Լարսի փակ լինելու դեպքում կարևոր է գործընկերների հետ կապերը չընդհատելը, վնասը կլինի արտահանման աճի դանդաղումը. կարծիքներ

Հանգամանքներն են բերել նրան, որ Հայաստանի գործընկերային կապերի ճնշող մեծամասնությունը Ռուսաստանի հետ է: Հիմա տնտեսվարող սուբյեկտի ամբողջ նպատակն այն է, որ իր գործարքները տեղի ունենան հնարավորինս պատշաճ ձևով և չընդհատվեն։ Այս մասին Tert.am-ի հետ զրույցքում ասաց տնտեսագետ Վարդան Բոստանջյանը, ի պատասխան դիտարկմանը, թե այն դեպքում, երբ խոսվում է դեպի Ռուսաստան արտահանման ծավալների մեծացման մասին, ստեղծված խնդիրը լուրջ խոչընդոտ չի՞ հանդիսանա այդ հարցում։ 

«Հաշվի առնելով, որ մեզ ավելի արդիական, ավելի բարձր գործընկերներ գտնելու հնարավորություն տրված չէ, ես մտածում եմ, որ մենք պետք է գոնե ամրապնդենք այդ արդեն հաստատված կապերը»,–հավելեց նա։ 

Տնտեսագետը նաև նշեց, որ հանգամանքների բերումով Հայաստանը հայտնվել է մի տեղում, որ կարելի է անգամ սենտիմենտալորեն ասել, որ մեր բախտը չի բերում. «Իհարկե, չկիրառենք այդ մոտեցումը և հասկանանք, որ սրանք են մեր պայմանները: Լիովին այլ հարց է, որ կառավարողներն այդքան էլ լավ չեն հասկանում, չեն անում այն, ինչ կարելի է»: 

ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը Tert.am-ի հետ զրույցում նշեց, որ Վերին Լարսի՝ սողանքի հետևանքով փակված ճանապարհը Հայաստանը ռուսական շուկային կապող կարևոր ճանապարհ է, որի խափանումը որոշակի վնասներ կհասցնի, իսկ թե կոնկրետ որ ապրանքատեսակների վրա կազդի և ինչ ծավալներով, պարզ կլինի ճանապարհը բացվելուց հետո արվելիք հաշվարկների արդյունքում: 

«Իհարկե, այդ ճանապարհը մեզ համար շատ կարևոր ճանապարհ է, Վրաստանն էլ մեր բեռնափոխադրումների և հեռահաղորդակցության առումով կարևոր երկիր է՝ գործընկեր և բարեկամ պետություն, հետևաբար աղետների և փլուզումների արդյունքում առաջացած բարդությունները որոշակի խոչընդոտ առաջացնելու են տնտեսության վրա»,-ասաց Արտակ Զաքարյանը: 

ՀՀ էկոնոմիկայի նախարարության Առևտրի և շուկաների կարգավորման վարչության պետ Գագիկ Քոչարյանը մեզ հետ զրույցում ներկայացրեց ցուցանիշներ, որոնք ցույց են տալիս, թե տնտեսության վրա ինչ ազդեցություն է ունեցել դեռ այս տարվա մայիսին կրկին սողանքի հետևանքով Վերին Լարսի ավտոճանապարհի փակումը: 

Ըստ նրա՝ այս տարվա արտահանման առաջին կիսամյակի ցուցանիշների՝ նախորդ տարվա առաջին կիսամյակի հետ համեմատությունը ցույց է տվել, որ աճը կազմել է 1,4 տոկոս, բայց կարող էր կազմել ավելի շատ, եթե չլիներ մայիս ամսին մոտ մեկ ամիս Վերին Լարս ավտոճանապարհի փակվելը: 

Օրինակ՝ անցած տարվա նույն ժամանակահատվածի համեմատ արտահանված խմիչքների ծավալը 10%-ով նվազել է, նվազել է նաև թարմ պտուղ-բանջարեղենի արտահանումը: 

«Այդ պատճառով մեր արտահանման ծավալը չի աճի այնքան, ինչքան մենք կանխատեսել ենք՝ մոտ 10-15 տոկոս, զուտ դրա հետ կապված մոտ մեկ ամիս փակումը ընդհանուր ազդեցություն ունեցավ մեր արտահանման ծավալների վրա»,-ասաց նա և ավելացրեց, որ այժմ, երբ արդեն երկիրը պատրաստ է արտահանման, այս անգամ անշուշտ ճանապարհի փակումը կրկին կունենա իր ազդեցությունը: Ըստ նրա՝ խնդրահարույց են հիմնականում խմիչքը, պտուղ բանջարեղենը և հանքային ջրերը: 

Իսկ ներկրման առումով երկրում խնդիրներ՝ ապրանքների դեֆիցիտ առաջանալու հետ կապված նախարարության պաշտոնյան նշեց, որ դա քիչ հավանական է, քանի որ նախկինում ավելի երկար ժամանակով է երկրում նման խնդիր առաջացել, սակայն ինչ-որ ապրանքատեսակի դեֆիցիտ չի առաջացել:

Իսկ ՀՀ գյուղատնտեսության նախարար Սերգո Կարապետյանը այսօր կայացած ասուլիսին հայտարարեց, որ սողանքային փլուզման հետևանքով Վերին Լարս ավտոճանապարհի փակման պատճառով գյուղատնտեսական ապրանքների մթերումը արտահանող ընկերությունները չեն դադարել, քանի որ ունեն սառնարանային տնտեսություններ:

«Դեռ մայիս ամսին, երբ նորից փակված էր այդ ճանապարհը, այդ ընթացքում մենք մի շարք մթերքների արտահանման հետ կապված բավականին խնդիրներ ունեցանք: Մեզ համար դա շատ կարևոր ուղի է»,-ասաց նա:
Նախարարը հույս հայտնեց, որ 10-12 օրվա ընթացքում ճանապարհը կբացվի. «Այդ հարցը մենք քննարկել ենք նաև Վրաստանի վարչապետի հետ ու հուսով ենք, որ ճանապարհը միայն այդքան օրով փակ կմնա»:

Թե առաջացած խնդիրն ինչ ազդեցություն կունենա Հայաստանից արտահանողների վրա, Tert.am-ը հետաքրքրվեց արտահանումներ իրականացնող «Սպայկա» ընկերությունից: Ընկերությունից ասացին, որ ճանապարհի 10 օր չաշխատելն առանձնապես խնդիրներ չի առաջացնի ընկերության համար: Նաև տեղեկացրին, որ մթերումները չեն դադարեցրել, այժմ էլ շարունակում են մթերել և պահեստավորել, ինչը կարտահանեն ճանապարհը բացվելուց հետո միայն: