Եթե ԱլԳ հռչակագրում ԼՂ վերաբերյալ հայկական կողմին ոչ ձեռնտու ձևակերպումներ լինեն, կնշանակի, որ ԵՄ-ն հակասում է իր մոտեցմանը. Թևան Պողոսյան

Մարդկային զարգացման միջազգային կենտրոնի ղեկավար Թևան Պողոսյանի խոսքով՝ նոյեմբերի վերջին Բրյուսելում կայանալիք Արևելյան գործընկերության գագաթնաժողովի ամփոփիչ հռչակագիրն իրավական ուժ չունի, սակայն այն որպես դիրքորոշում կարող է տարբեր առիթներով օգտագործվել:

Նա, Tert.am-ի հետ զրույցում խոսելով եղած մտահոգությունների մասին, թե ԱլԳ գագաթնաժողովի նախնական ամփոփիչ հռչակագրում ԼՂ հիմնահարցի վերաբերյալ հայկական կողմի համար «ոչ ձեռնտու» ձևակերպումներ կան, հիշատակեց, որ մենք ունենք արդեն հրապարակված Հայաստանի և Եվրամիության միջև ստորագրվելիք «Համապարփակ և ընդլայնված շրջանակային համաձայնագրի» տեքստը, որտեղ առանձին անդրադարձ կա Լեռնային Ղարաբաղի հակամարտության լուծման վերաբերյալ Եվրամիության մոտեցման մասին:

«Իսկ դա նշանակում է, որ Եվրամիության բոլոր երկրները կիսում են այդ մոտեցումը: Եթե արդեն այդ մոտեցումը կիսել են, բանակցել են, համաձայնել են, նախաստորագրել են և տեքստն են հրապարակել, որ նոյեմբերի 24-ին ստորագրեն, իսկ դրա փոխարեն այդ օրը հակառակ բան են հռչակում, արդեն հակասում են հենց իրենց մոտեցմանը»,- ասաց նա:

Թևան Պողոսյանի խոսքով՝ ինքը վստահ է, որ հայկական դիվանագիտությունն աշխատում է նաև ԱլԳ գագաթնաժողովում ամփոփիչ տեքստի ուղղությամբ: Նրա դիտարկմամբ՝ հայկական կողմը պարզապես պետք է մատնանշի ՀՀ-ԵՄ համաձայնագրում եղած ձևակերպումները և ասի՝ եթե մենք ստորագրում ենք այս տեքստի տակ, ընդունում ենք այդ մոտեցումները, ուրեմն պետք է Լեռնային Ղարաբաղի մասին ձևակերպումը լինի առանձին:

Դիտարկմանը, թե ԱլԳ հռչակագրում եղած հակամարտությունների մասին ձևակերպումներում ընդգծվելու է, որ մասնակիցներն աջակցում են ԱլԳ անդամ երկր­ների տարածքային ամբողջա­կանությանը և սահմանների անձեռնմխելիությունը՝ հաշվի առնելով, որ ԵՄ անդամ Իսպանիայի համար այս դրույթը չափազանց էական և կարևոր է, Թևան Պողոսյանը պատասխանեց, որ իրականում մեկ հակամարտության պատճառով չպետք է մյուս հակամարտություններն անտեսել, հակամարտությունները տարբեր են:

«Եթե Իսպանիան ցանկանում է Կատալոնիայի վերաբերյալ ինչ-որ բան հռչակել, որը չի էլ վերաբերում Արևելյան գործընկերության երկրներին, իր գործն է: Հասկանալի է, որ Ադրբեջանը, Վրաստանը, Մոլդովան, Ուկրաինան անպայման կուզեն, որ ինչ-որ շեշտադրումներ լինեն, թող շեշտադրեն, բայց ամեն մեկը թող իր կոնֆլիկտը շեշտադրի»,- ասաց նա:

Անդրադառնալով ԱլԳ բրյուսելյան գագաթնաժողովին Ադրբեջանի հնարավոր պահվածքին՝ Թևան Պողոսյանը նկատեց, որ այդ երկիրը մեզ թշնամի է համարում, հայտարարում է պատերազմ սկսելու մասին, և բնական է, որ ԱլԳ-ում ևս փորձելու է իր թշնամական քայլերն անել Հայաստանի հանդեպ: «Նա ամեն օր փորձելու է մեզ ճնշել, մեզ իզոլացնել»,- նշեց նա:

Թևան Պողոսյանի խոսքով՝ Հայաստանի դիվանագիտական կորպուսը Եվրամիության հետ աշխատելիս պետք է հիշեցնի, թե ում հետ գործ ունի՝ ի դեմս Ադրբեջանի:

«Ցանկանում են աշխատել այն երկրի հետ, որը կոռուպցիայի մե՞ջ է թաթախված․․․ Սա մեր զենքն է: Եվ տարբեր նման բազմաթիվ գործիքներ ունենք, որոնք պետք է օգտագործեն մեր դիվանագետները Եվրամիության մեր գործընկերների հետ աշխատելիս»,- ասաց նա՝ նշելով, որ այս բոլոր գործիքների մասին գիտեն բոլորը, և բոլորն էլ դրանք պետք է օգտագործեն՝ և՛ դիվանագիտական կորպուսը, և՛ խորհրդարանականները, և՛ հասարակական կազմակերպությունները, և՛ համայնքները:

Նա մատնանշեց՝ Ադրբեջանի հիմնական նպատակը ռազմական ուժով Լեռնային Ղարաբաղի հակամարտության լուծումն է: «Այդ հռչակագիրը ի՞նչ է անելու Ադրբեջանին... պարզապես նա ցանկանում է իր քաղաքականության համար հիմնավորում գտնել: Իսկ խնդիրը լուծելու համար պետք է դիմի ռազմական գործողությունների: Պետք է ասել Եվրամիությանը, որ փաստորեն դուք ցանկանում եք ոչ թե նպաստել հակամարտության լուծմանը, այլ ռազմական գործողություններին»,- նշեց նա:

Իսկ ընդհանրապես, Թևան Պողոսյանի խոսքով, մեզ պետք է քիչ մտահոգի, թե Ադրբեջանն ինչ է անում: «Ադրբեջանը փորձում է մեզ վնասել: Դա մենք գիտենք: Վերջակետ: Մենք պետք է մեր քաղաքականությունն առաջ տանենք»,- ասաց նա:

Անդրադառնալով այն մտահոգություններին, ըստ որոնց՝ Եվրամիությունն առանձնապես չի կարևորում Արևելյան գործընկերությունը՝ Թևան Պողոսյանը նշեց, որ դրանք իրականությանը համապատասխանում են. նա հիշատակեց, որ ինքն էլ բազմիցս մասնակցել է Եվրանեստի խորհրդաժողովներին, որին շատ քիչ թվով պատգամավորներ են մասնակցել:

«Եվրամիությունը մի ինստիտուտ է, որը միավորում է երկրներ, որոնք ունեն տարբեր խնդիրներ, որոնք փորձում են առաջ գնալ: Եվրամիությունն ունի մի նախագիծ, որը կոչվում է Արևելյան գործընկերություն: Հիմա վերջինիս գագաթնաժողովն է, և չեն գալու երկրներն իրենց խնդիրներն ու հարցերը քննարկելու, բայց ցանկացած հարց, որ Արևելյան գործընկերության երկրներ կբարձրաձայնեն, դիտարկելու են միայն ու միայն իրենց շահերից: Եվրամիությունը գալու է գագաթնաժողովին փորձելու, որ իր հռչակած Արևելյան գործընկերության քաղաքականությունը հաջողության հասնի»,- ասաց նա:

Մեր դեպքում, ըստ Թևան Պողոսյանի, կարևոր է Հայաստան-Եվրամիություն համաձայնագրի կետերի կատարումը: «Եկեք մտածենք, թե ինչպես ենք այդ բարեփոխումներն անելու, որ մատների արանքով նայելով չլինի, որ հերթական անգամ չմնա թղթի վրա»,- նշեց նա: