Հայաստա՞ն, Արցա՞խ, թե՞ Վրաստան. ըստ մասնագետների՝ հարևան երկրում հանգիստն առավել մատչելի է հյուրատների և էժան սննդի հաշվին

Ամառային հանգստի գները Հայաստանում անցած տարվա համեմատ հիմնականում մնացել են նույնը. աճել է հանգստացողների թիվը: Արցախում համեմատաբար ավելի էժան է, իսկ հարևան Վրաստանում հյուրանոցների գներն առանձնապես չեն տարբերվում տեղի գներից, ուղղակի ակտիվ հյուրատների և համեմատաբար էժան սննդի հաշվին այնտեղ հանգիստն ավելի էժան է արժենում: Այս մասին Tert.am-ին փոխանցեց «Ռումեա գայթակղիչ ճամփորդությունների ակումբի» նախագահ Ռուբեն Գրիգորյանը:

«Հայաստանում հանգստի գները կարող են լինել սկսած 5.000 դրամից մեկ հոգու համար, վերջացրած 50.000 դրամով մեկ օրվա համար: Վրաստանի հյուրանոցների համեմատ այստեղ գներն ավելի ցածր են, ուղղակի այնտեղ շատ ակտիվ են հյուրատները, որոնք շատ ավելի մատչելի են դարձնում հանգիստը»,-ասաց նա և ավելացրեց, որ միջին հաշվով Վրաստանում գները փոփոխման են ենթարկվել, թանկացել են: Իսկ հանգիստն այնտեղ ավելի էժան է կազմում սննդի հաշվին: Նաև կան ծառայություններ, որոնք ավելի էժան են, քան Հայաստանում:

Ակումբի ղեկավարի խոսքով՝ մի քանի տարի առաջ վրացական փաթեթները հայկականից մոտ 30% էժան էին: Բայց այսօրվա դրությամբ Հայաստանում ևս կան էժան փաթեթներ: «Մենք շատ կուզենայինք, որ ավելի մատչելի լիներ, մենք ամեն անգամ հյուրանոցներին ասում ենք, որ մի քիչ գինն էժանացնեն, հիմա համեմատաբար էժան փաթեթներ կան»,-ասաց նա:

Ինչ վերաբերում է Արցախին, մեր զրուցակիցը նկատեց, որ այնտեղ հյուրանոցներ կան, որոնք ավելի մատչելի են. «Հինգ աստղանի հյուրանոց կարող ենք դիտարկել՝ Ստեփանակերտում գտնվող «Արմենիա» և «Վալեքս գարդեն» հյուրանոցները, որտեղ երկտեղանի համարները սկսում են 35.000 դրամից, ինչն այս սեզոնին բավականին մատչելի է»:

Այդուհանդերձ Ռուբեն Գրիգորյանը նշեց, որ հայաստանյան հանգստյան գոտիներում այսօր մարդկանց զբաղեցնելու խնդիր կա: «Մտաք հյուրանոց, լողավազանից օգտվեցիք, կերաք և այլն: Ուրիշ ի՞նչ եք անելու, անելիք չկա, զբաղմունք է պետք ստեղծել հանգստյան գոտիներում»,-ընդգծեց նա:

Սպասարկման ոլորտի խնդիրների շուրջ էլ զրուցեցինք Տուրիզմի հայկական ինստիտուտի ռեկտոր Ռոբերտ Մինասյանի հետ, ով հայաստանյան զբոսաշրջության սպասարկման ոլորտի թիվ մեկ խնդիրը որակյալ կադրերի սակավաթիվ լինելն է համարում:

«Այսօր պետք չի բավարարվել նրանով, որ ով ցանկանում է, աշխատի. մասնագիտական կրթություն է պետք, այսօր մարդիկ շատ տեղեր սովորում են, բայց մասնագետ չեն դառնում: Այսօր դա թիվ մեկ խնդիրն է Հայաստանի համար»,-ասաց նա:

Վերջինս նաև նշեց, որ ճիշտ է, հայ ազգը հյուրընկալ է, բայց կյանքը փոխվել է, ժամանակը փոխվել է, և պետք է նորովի այդ ամեն ինչը կազմակերպվի: «Այսօր մենք բավականին ետ ենք ընկել, տուրիստական բոլոր կառույցները շատացել են, բայց որակյալ մասնագետը չկա. գիտելիքով, հայրենասեր, երկիրը սիրող մարդը քիչ է: Նրանց աշխատանքից է կախված, թե տուրիստները կրկին կգա՞ն Հայաստան, թե ոչ»,-ասաց նա՝ հավելելով, որ այդ մասին պետք է նաև գործատուն մտածի և ոչ թե միայն շինարարության մեջ, այլ նաև որակյալ կադրերի պատրաստման գործում գումար ներդնի:

Ռոբերտ Մինասյանը հիշեցրեց, որ այսօր զարգացած տուրիզմ ունեցող բոլոր երկրները մի հարց են դնում քննարկման՝ ինչ անել որակյալ կադրեր պատրաստելու համար, իսկ Հայաստանում գտնում են, որ ամեն ինչ լավ է:

Սպասարկման ոլորտի մեկ այլ խնդիր նա համարեց այն, որ ազգային ուտեստները չեն պրոպագանդվում, և այսօր ազգային ուտեստները դուրս են մնում ճաշացանկից, մինչդեռ այլ երկրներում ամեն ինչ անում են ազգային խոհանոցը քարոզելու համար:

Դիտարկելով Հայաստանի, Արցախի և հարևան Վրաստանի մի շարք հյուրանոցների գները՝ ստացվեց հետևյալ պատկերը.

Հինգ աստղանի հյուրանոցներից Երևանի «Արմենիա Մարիոթ» հյուրանոցում համարների գները տատանվում են 79.000-ից 320.000 դրամի սահմաններում:

Գյումրու կենտրոնական հրապարակից ոչ շատ հեռու գտնվող «Ալեքսանդրապոլ» հյուրանոցի համարների գները սկսվում են 40.000-ից և հասնում մինչև 120.000 դրամի: Համարի գինը ներառում է հարկերը, նախաճաշը, անվճար ինտերնետ կապ հյուրանոցի համարներում և հանրամատչելի վայրերում, իսկ երեխաներին և չափահասներին լրացուցիչ մահճակալներ տրամադրվում են լրավճարով:

Ծաղկաձորի «Մարիոթ» հյուրանոցում համարներն արժեն 45.000-250.000 դրամ: Գները չեն ներառում հարկերը:

Ծաղկաձորի «Մուլտի Ռեսթ Հաուզ» հյուրանոցային համալիրում ստանդարտ երկտեղանոց համարի արժեքը 40.000 դրամ է, լյուքս համարը՝ 100.000 դրամ, կան նաև առանձին քոթեջներ 4-10 անձի համար նախատեսված, որոնց արժեքը տատանվում է 100.000-ից մինչև 150.000 դրամ: Համարի գինը ներառում է հարկերը, նախաճաշ, լողավազան, մարզասրահ, սեղանի թենիս, մանկական սենյակ, խաղահրապարակ, փոխադրամիջոց դեպի ճոպանուղի, անվճար ինտերնետ կապ ամբողջ հյուրանոցի տարածքում:

Սյունիքի մարզի Գորիս քաղաքի հյուսիսային մասում գտնվող «Մինա» հյուրանոցում համարների գները սկսում են 18.000 դրամից։

Արցախում հյուրանոցները հիմնականում տեղակայված են մայրաքաղաք Ստեփանակերտում, որտեղ կան 3, 4 և 5 աստղանի հյուրանոցներ: 5 աստղանի է «Վալլեքս»-ը, որտեղ համարների գները սկսվում են 34.900 դրամից՝ ընդհուպ մինչև 119.900 դրամ:

Երեք աստղանի «Հեղնար» հյուրանոցը, որը գտնվում է Ստեփանակերտի ամենակենտրոնից ոչ հեռու, առաջարկում է 12.000 դրամից մինչև 40.000 դրամ արժողությամբ համարներ։

Շուշիում չորս աստղանի հյուրանոց է «Շուշիի Գրանդ հոթելը», որտեղ համարներն արժեն 22.000-76.000 դրամ: Այնտեղ կա նաև երեք աստղանի հյուրանոց, «Ավան Շուշի պլազա» հյուրանոցը, որտեղ մեկ օր մնալու արժեքը 9.000-40.000 դրամ արժե:

«Անի Պարադիզ» հյուրանոցային համալիրը տեղակայված է Ստեփանակերտ-Գանձասար մայրուղու 17-րդ կմ-ի վրա. այստեղ համարներն արժեն 7.000-25.000 դրամ:

Իսկ օրինակ՝ Թբիլիսիի կենտրոնական Ռուսթավելի փողոցի վրա գտնվող երեք աստղանի «Հոթել Շայն» հյուրանոցում համարների գները տատանվում են 34.000-ից մինչ 43.000 դրամի սահմաններում:

Թբիլիսիում ևս գործում է «Մարիոթ» հյուրանոցը, որտեղ գները սկսում են 119.000-ից՝ ՀՀ դրամով։

Վրաստանի ծովափնյա Բաթումի քաղաքում հինգ աստղանի հյուրանոց համարվող «Radisson Blu Hotel Batumi»-ում մեկօրյա հանգիստը սկսում է 78.000 դրամից և հասնում մինչև 156.000 դրամի: Նույն քաղաքում մեկ աստղանի հյուրանոց է գործում, որտեղ մեկ օրը երկու անձի համար արժե 16.000 դրամ, 34000 դրամ՝ ընտանիքի համար: