Վարչապետը մտածում է սահմանին ԱԱՀ-ն վերացնելու մասին. պատգամավորները ողջունում են

Վարչապետ Հովիկ Աբրահամյանը երեկ 100 խոշոր գործարարների հետ հանդիպմանը հայտարարել է, որ մտածում է սահմանի վրա ապրանքների ավելացած արժեքի հարկը վերացնելու մասին: Դա, սակայն, նշանակում է, որ մի քանի ամիս բյուջետային մուտքերի «բաց» է լինելու, ինչը լցնելու մեխանիզմների մասին էլ ներկայումս մտածում է կառավարությունը:

ԱԺ պատգամավորներ Գուրգեն Արսենյանը, Գարեգին Նուշիկյանը, Միքայել Մելքումյանը և Խաչատուր Քոքոբելյանը Tert.am-ի հետ զրույցում հաստատելով այս տեղեկությունը՝ «կողմ» արտահայտվեցին հնարավոր փոփոխությանը:

«Տնտեսության համար սա չասեմ՝ հեղափոխական, բայց շատ վճռական բան է լինելու, որպեսզի տնտեսությունը շունչ ստանա: Այսինքն՝ էն հիմնական ծավալը, որ կա, վճարում ես սահմանին, իսկ ԱԱՀ-ն սահմանին վճարելով՝ դա նշանակում է, որ դու վարկավորում ես պետությունը՝ տնտեսությունից ռեսուրս հանելով»,-մեկնաբանեց Գուրգեն Արսենյանը:

Հիշեցնենք, որ սահմանի վրա ապրանքների ներմուծման վրա ավելացած արժեքի հարկ Հայաստանում գանձվում է 1998 թվականից ի վեր:

«Ավելացած արժեքի հարկը սահմանին վրա ուղղակի հանցագործություն է տնտեսության նկատմամբ, քանի որ ապրանքները դեռ չիրացրած, շահույթ չստացած՝ ներմուծողը պարտավոր է դրա համար վճարումներ անել»,-Tert.am-ին ասաց անկախ պատգամավոր Խաչատուր Քոքոբելյանը:

ԱԱՀ-ն ապրանքների իրացումից հետո հարկելու պրակտիկան հագեցնելու է գործարարության ՝առևտրային բանկային համակարգից առավել քիչ կախվածությանը, քանի որ այս դեպքում շրջանառու միջոցները տնտեսության և բիզնեսի ձեռքում ավելի շատ են լինելու և լրացուցիչ վարկավորման խնդիր չի լինելու: Ինչն էլ նշանակում է, որ առևտրային բանկերում կարող է առաջանալ փողի ավելցուկ, եթե չկա շրջանառու միջոցների անհրաժեշտությունն այն ծավալով, որ նախկինում էր: Ըստ Գուրգեն Արսենյանի՝ «սա նշանակում է՝ շուկայում տոկոսադրույքների անկում»։

Այսինքն՝ ըստ նրա այս կանխատեսումների՝ փողը էժանանալու է, և էֆեկտը լինելու շղթայական և մուլտիպլիկատիվ, որովհետև բանկերն էլ ստիպված կլինեն ավելի էժան փող տալ, ավելի լավ պայմաններով:

Ի պատասխան հարցադրման, թե սա, փաստորեն, նշանակում է, որ առևտրային բանկերը դե՞մ են լինելու, ԲՀԿ խմբակցության պատգամավորն ասաց, որ իրեն ու ՀՀ քաղաքացիներին չպիտի հետաքրքրի՝ «բանկերին ի՞նչն է ձեռ տալիս, ինչը՝ ոչ»:

«Եվ բանկերի կենսագործունեությունը տնտեսության առողջությունից է կախված, ինչքան տնտեսությունդ առողջ եղավ, էնքան բանկերդ առողջ են լինելու, եթե տնտեսությունդ տաքություն ունի, բանկը՝ փող ծախողը, չի կարող էդ վիրուսից հեռու մնալ, արդյունքում սենց իրար վարակում են՝ տնտեսությունն ու բանկերը»,-տնտեսության խնդիրների մասին բժշկական տերմիններով խոսեց Գուրգեն Արսենյանը:

Ի պատասխան հարցի, թե Հովիկ Աբրահամյանը հեծանի՞վ հորինեց, Գուրգեն Արսենյանն ասաց. «Սա հեծանիվ հորինել չի, սա նշանակում է, որ գործադիր իշխանության բարձրագույն մարմինը շեղում է իր թիրախները, ըստ որում՝ ոչ կարևորից՝ կարևոր: Կարևորը Հայաստանի տնտեսությունն է, ոչ թե Հայաստանի բանկային համակարգը»:

Այլ խոսքով՝ այս հայտարարությամբ ԲՀԿ խմբակցության պատգամավորը հասկացնել է տալիս, որ ՀՀ 12-րդ վարչապետ Տիգրան Սարգսյանը բանկային համակարգի շահերն էր պաշտպանում ու «փաստաբանություն» անում:

Ակնհայտ է, որ նման արմատական քայլի գնալու դեպքում Հայաստանի պետական բյուջեն լրջագույն խնդիրներ է ունենալու, քանի որ բյուջետային մուտքերի զգալի մասը կատարվում է հենց ԱԱՀ-ի հաշվին: Ի պատասխան այդ դիտարկման, Գուրգեն Արսենյանը հայտարարեց՝ «երկու ամսվա ճեղքվածք է լինելու, որովհետև իրացումից հետո հարկվելու է, չէ՞»:

ԲՀԿ–ական պատգամավորն ունի երկու ամիս գոտիները ձգելու իր լուծումը՝ 2 ամսով վերցնել էժան վարկային ռեսուրս՝ հաշվարկով, որ ԱԱՀ-ի հարկումը 2 ամսվա մեջ ընկնելու է իր ցիկլի մեջ, 2 ամսվա մեջ վճարել ու անցնել առաջ:

Հայաստանի «Հանրապետական» խմբակցության անդամ, գործարար Գարեգին Նուշիկյանն էլ այս մոտեցումը միանգամայն իրատեսական է համարում։ Նա նաև համաձայնեց մեր այն ձևակերպման հետ, որ սա կլինի տնտեսության կողմից «բանկային լուծը թոթափելու» ձև:

«Իհարկե, եթե գործարարին անհրաժեշտ են ռեսուրսներ, նա այդ պահին չունի, պետք է դիմի բանկերին և այդ ռեսուրսը սահմանի վրա վճարի մաքսային մարմիններին: Եթե չի վճարում, բնականաբար, բանկերից էլ ռեսուրս վերցնելու անհրաժեշտություն չունի»,-ասաց Գարեգին Նուշիկյանը:

ԱԱՀ-ն սահմանից վրայից հանելու մասին օրենքի նախագիծ էր հեղինակել «Բարգավաճ Հայաստան» խմբակցության պատգամավոր Միքայել Մելքումյանը ժամանակին. այն հետաձգվել էր: Այդ օրենսդրական նախաձեռնության տարբերակով՝ բյուջետային ծախսերի որոշակի ժամանակահատվածի հետաձգումը լրացնելու համար անհրաժեշտ բուֆերային գումարները կազմում են 150 միլիոն ԱՄՆ դոլար՝ 9 ամսվա կտրվածքով: