Դա ապագայի կայունության երաշխիքն է․ «Յանդեքսի» ղեկավարությունը՝ Վանաձորում իրենց բացած Ծրագրավորման դպրոցի մասին

Հայաստանում ծրագրավորման դպրոցը բացելու միտքը շատ հանկարծակի է առաջացել․ այս մասին Tert.am-ին պատմեց «Յանդեքսի» ակադեմիական ծրագրերի կառավարման ղեկավար Սերգեյ Չերնիշովը:

«Մենք մի քանի ամիս առաջ մեր ծառայություններից մեկով՝ «Յանդեքս տաքսի»-ով  մուտք գործեցինք Հայաստան: Թողարկել ենք «Յանդեքս քարտեզ», նավիգատորներ,- հիշատակեց նա՝ հավելելով,- Մենք ավանդույթ ունենք․երբ ինչ-որ տեղ մեր ծառայություններն ենք թողարկում, արագ փորձում ենք  նաև իրականացնել կրթական ծրագրեր: Թե ինչու ենք մենք նման բան անում հարցին, կարող եմ պատասխանել այսպես՝ դա ապագայի կայունության երաշխիքն է: Այնպիսի ծառայությունների ձևավորման համար, որոնք մենք ունենք, պետք են մասնագետներ, մենք պետք է վստահ լինենք, որ շուկայում նման մասնագետներ մեզ համար կլինեն: Դրա համար մենք նախապես ենք դրան պատրաստվում»:

Նշենք, որ հունվարի 20-ին Վանաձորի տեխնոլոգիական կենտրոնում տեղի է ունեցել «Յանդեքս» ընկերության Ծրագրավորման դպրոցի պաշտոնական բացումը: Այն «Յանդեքսի» և «Ձեռնարկությունների ինկուբատոր» հիմնադրամի համատեղ նախագիծն է 9-11-րդ դասարանների աշակերտների համար, որոնք ցանկանում են ձեռք բերել ծրագրավորման հմտություններ: Ծրագրի նպատակն է ծանոթացնել աշակերտներին ծրագրավորմանը, տեղեկատվական տեխնոլոգիաների ոլորտում աշխատանքի հեռանկարներ ստեղծել նրանց համար և նպաստել ՏՏ ոլորտի զարգացմանը Լոռու մարզում:

Սերգեյ Չերնիշովը պատմեց, որ նա մտածում էր՝ Ծրագրավորման դպրոցը կբացեն Երևանում, անգամ ժամանակն էին որոշել՝ դեկտեմբերին: Նրա խոսքով՝  ի սկզբանե որոշել էին դպրոցը Երևանում բացել․ մայրաքաղաքում ավելի հեշտ է բացել նման դպրոց, քան մարզերում: Բայց ավելի ուշ ուսումնասիրել են շուկան, հանդիպել կրթության և գիտության նախարարի հետ և հասկացել, որ կարող են անցնել նույն ճանապարհով, ինչով որ անցել են Ռուսաստանում՝ գնալով մարզեր:

«Մայրաքաղաքներում կրթություն ստանալը շատ ավելի հասանելի է և այստեղի դպրոցակաների համար այն ինչ-որ չափով հասանելի է: Իսկ մարզերում նման հնարավորություններ չկան, դրա համար կարծում եմ՝ որ ավելի ճիշտ և արդյունավետ են մարզերը»,- ասաց նա՝ նշելով, որ ընտրությունը Վանաձորի վրա  է կանգնել Կրթության և գիտության նախարարության առաջարկով:



Հատկանշական է, որ Ծրագրավորման դպրոց Ռուսաստանից բացի, կա միայն Հայաստանում: «Մենք հասկացանք, որ Հայաստանը մեզ շատ է դուր եկել»,- ասաց նա՝ նշելով, որ նախատեսել են նաև այլ երկրներում, օրինակ՝ Ղազախստանում ևս նման դպրոց հիմնել:

Սերգեյ Չերնիշովի խոսքով՝ իրենք կկարողանան հասկանալ՝ արդյո՞ք հայաստանյան այլ քաղաքում ևս ծրագրավորման դպրոցներ «Յանդեքսը» կբացի, երբ արդեն բացված դպրոցը կտա իր արդյունքները: «Սա մեկնարկն է: Ռուսաստանում ևս մենք բացել ենք նմանատիպ դպրոց մի քանի ամիս առաջ, և դեռ չունենք այդ ծրագրի շրջանավարտներ: Հիմա պարզապես կա զգացողություն, որ ամեն ինչ լավ է։ Եթե նախագիծը հաջողի, բնականաբար մենք այն կզարգացնենք և՛ Ռուսաստանում, և՛ Հայաստանում»,- ասաց նա՝ հավելելով, որ չեն բացառում, որ դպրոցներ կբացեն նաև հայաստանյան այլ քաղաքներում:

«Յանդեքս» ընկերության ակադեմիական ծրագրերի կառավարման ղեկավարը նկատեց, որ սկզբից խնդիր կար՝ հետաքրքիր և միևնույն ժամանակ բարդ հայոց լեզվի հետ կապված, սակայն արդեն մտադրվել են՝ մինչև եկող տարի իրենց դասագրքերը կթարգմանեն հայերեն:

Վանաձորի դպրոցում աշակերտները հնարավորություն կունենան սովորել Python ծրագրավորման լեզուն: «Python-ն այժմ այնքան տարածված ծրագրավորման լեզու է, որ ընդգրկված է լավագույների հնգյակում: Այն ծրագրավորման լեզու է, որով կարող են լուծել ցանկացած բարդ խնդիր: Այս լեզվով, իսկապես կարող ես իմանալ, թե ինչ է ծրագրավորումը,- ասաց նա՝ հավելելով,  նաև հաշվի է առնվել այն հանգամանքը, որ Python դպրոցական տարիքի երեխաները ավելի հեշտորեն կսովորեն: Նրա խոսքով՝ միայն ծրագիրը սովորեցնելով չեն բավարարվելու, համոզվելու են՝ իրենց տրված գիտելիքն ընկալվում է: Իրենց և դպրոցի թիմի հետ աշխատանքի արդյունքում փորձելու են բացահայտել այն դժվարությունները, որոնց հանդիպում են դպրոցականները և աշխատանք են տանելու դրանք հեշտացնելու ուղղությամբ: Բացի այդ, դասավանդողների հետ կապը ևս մշտական է լինելու, ամբողջ տարվա ընթացքում նրանք վերապատրաստվելու են:

Այս տարի դպրոցում սովորելու է 28 դպրոցական՝ երկու խմբով, դասավանդողները երիտասարդ մասնագետներ են հենց Վանաձորից: Սերգեյ Չերնիշովը պատմեց, որ Ռուսաստանում ծրագրավորման դպրոցի նախագիծը կազմելիս իրենք իրենց առջև խնդիր են դրել՝ ներգրավվել դպրոցական երեխաների, որպեսզի հենց երեխաները կարողանան զբաղվել ծրագրավորմամբ:

«Մենք մեր առջև դրել ենք ամբիցիոզ նպատակ․դպրոցական մակարդակում այնպիսի ծրագիր հիմնենք, որ դպրոցականները արդեն կարողանան զբաղվել ծրագրավորմամբ: Դա ոչ թե դասընթաց է այն մասին, թե ինչ է ծրագրավորումը, այլ դասընթացն ավարտողները պետք է կարողանան զբաղվել ծրագրավորմամբ»,- ասաց նա:



Սերգեյ Չերնիշովի խոսքով՝ իրենք հասկացան, որ որոշել են ընդգրկել դպրոցականներին հնարավորինս վաղ տարիքում: «Հասկացանք, որ Ռուսաստանում այդ տարիքը 8-րդ դասարանն է, իսկ Հայաստանում՝ 9-րդը: Աշակարտներին ընտրել ենք փուլերով,- պատմեց Չերնիշևը՝ հավելելով, որ աշակերտներն անցել են տարբեր փուլերով: Ըստ նրա՝ դասընթացին հավակնող աշակերտները պետք է գիտելիքներ ունենան մաթեմատիկայից և տրամաբանությունից:

«Յանդեքս» ընկերության ակադեմիական ծրագրերի կառավարման ղեկավարը նշեց, որ դպրոցականների ընտրությունը տեղի է ունեցել իրենց վերահսկողությամբ: «Մոտ 208 աշակերտի դիմում ենք ստացել, հարցազրույցի են անցել 51 հոգի, նրանցից անցել են 28-ը»,- պատմեց նա:

Սերգեյ Չերնիշովը նաև նշեց, որ նկատել են՝ այստեղ կրթությունը գնահատվում է: «Պոտենցիալ կա յուրաքանչյուր մարդու, աշակերտի մոտ: Միակ բանը, որ պակասում է՝ հնարավորություններն են դրա զարգացման համար,- նկատեց նա՝ հավելելով, որ եթե աշակերտները աշխատասիրություն դրսևորեն, պոտենցիալի մակարդակը մեկ տարի հետո ավելի կբարձրանա,- թե արդյոք ծրագրից հետո կկարողանան արդեն աշխատանքի անցնել, մենք դեռ չգիտենք, բայց ամենագլխավորն այն է, որ մենք նրանց կտանք հնարավորություն հասկանալ ծրագրավորումից»:

«Յանդեքսի» ծրագրավորման դպրոցն անվճար է: Սերգեյ Չերնիշովի խոսքով՝ նախաձեռնությունը սոցիալական բնույթի է: «Մենք ներդրում ենք անում կրթության ոլորտում, որպեսզի հայտնվեն մարդիկ, որոնք հետագայում կգան մեզ մոտ՝ մեր ընկերություն կամ կգնան այլ ընկերություններ և կզարգացնեն ոլորտը: Ես ձգտում եմ՝ այդ ավանդույթը պահել: Միակ պատճառը, որ կարող է իրավիճակ փոխել, մոտիվացիայի պակասը կլինի․ ուսումնասիրությունները ցույց են տալիս, որ անվճար կրթությանը լուրջ չեն վերաբերում: Այսինքն՝ գոնե երեք կոպեկ պետք է վճարել, որպեսզի մոտիվացիա առաջանա»:

«Յանդեքսի» ղեկավարությունը շարունակում է իր բանակցությունները Կրթության և գիտության նախարարության հետ՝ կրթական այլ ծրագրեր Հայաստանում իրականացնելու համար: «Մենք դիտարկում ենք համագործակցության տարբերակներ բուհական համակարգի հետ, բայց դեռ հստակ պայմանավորվածություններ դրա վերաբերյալ չկան»,- նշեց Սերգեյ Չերնիշովը:

Վերդառնալով Վանաձորի Ծրագրավորման դպրոցի բացմանը՝ նա նշեց, որ իրենք նպատակ ունեն, որ նաև ներդրումներ կբերեն հայաստանյան այդ քաղաք, նոր ընկերություններ կգան այստեղ: «Եվ կա ոչ քիչ հավանականություն, որ մեր դպրոցի շրջանավարտները բարձրագույն կրթություն կստանալուց հետո կվերադառնան, կմնան Վանաձորում»,- իր տեսլականը ներկայացրեց «Յանդեքսի» ակադեմիական ծրագրերի կառավարման ղեկավարը: