Արտադրությունն ու արտահանումը պետք է զուգահեռ խթանել, ընդամենը պետք է հավասար դաշտ. կարծիքներ վարչապետի հանձնարարականի մասին

Հայրենական ապրանք արտադրողների միության նախագահ Վազգեն Սաֆարյանը կարծում է, որ ՀՀ-ից ՌԴ գյուղմթերքի արտահանման ծավալները 30-40 միլիոն դոլարով կարելի է ավելացնել։ Այս մասին նա ասաց Tert.am-ի հետ զրույցում, ի պատասխան դիտարկման, որ ՀՀ վարչապետ Հովիկ Աբրահամյանը հանձնարարել է ձևավորել համատեղ աշխատանքային խումբ, որը կուսումնասիրի արտահանող ձեռնարկությունների արտադրական հզորությունները, ռեսուրսները և արտահանման ծավալի ավելացման հնարավորությունները:

Վազգեն Սաֆարյանը գտնում է, որ վարչապետը ճիշտ որոշում է կայացրել: «Այսօր ռուսական շուկայում՝ կապված ԵՄ-ի կողմից կիրառվող պատժամիջոցների հետ, մենք շատ լավ հնարավորություն ունենք այդ շուկայում մեր տեղը զբաղեցնելու առումով: Դրա համար քայլեր պետք է արվեն, որոնք կնպաստեն գյուղմթերքի արտահանման ծավալներն ավելացնելու ուղղությամբ: Մեր գնահատականներով՝ դրանք 30-40 միլիոն դոլարով կարելի է ավելացնել, ինչը շատ լուրջ օգնություն կլինի մեր գյուղատնտեսության ոլորտի աշխատողների համար»,-ասաց նա և նկատեց, որ Հայաստանը լայն հնարավորություններ ունի, մասնավորապես Ռոստովի մարզ արտահանում կազմակերպելու հարցում:

Հարցին, թե նախ չպե՞տք է արտադրության ծավալների խթանման ծրագրեր իրականացնել, ապա նոր մտածել արտահանման մասին, Վազգեն Սաֆարյանը պատասխանեց. «Դրանք զուգահեռ պետք է արվեն»:

Նա նշեց, որ բացի այն, որ տարեցտարի մեր մշակվող հողատարածությունների ծավալը մեծանում է, պետք է նաև մտածել գյուղատնտեսական կոոպերացիաներ ստեղծելու մասին:

Հայրենական ապրանք արտադրողների միության նախագահն օրինակ բերեց, որ այժմ դեղձի մեծ քանակություն կա, որը նույնիսկ շատ ցածր գնով չի իրացվում:

«Իսկ եթե պետությունը աջակցեր նրանց մթերքները մթերելու, կամ պատրաստի թարմ միրգը արտահանելու ուղղությամբ, բավականին օգնություն կլիներ գյուղացիներին»,-ասաց նա՝ նկատելով, որ եթե մինչ այժմ կառավարության կողմից գյուղատնտեսությունը սուբսիդավորվում էր չորս տոկոսով, հիմա արդեն՝ վեց տոկոսով:

Հարցին, թե Թուրքիան պատրաստվում է ավելացնել արտահանման ծավալները Ռուսաստան և այդ երկրի շուկան թուրքական ապրանքով լցվելու պարագայում, որքանո՞վ մրցունակ կլինի մեր ապրանքը, նա պատասխանեց. «Ամեն մի երկիր ունի իր իմիջը: Հայկական ապրանքի՝ մասնավորապես գյուղմթերքի վերաբերյալ որոշակի դրական վերաբերմունք կա: Չեմ կարծում, որ թուրքական ապրանքները, ռուսական շուկա գալով, մեզ կվնասեն, որովհետև Ռուսաստանի շուկան շատ մեծ է: Առավել ևս, որ Ռուսաստանում մեծ քանակությամբ հայեր են ապրում, որ եթե միայն նրանք էլ սպառեն, մենք չենք հասցնի այդքան ապրանք արտահանել»։

Ամփոփելով՝ Վազգեն Սաֆարյանը նշեց, որ այսօր պայմանները շատ բարենպաստ են, ինչից պետք է Հայաստանը կարողանա օգտվել, առավել ևս, որ օրեր առաջ Ռուսաստանի կառավարությունը հաստատեց ՀՀ-ի ԵՏՄ-ին անդամակցության պայմանագիրը։

ԱԺ «Հանրապետական» խմբակցության անդամ Ալեքսան Պետրոսյանը ևս գտնում է, որ արտադրման և արտահանման ծավալները պետք է ավելացվեն զուգահեռ, ինչը ցանկացած պահի կարելի է անել: Նա ևս դրական է համարում վարչապետի այդ որոշումը:

«Հաշվի առնելով, որ գյուղմթերքների արտադրության և վերամշակման սեզոն է, բոլոր եղած հնարավորություններից պետք է օգտվել, ինչն անպայման կանդրադառնա արտադրանքի քանակների ավելացման վրա: Մեր արտադրանքների ավելացման հիմքում ընկած է գյուղատնտեսության զարգացումը, այսինքն` պետք է շատ գյուղմթերք արտադրվի, որպեսզի կարողանան արտահանել»,-ասաց նա:

Ինչ վերաբերում է կառավարության խթանող ծրագրերի բավարար լինելուն, Ալիկ Պետրոսյանն ասաց, որ շատ դժվար է այսօր ասել, թե դա բավարար է, որովհետև դա աստիճանաբար պետք է արվի՝ կախված է կառավարության հնարավորություններից և քրտնաջան աշխատանք է պահանջում:

«Ցանկացած երկրում բոլորը պետք է աշխատանքներ տանեն, որպեսզի գյուղատնտեսությունը, արդյունաբերությունը զարգանա և արտահանումը խթանվի: Այսօր արտադրող գործարանները տեխնոլոգիաների տեսակետից շատ ավելի առաջ են, քան գյուղատնտեսական ապրանքներ արտադրողները՝ ֆերմերները»,-ասաց նա և նշեց, որ մեր արտադրանքից նախ մենք պետք է օգտվենք:

ԱԺ պատգամավոր Ալիկ Արզումանյանը Tert.am-ի հետ զրույցում նշեց, որ արտահանման ծավալների ավելացման հնարավորությունների ուսումնասիրումը հենց կառավարության աշխատանքն է, որը պետք է կատարվի: «Վարչապետը պետք է ուսումնասիրի հնարավորությունները, որ տեսնենք, թե ինչ է մեր գլխին գալիս»,-ասաց նա:

Իսկ արտադրանքի ծավալների ավելացման հետ կապված նա նշեց. «Արտադրանք կա՞ , որ ծավալներն ավելացվի, թող թալանածը վերադարձնեն ժողովրդին և նորմալ տնտեսական հարաբերություններ ապահովեն: Եթե բիզնեսը ստվերից բերեն օրինական դաշտ, մարդկանց հարգեն, ապա արտադրողը արտադրանքը կավելացնի՝ առանց պետական միջամտության»:

Ընդհանուր առմամբ Ալիկ Արզումանյանը հիշեցրեց, որ ինքը լիբերալ հայացքներ կրող է: «Վարչապետը պետք է տնտեսության մեջ չխառնվի, ընդհանրապես կառավարությունը պետք է հավասար դաշտ ապահովի, իսկ մարդիկ հավասար մրցակցության պայմաններում արտադրանք էլ կտան, արտահանումն էլ կապահովեն և ժողովրդի կենսամակարդակը կբարձրացնեն, սա է իմ փիլիսոփայությունը»,-հավելեց նա: