Շփվում ենք մասսաների հետ. Լեռնիկ Ալեքսանյանը բացահայտում է ընտրություններում ՀՀԿ-ի հաջողության գաղտնիքը

ԱԺ համապետական ընտրություններում իշխող Հանրապետական կուսակցության հաջողության գաղտնիքն այն է, որ ի սկզբանե իշխանություն չլինելով, համարելով, որ ամեն ինչ սկսվում է ՏԻՄ ընտրություններից, մեծ տեղ է հատկացրել դրանց, սակայն ամենակարևորը` «աչք աչքի է կպցրել» ընտրողների հետ: Այսինքն՝ «շփվում են մասսաների հետ»:

Այսօր լրագրողների հետ, «Քաղաքացիների ներգրավվածությունը ՏԻՄ ընտրություններին. նախընտրական իրավիճակի գնահատում» թեմայով քննարկմանը ՀՀԿ-ի հաջողության գաղտնիքը բացահայտեց ԱԺ «Հանրապետական» խմբակցության անդամ Լեռնիկ Ալեքսանյանը` ասելով. «Լիարժեք պատկերացում ենք կազմում տրամադրությունների մասին, չեմ բացառում… գալիս են, դժգոհում են, բողոքում են, հայհոյում… Բայց երբ աչքը կպնում է աչքին, մարդը բացատրություններ է ստանում, մարդը լիցքաթափվում, մարդը կարող է ընկալի ասածը: Սա է գաղտնիքը»։

Ըստ Լեռնիկ Ալեքսանյանի` այդպես են վարվել առաջ՝ չլինելով իշխանություն, առավել ևս այդպես շարունակում են հիմա:

Իսկ գաղտնիքի մյուս մասն էլ այն է, որ «շփվելով մասսաների հետ»՝ լավ պատկերացում են կազմում, թե համայնքում ո՞վ որոշակի հեղինակություն ունի, ինչի համար անգամ չեն խուսափում ոչ հանրապետական թեկնածուներին աջակցություն հայտնելուց:

«Ընտրում ենք մարդու, թեկուզ ոչ կուսակցական, ով ունի հեղինակություն, իմիջ. սա է հիմնական գաղտնիքը»,-կրկնեց Լեռնիկ Ալեքսանյան:

Նրա բացահայտմամբ`  ՏԻՄ ընտրություններին է որոշվում համապետական ընտրությունների բախտը, քանի որ երբ քաղաքական ուժը «իջնում ներքև», ոչ միայն ծանոթանում է ժողովրդի տրամադրություններին, այլև  կապեր հաստատում այնտեղ, «մարդիկ ունենում» տեղերում: Իսկ նման վարքագիծ դրսևորող քաղաքական ուժը չի կարող հաջողություն չունենալ:

Հիշեցնենք, որ հունիս 7-ին Հայաստանի 32 համայնքներում սպասվում են ընտրություններ, որոնցից միայն 18 համայնքի ղեկավարի և ավագանու, իսկ մյուսներում` ավագանու:

Եվ քանի որ հունիսյոթյան ընտրություններում լրացել է ինքնաբացարկներ ներկայացնելու ժամկետը, պատկերն այն է, որ թեկնածուների գերակշիռ մասը կա՛մ հանրապետականներն են, կա՛մ վայելում են հանրապետականների աջակցությունը: Միակ բացառությունը «Բարգավաճ Հայաստանի» անդամ երկու անդամներն են և մեկ դաշնակցականը:

«Ժառանգություն» կուսակցության վարչության անդամ Սուսաննա Մուրադյանը, ով տեղական ինքնակառավարման մարմինների ընտրության նախաշեմին շրջել է մարզերով, ծանոթացել մարդկանց տրամադրություններին, որպես նախաբան նախ հայտարարեց. «Բոլորը չասեմ` զզված, և այլն, տգեղ բառ է, բայց մարդիկ երկնքից են փրկություն սպասում էս իշխանությունից ազատվելու համար: Ես չեմ ասում, միգուցե կան ձեր մեջ  թեկնածուներ, որ ունեն խարիզմա, բայց ասում եմ այն, ինչ կա»:

Նա անգամ վկայակոչեց, առանց անունների տալու, հանրապետական մի «վաղեմի» գյուղապետի:

Անդրադառնալով արդեն Լեռնիկ Ալեքսանյանի հիմնավորումներին, որ հանդիպում են մարդկանց հետ՝ ունենալով գրասենյակներ, շտաբեր, նա նշեց, որ հարգարժան հանրապետական պատգամավորը ասում է հենց այն, ինչ պահանջվում է ապացուցել, որ ունեն գրասենյակներ, քանի որ ունեն անսահմանափակ ֆինանսական ու վարչական լծակներ, ինչից զրկված է ընդդիմությունը:

Հատկապես այդ պատճառով էլ ընդդիմությունը մշտապես խոսում է կուսակցությունների` պետության կողմից ֆինանսական աջակցության անհրաժեշտության մասին:

Նաև «Ժառանգության» անդամը նշում է, որ ընդդիմությունը պասիվ է ՏԻՄ ընտրություններում որոշ սպեցիֆիկ առումով. համեմատաբար մեծ համայնքներում՝ քաղաքներում, որտեղ նաև Գյումրի օրինակով եղել է ընդդիմության թեկնածուների համախմբման նախադեպ, հաջողություն հասնելու հնարավորությունը առավել մեծ է, ի տարբերություն գյուղերի, որտեղ ըստ բանախոսի, պարզապես կլանային հարաբերություններ են:

«Սա իմ բաջանաղի հոր հորեղբոր չգիտեմ ինչն է» ,-ասաց Սուսաննա Մուրադյանը և ներողություն խնդրելով ընտրողներից` արձանագրեց. «Մի տեսակ ճորտի հոգեբանություն ունեն, ֆեոդալի մոտ»:

Լեռնիկ Ալեքսանյանն էլ չհամաձայնեց՝ ասելով, որ, նախ ՏԻՄ ընտրություններում քաղաքական ուժերը մեծ ֆինանսական միջոցներ չեն ներդնում, գոնե Հանրապետականը, և նկատեց, որ ինքն էլ զարմացած է, որ գյուղերում «ֆինանսը հարգանք է վայելում»:

«Ես չգիտեմ` ինչու է այդպես … ես դրա կողմնակիցը չեմ, ես զարմանում եմ, գյուղացին ունեցվածքի հետ կապված ինչո՞ւ է տարբերություն դնում»,-հարցրեց հանրապետական պատգամավորը: