Նախկինում ՀՀ–ին հաջողվում էր հստակ դիրքորոշում չհայտնել՝ Արևմու՞տք, թե՞ ՌԴ, հիմա հայտնի չէ որքանով դա կհաջողվի. քննարկում (տեսանյութ)

13։23

Մենք եղած խնդիրները չպետք է ծածկենք կամ ասենք՝ ՌԴ-ում հայտնի հայի կապերով կլուծենք, պետք է պետական ինստիտուտները լուծեն այդ խնդիրները. Թևան Պողոսյան

Ցանկացած երկիր պետք է գիտակցի՝ ամեն մի հարաբերություն ձևավորվում է սեփական շահերի վրա: Պետք է հասկանալ՝ որն է ռուսական շահը իրենց պատկերացմամբ: Այս մասին «Ոսկանապատ» վերլուծական կենտրոնի կազմակերպած Հայաստան-Ռուսաստան. նոր հեռանկարներ փնտրելիս» թեմայով պանելային քննարկման ժամանակ ասաց Մարդկային զարգացման միջազգային կենտրոնի ղեկավար Թևան Պողոսյանը:

«Առաջարկում եմ՝ համալսարաններում բացվեն Ռուսաստանի ուսումնասիրության ամբիոններ. մենք չունենք ռուսագիտության մասնագետներ: Եթե հասկանում ենք, որ պետք է լինի Եվրոպայի, Ամերիկայի, արևելագիտության ուսումնասիրության կենտրոններ, պետք է ռուսագիտություն էլ ունենանք»,- նշեց նա:

Ըստ Պողոսյանի՝ պետք է հասկանալ՝ դու ինչո՞վ ես հետաքրքիր այդ երկրին: «Արդյոք ինչ-որ կերպ իր շահերը բավարարվո՞ւմ են, թե՝ ոչ: Ամբողջ խնդիրը նրա մեջ է, որ մենք իսկապես կարողանանք այս եղած խնդիրները ոչ թե փորձենք ծածկել, ոչ թե ասենք՝ մի հատ լավ հայ ունենք Ռուսաստանի բնակիչ, իր կապերով կօգնի, այլ պետք է լինենք համարձակ: Ի վերջո, մենք պետականություն ենք ձևավորում և պետականության ձևավորվումը լինում է պետական ինստիտուտների միջոցով խնդիրներ լուծելը: Պետք է ինստիտուտները վերլուծեն, որովհետև Ռուսաստանն էլ է փոխվում ժամանակի ընթացքում»,-ասաց նա:

Ըստ Թևան Պողոսյանի՝ պետք է կարողանալ սցենար մշակել: «Այնտեղ էլ է  սերնդափոխություն լինում, այնտեղ էլ են շահեր գալիս, ինչ-որ այլ հարաբերություններից իրավիճակներ փոխվում: Ամեն ինչին պատրաստ լինելու համար պետք է կարողանաս այդ սցենարները տեսնես»,- շեշտեց նա:

 

13:12

Նախկինում ՀՀ–ին հաջողվում էր հստակ դիրքորոշում չհայտնել՝ Արևմու՞տք, թե՞ ՌԴ, հիմա հայտնի չէ որքանով դա կհաջողվի. Հայկ Խալաթյան 

Ակնհայտ է, որ գնալով ուժեղանում է Ռուսաստան-Արևմուտք առճակատումը: Եթե նախկինում կոնֆլիկտը սուր չէր, հիմա շատ ավելի սուր է: Այս մասին «Ոսկանապատ» վերլուծական կենտրոնի կազմակերպած «Հայաստան-Ռուսաստան-նոր հեռանկարներ փնտրելիս» թեմայով քննարկման ժամանակ ասաց քաղաքական մեկնաբան Հայկ Խալաթյանը:

«Նախկինում Հայաստանին հաջողում էր հստակ դիրքորոշում չհայտնել, որը դժգոհություն էր առաջացնում Ռուսաստանում: Ներկայիս իշխանությունն էլ փորձում է նույն քաղաքականությունը տանել, բայց թե որքանով կհաջողվի, կտեսնենք: Սիրիայի հարցում Արևմուտքի դժգոհությունը բերեց նրան, որ Հայաստանը ուղարկեց իր զորքերը, չնայած Ռուսաստանում էլ դրական ընդունվեց, բայց խնդիրներ կարող են լինել այստեղ»,- ասաց բանախոսը:

Նա հարց բարձրացրեց՝ արդյո՞ք հայկական իշխանություններին կհաջողվի շարունակել այն քաղաքականությունը՝ հստակ չբռնել Արևմուտքի կամ Ռուսաստանի կողմը, որովհետև յուրաքանչյուր նման ընտրությունը լուրջ խնդիրներ կառաջացնի Հայաստանի համար:

«Մյուս խնդիրն էլ Ռուսաստանի և Բելառուսի միջև հարաբերություններն էն՝ ի՞նչ է կատարվելու: Մենք տեսնում ենք Ռուսաստանի քաղաքականությունն իր դաշնակիցների հանդեպ ինչպես  է փոխվում: Ռուսական կողմը հստակ ասում է Բելառուսին՝ «եթե մենք ձեզ մի բան տալիս ենք, դուք պետք է պատասխան մի բան տաք դիմացը»: Բելառուսը դիմադրում է, բայց երկար չի կարող դիմադրել:

Կտեսնենք, թե ինչպես կվերջանա այդ քաղաքականությունը, ինչն էլ հստակ ցույց կտա Հայաստանի ապագան. մեզանից ի՞նչ է ուզելու և մենք ի՞նչ ենք կարողանալու պատասխանել Ռուսաստանին»,- շեշտեց քաղաքական մեկնաբանը:

 
12:07

«Ոսկանապատ» վերլուծական կենտրոնը կազմակերպել է պանելային քննարկում` «Հայաստան-Ռուսաստան. նոր հեռանկարներ փնտրելիս» թեմայով:

Խոսնակներն են` Մարդկային զարգացման կենտրոնի ղեկավար Թևան Պողոսյանը, «Ոսկանապատ» վերլուծական կենտրոնի ղեկավար Հրանտ Մելիք-Շահնազարյանը, քաղաքական փորձագետ Հայկ Խալաթյանը և քաղաքական փորձագետ Ռուբեն Մարգարյանը:

Քննարկումը վարում է «Ոսկանապատ» վերլուծական կենտրոնի փորձագետ Դավիթ Մաթևոսյանը: