ՌԴ-ի նկատմամբ կիրառվող պատժամիջոցները և Հայաստանը. ակնկալվող օգուտներից մինչև վնասներ

ԱԺ «Հանրապետական» խմբակցության քարտուղար Գագիկ Մելիքյանը գտնում է, որ Արևմուտքի կողմից Ռուսաստանի նկատմամբ կիրառվող պատժամիջոցների հետևանքով Ռուսաստանի տնտեսության անկումն իր հերթին կունենա իր ազդեցությունը մեր տնտեսության վրա:


Դիտարկմանը, թե նախկինում իշխանության կողմից ասվում էր, թե այդ պատժամիջոցները չեն ազդի մեզ վրա, այլ ճիշտ հակառակը` Հայաստանը դրանից օգուտներ կունենա` մասնավորապես արտահանման հարցում, Գագիկ Մելիքյանը պատասխանեց.«Պատժամիջոցների արդյունքում իրոք նվազել են տրանսֆերտները: Իրոք լուրջ, ավելի հեռատես տնտեսական քաղաքականություն վարելու դեպքում կարելի է օգտվել Ռուսաստանի նկատմամբ կիրառվող պատժամիջոցներից և տնտեսական շահ ստանալ»,-ասաց նա:

Հարցին, թե ստացվում է, որ չի վարվում նման քաղաքականություն, քանի որ մենք չենք ստանում այդ շահը, նա պատասխանեց.«Դա պետք է վարվի պատժամիջոցներից հետո, իսկ պատժամիջոցները նոր են կիրառվում, ընդամենը երկու ամիս է: Այդ երկու ամսվա ընթացքում պետք է տնտեսական քաղաքականության մեջ փոփոխություններ իրականացվեն, և օգտվենք այն առավելություններից, որը Ռուսաստանն արդեն տալիս է իր երկիր` հատկապես գյուղատնտեսական մթերքներ ներկրողներին: Դրանք լուրջ առավելություններ են, որոնցից մենք կարող ենք օգտվել»:

Դիտարկմանը, թե մենք վնասները շուտ զգացինք, իսկ օգուտները` ոչ, Գագիկ Մելիքյանն ասաց, թե «վնասները վաղուց էր, որովհետև Ռուսաստանի տնտեսությունը նախքան պատժամիջոցներն էլ անկում էր ապրում և տրանսֆերտներով մենք վնասները զգացինք»:

Հարցին, թե հաշվի առնելով, որ ընդունում եք, թե Ռուսաստանի տնտեսությունը լուրջ վնասներ է կրել, հիմա Հայաստանի ԵՏՄ անդամակցության հարցում իշխանությունների լավատեսությունը պահպանվո՞ւմ է, «Հանրապետական» խմբակցության ղեկավարն ասաց.«Այո՛, պահպանվում է»:

Պատգամավորը նշեց, որ տնտեսական քաղաքականության համապատասխանեցման դեպքում մենք տնտեսական առավելություն կարող ենք ստանալ այդ պատժամիջոցներից, սակայն այդ առավելությունները ժամանակավոր են լինելու, և տևելու են այնքան ժամանակ, որքան որ պատժամիջոցներն իրականացվում են:

Ըստ Գագիկ Մելիքյանի՝ հեռատես տնտեսական քաղաքականություն Հայաստանը վարում է և հատկապես գյուղատնտեսական մթերքների արտահանման առումով լուրջ տեղաշարժեր կան, որոնք վերջին ամսվա ընթացքում նկատվում են:

«Բարգավաճ Հայաստան» խմբակցության անդամ Միքայել Մելքումյանը Tert.am–ի հետ զրույցում ասաց, որ Ռուսաստանի նկատմամբ կիրառվող պատժամիջոցները չէին կարող չանդրադառնալ մեզ վրա, քանի որ Ռուսաստանում մի քանի միլիոն հայ է աշխատում, որոնք տրանսֆերտներ են ուղարկում:«Հայաստանի իշխանությունը վարում է այնպիսի քաղաքականություն, որի այլընտրանքը չունի»,- ասաց նա։

Միքայել Մելքումյանը նշեց, որ Ռուսաստանի նկատմամբ կիրառվող պատժամիջոցները վերաբերում են երեք ուղղության: «Առաջինը` Ռուսաստանը չի ստանում այնպիսի բարձր տեխնոլոգիաների սարքավորումներ, որոնցից Ռուսաստանում այլ սարքավորումներ էին արտադրում: Երկրորդ` արևմուտքից ստանում էին բարձր ճնշման դիմացող բարձր տեխնոլոգիական դետալներ, որոնք օգտագործում էին ռազմական արդյունաբերության մեջ, դա ևս չկա: Երրորդ կարևոր բանն այն է, որ Արևմուտքի ֆինանսական կառույցները ֆինանսավորում էին Ռուսաստանի խոշորագույն գործարքները` օրինակ` Չինաստանի, Ճապոնիայի հետ, իսկ հիմա` ոչ»,-ասաց նա:

Միքայել Մելքումյանը նկատեց, որ Ռուսաստանի նկատմամբ կիրառվող այդ պատժամիջոցները բերեցին նաև եվրոպական շատ ձեռնարկությունների շահութաբերության անկմանը, քանի որ ռուսական շուկան մեծ է, իսկ եվրոպական շատ գյուղատնտեսական վերամշակող ապրանքներ Ռուսաստան չգալով լճացում է տեղի ունենում, ավելցուկ է առաջանում և գներն իջնում են:

«Այսինքն` նրանք իրականում ավելի շատ են տուժում, քան Ռուսաստանը, քանի որ Ռուսաստանն այդ բացը լրացնում է այլ երկրներից և որոշակի կոմպենսացում է տեղի ունենում: Սակայն բարձր վարկավորման, բարձր տեխնոլոգիաների առումով, իհարկե, տուժում է»,-ասաց պատգամավորը և ավելացրեց, որ դա բերում է Ռուսաստանում տնտեսական աճի որոշակի դանդաղման և ռուսական ռուբլու արժեզրկման: Նրա գնահատմամբ` խաչաձև այս պրոցեսներն ազդում է աշխարհի տարբեր երկրների և կառույցների վրա:

«Հայաստանին այս ամբողջ խոշոր խաղի կանոնների մեջ չնչին բան է լինում` քչանում են ռուսական տրանսֆերտները: Մենք տարեկան Ռուսաստանից   1.5 միլիարդ դոլարի տրանսֆերտ էինք ստանում, հիմա` ավելի քիչ: Սակայն դրա փոխարեն Հայաստանը ռուսական շուկա ապրանքների արտահանման շանս ունի, որին պատրաստ չէ: Ռուսական շուկան մեծ ծավալի ապրանքներ է ցանկանում, իսկ մենք որպեսզի այդքան արտահանենք, պետք է ընդլայնենք մեր արտահանման հնարավորությունները, սակայն մեր արտադրողները դրան պատրաստ չեն»,-ասաց նա և նկատեց, որ Հայաստանում վարկերի տոկոսադրույքները շատ բարձր են և խոշոր արտադրողներն արդեն այնքան են բեռնված վարկերով, որ նոր վարկեր չեն կարող վերցնել:

«Այս ամեն ինչը բերում է նրան, որ Հայաստանում որոշակի բացասական ազդեցություն կլինի, ապրանքների գնաճ կլինի, սակայն այնքան է իջել տնտեսական մակարդակի անկումը և դանդաղումը, որ էլ տեղ չկա, դրանից հետո կարող է փլուզում լինել, առավելևս, որ 2-3 փոքր փլուզում եղել է»: