Տնօրեններն ուսուցիչներին ստիպում են սոցփաթեթներով համագործակցել կոնկրետ տուրօպերատորի հետ

Հանրակրթական դպրոցների ուսուցիչներին հանգստի նպատակով հատկացված սոցիալական փաթեթի ապահովման ծառայությունից օգտվելու համար որոշ դպրոցներում տնօրենները ստիպում են ուսուցիչներին համագործակցել կոնկրետ զբոսաշրջային օպերատորի հետ: Այս մասին Tert.am-ը ահազանգեր է ստացել մի քանի ուսուցիչներից, որոնք հրաժարվեցին հրապարակել իրենց անունները՝ մտավախություն ունենալով, որ իրենց իսկ դպրոցներում լուրջ խնդիրներ կարող են ունենալ։

Եղել են նաև դեպքեր, երբ տվյալ ընկերությունն այլևս հնարավորություն չի ունեցել արձակուրդային ժամկետում ծառայություն մատուցել, մինչդեռ ուսուցչի և բանկի միջև համապատասխան պայմանագրի կնքումից հետո գումարն արդեն փոխանցվել է այդ ընկերության հաշվին:

Խնդրի մասին փորձեցինք պարզաբանումներ ստանալ ՀՀ կրթության և գիտության նախարարությունից։ ԿԳՆ ֆինանսատնտեսագիտական և հաշվապահական հաշվառման բաժնի պետ Գևորգ Եղինյանը տեղեկացրեց, որ նախարարությունը որևէ կապ չունի այդ ծրագրի հետ, և ֆինանսական բոլոր հարցերը լուծվում են բանկերի միջոցով: «Մենք որևէ կերպ չենք խառնվում այդ հարցերին»,- ասաց նա:

Սոցիալական փաթեթի հանգստի ապահովման ծառայությունը ՀՀ-ում և ԼՂՀ-ում համակարգվում է էկոնոմիկայի նախարարության միջոցով: Ինչպես Tert.am-ին փոխանցեց ՀՀ էկոնոմիկայի նախարարության Զբոսաշրջության վարչության պետ Մեխակ Ապրեսյանը, գոյություն ունի ծառայության մեջ ընդգրկված զբոսաշրջային օպերատորների ցանկ, և սոցիալական փաթեթով հանգստի ապահովման ծառայությունները մատուցվում են  նախարարությունում հաշվառված տուրօպերատորների միջոցով:

Հանգստի ապահովման և տուրօպերատորների հաշվառման կարգը սահմանված է էկոնոմիկայի նախարարի հրամանով, որտեղ ներկայացված են չափանիշները, թե ինչպիսին պետք է լինի ընկերությունը, համապատասխան փաստաթղթեր պետք է ներկայացվեն, հյուրանոցային ծառայության գինը չպետք է լինի ավելին, քան հյուրանոցի հայտարարած մանրածախ գինն է, բացառությամբ այն դեպքերի, երբ զբոսաշրջային ծառայությունը ավելացված արժեքի հարկ վճարող է, իսկ հյուրանոցային ծառայություն մատուցող անձը՝ ոչ: Այդ դեպքում թույլատրվում է հյուրանոցի հայտարարած մանրածախ գնին գումարել ԱԱՀ-ի գումարը»,- ասաց նա:

Հարցին, թե արդյոք գոյություն ունի կարգ կամ պայման, որ մի որևէ դպրոց պարտադիր պետք է համագործակցի զբոսաշրջային ինչ-որ մի ընկերության հետ, Մեխակ Ապրեսյանը միանշանակ պատասխանեց՝ ոչ:

«Բոլորն ինքնուրույն իրավունք ունեն ընտրել մեր կայքում հրապարակված ընկերություններից որևէ մեկը: Նրանք կարող են մեր կայքի միջոցով այցելել այդ ընկերությունների կայքեր, ուսումնասիրել, առաջարկներին համապատասխան կարող են իրենք ընտրություն կատարել»,- ասաց նա և ավելացրեց, որ այդ առաջարկները չեն սահմանափակում շահառուների իրավունքները, միայն թե զբոսաշրջային փաթեթները ձևավորելիս օպերատորը պարտավոր է հստակ նշել, թե ինչքան է փաթեթի արժեքը, դրա մեջ որքանն է հյուրանոցային ծառայության արժեքը, որը չպետք է գերազանցի հյուրանոցի հայտարարած մանրածախ առևտրի գինը:

Մեխակ Ապրեսյանը նաև շեշտեց, որ անթույլատրելի է որևէ շահառուի ստիպել համագործակցել ինչ-որ ընկերության հետ. «Ստիպել չի կարելի, այլ բան է, եթե խորհուրդ տան, վատ բան չի նաև, երբ ընկերությունները մարկեթինգային քայլեր անեն և գնան ու ներկայացնեն իրենց ծառայությունները: Մենք կարող ենք ասել միանշանակ, որ որևէ մեկն իրավասու չէ պարտադրել շահառուին ընտրել այս կամ այն օպերատորին»:

Մեխակ Ապրեսյանը կոչ արեց շահառուներին իմանալ իրենց իրավունքները և չկորցնել իրենց ընձեռված հնարավորությունը: Իսկ կոռուպցիոն ռիսկերը հնարավորինս նվազեցնելու մասին ասաց, որ պարզապես մարդիկ պետք է տեղյակ լինեն, որ դա իրենց իրավունքն է: Իսկ կարգը խախտողները կենթարկվեն պատասխանատվության: