Ֆալստարտ վերցնողը միշտ պարտվում է. Է. Շարմազանովը՝ ժամանակից շուտ նախընտրական քարոզարշավ սկսող ուժերի մասին

ԱԺ փոխնախագահ, Հայաստանի հանրապետական կուսակցության մամուլի խոսնակ Էդուարդ Շարմազանովը մի քանի լրագրողների հետ զրուցում խոսեց կուսակցության 15-րդ համագումարում ՀՀԿ նախագահ Սերժ Սարգսյանի ելույթի շեշտադրումներից՝ նշելով, որ հիմնական ազդակն այն էր, որ եթե կան ուժեր, ովքեր այսօր ժամանակից շուտ սկսել են նախընտրական քարոզարշավը, ապա ՀՀԿ-ն իրեն նման շռայլություն թույլ տալ չի կարող, որովհետև թե´ տնտեսական, թե´ քաղաքական, թե´ իրավական պատասխանատվությունը Հանրապետականի ուսերին է։ Նա հավատացրեց, որ դժվար չի լինի՝ պայքարել մի ուժի դեմ, որը երեք տարի ավելի շուտ քարոզարշավ կսկսի. «Կարևորը ճիշտ ժամանակին ստարտը վերցնելն է: Ֆալստարտ վերցնողը միշտ պարտվում է»։
Իսկ թե ինչու Սերժ Սարգսյանն իր հայտարության մեջ իշխող քաղաքական ուժին ու ընդդիմությանը համեմատեց պետության համար մարդու երկու ձեռքի՝ անտեսելով այլընտանք համարվող ԲՀԿ-ին, Շարմազանովը նշեց, որ դասական առումով՝ ինչպես մարդն ունի երկու ձեռք, այնպես էլ՝ քաղաքականության մեջ լինում է ընդդիմություն և իշխանություն, և երրորդ ձեռք լինել չի կարող։
«Կա´մ ընդդիմություն են, կա´մ էլ՝ իշխանություն»,-նշեց նա:

-Պարո´ն Շարմազանով, ՀՀԿ համագումարին Սերժ Սարգսյանի ելույթի հիմնական շեշտադրումները որո՞նք էին։

-Նախ՝ արձանագրենք մի քանի հստակ ուղերձներ, որոնք առկա էին Նախագահի ելույթում: Առաջինն այն էր, որ ՀՀԿ-ն ժողովրդավարական արժեքներ դավանող կուսակցություն է, ազատ մրցակցության կողմնակից է, բայց միևնույն ժամանակ՝ մենք արձանագրում ենք, որ Հայաստանի Հանրապետության ամենաազդեցիկ քաղաքական ուժը, քաղաքական կյանքի առաջատարը ՀՀԿ-ն է: ՀՀԿ-ն այսուհետ պետք է ամեն ինչ անի, որպեսզի ո´չ միայն չկորցնի, այլև՝ զարգացնի այդ դիրքերը առաջիկա թե´ ՏԻՄ, թե´ համապետական ընտրություններում:
Նախագահի ելույթի հիմնական ազդակն այն էր, որ եթե կան ուժեր, ովքեր այսօր ժամանակից շուտ սկսել են նախընտրական քարոզարշավը, ապա ՀՀԿ-ն իրեն նման շռայլություն թույլ տալ չի կարող, որովհետև թե´ տնտեսական, թե´ քաղաքական, թե´ իրավական պատասխանատվությունը ընկած է Հանրապետականի վրա: Մենք ժամանակ չունենք՝ զբաղվելու նախընտրական քարոզարշավով, առաջիկա երեք տարին մենք պետք է օգտագործենք օրնիբուն, քրտնաջան աշխատանքի վրա, որ մեր ժողովրդի մատից փուշ հանենք:

ՀՀ Նախագահը հստակ նշեց նաև, որ մենք կիսելու հայրենիք չունենք. ցանկացած համաքաղաքացի մեր եղբայրն ու մեր քույրն է: Մենք անգամ հակառակորդ կուսակցությանը մեզ թշնամի չենք համարում, չկա նման բան, և բոլոր նրանք, ովքեր կուսակցական, ներքաղաքական պայքարը փորձում են տանել ոչ կոռեկտության ճանապարհով, մենք նման կերպ չենք արձագանքելու նրանց, որովհետև ճիշտ ճանապարհը միասնական աշխատանքն է: Նախագահի խոսքում էլ հստակ դրված էր այս գաղափարը՝ ՀՀԿ-ն պետք է գնա համագործակցության, երկխոսության ճանապարհով:

Հաջորդ կարևոր դրույթը, որի մասին կուզեմ խոսել, սահմանադրական բարեփոխումների անհրաժեշտությունն է: Մենք բոլորս խոսում ենք համակարգային բարեփոխումների անհրաժեշտության մասին, սակայն չգիտես ինչու՝ համակարգային բարեփոխումները չենք կապում սահմանադրական բարեփոխումների հետ: Կա չգրված օրենք՝ առանց սահմանադրական փոփոխությունների հնարավոր չէ հասնել համակարգային փոփոխությունների: Ամենակարևոր ազդակը ՀՀ Նախագահի խոսքում այն էր, որ ժողովրդավարական արժեքները և իրավական պետության գաղափարը մեր պետության ամենաարժեքավոր հենասյունն են:

- Իսկ որո՞նք են այդ ուժերը:

- Ինձ մոտ այնպիսի տպավորություն է, որ դուք խորհրդարանական գործիչների հայտարարություններին ծանոթ չեք: Եթե դուք չեք տեսնում, չի նշանակում, որ չկան: Ո´չ միայն ես եմ տեսնում, այլև՝ հասարակությունը: Խոսքը բոլոր այն ուժերի մասին է, ովքեր մինչև այս խոսում էին համամասնական ընտրակարգին անցնելու մասին, խոսում էին համակարգային փոփոխությունների անհրաժեշտության մասին, և հանկարծ արթնացան ու ասացին, որ մեր ժողովրդին սահմանադրական բարեփոխումներ պետք չեն:

- Խոսքը ԲՀԿ-ի՞ մասին է միայն:

- Խոսքը բոլոր նրանց մասին է, ովքեր պատրաստվում են ընտրությունների:

- ՀՀ երկրորդ Նախագահն էլ դեմ է սահմանադրական բարեփոխումներին: Նրան է՞լ է վերաբերում ասվածը:

- Մենք անձնավորված մեսիջներ չենք ուղղարկում կոնկրետ անձանց ու կոնկրետ կուսակցություններին: Մենք երբեք ռազմավարություն, մարտավարություն չենք մշակում՝ ելնելով «ընդդեմ ինչ-որ մեկի և ընդդեմ ինչ-որ ուժի» սկզբունքի: Մեր ուժը հենց դրա մեջ է։ Մենք մշտապես ինքներս ենք ձևավորել քաղաքական օրակարգն ու ինքներս ենք շարժվել՝ հանուն գաղափարի: Իսկ «հանունը» պետության հզորացումն է, քաղաքական համակարգի կայացումն է, որը պետք է աստիճանաբար տեղի ունենա քաղաքական դաշտի բևեռացմամբ: Մենք միաբևեռ քաղաքական համակարգի կողմնակից չենք, համարում ենք, որ պետք է լինի երկբևեռ, կգնա կուսակցությունների խոշորացում, և մենք կգնանք ո´չ թե ուղղահայաց, այլ՝ ցանցային-հորիզոնական ճանապարհով: Աստիճանաբար կնվազի նաև անհատի դերը, վճռորոշ դերակատարություն կստանձնեն կուսակցությունները, որոնցից ամենաազդեցիկն ու առաջատարն այսօր ՀՀԿ-ն է, ու մենք ցանկանում ենք, որ մյուս կուսակցությունները ևս ուժեղանան:

- Սերժ Սարգսյանն իր ելույթում ասաց, որ իշխող քաղաքական ուժն ու ընդդիմությունը պետության համար նույնն են, ինչ մարդու երկու ձեռքը: Այդ դեպքում այլընտրա՞նքն ուր մնաց։

- Դասական առումով՝ ինչպես մարդն ունի երկու ձեռք, այնպես էլ քաղաքականության մեջ լինում է ընդդիմություն և իշխանություն:

- Փաստորեն՝ մեր պետությունը երրորդ ձե՞ռք էլ ունի:

- Չունե´նք, չունե´նք… կա´մ ընդդիմություն են, կա´մ էլ՝ իշխանություն:

- Պարո´ն Շարմազանով, Դուք հայտարարել էիք, որ 2017 թ-ի նախագահական ընտրություններում հաղթանակը չի շրջանցելու Մելիք-Ադամյան փողոցը, միաժամանակ՝ Սերժ Սարգսյանն ասաց, որ ՀՀԿ-ն, ի տարբերություն այլ քաղաքական ուժերի, իրեն «ճոխություն» թույլ չի տա՝ այսօրվանից պատրաստվել ընտրությունների, հակասություններ չե՞ք տեսնում այստեղ։

- Իհարկե՝ ո´չ: Իմ ելույթն ի՞նչ կապ ուներ նախտընտրական քարոզարշավի հետ, իմ ելույթը համակարգային էր, ու պետք չէ դրանից վերջին նախադասությունը միայն հանել՝ անտեսելով առաջին մեկուկես էջը:

- Իսկ ե՞րբ եք սկսկելու քարոզարշավը:

- 2017-ի նախընտրական ժամանակաշրջանում, օրենքով սահմանված կարգով: Պետք չէ խառնել ամենօրյա աշխատանքը նախընտրական քարոզարշավի հետ: Ի տարբերություն շատ ուժերի՝ մենք ընտրություններից ընտրություն գրասենյակներ չենք բացում:

- Դժվար չի՞ լինի՝ պայքարել մի ուժի հետ, որը երեք տարի քարոզարշավ կանի:

- Ո´չ, որովհետև կարևորը ճիշտ ժամանակին ստարտը վերցնելն է: Ֆալստարտ վերցնողը միշտ պարտվում է: Մենք շատ ճիշտ ժամանակին կսկսենք:

- Պարո´ն Շարմազանով, Սերժ Սարգսյանն, ի տարբերություն նախորդ համագումարի, այս անգամ պարտադիր կուտակայինից չխոսեց, դա արդյո՞ք նշանակում է, որ դիրքերը զիջում եք։

-Զիջել-չզիջելու մասին խոսք լինել չի կարող, ես համամիտ չեմ ձեր դիտարկմանըւ: Փոխարենը` Կառավարության ղեկավարը՝ պարոն վարչապետն է ներկայացրել: