Air Armenia–ի տնօրենը չի բացառում ռուսական ավիաընկերությունների կողմից դեմպինգը

Tert.am-ի հետ զրույցում Air Armenia–ի գործադիր տնօրեն Արսեն Ավետիսյանը չբացառեց, որ ինչ-ինչ դժվարությունները, որ ունեն իրենց ընկերությունում, կարող են պայմանավորված լինել ռուսական ավիաընկերությունների ինչ-ինչ քայլերով, սակայն հերքեց, որ դրանք այն աստիճան են, որ հնարավոր լինի խոսել ընկերության սնանկ ճանաչվելու մասին:


-Պարո՛ն Ավետիսյան, կայքերից մեկը տեղեկացրել էր, որ ընկերությունը շուրջ 5 միլիոն դոլարի պարտքեր ունի, հնարավոր է առաջիկայում սնանկ ճանաչվի, ինքնաթիռների ձեռքբերման հետ կապված էլ խնդիրներ ունի:

-Չգիտեմ ով է պատվիրատուն, արդեն երկրորդ անգամ ապատեղեկատվություններ են տարածվում: Երևի, իրենք ուրախանում են, որ մենք ունենք խնդիրներ ... չգիտեմ՝ ով է անում:

-Փաստորեն, հաստատում եք, որ ունեք խնդիրներ:

- Մենք ունենք տեխնիկական խնդիրներ, մենք այսօրվա դրությամբ մեր A320 օդանավը Փարիզով մեկնել է Ամստերդամ, որտեղ պետք է կատարվի տեխնիկական սպասարկում՝ պլանավորված: Երկրորդ A320 օդանավը պետք է գնար տեխսպասարկման կարճ ժամկետով և երկրորդ օդանավը այսօրվա դրությամբ նորից գտնվում է իրենց մոտ, Դուբայում ես օդանավ չունեմ, ինչպես գրել են, և այդ երկրորդ օդանավը տեխզննում անցնելով՝ նորից կվերադարձվի հետ: Մյուս օդանավը 21 օր լինելու է այնտեղ, խնդիրն այն է, որ դա չնախատեսված էր և մեկ օդանավով մենք հնարավորություն չունենք ամբողջ չվացուցակը ապահովելու: Այդ իսկ պատճառով երկու թռիչք միացրել ենք իրար, կատարում ենք մեկ օդանավով: Այո, մենք ունենք խնդիրներ, և ես ստիպված եմ կողքի հարևան ընկերություններից ժամանակավոր օդանավ վերցնել, թռիչքները ապահովենք, մինչև իմ օդանավը հետ վերադառնա:

-Իսկ ֆինանսական խնդիրներ չունե՞ք:

-Ուրեմն՝ աշխարհում բոլոր ավիաընկերություններն ունեն ֆինանսական խնդիրներ, սակայն հաշվի առնելով, որ մեր շրջանառու միջոցները բավարար են, մենք մեր ֆինանսական խնդիրները լուծում ենք, սնանկության մասին խոսք լինել անգամ չի կարող:


Ես՝ ոչ որպես Air Armenia–ի գործադիր տնօրեն և բաժնետեր, այլ որպես հայ մարդ, խնդրում եմ՝ մի՛ մորթեք մեզ, որովհետև սեպտեմբերի 11-ից հետո մենք ոտքի չենք կարողանում կանգնել: Հիշեցնեմ՝ սեպտեմբերի 11-ին բոլոր լրատվամիջոցներով հայտարարվեց, որ սեպտեմբերի 21-ին մեր ընկերությունը դադարեցնում է գործունեությունը, քանի որ ունի պարտքեր ունի «Ռոսաէրոնավիգացիային»: Ինչը չէր համապատասխանում իրականությանը, և դրա վերաբերյալ համապատասխան հայտարարություն եմ արել, սակայն, քանի որ այդ ապատեղեկատվությունը տարածվեց ողջ աշխարհով, տպագրել էր նաև ԻՏԱՌ ՏԱՍՍ-ը, մենք կանխատեսում էինք, որ մինչև ամսի 21-ը ժողովրդի մոտ կլինի այդ խուճապը, սակայն թռիչքները կկատարվեն և այն կցրվի: Ինչպես տեսնում եք՝ թու-թու-թու առ այսօր կատարվում են թռիչքները:

-Իսկ որ ասում եք՝ նման ավիաընկերություն չկա, որ չունենա ֆինանսական խնդիրներ, արդյո՞ք դրանք չեք կապում ռուսական ավիաընկերությունների կողմից իրականացվող դեմպինգի հետ:

- Այո՛, այդ հայտարարությունները, կարող են կապված լինել մրցակիցների ինչ-որ քայլերի հետ, և այն նամակը, որ ես ստացել էի «Ռոսաէրոնավիգացիայից», շատ բարեխիղճ և բարեհամբույր նամակ էր, սակայն այն տեղեկատվությունը, որ տպագրվեց, իրոք, աբսուրդ էր: Եվ այն բերեց մեծ ֆինանսական խնդիրների, քանի որ մեր բոլոր դեբիտորները ձեռնպահ են մնում մեզ գումարներ վճարելուց, քանի որ ասում են՝ կարող է մենք թռիչքները չանենք, մենք ստիպված ենք լինելու ավիատոմսերի վերադարձ ապահովել: Եվ բոլորը միանգամից բոլորը միասին իրենց գումարները պահանջել՝ վախենալով, որ մեր ընկերությունը կարող է սնանկանա: Բայց մենք չենք սնանկանա, այո՛, կան խնդիրներ, որ մենք չենք կարողանում ապահովել մեր հասույթները ժամանակին ստանալ, որպեսզի վճարենք կրեդիտորների պարտքերը:

-Հասկանալի է, բայց ես ամառվա ընթացքում ավիաթռիչքների մասին եմ հարցնում, երբ ռուսական ընկերությունները…

-Այո՛, Դուք ճիշտ եք՝ ամռան ընթացքում փորձում էին այնպես անել, որպեսզի հայկական փոխադրող չլինի:

-Իսկ արդյո՞ք դա պայմանավորված չէր նրանով, որ սիմետրիա չկար Մոսկվայից Ձեր ընկերության և ռուսական ընկերությունների կողմից կատարվող թռիչքների միջև, դուք՝ 1-2 , նրանք՝ 7:

-Մենք անում ենք օրական 2 թռիչք, և կիրակի օրերին՝ 3 թռիչք: Դե «Բաց երկնքի» քաղաքականությունը հենց նրանում է, որ ցանկացած ավիափոխադրող ինքն է որոշում՝ քանի թռիչք իրականացնի, ո՞ր ուղղությամբ, և որևէ սահմանափակումներ չկան: Դա մրցակցություն է և դա նշանակում բաց երկինք: Դե բնական է, եթե լիներ 7 թռիչք հայկական կողմից, 7-ը՝ ռուսական, մենք շատ լուրջ շահույթներ կունենայինք:Այսօր ստեղծեցին այն իրավիճակը, որ պետք է դժվարին պայմաններում մրցենք:

-Բայց չէ՞ որ մի քանի ամիս առաջ հպարտությամբ հայտարարվում էր, որ «Բաց երկնքի» քաղաքականությունը տվել է իր արդյունքը՝ ուղևորների և թռիչքների մոտ 40 տոկոսանոց աճ:

-Այսպես ասեմ՝ «Բաց երկնքի» քաղաքականության կողմնակիցները, բնականաբար, պետք է պնդեն, սակայն ուղղակի վերցնել հայտարարելը միանշանակ սխալ բան է: Դա պրոցեդուրա էր, որ ի սկզբանե որոշվել էր, որ պետք է անցնեինք:Այսինքն՝ մեր պետությունը պետք է նախապատրաստվեր այդ բաց երկնքի քաղաքականությանը՝ փուլային: Իսկ մենք ուղղակի հայտարարեցինք, ու շուկայում սկսվեց քաոս, սկսվեց դեմպինգ, և այլն, և այլն: Այսինքն՝ մենք պատրաստ չէինք այդ հայտարարությանը:

-Իսկ այդ ցուցանիշները՝ 40 տոկոս ուղևորների ավելացում:

-Ուղևորների աճ տեղի է ունեցել, դա բնական է, և դա ինչ-որ չափով կապված է եղել «Բաց երկնքի» քաղաքականության հետ, բայց միևնույն ժամանակ, մի հատ ուշադրություն դարձրեք, այդ աճը ո՞ր ուղղություններով է տեղի ունեցել: Տեղի է ունեցել Ռոստով, Կրասնոդար, Սոչի, Միներալնիե վոդի ուղղությամբ:

- Արտերկրյա աշխատանքի՞ են մեկնել։

-Այդքան ուղևորներ ավտոբուսներից տեղափոխվեցին օդանավեր: Ինչո՞ւ, քանի՛ անգամ է այս տարի Լարսը փակվել: Գները նվազեցին միայն այն ուղղություններով, ուր մենք կատարեցինք կամ կատարում ենք թռիչքներ: Կոնկրետ եվրոպական ուղղություններով, մինչ մեր Փարիզի թռիչքը սկսելը, 800 եվրո երկու ուղղությամբ տոմսն էր, և միայն մեր թռիչքներից հետո հնարավոր եղավ 350-380 եվրոյով, որ մենք մինչ այսօր վաճառում ենք: