Արցախի հետ կապված քննարկումները երբեք վերելակների մեջ չեն եղել. մերժված ուժերը փորձում են նսեմացնել ԼՂ-ն բանակցային սեղան բերելու գործընթացը. Ա. Քոչարյան

Լավ կլինի, որ արցախյան հերոսները քաղաքական շահարկումների դաշտ չմտնեն, որովհետև այդտեղ մսխվում է նաև իրենց հսկայական ավանդը որպես հերոսապատման ակտիվ մասնակից: Այս մասին Tert.am-ի հետ զրույցում ասաց ԱԺ պաշտպանության և անվտանգության հարցերի մշտական հանձնաժողովի նախագահ, «Իմ քայլը» խմբակցության պատգամավոր Անդրանիկ Քոչարյանը: Ըստ նրա՝ Արցախի ազատամարտի մեր հերոսներին օգտագործել տարբեր քաղաքական միջնորդությունների նպատակով, որը միտված չէ Հայաստան-Արցախ հարաբերություններն ավելի ուժեղացնելու, այլ միտված է Արցախը քաղաքական շահարկումների թեմա դարձնել, անթույլատրելի է և ոչ հեռանկարային:

- Արցախի անվտանգության խորհրդի նախագահ Վիտալի Բալասանյանը երեկ հայտարարել է, որ վերելակային պայմանավորվածությունը Հայաստանին օգուտ չի տվել: Ըստ նրա՝ Ադրբեջանը աշխատանքներ է իրականացնում, ուստի այն հօգուտ Ադրբեջանի էր: Այսօր առավոտյան վարչապետ Նիկոլ Փաշինյանը ֆեյսբուքյան գրառում է արել, որ «եթե ոմանք փորձեն Արցախը դարձնել հակահեղափոխության օջախ, Արցախի ժողովուրդն այն կդարձնի հեղափոխության օջախ»: Կա՞պ կա այս երկու հայտարարությունների միջև:

- Քանի որ Հայաստանում շատ ուժեր մերժված են, մասնավորապես իշխանությունից զրկված քաղաքական ուժերը, ովքեր փորձում են քաղաքական հարթակ փնտրել Արցախում, որպեսզի այնտեղից խոսեն ՀՀ իշխանությունների դեմ, Հայաստանի ու Արցախի մեջ խառնակչություն անելը լուրջ վտանգ է ազգային անվտանգության տեսանկյունից: Արցախը պետք է հարաբերվի Հայաստանի հետ, մերժված քաղաքական համակարգերն էլ այստեղ պետք է անելիք չունենան: Նրանք պետք է գիտակցեն, որ իրենց դերը պետք է լինի իրենց քաղաքական ապագայի կերտումը, իսկ դա տարիներ կպահանջի, որովհետև իրենց կառավարման ընթացքում այնպիսի սխալներ են գործել, որոնց ընթացքում նաև արյուն է թափվել Հայաստանում: Սա անտեսել հնարավոր չէ: Անթույլատրելի է Արցախը քաղաքական խաղաքարտ դարձնելը:

Իսկ ինչ վերաբերում է դիվանագիտությանը վերելակի մեջ, թե ծառերի տակ, կրկին շահարկման թեմա է, որովհետև իրենք լավ գիտեն, որ վերելակների մեջ չէ, որ կերտվում է դիվանագիտությունը: Դիվանագիտությունը կերտվում է Հայաստանում, Արցախում: Արցախի հետ կապված քննարկումները երբեք վերելակների մեջ չեն եղել, պարզապես նրանք փորձում են նսեմացնել գործընթացը, որը միտված է Արցախը բանակցային սեղան օր առաջ բերելուն:

- Ինչո՞ւ պետք է նսեմացնեն, հաջողվո՞ւմ է:

- Չի հաջողվում, որովհետև այն վերաբերմունքը, որ կա Հայաստանում տեղի ունեցած փոփոխությունների նկատմամբ, հույս է ներշնչում, որ բևեռներ ստեղծելու փորձը հեռանկար չունի: Այդ մարդիկ չեն գիտակցում, որ իրենք մերժված են շատ խորքային պատճառներով, դա մեկ օրվա արդյունք չէ, տարիների ընթացքում ձևավորված վերաբերմունք է, որի արդյունքում ժողովուրդը մերժեց այդ տեսակը: Փորձ անել Արցախը դարձնել մերժվածության վրեժը լուծելու հարթակ անթույլատրելի է: Արցախի հասարակությունն էլ ունի հստակ դիրքորոշում Հայաստանում տեղի ունեցող փոփոխությունների նկատմամբ միայն դրական առումով:

- Վիտալի Բալասանյանը ևս մեկ հայտարարություն հնչեցրեց ԼՂ նախագահ Բակո Սահակյանի և նախկին նախագահ Արկադի Ղուկասյանի կողմից ուղարկված նամակի մասին, որտեղ խոսվում էր ՀՀ երկրորդ նախագահ Ռոբերտ Քոչարյանի խափանման միջոցը՝ կալանքը, մայիսյան տոներին ընդառաջ փոխելու մասին: Բալասանյանն ասել էր, որ պետք է հարգեին Արցախի գործող և նախկին նախագահների դիմումը և րոպե առաջ այդ որոշումը կայացնեին։ Ի՞նչ կասեք:

- Նախ՝ վարչապետը չի լուծում այդ հարցերը, երկրորդ՝ Վիտալի Բալասանյանն այն անձը չէ, որ պետք է նման գնահատական տա, առավել ևս, երբ ինքը հանդիսանում է Արցախի անվտանգության խորհրդի քարտուղարը: Անվտանգության խորհրդի քարտուղարը պետք է լինի շատ ավելի զուսպ, որովհետև խոսքը վերաբերում է Հայաստանի դատաիրավական համակարգին և դրա շրջանակներում գործող օրենսդրությանը:

Հանրապետության դատախազն այդ նամակին շատ սպառիչ պատասխան է տվել, բայց եթե քաղաքական շահարկումների ենթատեքստ պետք է օգտագործենք, դա անթույլատրելի է: Լավ կլիներ, որ նման հարց բարձրացնող մեր ազատամարտիկ հերոսները օր առաջ մտածեին նրա մասին, որ 2008 թ. մարտի 1-ին, երբ օգտագործվում էին բանակային ստորաբաժանումները, երբ Հայաստան էին գալիս խմբավորումներ նաև Արցախից, դեմն առնեին, որ Քոչարյանն այս վիճակում չհայտնվեր: 

- Վ. Բալասանյանը նշել էր, որ «նրանց դիմումը չէր վերաբերում ընդհանրապես քրեական գործը կասեցնելուն կամ հետապնդումը դադարեցնելուն, այլ նրան, որ գոնե այս օրերին բոլոր նախագահները մասնակցեին այս տոներին»: Կա՞ նման պրակտիկա խափանման միջոցը մի քանի օրով փոխելու հետ կապված:

- Ցանկացած միջնորդություն կարելի է ներկայացնել: Որոշում կայացնողը դատարանն է, որովհետև գործը հանձնված է դատարանին: Այնպես որ Վիտալի Բալասանյանի հայտարարության մեջ քաղաքական հայտարարության երանգներ եմ տեսնում, որն անթույլատրելի է նման պաշտոն զբաղեցնող մարդու համար:

Նորից եմ ասում՝ լավ կլինի, որ մեր հերոսները քաղաքական շահարկումների դաշտ չմտնեն, որովհետև այդտեղ մսխվում է նաև իրենց հսկայական ավանդը որպես հերոսապատման ակտիվ մասնակից: Արցախի ազատամարտի մեր հերոսներին օգտագործել տարբեր քաղաքական միջնորդությունների նպատակով, որը միտված չէ Հայաստան-Արցախ հարաբերություններն ավելի ուժեղացնելու, այլ միտված է Արցախը քաղաքական շահարկումների թեմա դարձնել, հեռանկարային չէ, անթույլատրելի է:

Հայաստանում տեղի ունեցած փոփոխություններն ուժեղացրել են նաև Արցախի իշխանություններին: Հայաստանը Արցախի անվտանգության երաշխավորն է, ու մեր ամուր լինելը անհրաժեշտ է նաև Արցախի անվտանգության համակարգին: Կասկածամտություն մտցնելը վտանգավոր է: