Առաջընթացից խոսելը դեռ վաղ է. Արարատի գլխավոր մարզիչ Սուրեն Չախալյան

«Արարատի» գլխավոր մարզիչ Սուրեն Չախալյանն ակումբի պաշտոնական կայքին հարցազրույց է տվել, որում խոսել է Սոչիում անցկացված հավաքի եւ առաջիկա ծրագրերի մասին:

- Ինչպե՞ս կգնահատեք ուսումնամարզական հավաքը: Հաջողվե՞ց արդյոք իրականացնել ծրագրվածը:

- Դրական: Ամեն ինչ անցավ ըստ պլանավորվածի: Շատ լավ պայմաններ էին ստեղծված հավաքի համար: Հյուրանոցը, խաղադաշտը, վերականգնողական կենտրոնը. Ամեն ինչ կազմակերպված էր բարձր մակարդակով: Նպատակ էինք դրել ավելի լավ ծանոթանալ նորեկների հնարավորություններին և կողմնորոշվել նրանց հարցում: Արդյունքում ունեցանք նոր համալրումներ և հրաժարվեցինք որոշ ֆուտբոլիստների ծառայություններից:

- Ինչի՞ վրա էր դրվում շեշտը մարզումային պրոցեսում:

- Քանի որ սա մեր առաջին հավաքն էր, հիմքը դրվում էր ֆուտբոլիստների ֆունկցիոնալ պատրաստվածությունը բարելավելու վրա:

- Հայտնի է, որ արհեստական խոտածածկով խաղադաշտում մարզումները երբեմն դառնում են վնասվածքների պատճառ: Ի՞նչ որակի էր «Վեսնա» մարզահամալիրի խաղադաշտը:

- Մարզումային խաղադաշտը շատ լավ որակ ուներ և այդ պարագայում վնասվածք ստանալու հավանականությունը կտրուկ նվազում է: Կարողացանք խուսափել վնասվածքներից, ինչը շատ կարևոր է:

- Կարելի՞ է արդյոք ասել, որ թիմն արդեն լիովին կոմպլեկտավորված է, թե դեռ սպասվում են համալրումներ:

- Մեզ կմիանան ևս 1-2 ֆուտբոլիստներ, որոնց հարցում կկողմնորոշվենք հաջորդ հավաքից հետո:

- Մի փոքր պատմեք կայացած ընկերական խաղերի մասին:

- Առաջին խաղի համար ընտրեցինք համեմատաբար թույլ մրցակից և ասպարեզ հանեցինք երկու տարբեր կազմեր: Այդ ժամանակահատվածի համար ֆուտբոլիստներին անհրաժեշտ էր տվյալ քանակի ծանրաբեռնվածություն: Թիմի խաղը, բնականաբար, դեռ ցանկալի մակարդակի վրա չէր, սակայն դա էլ ունի իր պատճառները, քանի որ նախորդ տարվա համեմատ «Արարատի» կազմը գրեթե ամբողջովին փոխվել է:

- Չնայած երկրորդ խաղում գրանցված պարտությանը, թիմի խաղը ավելի գոհացնող էր, ֆուտբոլիստները ավելի լավ էին պատկերացնում և կատարում մարզչական շտաբի մտահղացումները: Նախապատրաստական փուլում չենք կարևորում արդյունքը, այլ փորձում ենք շատ հարցերի պատասխաններ ստանալ:

- Արդյո՞ք հաջողվեց որոշակի խաղակցվածություն ստեղծել, թե այդ մասին դեռ վաղ է խոսելը:

- Երկրորդ ընկերական խաղում որոշ չափով տեսանք մեր մարզումների արդյունքը: Ճիշտ ուղղությամբ ենք շարժվում, սակայն գլոբալ առաջընթացից խոսելը դեռ վաղ է:

- Հավանական է, որ «Արարատի» հաջորդ հավաքը նույնպես կանցկացվի Սոչիում: Ի՞նչ նպատակներ են դրվելու երկրորդ հավաքի ընթացքում:

- Հաջորդ հավաքի ընթացքում մեր աշխատանքը ավելի շատ տակտիկական բնույթ է կրելու: Պետք է բարելավենք ֆուտբոլիստների համագործակցությունը խաղադաշտում և թիմային խաղը: Ծրագրված երեկ ստուգողական հանդիպումները կնպաստեն դրան: Ի տարբերություն նախորդ հավաքի, մարզվելու ենք բնական խոտածածկով խաղադաշտում: Պետք է կողմնորոշվենք նաև օպտիմալ կազմի հարցում և պատրաստ լինենք մրցաշրջանի երկրորդ հատվածին:

- Տվյալ պահին «Արարատում» շատ են արտասահմանցի ֆուտբոլիստները: Ինչպե՞ս եք կազմակերպում շփումը տարբեր ազգերի ներկայացուցիչների հետ:

- Այո, տվյալ պահին «Արարատում» հավաքագրված են մոտ 9 տարբեր ազգերի ներկայացուցիչներ: Սակայն, ֆուտբոլային լեզուն մեկն է: Բոլորի հետ էլ շփվում ենք անգլերեն լեզվով:

- Հայտնի է, որ Դուք նախընտրում եք արագ, կոմբինացիոն ֆուտբոլ: Կարելի՞ է ենթադրել, որ այդպիսի խաղային ձեռագիր է ունենալու նաև «Արարատը»:

Մեր նախընտրած խաղային փիլիսոփայությունը կառուցված է կոմբինացիոն ֆուտբոլի և գնդակի վերահսկման վրա, հետևաբար` ամբողջ մարզումային պրոցեսն անցնում է գնդակով, այդ թվում` նաև ֆիզիկական աշխատանքը: