Հայաստանը պետք է ունենա զսպման և վրիժառության զենք. զինվորականներն ինձ կհասկանան. Ն. Տեր-Գրիգորյանց

Խորհրդային Միության և Հայաստանի Հանրապետության պաշտոնաթող գեներալ-լեյտենանտ Նորատ Տեր-Գրիգորյանցը Tert.am-ի հետ զրույցում, անդրադառնալով ՌԴ փոխվարչապետ Դմիտրի  Ռոգոզինի հայտարարությանը, նշեց, որ նա նողկալի քաղաքական գործիչ է, ով հանդես է գալիս առաջին հերթին ընդդեմ ՌԴ շահերի: «Չորս միլիարդն ավելի լավ է,քան բարեկամությունն ու հայկական պետականությունը, որը ձեր թիկունքն է պահում հարավում»,-ասաց հայազգի զինվորականը: Անդրադառնալով առաջին գծում հայ զորակոչիկների սխրանքի դեպքերին՝ պաշտոնաթող գեներալը նշեց, որ նրանք, հիրավի, հերոսական մարդիկ են:

- Հայկական երկու պետությունների Զինված ուժերի զարգացման Ձեր հայեցակարգով և տեսլականով ապրիլյան ողբերգական իրադարձություններից հետո բանակում բարեփոխումների կարիք տեսնո՞ւմ եք:

-Ես՝ որպես այդ Զինված ուժերի ստեղծողներից մեկը,կարող եմ ասել, որ դրանք կազմակերպված են, ղեկավարվող, քաղաքականապես գրագետ: Այն ժամանակ հագեցած լինելով՝ կարողացան Ցեղասպանությունից պաշտպանել իմ ժողովրդին ու Արցախն՝ Ադրբեջանի զինված ուժերից, որը հարձակվել էր ողջ ճակատով: Եվ դա արվեց ֆիդայինների ու նորաստեղծ բանակի կողմից, որը ջարդեց Ադրբեջանի Զինված ուժեր անվանվող ցեղասպան պետության այդ համակարգը և ոչ թե նվաճեց, այլ ազատագրեց Արցախը հարյուր տոկոսով: 
 

20-ից ավելի տարիների ընթացքում այդ Զինված ուժերը պաշտպանել են ու կանգնած են եղել Ադրբեջանի դեմ: Եվ ոչ միայն, որովհետև մեր բանակը կանգնած է նաև Թուրքիայի Հանրապետության Զինված ուժերի դեմ: Կրկնում եմ, մեր բանակը պաշտպանել է ոչ միայն Արցախը, այլև ողջ Հայաստանն ու աշխարհի հայությանը:

Երկրորդ. հիմա թշնամական զինված ուժը` Ադրբեջանը,որը մշտապես գոռում է, թե մենք` հայերս, գրավել ենք Ադրբեջանի 20 տոկոսը, այդ ուղերձը հետևողականորեն հասցնում է աշխարհին ու ցույց տալիս, թե, իբր, Արցախը գրավյալ հող է: Հայերը ոչ մի բան չեն գրավել, հայերը ազատագրել են այդ տարածքները, ի դեպ, ենթարկվելով հարձակման: Կրկնում եմ` նրանց հարձակվել են, մերոնք` պաշտպանել, որովհետև սա դարեր, հազարամյակներ ի վեր հայկական հող է եղել:

Բայց այս անգամ Ադրբեջանը շատ մեծ թափով հարձակվեց: Եվ եթե սկզբում տպավորություն էր, որ սա գրոհով հետախուզություն է, պարզվեց, որ այն չափազանց ագրեսիվ հարձակում էր: Եվ եթե այնտեղ կանգնած մեր ԶՈՒ ստորաբաժանումները չկարողային դրա դեմն առնել, հասնելու էին մինչև Արցախ ու չգիտեմ` ուր: Այնպես որ, մեր բանակն, իհարկե, կատարեց իր խնդիրը, բայց, ըստ իս, հակադարձ հատվածը թույլ էր: Ես վերջերս հարցազրույց էի տվել և հայտարարել, որ ՀՀ պաշտպանության նախարարը և ՀՀ ԶՈՒ գլխավոր շտաբի պետը կարծես խղճացել էին թշնամուն: Եվ պետք էր նրանց ամբողջությամբ թողնել հասնել այն կետին, որտեղ գտնվում է իրական պաշտպանությունը և ամբողջությամբ ջարդել այդ հրոսակներին, որոնց մեջ կային նաև «Իսլամական պետության» մարտիկներ:

-Ամեն դեպքում, Ադրբեջանը մեծ կորուստներ չկրե՞ց:

-Դա կարևո՞ր է… միշտ էլ պատերազմի ժամանակ  կողմերից մեկը թաքցնում է կորուստները, իսկ մյուսն ասում, որ հակառակորդն ավելի շատ կորուստներ է կրել` ձգտելով ցույց տալ, որ ինքն ավելի խելացի է, գրագետ: Երկու կողմից կան կորուստներ, որովհետև սա պատերազմ է: Հրետակոծում են, արկակոծում են, հրթիռակոծում: Ես նայել եմ` Հայաստանը միշտ ազնվորեն ասում է իր կորուստների չափը:
 

-Ամեն դեպքում, Ադրբեջանի սպառազինության այս մակարդակի պայմաններում  բարեփոխումների անհրաժեշտության հարց տեսնու՞մ եք՝ կառուցվածքայինից մինչև ռազմավարական բնույթի:

-Այո՛, Դուք ճիշտ եք` Ադրբեջանի ԶՈՒ-ն հագեցած է սպառազինությունների ավելի նոր տեսականիով: Նրանք ավելի շատ փող ունեն,նավթային դոլարներ ունեն, և պետք էր օգտվելով այս ագրեսիայից` ոչնչացնել  այս բոլոր նավթային խողովակաշարերն ու մնացած «շարերը»: Որ այդ ամենն այնպես այրվեր, որ չկարողանային դրանցով սպառազինել իրենց բանակը: Այո, նրանք ունեն շատ տանկեր, համազարկային կրակի համակարգեր ու սպառազինություն, որը գնել են ՌԴ-ից: Հետո էլ Էրդողանը Ալիևին հրաման էր տվել, որ նրանք առաջին հերթին կրակեն ռուսական զենքով, ինչը և արեց Ալիևը, քանի որ, եթե նրանք կրակեին թուրքական զենքով, աշխարհը կասեր`«թուրքերն են տվել հրամանը»:  Սա կոպիտ խախտում է ձեռք բերված պայմանավորվածությունների, և նրանք առաջին հերթին վիրավորանք են հասցրել Ռուսաստանի Դաշնությանը, որովհետև ստացվեց, որ ՌԴ-ն իրենց տվել էր այդ զենքով հայերին ոչնչացնելու քարտ բլանշ:

-Բայց ՌԴ-ն իրեն վիրավորված չի համարում, ավելին` Ռոգոզինը հայտնեց, որ վաճառել ու շարունակելու են զենք վաճառել Ադրբեջանին:


-Ռոգոզինը նողկալի քաղաքական գործիչ է, որը տվյալ դեպքում աշխատել է ընդդեմ Ռուսաստանի: Ի դեպ, ես այդ մասին նամակ եմ գրել ու կարող եմ ասել, որ սա ընկեր Ռոգոզինի կոպտագույն ու անամոթ վերաբերմունքն է ռուս ժողովրդի ու Ռուսաստանի Դաշնության նկատմամբ, որովհետև իր այդ խոսքն Ադրբեջանին ասես հրաման լինեն` «որ, դե, կրակի, ոչնչացրա»: Ինչն էլ նրանց պետք է` Ադրբեջանին ու Թուրքիային:  Որովհետև սա առաջացնում է հայ ժողովրդի դժգոհությունը ՌԴ-ի հանդեպ:  Եվ նրանց պետք է, որ Հայաստանը երես թեքի Ռուսաստանից ու գնա ՆԱՏՕ կամ ինչ-որ այլ տեղ: Իսկ Ռուսաստանը սրանով կկորցնի իր հարավային սահմաններում իր պաշտպանին` ՆԱՏՕ-ին ու իսլամական ռադիկալիզմին: Ինչը շատ վտանգավոր է, որովհետև ՌԴ–ի հարավային սահմաններին նրա միակ դաշնակիցը Հայաստանն է: Իսկ արևմուտքում էլ միայն Բելառուսն է:


Նրանք հասել են սրան: Այսինքն` Ռոգոզինը նրանց օգնեց դա անել: Ահա՛, Ձեզ Ռոգոզին: Այնպես որ, հիմա թող ՀՀ-ն ու ՌԴ-ն եզրահանգման գան, թե ինչ վիճակ է այդ սահմաններում, երբ շարքից հանեցին այնպիսի քրիստոնեական պետություններ, ինչպիսիք են Վրաստանը, Ուկրաինան, հիմա` Հայաստանը, հետո կանցնեն Բելառուսին: Ամեն ինչ պարզ է չէ՞: Եվ այդ ժամանակ կզգան այդ 4 միլիարդի հոտը: Հիմա դեռ Թուրքիայից տասնյակ իսլամիստներ տեղափոխվում են Աֆղանստան, որտեղից կհարձակվեն Տաջիկստանի, Ուզբեկստանի ու Ռուսաստանի վրա: Պարզ է, չէ՞, թե որտեղ է պետք դաշնակից պետություն: Սա Ռոգոզինի խղճի վրա է:

-Ինչո՞ւ միայն Ռոգոզինի, նա բարձրաձայնել է ՌԴ-ի տեսակետը:

- Այո, վարչապետն էլ է ելույթ ունեցել և ասել, որ վաճառվում ենք: Ես էլ ասում եմ «դե, շնորհավորում եմ», 4 միլիարդն ավելի լավ է,քան բարեկամությունը ու հայկական պետականությունը, որը ձեր թիկունքն է պահում հարավում: Հանեք Հայաստանը և Չեչնիան, Դաղստանը, Ինգուշեթիան,  Ստավրոպոլի երկրամասը կապույտ կրակով են այրվելու: Մենք գիտենք` ինչպես Ադրբեջանն իր տարածքով օգնում էր արմատական իսլամիստներին:

-Բանակին մոտ կանգնած մի զինվորական վերջերս ասում էր, որ պետք է 18 տարեկաններին հանել առաջին գծից, կամավորներին էլ ու նրանց փոխարեն առաջին գծում շարել հատուկ պատրաստվածություն ունեցող մարտիկների, որոնք նաև բարձր աշխատավարձ կստանան: Ինչ-որ ռացիոնալ հատիկ կա՞ այս մոտեցման մեջ:


- Կարծում եմ` ճիշտ է այդ մարդը: Ճիշտ է` ամեն հայ պետք է պաշտպանի իր հողն ու տունը: Բայց համաձայն եմ, որ ավելի լավ պատրաստվածություն ունեցող և ավելի կատարելագործված  մարտիկների կարիք կա: Եվ եթե այնտեղ կանգնած է պայմանագրային, ավելի հասուն մարդը 18 տարեկան տղայի փոխարեն, նա ավելի կազմակերպված է, ավելի ուսուցանված, ավելի առնական: Սա փաստ է: Նրանք կանգնած են առաջնագծում և դա պաշտպանություն չէ, բայց մեր տղաներն այնպես պաշտպանեցին, որ Ադրբեջանը չկարողացավ դիմանալ: Այս տղաները նույնիսկ իրենք իրենց պայթեցնում էին, այդ տղաները հերոսական մարդիկ են, երկնային արքայություն, զոհվածներին:  Ըստ որում, սա պաշտպանություն չէ, սրանք դիտակետեր էին, որում կանգնած տղաները այդ ամբողջ տականք հրոսակախմբերին դիմակայեցին: Եվ, այո, այստեղ պետք է լինեն ավելի հասուն ու պատրաստված մարդիկ:
 

Եվ բացի այդ, այս գիծը կարելի է դարձնել ինչպես սահմանապահ գիծ` կապիտալ կերպով ականապատելով ամեն ինչ: Ամբողջությամբ ունենալ կառավարվող ականապատ դաշտեր, ռոբոտացված համակարգեր, այդ թվում` զարկի ավտոմատացված: Բայց  սրա համար պետք է փող ունենալ: Ես չեմ քննադատում, ես ուղղակի ասում եմ` մեր բանակը պետք է լինի հագեցած, սպառազինված զինված հակամարտության բոլոր գործիքներով և ղեկավարվի բարձր մակարդակով: Նկատի ունեմ և՛ կոորդինացումը, և՛ փոխազդեցությունը, և՛  հետախուզությունը, որովհետև մենք ՆԱՏՕ-ական Թուրքիայի ու երկրորդ թուրքական պետության` Ադրբեջանի Զինված ուժերի  շրջափակման մեջ ենք գտնվում, ագրեսիվ ու ցեղասպան շրջափակման, ինչպես նաև՝ դավաճանական Վրաստանի: Ու քանի որ Հայաստանը ոչ թե հարձակվող, այլ պաշտպանվող պետություն է, պետք է  ավելի շատ պաշտպանողական բնույթի զենք ունենա: Եվ ինչու ոչ` ատոմային զենք, եթե ինչ-որ մեկը մեզ այն առաջարկի: Եվ սա զսպման ու վրիժառության զենք է լինելու: Ուզում եմ բացատրել` ՌԴ-ն ունի նման զենք, ոչ ոք նրա վրա չի հարձակվի: Սա է զսպման ու վրիժառության զենքը:
 

-Այսի՞նքն`  Հայաստանն ունենա ատոմային զենք:


-Յուրաքանչյուր զենք, որը վրիժառության զենք է: Զինվորականները, որ կկարդան այս խոսքերը, գիտեն, թե դա ինչ է, ու դա միայն միջուկային զենքը չէ: Նման զենքերի տեսականին կարելի է մեկ ժամ շարունակ թվարկել: Եվ այս զենքը Հայաստանը պետք է ստանա: Կամ էլ գնի` իր բոլոր գումարները հավաքելով: Այլ կերպ լինել չի կարող, քանի որ այս վիճակը հավերժ տևելու է:

Որպես վերջաբան պետք է ասեմ, որ մենք պետք է ունենանք աշխատատեղեր, որպեսզի  այստեղ ներդրումներ արվեն, ու որպեսզի Հայաստանից ոչ ոք չարտագաղթի: Այն ժամանակ ամեն ինչ լավ կլինի: