Փաշինյանն Ալիևին և ՄԽ համանախագահներին պետք է ասի՝ կա՛մ Արցախը վերադառնում է բանակցային սեղան, կա՛մ պիտի լինի միացում ՀՀ-ին. Կայծ Մինասյան

Ֆրանսահայ քաղաքագետ, Փարիզի Քաղաքագիտության հիմնարկի փորձագետ Կայծ Մինասյանի խոսքով՝ վարչապետ Նիկոլ Փաշինյանն է ասել՝ Վիեննայում Ալիևի հետ հանդիպմանը օրակարգ չի լինելու, այլ պարզապես խոսակցություն և հստակեցումներ են լինելու: Նա Tert.am-ի հետ զրույցում նշեց, որ վստահաբար կարելի է ասել՝ Փաշինյանը մի քանի հարցեր ունի Ալիևին:

«Շատ հստակ հարց ունի, օրինակ. «Պարո՛ն Ալիև, ի՞նչ ունեք ասելու Ղարաբաղի ժողովրդին: Եթե միայն ու միայն ցանկանում եք վերցնել Ղարաբաղն ու ժողովրդին, ապա դա սպառնալիք է, պատերազմ, հարձակում և այլն: Իսկ դա պարզապես անընդունելի է»,- ասաց նա:

Նիկոլ Փաշինյանի հաջորդ դիտարկումը, ըստ Կայծ Մինասյանի, վերաբերելու է ժողովուրդներին խաղաղության նախապատրաստելուն: «Պետք է ասել, որ ձեր համար խաղաղությունը հարձակումներն են, դիվերսիոն գործողությունները, և դա ևս անընդունելի է»,- ասաց նա:

Մեկ այլ կարևոր դիտարկում էլ, ըստ փորձագետի, այն պետք է լինի, որ եթե ցանկանում են, որ Բաքվում եղած՝ Արցախի ադրբեջանական համայնքն էլ մասնակցի բանակցություններին, ապա նշանակում է, որ այդ համայնքի ներկայացուցիչները Ալիևին չեն ընտրել, և դրա համար վերջինս չի կարող ներկայացնել նրանց: «Բայց չկա նման սուբյեկտ»,- ասաց նա:

Կայծ Մինասյանի նկատառմամբ՝ Նիկոլ Փաշինյանը Ալիևի հետ հանդիպմանը պետք է բարձրացնի հարցը, թե ինչու են բարձրաձայնում սկզբունքներից միայն տարածքային ամբողջականության մասին, այնինչ ազգերի ինքնորոշման իրավունքը ևս միջազգային իրավունք է, և այսօրվա աշխարհի երկրների 2/3-ը հիմնված է ինքնորոշման իրավունքի վրա: Նրա խոսքով՝ առաջիկայում սպասվող հանդիպմանը  անուղղակի կերպով կքննարկվեն նաև Մադրիդյան սկզբունքները, որոնք կարգավորման գործընթացի հիմնական սկզբունքներն են:

«Բայց Փաշինյանն իր հարցերն էլ կներկայացնի, որովհետև ԵԱՀԿ Մինսկի խմբի համանախագահները չեն կարող սահմանափակել նրա խոսքի ազատությունը, չեն կարող նրան խոչընդոտել»,- ասաց նա: Վերջինս հավելեց՝ Ադրբեջանի նման ռազմատենչ պետության հետ նախքան բանակցելը պետք է զրուցել: «Դժբախտաբար, Հայաստանի նախորդ երեք ղեկավարները ոչ թափանցիկ բանակցություններ էին վարում, և դա շատ վտանգավոր էր:

Իսկ Նիկոլ Փաշինյանը շարունակում է իր թափանցիկ քաղաքականությունը թե՛ ներքին, թե՛ արտաքին քաղաքական ոլորտում,- ասաց նա՝ մատնանշելով, որ վարչապետը հայտարարել է, որ իր մոտեցումն ամբողջությամբ տարբերվում է նախորդ ղեկավարների մոտեցումից,- դա ճկուն մոտեցում է․ այսօրվա դիվանագիտությունը ցույց է տալիս, որ մենք այլևս ստիպված չենք մինչ հիմա եղածը ժառանգություն վերցնել և հետևել այդ գործընթացին: Բայց ասելով, որ մեր մոտեցումները տարբեր են, չենք ասում, որ ընդունում ենք պատերազմը»:

Նիկոլ Փաշինյանը, ըստ Կայծ Մինասյանի, պետք է մատնանշի նաև, որ նախկինում եղած գործընթացներն ու քաղաքականությունը բերեցին ապրիլյան պատերազմին: «Պետք է ասել, եթե գոհ եք դրանից, պարո՛ն Ալիև, եթե գոհ եք, ԵԱՀԿ Մինսկի խմբի համանախագահներ, ապա շարունակեք, բայց այդ դեպքում մենք հետագայի համար պատասխանատվություն չենք կրում»,- ասաց նա:

Դիտարկմանը, թե Փաշինյանը գնում է Վիեննա՝ Ալիևի հետ պարզաբանելու Մադրիդյան սկզբունքները, դա արդեն չի՞ նշանակում, որ բանակցելու են դրանց շուրջ, նա պատասխանեց, որ բանակցություններ չեն լինելու, քանի որ օրակարգ չկա, լինելու է զրույց: «Դա մարտավարական քայլ է Փաշինյանի կողմից»,- ասաց նա:

Կայծ Մինասյանն ընդգծեց՝ Հայաստանում տեղի ունեցած զարգացումները պետք է նաև իրենց ազդեցությունն ունենան նաև Լեռնային Ղարաբաղի բանակցային գործընթացի վրա: Մատնանշեց հետխորհրդային երկրներից Ղազախստանը, որտեղ վերջերս երկրի նախագահը թողեց իր աթոռը, նկատեց, որ նման շատ երկրներում ղեկավարների մոտ արդեն իշխանություն կորցնելու վախ կա: «Նույնը նաև Ադրբեջանում կա: Պարզ է, որ հիմա Ալիևն էլ վախենում է»,- ասաց նա: Այնինչ, Հայաստանի իշխանությունները, ըստ նրա, այսօր շատ հանգիստ են, և՛ թե Նիկոլ Փաշինյանը, և՛ Զոհրաբ Մնացականյանը շատ հանգիստ են գնացել Վիեննա:

Կայծ Մինասյանի խոսքով՝ Հայաստանը պետք է նաև շարունակի պնդել, որ Արցախը պետք է վերադառնա բանակցային սեղան: «Երկու տարբերակ կա, և դրանց մասին Նիկոլ Փաշինյանը պետք է ասի Ալիևին և ԵԱՀԿ Մինսկի խմբի համանախագահներին: Պետք է ասել, որ դուք գտնվում եք երկու տարբերակների առջև․ կա՛մ ընդունում եք Արցախի իշխանություններին բանակցային սեղանի շուրջ, կա՛մ ինքը կներկայացնի Ղարաբաղի ժողովրդին, բայց նրանք պետք է ընտրեն իրեն: Այդ դեպքում կլինի միացում: Պետք է ասվի՝ դուք որոշեք, կա՛մ ճանաչում, կա՛մ միացում, ուրիշ ոչինչ»,- ասաց նա:

Իսկ առաջիկա հանդիպմանը, ըստ նրա, Նիկոլ Փաշինյանը պարզապես ուսումնասիրելու է Ադրբեջանի նախագահ Իլհամ Ալիևի և ԵԱՀԿ Մինսկի խմբի համանախագահների տրամադրությունները: «Պետք է ասի՝ տեսեք, թե որքան հակասություններ կան ձեր ասածների մեջ, ինչպե՞ս պետք է դուրս գաք այդ հակասություններից, իսկ մենք՝ հայկական կողմը, հակասություններ այլևս չունենք, որովհետև ժողովրդավարական պետություն ենք: Եթե Փաշինյանն այդպես չխոսա, նշանակելու է, որ վերադառնում է նախորդ Հայաստանին և չի ընդունում «թավշյա հեղափոխության» ուժը»,- ասաց նա: