Ջրբաժաններ ստեղծելու փոխարեն համախմբվենք և աշխատենք միասին. ՀՀ նորընտիր նախագահ

13.00 

Հանրապետության նախագահի պաշտոնը ստանձնելու պաշտոնական արարողությանը ԱԺ նախագահ Արա Բաբլոյանն իր և ՀՀ ԱԺ անունից շնորհավորեց ՀՀ նախագահ Արմեն Սարգսյանին՝ բարձր պաշտոնում ընտրվելու և պաշտոնը ստանձնելու առիթով:

«Պարո՛ն նախագահ, ծանոթ լինելով Ձեր անցած ուղուն, համոզված եմ, որ Ձեր ողջ կենսափորձն ու գիտելիքները կծառայեցնեք համազգային նպատակների իրականցմանն ու միասնության ամրապնդմանը, ՀՀ քաղաքացիների բարեկեցության բարձրացմանը: Եվս մեկ անգամ շնորհավորում եմ այդ պատասխանատու պաշտոնը ստանձնելու առիթով»,-ասաց նա: 

ԱԺ նախագահը հայտարարեց, որ դուրս բերվեն ՀՀ Սահմանադրության մայր օրինակը և վեհամոր Ավետարանը: Հանդիսավոր կերպով դուրս բերվեցին նաև ՀՀ պետական դրոշն ու նախագահական իշխանության խորհրդանշանները:

ԱԺ նախագահ Արա Բաբլոյանը հայտարարեց. «Հանրապետության նախագահի պաշտոնի ստանձնմանը նվիրված Ազգային ժողովի հատուկ նիստը հայտարարում եմ փակված»:

12.57 

Մարզահամերգային համալիրում այսօր հանրապետության նախագահի պաշտոնը ստանձնելուց հետո ելույթի խոսք ասաց Արմեն Սարգսյանը, ով շեշտեց, որ իրեն մեծ պատիվ է վիճակվել՝ ստանձնել ՀՀ նախագահի պաշտոնը, ինչը նաև վիթխարի պատասխանատվություն է երկրի, ժողովրդի առաջ:

Սարգսյանը նշեց, թե կներդնի ողջ եռանդը՝ արդարացնելու այն վստահությունը, որ մարտի 2-ին իր հանդեպ ցուցաբերեց ՀՀ ԱԺ-ն: Նաև նշեց, որ կանի ամեն ինչ՝ արդարացնելու այն հույսերը, որոնք իր հետ կապում են ՀՀ հասարակության տարբեր շերտերը, նաև Արցախի և Սփյուռքի հայրենակիցները:

«Ինձ ուժ է տալիս մեր երկրի ու ժողովրդի հավատը ապագայի հանդեպ»,-ասաց նա:

Արմեն Սարգսյանը նշեց, թե օրեր հետո կնշենք ՀՀ առաջին հանրապետության հարյուրամյակը և հավելեց, որ հարյուրամյա պատմություն ունենք, մյուս կողմից էլ՝ խորհրդանշանական կերպով սկսում ենք նոր էջից:

«Մեր ժողովուրդը ոչ միայն կարողացավ ոտքի կանգնել, ուղղել մեջքը, այլ արժանապատիվ ձևով ներկայանալ աշխարհին: Մեր ժողովրդին բախտ վիճակվեց կայացնել Երրորդ հանրապետություն, ամրացնել ինքնիշխանությունը, ստեղծել ամուր և հզոր բանակ: Այսօր որևէ մեկը թող չկասկածի, որ ողջ Հայաստանը կանգնած է Արցախի թիկունքին և պայքարելու է նրա հարցի արդար ճանաչման համար, պայքարելու է այսօր, վաղը։ Փա՛ռք հայոց հաղթական բանակին»,-ասաց նա:

Արմեն Սարգսյանը նաև ցանկացավ արժանին մատուցել ՀՀ նախագահ Սերժ Սարգսյանին: «Ցանկանում եմ արժանին մատուցել Ձեր քաղաքական հեռատեսության, պետական գործչի ու կազմակերպչի քաղաքական հմտության համար»,-ասաց նա:

ՀՀ նորընտիր նախագահը նշեց, թե հայ ժողովրդի համար առանցքային է մնում ԼՂՀ հարցի արդարացի լուծումը՝ խաղաղ բանակցային կարգավորմամբ: Ըստ նրա՝ Հայոց ցեղասպանության ճանաչումը ինքնանպատակ չէ, նպատակը աշխարհում դրա կրկնությունը հետագայում բացառելն է:

ՀՀ նորընտիր նախագահը նշեց, որ ծաղկող Հայաստանի համար պետք է ապահովեն լավագույն միջավայր քաղաքացու ինքնադրսևորման համար:

«Պետք է հետևողական պայքար մղենք պետական համակարգում, մեր հասարակության մեջ առկա բոլոր բացասական և արատավոր երևույթների դեմ՝ կոռուպցիայից մինչև սոցիալական անարդարություն,անտարբերությունից մինչև անպատասխանատվություն: Այս անզիջում, արդար պայքարի համար մեզանից յուրաքանչյուրի դերակատարումը անհրաժեշտ է: Մենք կհաջողենք, եթե ոչ միայն քննադատենք, այլ նաև առաջարկենք, ջրբաժաններ ստեղծելու փոխարեն համախմբվենք և աշխատենք միասին»,-ասաց նա:

Ըստ Արմեն Սարգսյանի՝ հանուն համազգային նպատակների և այդ նպատակների իրականացման առաջնահերթությունը պետք է լինի ՀՀ-Սփյուռք-Արցախ համակողմանի միասնության ամրապնդումը և ներուժի իրացումը:

«Հավատ-վստահություն-արդարություն և ամենօրյա աշխատանք, այս արժեքներն են, որ կարող են խթանել մեր ժողովրդի ներուժը»,-ասաց նա:

12.26 

Հանրապետության նախագահի պաշտոնի ստանձնման պաշտոնական արարողությանը հայրապետական օրհնանքի խոսք ասաց Ն. Ս. Օ. Տ. Տ. Գարեգին 2-րդ Ամենայն Հայոց Կաթողիկոսը: 

«Մեր օրհնությունը, շնորհավորանքներն ու մաղթանքներն ենք բերում Ձեզ՝ նախագահի բարձր պաշտոնին ընտրվելու կապակցությամբ: Մեր երկրի կյանքում արդյունավոր ջանքեր եք բերել որպես ՀՀ վարչապետ, հաջողություններ եք արձանագրել դիվանագիտական ասպարեզում, բարեգործություններով ներդրում բերել հոգևոր անդաստանում»,-ասաց Ամենայն Հայոց Կաթողիկոսը:

Ն. Ս. Օ. Տ. Տ. Գարեգին 2-րդը նշեց, թե աղոթում են աշխարհի խաղաղության, մեր հայրենիքի խաղաղ ու ապահով կյանքի համար:

«Մեր աղոթքն ենք բարձրացնում Ձեզ համար, մեծարգո՛ նախագաh, տյար Արմեն Սարգսյան, Ձեր բարձր ու պատասխանատու աշխատանքի համար»,-ասաց նա, ապա բոլորին հրավիրեց հոտնկայս աղոթքի:

12.11

Կարեն Դեմիրճյանի անվան մարզահամերգային համալիրում գումարվեց Հանրապետության նախագահի պաշտոնի ստանձնմանը նվիրված Ազգային ժողովի հատուկ նիստը:  

Նիստը նախագահող ԱԺ նախագահ Արա Բաբլոյանը հայտարարեց, որ գրանցվել է 92 պատգամավոր, քվորում կա. «Նիստը հայտարարվում է բացված»։

Նիստը նախագահողի բացման խոսքից հետո դահլիճ բերվեցին Հայաստանի Հանրապետության պետական դրոշը, նախագահական իշխանության խորհրդանշանը, Հայաստանի Հանրապետության Սահմանադրության մայր օրինակը և Վեհամոր Ավետարանը: 

Ձեռքը դնելով Հայաստանի Հանրապետության Սահմանադրության մայր օրինակին և Վեհամոր Ավետարանին՝ նորընտիր նախագահ Արմեն Սարգսյանը հանդես եկավ երդմամբ։

Սահմանադրությամբ ամրագրված է նախագահի երդման տեքստը.  «Ստանձնելով Հանրապետության նախագահի պաշտոնը՝ երդվում եմ հավատարիմ լինել Հայաստանի Հանրապետության Սահմանադրությանը, իմ լիազորություններն իրականացնելիս լինել անաչառ, առաջնորդվել միայն համապետական ու համազգային շահերով և իմ ողջ ուժը ներդնել ազգային միասնության ամրապնդման գործում: Աստված ինձ օգնական»:

11.56

Կարեն Դեմիրճյանի անվան մարզահամերգային համալիրում գումարվել է ԱԺ հատուկ նիստ՝ նվիրված ՀՀ չորրորդ նախագահ Արմեն Սարգսյանի պաշտոնի ստանձնման արարողությանը, որին մասնակցում է 1300 մարդ, այդ  թվում հյուրեր Հայաստանից ու արտասահմանից, ինչպես նաև լրատվամիջոցների ղեկավարներ: 

ԱԺ այսօրվա հատուկ նիստը բացում է ԱԺ նախագահը, ինչից հետո դահլիճ է բերվում ՀՀ պետական դրոշը, նախագահական իշխանության խորհրդանշանը, ՀՀ Սահմանադրության մայր օրինակը և Վեհամոր Ավետարանը:

ՀՀ նորընտիր Նախագահը կհրավիրվի ամբիոնի մոտ և կընթերցի երդման տեքստը։ ՀՀ նախագահը պաշտոնն ստանձնում է ժողովրդին տրված հետևյալ երդմամբ. «Ստանձնելով Հայաստանի Հանրապետության Նախագահի պաշտոնը` երդվում եմ. անվերապահորեն կատարել Սահմանադրության պահանջները, հարգել մարդու և քաղաքացու իրավունքներն ու հիմնական ազատությունները, ապահովել Հանրապետության անկախությունը, տարածքային ամբողջականությունը և անվտանգությունը` ի փառս մեր հայրենիքի և ի բարօրություն մեր ժողովրդի»:

Այնուհետև ՀՀ Նախագահը կստանա Ամենայն Հայոց Կաթողիկոս Գարեգին Բ–ի օրհնությունը։ Դրանից հետո արդեն պաշտոնն ստանձնած նախագահն իր առաջին ուղերձը կհղի ժողովրդին և դրանով նիստը կավարտվի։ 

Այսօր ուժի մեջ է մտնում Սահմանադրության համապատասխան դրույթը (հոդված 212), որը սահմանում է, որ նորընտիր Հանրապետության նախագահի կողմից իր պաշտոնը ստանձնելու օրը, այսինքն՝ ապրիլի 9-ին, Կառավարությունը ներկայացնում է իր հրաժարականը, որը Հանրապետության նախագահն անհապաղ ընդունում է։ Կառավարության հրաժարականն ընդունվելուց հետո` յոթնօրյա ժամկետում՝ապրիլի 9-16-ը ԱԺ խմբակցություններն իրավունք ունեն առաջադրելու վարչապետի թեկնածուներ:

Նշենք, որ երեկ տեղի է ունեցել ՀՀ 4-րդ Նախագահի երդման արարողության գլխավոր փորձը։