Քիմ Քարդաշյանի այցի ազդեցությունը ՀՀ զբոսաշրջության վրա` ոլորտի մասնագետների հայացքով

Ամերիկահայ հաղորդավարի, ֆոտոմոդել Քիմ Քարդաշյանի, նրա ամուսնու՝ Քանյե Ուեստի, ինչպես նաև Քիմի քրոջ՝ Քլոե Քարդաշյանի այցի PR հետևանքները ամենևին չգերագնահատելով` տարբեր ոլորտների մասնագետներ կանխատեսում են, որ Հայաստանում սպասվում է եթե ոչ տուրիստական «բում», ապա առնվազն զբոսաշրջիկների այցերի աշխուժացում։
 

Tert.am–ի հետ զրույցում նման կարծիք արտահայտեցին զբոսաշրջության ոլորտում գործող «Հայ Զբոսավարների գիլդիա», «Հայ խոհարարական ավանդույթների զարգացման և պահպանման» ՀԿ, «Բարմենների հայկական ասոցիացիա», «Մարքեթինգի հայկական ասոցիացիա» հասարակական կազմակերպությունների ներկայացուցիչները:
 

Tert.am –ի հետ զրույցում ՀՀ էկոնոմիկայի նախարարության զբոսաշրջության  վարչության պետ Մեխակ Ապրեսյանը, ի պատասխան հարցի, թե Հայաստանի մասին այս բոլոր` լրատվական և այլ հիշատակումները ի՞նչ ազդեցություն կթողնեն ՀՀ`ներգնա զբոսաշրջության զարգացման առումով, նկատեց. «Քիմ Քարդաշյանի այցը էապես նպաստել է Հայաստանի ճանաչմանը, միջազգային ճանաչմանը: Դա հետագայում  իր նպաստը կբերի հետագայում զբոսաշրջային այցելություններին  աճի վրա»:
 

Հիշեցնենք, որ երբ Քիմ Քարդաշյանին Երևանի «Զվարթնոց» օդանավակայանում դիմավորում էր ՀՀ էկոնոմիկայի տուրիզմի գծով փոխնախարար Սերգեյ Ավետիսյանը` շատերը տարակուսում էին, թե ինչո՞ւ, սակայն, արդեն իսկ այցելության ժամանակ ակնհայտ էր, որ այդ  այցի որպես ածանցյալ հետևանք հետագայում կարող է լինել տուրիզմի զարգացման խթանումը: Դա հատկապես ակնհայտ դարձավ, երբ այդ այցելության մասին գրեցին ամերիկյան ու եվրոպական մի շարք առաջատար պարբերականները։
 

Ըստ «Ազատություն» ռադիոկայանի միայն բրիտանական Daily Mail–ը 20 անգամ անդրադարձել է Քարդաշյան քուրերի Հայաստան այցելությանը:


Մեդիափորձագետ Սամվել Մարտիրոսյանի տվյալներով` Քարդաշյան քույրերի և Քանյե Ուեսթի` Հայաստան այցելության օրերին Google որոնողական համակարգում սովորական միջինից մոտ երկու անգամ բարձր ակտիվություն է նկատվել «Հայաստան»` Armenia բառը այս համակարգում որոնելու առումով:
 

Ինչ վերաբերում է նրան, թե Քիմ Քարդաշյանի միլիոնավոր երկրպագուների քանի տոկոսը բացի սոցանցերում իր ակտիվությունն արտահայտելուց տոմս կգնի ու կգա Հայաստան, Մեխակ Ապրեսյանը  նկատեց, որ սա շատ դժվար է կանխատեսել միանգամից, այլ միայն` տարիների ընթացքում:
 

Այսինքն` ըստ նրա, այնպես չէ, որ այսօր Հայաստանի վերաբերյալ լայնածավալ գովազդ կամ տեղեկատվություն սփռվեց, ապա հենց նույն տարում կարելի է կանխատեսել այցելությունների զգալի աճ:

Զբոսաշրջային մարքեթինգով զբաղվող «Մարքեթինգի Հայկական Ասոցիացիա» ՀԿ –ի ղեկավար Արամ Նավասարդյանը, Tert.am–ի հետ զրույցում նույնպես գնահատելով շատ լավ նախապայմաններ Հայաստանում տուրիզմի խթանման համար, նկատեց, որ շատ դժվար է կանխատեսել, թե նրանցից քանիսը կգան Հայաստան:
 

«Որովհետև Քարդաշյանը մեկ, Հռոմի պապի պատարագը երկու, երբ Հայաստանն այդքան հիշատակվեց աշխարհի առաջատար մամուլում, բայց ավելի կարևոր է, թե մենք որքանո՞վ ենք պատրաստ,  տուրիստական ընկերությունների կարողությունների հարցն է: Մենք կոպիտ ասած` կարո՞ղ ենք այդքան տուրիստ «մարսել» , որովհետև դա կախված է երկրի  ենթակառուցվածքների վիճակից»,- ասաց նա։
 

«Եվ դա մենք պետք է  կամ կարողանանք, կամ չկարողանանք իրականացնել:  Որովհետև դիցուք` Քիմ Քարդաշյանը գնաց Գեղարդ, բայց այդ  ճանապարհը ունակ է արդյո՞ք այդքան տուրիստ սպասարկել: Ես երկու օր առաջ եմ եղել Գեղարդում ու այդ կարծիքին չեմ»,– ավելացրեց մարքեթինգի մասնագետը։
 

Ինչպես  Tert.am-ի հետ զրույցում նույն հարցին պատասխանելով նշել էր Մեխակ Ապրեսյանը` թեև Հայաստանի հյուրանոցների տարողունակությունը մեծ է (2014 –ի ընթացքում  ընդունել ենք 1 մլն 205 հազար զբոսաշրջիկ) հարցադրումը ճիշտ է, և որ «գնալով աճող պահանաջարկին համապատասխան պետք է զարգանան ենթակառուցվածքները»` ապահովելու համար լինեն համապատասխան հյուրանոցային տնտեսության օբյեկտները, պահանջարկված ննջասենյակների քանակը:

«Այդ հարցադրումը թող ուղղվի նաև մեր մասնավոր հատվածին, որը,  ի պատիվ իրեն  բավականին արագ արձագանքում է աճող պահանաջարկին, և Հայաստանում ձևավորված բարենպաստ ներդրումային աճող միջավայրին»,- ասաց Մեխակ Ապրեսյանը նշելով, որ վերջին տարիներին հյուրանոցաշինության համար նպաստավոր միջավայրի ձևավորման  հետևանքով տարեկան կտրվածքով միջինը 10 հյուրանոց է բացվում Հայաստանում:
 

«Հայ Զբոսավարների գիլդիա» հասարակական կազմակերպության ներկայացուցիչ Գոհար Աշուղթաթայանին խոսքով` հայ զբոսավարների ծառայությունները բավականին լավ են գնահատվում, հատկապես, լեզուների իմացության տեսանկյունից:
 

Tert.am-ի հետ զրույցում նա ասաց.«Հիմնական լեզուները`անգլերեն, գերմաներեն, ֆրանսերեն, ռուսերեն, իտալերեն, մեծ շուկա կա հիմա: Սկսվում է իսպաներեն, դե… ճապոներեն ոչ շատ, բայց կա:  Հիմնականում սա է»:
 

Ըստ զբոսավարի`չինարեն խոսող զբոսավար Հայաստանում չկա, և ավելացրեց, որ երկրում կա որոշ լեզուների իմացության խնդիր, օրինակ` հոլանդացի զբոսաշրջիկների հետ հաղորդակցվում են ոչ թե հոլանդերենով կամ ֆլամանդերենով, այլ անգլերենով, իսկ իսրայելցիների հետ ոչ թե եբրայերեն, այլ՝ անգլերեն:
 

Սևան, Գառնի–Գեղարդ, Սանահին–Հաղպատ, Նորավանք, սրանք, ըստ նրա,  զբոսաշրջիկների սիրած հիմնական ուղղություններն են: Իսկ Երևանում` Մատենադարան, Պատմության թանգարան, Հայոց ցեղասպանության թանգարան:
 

«Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանը, ով Tert.am-ի հետ զրույցում  հայտնեց, որ տարեկան հայ ավանդական ուտեստները գովազդող 7 միջոցառում-փառատոն է անցկացնում, նկատեց, որ ինքը չէ, որ պետք է ասի,որ Քարդաշյանի այցը Հայաստան է բերելու զբոսաշրջիկներ, ողջ աշխարհն է ասում:
 

Կոնկրետ Սեդրակ Մամուլյանը զգուշացնում է, որ զբոսաշրջիկները Հայաստան գալիս են հայկական ավանդական կերակրատեսակներ համտեսելու համար, և պետք չէ նրանց քաբաբ, խաշլամա կամ վրացական խինկալի հրամցնել:

«Հայկական ավանդական կերակրատեսակներ են` Լոռվա բորանին, Վանա քաշովին և այլն: Հաստատ  խաշլամա, քաբաբ չեն սիրում, ու երբ նրանց քաբաբ են տալիս, էդ մարդիկ էլ բարեկիրթ մարդիկ են,  ուտում են, հետո ասում են` կիլոմետրերով քաբաբ ենք կերել»»,- ասաց Սեդրակ Մամուլյանը:

Ինչ վերաբերում է հայ ավանդական խաշին, ապա Սեդրակ Մամուլյանը նկատեց, որ այն օտարազգի զբոսաշրջիկների համար էկզոտիկա չէ, եթե նրանց բացատրում են այս ուտեստի խորհուրդը, ցույց է տրվում այն ճաշակելու ձևը, բացատրվում, թե ինչ խաշ պետք է ուտել՝ ձմռանն ու առավոտյան:
 

Ըստ Սեդրակ Մամուլյանի` նույնիսկ Երևանում կան հատուկենտ ռեստորաններ, որոնց շեֆ խոհարարներն ունեն նման ավանդույթ` զբոսաշրջիկների հետ աշխատանքները տանելու: 

Tert.am-ի հետ զրույցում «Բարմենների հայկական ասոցիացիա» ՀԿ-ի նախագահ Տիգրան Ավետիսյանն  էլ ասաց, որ իրենց կազմակերպությունը նպաստում է ռեստորաններում սպասարկման ոլորտի զարգացմանը: 


«Մենք զբոսաշրջիկին ներկայանալու խնդիր ունենք մեզ մոտ արտադրվող բոլոր խմիչքներով. կոնյակ, գինի, տնական օղիներ`թթի, հոնի և այլն, որոնք շատ սիրում են տուրիստները»,- ասաց Տիգրան Ավետիսյանը`ի պատասխան հարցի, թե հայկական խմիչքային բրենդերից ո՞րով ենք ներկայանում: