Ազատ գետը Նախիջևան գնալու փոխարեն կարող էր Արարատյան դաշտի հողերը ոռոգել. Արարատի մարզպետ

Գառնիի Ազատ գետից Արարատի մարզի Քաղցրաշեն և ևս 12 գյուղ ինքնահոս կերպով ջուր տանելու ծրագրի չեղարկումը Արարատի մարզպետ Ռուբիկ Աբրահամյանի սրտով չէ:

«Իհարկե կուզենայի, որ ծրագիրն իրականացվեր։ Այս պահին Ազատի ջրամբարում օրվա տարբեր ժամերին 15-ից 25 հազար խորանարդ մետր ջուր թափում ենք և Ազատ գետով այսօր գնում է Նախիջևան: Ջրամբարում 70 մլն խմ/մ ջուր կա, որի օգտակար ծավալը 60 մլն խմ/մետր է։ Կուզենայի որ լիներ, նախ հուսալի մատակարարում կապահովեր և ամենակարևորը՝ էլեկտրաէներգիայի մեծ խնայողություն կունենայինք»,- Tert.am-ի հետ զրույցում ասաց մարզպետը: 

Ըստ նրա՝ Ջրային պետական կոմիտեն Մխչյան առաջին և երկրորդ պոմպակայանները աշխատացնելու համար Արտաշատի ջրանցքին տրվում է դոտացիա: Իսկ ծրագրի իրականացման դեպքում, ըստ նրա, տարեկան շուրջ 460 մլն դրամ տնտեսելու էին: 

«Բայց ինչ կարող եմ ասել, եթե ժողովուրդն այդպես է ուզում, ժողովրդին, բնական է, պետք է լսեն»,-ասաց նա:

Դիտարկմանը, թե հիմնավոր չէ՞գառնեցիների պնդումը, թե անհրաժեշտ է ջրամբար կառուցել, մարզպետը պատասխանեց, թե ջրամբար կառուցելն այդքան էլ հեշտ գործ չէ:

«Եթե կան կոմունիկացիաներ, թող կառուցվեն, վերակառուցվեն՝ խնդիրները կարգավորելու համար: Ես ամբողջ հանգույցի համար չեմ կարող ասել, ինձ հարցնում եք արդյունավետությունը, ես արդյունավետությունն եմ ներկայացնում»,-ասաց նա:
 

Հարցին, թե այն մեղադրանքները հիմնավո՞ր են, որ պաշտոնյաների այգիները ոռոգելու համար են, պատասխանեց. «Գիտեք ինչ կա, բոլորն էլ՝ ազգաբնակչությունն էլ սպասում էր ինքնահոս եղանակով ջուր ստանայինք, որովհետև պոմպակայանները, երբ որ աշխատում են, բնական է՝ մեխանիզմ է, խափանում է լինում, շարժիչը, կամ պոմպը խնդիրներ է ունենում, մի երկու-երեք օր: Այս պահին 12 համայնքները ընդհուպ մինչև Վեդիի շրջան դոտացիայի հաշվին են: Ինչը որ ջրամաբարից են տալիս, ինչն էլ պոմպակայանն են աշխատացնում»: 
 

Ռուբիկ Աբրահամյանը նշեց, որ եթե ջուրն ինքնահոս լիներ, անխափան դաշտերը կոռոգվեր՝ առանց էլեկտրաէներգիայի ծախսի, որի արդյունքում էլ գյուղմթերքների ինքնարժեքը ցածր կլինի: 
 

Նա շարունակեց ծրագրի խոսել օգուտներից, որ մարզում բերրի հողերը կավելանային, քանի որ կոռոգվեին:
 

«Վերին նիշի համայնքներում հողեր էին ավելանալու, որոնք ոռոգելի չեն ու կարող էին ոռոգելի լինեն»,-ասաց նա: 
 

Դիտարկմանը, թե արդարացի կլինի՞, որ դրա փոխարեն գառնեցիների հողերը չորանան, մարզպետը պատասխանեց. «Ես կուզենամ, իհարկե, ամբողջ հանրապետությունով մեկ խնդիրները լուծվեն, մենակ Արարատի մարզը չի, որ ասեմ՝ մեր մարզում ապահովի, որն արդյունավետ է, դա պետք է իրականացվի»։ 

Բնապահպանության նախարար Արամայիս Գրիգորյանը Tert.am-ի հետ զրույցում համաձայնվեց Արարատի մարզպետի դիտարկմանը, թե անտեղի Ադրբեջան ենք ուղարկում Ազատ գետի ջուրը:
 

«Խնդիրը նա է, որ կան ամիսներ, որտեղ որ կարող է լինել որոշակի դեֆիցիտ, բայց ընդհանուր առմամբ ջուրն ավելցուկ ունի, և այդ ավելացված ջուրը պետք է ուղղորդվեր Արարատյան դաշտ, սա է խնդիրը: Մնացած դեպքերում, դուք ինքներդ էլ գիտեք, գարնան վարարումների ժամանակ մեծ քանակությամբ ջուր կորչում, գնում է, իհարկե կորչում է»,-ասաց նա: 

Ըստ նախարարի՝ խնդիրն այն էր, որպեսզի ծրագրով կարողանային ավելացված ջուրը ուղղորդել նպատակին:

Հարցին, թե գառնեցիները առաջարկում են կառուցել ջրամբար և ավելցուկ ջուրը հավաքել և ուղղել արարատցիներին, նախարարը պատասխանեց, թե դրանք սիրողական բնույթի խոսակցություններ են:

«Ես ընդունում եմ բոլոր ներկայացուցիչների ասածները, բայց միևնույն ժամանակ կա պետական մոտեցում, խնդրում եմ՝ դուք նույնպես պետական մոտեցում ցուցաբերեք»,-ասաց նա։