ԵՄ 600 մլն-անոց շուկայի մասին խոսողները թող գնան Հունաստանում մի հատ հայկական ջուր վաճառեն. Է. Շարմազանով

Tert.am-ի հետ զրույցում Հայաստանի Հանրապետական կուսակցության խոսնակ, ԱԺ փոխնախագահ Էդուարդ Շարմազանովն անդրադառնում Արամ Զավենի Սարգսյանի կողմից հայտարարված օրակարգին՝ «թույլ չտալ, որ Սերժ Սարգսյանը դառնա վարչապետ», վարչապետ Կարեն Կարապետյանի այն հայտարարությանը, որ հայկական ապրանքները թերագնահատվում են ռուսաստանյան ընկերությունների կողմից: 

-Պարո՛ն Շարմազանով, ինչպե՞ս եք գնահատում վարչապետի այն հայտարարությունը, որ ռուսական ընկերությունների կողմից հայկական ապրանքները թերագնահատված են: Տեսեք՝ եթե քաղաքական առումով ՄՄ, ապա՝ ԵԱՏՄ մտնելու ամենահիմնական կռվանն անվտանգությունն էր, ապա տնտեսականով՝ ԵԱՏՄ 180 միլիոնանոց շուկան: Հիմա, եթե վարչապետի բերանով նման բան է հայտարարվում, չի՞ ստացվում, որ մենք անիմաստ տեղում ենք՝ մեր քաղաքական պարտավորություններով ու սահմանափակումներով:

-Վարչապետի հայտարարության մասով. եթե մեր ապրանքները թերագնահատած են այս շուկայում կամ գովազդված չեն, ուրեմն մեր կառույցները պետք է լավ աշխատեն՝ ռուսական կողմի հետ: Եվ այնպես չէ, որ ամեն տեղ հայկական ապրանքներին ասում են՝ էստի համեցեք: Եվ ԵԱՏՄ հնարավորություններից պետք է օգտվել. հնարավորություն ունենալը դեռ չի նշանակում բացարձակ հնարավորություն, աշխարհը մրցակցություն է: Դրա համար պիտի ավելի ակտիվ աշխատենք, պրոակտիվ քաղաքականություն վարենք, մեր Էկոնոմիկայի նախարարությունը, Գործարարների միությունը, մենք՝ խորհրդարանականներս: Եվ երկրորդ՝ արդյո՞ք այստեղից բխում է, որ մենք պետք է այնտեղից դուրս գանք: Եվ ասում եք՝ անիմաստ. անիմաստն այն խոսակցություններն են, որ Հայաստանը պետք է ԵԱՏՄ-ից դուրս գա: Դա ոչ միայն անիմաստ է, դա նաև վտանգավոր է Հայաստանի համար: Որ ասում են՝ ԵԱՏՄ-ից դուրս գանք, դուրս գանք, ո՞ւր մտնեք: Մեզ համար փակում ենք 180 միլիոնանոց շուկան ու որ դուրս ենք գալիս, գազը մեզ ո՞վ է տալու՝ 155 դոլարով ենք գնում: Կրկնում եմ՝ Եվրասիական տնտեսական միություն մուտքը լուրջ հնարավորություն է, իսկ հակառակը հղի է Հայաստանի տնտեսության համար շատ լուրջ վտանգներով: Եվ տեղը ի՞նչ են առաջարկում:

-Ասում են՝ եվրոպական 600 միլիոնանոց շատ ավելի վճարունակ շուկա:

-Նման բաները ցանկություններով չեն, այլ իրավապայմանագրային բազայով: Թող կարդան մի հատ Ռիգայի հռչակագիրը և տեսնեն՝ ԵՄ-ն ընդլայնվելու ցանկություն ունի՞, թե չէ: Ու ի՞նչ, իսպանական արտադրանքի կողքին սպասում էին, որ Հայաստանի կոնյա՞կը վաճառեն: Եվ մեր ապրանքները օբյեկտիվորեն ավելի մրցունակ են եվրասիական շուկայում: Ցանկություններ… եկեք միանանք Չինաստանին, այնտեղ էլ 1.5 միլիարդանոց շուկա կա, հո ասելով չէ: Կոնկրետ, եթե Հայաստանը գործընթաց է սկսում ԵՏՄ-ից դուրս գալու.

ա. գազի գինը կտրուկ բարձրանալու է,
բ. հայկական ապրանքների մաքսատուրքը կտրուկ բարձրանալու է
գ. աշխատողները, որ այնտեղ ազատ պայմաններում աշխատում են, նրանց իրավունքները սահմանափակվելու են:

Դրա փոխարեն՝ ինչ են առաջարկելու: Հայկական բանջարեղենը, միրգը, կոնյակը, հարց եմ տալիս՝ որտե՞ղ են մրցունակ: Եվրոպական շուկայո՞ւմ: Դե թող գնան մի հատ Հունաստանում հայկական ջուր վաճառեն:

Երեկ գյուղատնտեսության նախարարն ասում էր, որ խաղողի մթերման ծավալն ավելացել է, այդ ո՞ւմ հաշվին է ավելացել, ո՞ր շուկայի: Այսօր մեր արտահանումը 21 տոկոսով ավելացել է՝ ի հաշիվ եվրասիական շուկայի, տուրիզմն է ավելացել:

Եվ, վերջապես, ԵԱՏՄ դեռ չի նշանակում, որ մենք ոչ մի բան չպիտի անենք։ Մենք պետք է աշխատենք: Դա հնարավորություն է, տնտեսվարողները պետք է օգտվեն: Չոր հաշվարկներ կդնեն մեր առաջ, կխոսենք:

Ես այլընտրանք չեմ տեսնում ԵԱՏՄ-ին ու ոչ թե իմ քաղաքական ճաշակի համար, այլ որովհետև այնտեղից դուրս գալը հղի է Հայաստանի համար շատ լուրջ, միգուցե՝ կործանարար վտանգներով: Եվ ամենակարևորը՝ դու մինչև նոր շուկաներ գրավես, 10-20 տարի պետք է լինելու: 

- «Ծառուկյան» խմբակցության պատգամավորներից մեկը խոսել էր նման կառույցներում պայծառ ապագայի մասին: Մենք այնտեղ ունե՞նք կամ ունենալո՞ւ ենք պայծառ ապագա։ 

-Նախ, մենք ոչ մի տեղ չենք գնում, մենք մեր տեղում կանգնած ենք՝ ՀՀ-ում, և Հայաստանը մտել է ԵԱՏՄ, որովհետև այնտեղ տեսնում է շահ: Տնտեսական առումով շահեկան է, դա զգացմունքային, դա ճաշակի հարց չէ: 

-ԵԱՏՄ-ից դուրս գալը համարեցիք անիմաստ օրակարգ, իսկ մյուսը՝ թույլ չտալ, որ Նախագահ Սերժ Սարգսյանը դառնա վարչապետ: Գոնե Արամ Զավենի Սարգսյանը նման բան ասաց: 

-Ես մեկ անգամ չէ, որ ասել եմ Արամ Զավենի Սարգսյանին էլ, «Ելք»-ին էլ ու բոլոր նրանց, ովքեր գիշերը չեն քնում ու սպասում են՝ ով է 2018 թվականին լինելու վարչապետ, որ 2018 թվականի ապրիլը հենց կգա, ժողովուրդը կտեսնի: Եվ ժողովուրդը յուրաքանչյուր կուսակցությանը 2017 թվականին տվել է այնքան խոսելու իրավունք, ինչքան մանդատ ունեն: Եվ երբ «Ելք»-ը կունենա 50+1, նոր այն ժամանակ թող որոշի՝ ով է լինելու վարչապետ: Պառլամենտական ընտրությունները եղել են, մենք ստացել ենք մեծամասնություն, որպեսզի մինչև 2022 թվականը հանրապետականը որոշի՝ ինչպիսի կառավարություն ունենա, այդ կառավարությունն ինչ ծրագիր ունենա և այդ կառավարությունում ովքեր կլինեն։ Ավելի լավ է «ԵԼՔ»-ը թող զբաղվի, թե ով է իր մոտ ֆրակցիայի ղեկավար, ով՝ քարտուղար: