞տ եք։

-Ես կարծում եմ՝ քննադատություններից չպետք է խուսափել, և հետո՝ առաջին քննադատները մենք ենք, մեզ ենք քննադատում, և ընդդիմությունը, մեր նյութերն ավելի կարծրացած՝ շրջանառության մեջ է դնում։ Խորհրդարանը քաղաքական քուրայի հարթակ է, և բանավեճեր, իհարկե, պետք է լինեն։

-Բայց «այլընտրանքի» դեպքում, հաշվի առնելով խնամիական կապերը, հնարավոր տարբերակ չէ։

- Դուք ինչ է՝ մտածում եք, որ ՀՀԿ-ականը ընդդիմությունից աղջիկ չպե՞տք է ուզի, կամ էլ տղային պսակի մյուսի հետ։ Հարազատական կապերը, ես չեմ կարծում, քաղաքականի տեսակետների վրա պետք է ազդի, ինչպես մեզ մոտ են միշտ պատկերացնում։

-Բայց դա ընդունված տարբերակ էր նաև թագավորների շրջանում, մի թագավորությունից աղջիկ բերել՝ ավելի ամրապնդելու բարեկամությունը։

-Ես, միևնույն է, կարծում եմ՝ որևիցե կապ չունի դա. եթե ԲՀԿ-ն իր աշխատանքով այլն անի, կամ Գալուստ Սահակյանը քննադատի, կապ չունի այդ խնամիական կապի հետ։ Բայց, այսպես թե այնպես, ԲՀԿ-ն քննադատում էր նաև այն ժամանակ, երբ Հովիկ Աբրահամյանը ԱԺ նախագահ էր, չէ՞ր քննադատում։

-Այո, բայց թիրախը կառավարությունն էր և վարչապետը։

-Բայց կառավարությանը քննադատելն էլ նշանակում է քննադատել Գալուստ Սահակյանին և Հովիկ Աբրահամյանին, որովհետև մենք մի թիմ ենք, կիսված չեն, մի կուսակցության մարմնի անդամներ ենք, և կառավարությանը, եթե քննադատում են, բնականաբար ես այդ քննադատությունն իմ վրա եմ վերցնում, նաև Հովիկ Աբրահամյանը։