«Պատմական Կիլիկիա» անվան ներքո թուրքական հանգստավայրերում ծովափնյա հանգիստ է գովազդվում

Թեպետ Անթալիայում չհանգստանալու՝ ՀՀ պետական պաշտոնյաների համար սահմանված արգելքը նախկինի նման խիստ չէ (այն ժամանակին, ըստ լուրերի, մեկ նախարարի պաշտոնանկության հանգեցրեց), սակայն, մեր տեղեկություններով, բանավոր միշտ պատգամավորներին ու նախարարներին ասվում է Թուրքիայի վարչական մաս կազմող Անթալիա հանգստի չմեկնել:


Կառավարության լրատվական ծառայությունից Tert.am-ին այդ հարցի պատասխանը չկարողացան տալ։ 

Հաշվի առնելով «անթալիական գործոնի» առանձնահատկությունը, շատ տուրիստական կազմակերպություններ թուրքական սևծովյան անթալիական ծովափնյա հանգստի փաթեթները գերադասում են անցկացնել «պատմական Կիլիկիա» գեղեցիկ անվան տակ: Սակայն փաթեթի ուսումնասիրությունը վկայում է, որ իրականում զբոսաշրջիկները հանգստյան համար նախատեսված օրերի մեծ մասն անցկացնում են ծովափին, իսկ պատմական Հայաստանի սրբավայրերին հատկացվում է առավելագույնը 1-2 օր:


«Նարեկավան» տուրը, օրինակ, առաջարկում է բարձրակարգ 3 և 4-աստղանի հյուրանոցներ՝ Միջերկրական ծովափի 1-ին գծում հանրահայտ Կոռիկոս բերդի համայնապատկերով. ըստ որում, 10 օր, 9 գիշեր ճամփորդության 7 գիշերը՝ ծովափնյա հյուրանոցում, առաջին և վերջին գիշերը Մուշի հյուրանոցում, իսկ երթուղին անցնում է Կարս-Խնուս-Մուշ-Դիարբեքիր-Ադանա-Տարսոն-Կոռիկոս ուղով:


Տեղում հնարավոր է կազմակերպել էքսկուրսիաներ Կիլիկայի պատմական վայրեր՝ Սիս, Լևոնի բերդ, Տարսոն, Ադանա, Սելևկիա և այլն: Երևանից Թուրքիա ուղևորության ընթացքում Կարս քաղաքում ներառված է շրջայց Կարսում և ծանոթություն Առաքելոց եկեղեցու Վարդանի կամրջի, Չարենցի տան հետ: Իսկ վերջին օրը՝ շրջայց դեպի Մուշ՝ Սբ. Մարիամ եկեղեցի, Սուլուխի կամուրջ, Արածանի Մուրաթ գետ:


«Անի տուր» ընկերությունը ևս նմանատիպ պայմաններով ծովափնյա հանգիստ է կազմակերպում:


Հիշեցնենք, որ Կիլիկիան այժմ գրեթե ամբողջությամբ պատկանում է Թուրքիայի Հանրապետությանը, բացի Քեսաբի շրջանից, և հանգիստն էլ կազմակերպվում է հիմնականում Քըզ Քալեսի ծովափում:


«Իրազեկ և պաշտպանված» սպառող հասարակական կազմակերպության նախագահ Բաբկեն Պիպոյանը, ով տարիներ առաջ Թուրքիա և Անթալիա չմեկնելու քարոզչություն էր տանում, այսօր Tert.am-ի հետ զրույցում ասաց, որ այսօր էլ ինքը չի գնա, իր ընտանիքը չի գնա, բայց բարոյապես այլևս չի կարող նման քարոզ իրականացնել:


«Եթե մենք ուզում ենք, որ մեր քաղաքացին գումարը դրսում չծախսի, մենք պետք է ամեն ինչ անենք, որ քաղաքացուց պահանջենք: Իսկ պահանջել չենք կարող, որովհետև դա չենք արել»,–ասաց նա:


Բացի այդ, Բաբկեն Պիպոյանը նշեց, որ ծովային հանգիստն ինքն իրենով համարվում է ավելի առողջարար, քան լճային հանգիստը:


«Եվ դրանով հանդերձ, երբ ծովում հանգիստը շատ ավելի մատչելի է և ելնելով սոցիալ-տնտեսական իրավիճակից՝ մարդը գնում է այդ քայլին»,-ասաց նա:


Բաբկեն Պիպոյանի հավելմամբ՝ այս իմաստով միակ ճանապարհը մեր երկրի մրցակցային լինելն է, ինչի համար պետք է արագ քայլեր արվեն: Նա անգամ հիշեց, որ ակադեմիկոս Վիկտոր Համբարձումյանը ժամանակին դեմ է եղել Սևանը զբոսաշրջային կենտրոն դարձնելուն, քանի որ ասել է, որ ողջ բնակչությունը կդառնա սպասարկող անձնակազմ: Սակայն սպառողների շահերով զբաղվող կազմակերպության նախագահը հավելեց, որ «ժամանակները տրանսֆորմացվել են»:


Ինչ վերաբերում է հարցին, թե «պատմական Կիլիկիա» ձևակերպման դեպքում գործ ունե՞նք անբարեխիղճ գովազդի հետ, վերջինս նշեց, որ ոչ, քանի որ մարդը, երբ տոմս է գնում կամ փաթեթ, շատ լավ հասկանում է, թե ուր է գնում:


«Այսինքն՝ ինքը կոնկրետ գնում է Անթալիա կամ կոնկրետ՝ Թուրքիա, չկա որևէ Թուրքիա գնացող տուրիստ, որը չգիտի, որ ինքը հանգստանում է Թուրքիայում»,-ասաց նա:


Տուրիզմի հայկական ինստիտուտի ռեկտոր, տուրիզմի գծով փորձագետ Ռոբերտ Մինասյան էլ կարծիք հայտնեց, որ ոչ մեկ որևէ մեկին չի կարող ասել, որ մի հանգստացիր որևէ տեղում:


«Դա նման է նրան, որ ասես, թե դու այսօր պանիր չպետք է ուտես: Ով որտեղ ցանկանում է, որտեղ հնարավորություն ունի, այնտեղ է հանգստանալու»,- ասաց տուրիզմի մասնագետը և ավելացրեց, որ միակ ձևը, որը կստիպի հայաստանցուն մնալ Հայաստանում, տեղում որակյալ ու մատչելի հանգստի ու սպասարկման կազմակերպումն է:


«Չնայած դա էլ է ոչ վերջնական, որովհետև մարդը որտեղ ուզում է, այնտեղ պետք է հանգստանա, որովհետև եթե ես ուզում եմ գնալ Ծաղկաձոր, ինձ ո՞նց կարող են ստիպել գնալ Ջերմուկ»,- ավելացրեց տուրիզմի փորձագետը: