ՓՄՁ-ին ահաբեկում են, մակերեսորեն ստուգումներ այլևս չեն անում. գործարարները՝ վարչապետի «գիծ քաշելու» քաղաքականության մասին

Դեռ այս տարվա մայիսի 14-ին վարչապետ Հովիկ Աբրահամյանը իր մոտ էր հրավիրել շուրջ 100 գործարարների և հորդորել «գիծ քաշել» անցյալի վրա և մինչև հուլիսի 1-ը ժամանակ տվել բիզնեսի ոլորտին ստվերից դուրս գալու համար: Հայաստանի գործատուների միության նախագահ Գագիկ Մակարյանը Tert.am-ի հետ զրույցում նշեց, որ թեև հուլիսի 1-ը հատել ենք, բայց արդյունքի մասին խոսելը վաղ է, քանի որ կառավարության կողմից որևէ թիվ չի ներկայացվել: Միաժամանակ նա նշեց, որ այսօր «գիծ քաշելու» անվան տակ ինչ-որ երևույթներ են ընթանում:

«Մենք գիտենք, որ ՓՄՁ ոլորտի ներկայացուցիչներին ՊԵԿ-ից նամակներ են ուղարկվել՝ հորդորելով վերանայել հաշվետվությունները, քանի որ հուլիսի 1-ին սպասվում են փոփոխություններ: Բայց կան նաև լուրեր այն մասին, թե ինչպես են հարկային մարմնի տեսուչները ահաբեկում են ՓՄՁ ներկայացուցիչներին, ասելով՝ եթե չվերանայեք, կգանք կուսումնասիրենք, մի բան կգտենք: Որոշ տեղերում նույնիսկ զանգահարում են ու ասում են՝ աշխատավարձերը բարձրացրեք, օրինակ՝ 70 հազարից դարձնել 100 հազ.: Ու դա անում են առանց հիմնավորման: Այսինքն` կարծես հուլիսի 1-ից առաջ ինչ-որ ցուցանիշների համար փորձում են պատրաստվել»,-ասաց նա:

Հարցին, թե արդյո՞ք այդ ամենն արվում է արհեստականորեն բարձր ցուցանիշներ ցույց տալու համար, Գագիկ Մակարյանը պատասխանեց, որ չէր ցանկանա ենթադրություններ անել, բայց ռիսկեր այստեղ տեսնում է:

«Բայց ես դեռ պետք է հանդիպեմ ՊԵԿ-ի ղեկավարության հետ՝ հասկանալու իրավիճակը: Նշեմ, որ նման լուրեր ինձ հասել են միայն ՓՄՁ ոլորտից: Ինձ համար ընդունելի չէ, որ պետական պաշտոնյանները հայտարարում են, որ սա թանկացումների է բերելու: Թեև սրա մեջ ճշմարտություն կա, բայց միևնույն ժամանակ «լեզու են դնում» գործարարների բերանը, որովհետև դրանից կարող են շատերը օգտվել: Իրականում խոշորները կարող են տեղավորվել, իրենց եկամուտները թույլ են տալիս, ուղղակի հոգեբանորեն պետք է պատրաստ լինեն ավելի քիչ շահույթ ստանալուն»,- ասաց նա՝ ավելացնելով, թե «գիծ քաշելու» արդյունքը կերևա հուլիսի կեսերին:

Tert.am –ի հետ զրույցում «Մաքս Գրուպ» կոնցեռնի նախագահ, «Լուսակերտի տոհմային թռչնաֆաբրիկայի» սեփականատեր, ԱԺ նախկին պատգամավոր Խաչիկ Մանուկյանը, ի պատասխան հարցի, թե տեսնո՞ւմ է այդ «քաշված գիծը», ասաց, որ չի կարող ասել, ու ավելացրեց. «Ես իմ համար քաշել եմ»:

Խաչիկ Մանուկյանը նշեց, որ Կառավարության այս մոտեցումը իր համար ընդունելի է, և այս մասին պարզ հայտարարեց. «Ընդունելի է, բա ի՞նչ է, ինչքան կարելի է: Ստվերի տեղը իրենք գիտեին, որովհետև նույն հարկային մարմիններում հստակ երևում է»:

Իբրև փաստացի ապացույց, որ ստվերը հարկային դաշտ բերելու հարցում Կառավարության մտադրությունները լուրջ են, գործարարը վկայակոչեց միայն իր ձեռնարկություններում արված ստուգումները:

«Բոլորն էլ, ինձ թվում է՝վերանայել են (նախկին գործելաոճը – Tert.am), որովհետև նախ շատ հստակ ու չոր էր ասված, և հետո ստուգումներ եղան, բաներ եղան մարդկանց մոտ… Հստակեցրին, որ սրանից հետո էս ձևով ենք ստուգում, ասվեց, որ նայում ենք ամբողջը, մակերեսորեն նայել չկա, բարեխոսել չկա: Զգացվում էր, որ տարբերվում է, որ մարդիկ, իրոք, հանձնարարություն են ստացել, որ մատների արանքով չպիտի ստուգեն»,- պատմեց Խաչիկ Մանուկյանը:

Գործարարը նշեց, որ վարչապետի այդ նախաձեռնությունը ճիշտ գաղափար է և կարևոր համարեց, որ այն շարունակվի մինչև վերջ: «Ինձ թվում է՝ բոլորի մոտ էլ հաստատ փոփոխություններ կլինեն, միանգամից չի լինի՝ 100 տոկոսանոց, բայց ինձ թվում է՝ եթե խնդիրը դրվել է, կամաց-կամաց կհասնենք արդյունքի: Որ տեսնենք ինչ ենք անում, որ պետությունը կարողանանք առաջ տանել, արտագաղթը կանգնեցնենք»,- նշեց գործարարը:

Զանգեզուրի պղնձամոլիբդենային կոմբինատի տնօրեն Մաքսիմ Հակոբյանը նախ նշեց, որ խիստ նկատելի է, որ «գիծ է քաշվել», իսկ այնուհետև ավելացրեց. «Բայց մեզ մոտ գիծ քաշելու անհրաժեշտություն չի եղել, մենք միշտ հանրապետության առաջին հարկատուն ենք եղել: Եթե մեր ձեռնարկությունները ուսումնասիրեք, կտեսնեք, որ դրանք ստեղծված օրվանից գիծ են քաշել ու գծից սկսած են աշխատում: Մենք նման խնդիր չունենք»։

Հարցին, թե, ընդհանուր առմամբ քաղաքականության փոփոխություն նկատո՞ւմ է բիզնես միջավայրում, մասնավորապես, այն առումով, որ վարչապետը հայտարարել էր, թե հավասար մրցակցային պայմաններ պետք է ստեղծվեն գործարարների համար, նա պատասխանեց. «Ես Քաջարան գյուղում եմ ապրում չգիտեմ մյուս տեղերում ինչ է կատարվում … Անընդհատ գիծ քաշեք, ինչքան ուզում եք գծեր քաշեք՝ տարբեր գույնի տարբեր ձևի, տարբեր չափսի»:

Դիտարկմանը, թե արդյոք նկատի ունի, որ դրանք միևնույնն է արդյունք չեն տալիս, Մաքսիմ Հակոբյանն ասաց. «Հո ես բախտագուշա՞կ չեմ, Դուք ինձ կոմբինատից հարցեր տվեք»: