Շիշկինին ՀՀ-ում փախստականի կարգավիճակ տալը թելադրված էր արևմտյան ֆոնդերի կողմից և ուղղված էր Ռուսաստանին ապտակ հասցնելուն. Հրանտ Մելիք-Շահնազարյան

Այն որ, Հայաստանի իշխանությունները փախստականի կարգավիճակ են տվել Շիշկինին, մեկ էջով կավելացնի այն խնդիրների հաստ փաթեթը, որոնք արդեն իսկ գոյություն ունեն հայ-ռուսական հարաբերությունների մեջ:

Այս մասին Tert.am-ի հետ զրույցում ասաց քաղաքագետ Հրանտ Մելիք-Շահնազարյանը` անդրադառնալով Հայաստանի կողմից ռուս ակտիվիստ, Կալուգայում «ռուսական երթերի» կազմակերպիչ, Ռուսաստանում արգելված «Ռուսներ. էթնոքաղաքական միավորման» Կալուգայի մասնաճյուղի նախկին ղեկավար Վիտալի Շիշկինին փախստականի կարգավիճակ տրամադրելուն:

«Ես ավելի քան վստահ եմ, որ Հայաստանի և Ռուսաստանի իշխանական վերնախավի միջև ավելի վատ հարաբերություններ, քան արդեն իսկ այսօր գոյություն ունեն, պարզապես հնարավոր չէ: Չնայած Հայաստանի իշխանությունների բոլոր պաշտոնական հաղորդագրություններին, որոնք հղում են անում դարավոր եղբայրությանը, փաստացի որևէ խնդիր չի կարգավորվում և արդեն մեկուկես տարի շարունակ խնդիրները կուտակվում են»,-ասաց նա:

Քաղաքագետը նշեց, որ Շիշկինին փախստականի կարգավիճակ տրամադրելը Ռուսաստանի կողմից ընկալվելու է որպես մարտահրավեր: «Ինչպես նաև որպես մարտահրավեր է ընկալվել բազում այլ գործողություններ մեր իշխանությունների կողմից, որոնք արվել են չմտածված և միայն Նիկոլ Փաշինյանի անձնական ամբիցիաները բավարարելուն են ուղղված եղել: Այս մարտահրավերը, իհարկե, կունենա իր պատասխանը: Հուսադրողը միայն այն է, որ Ռուսաստանի իշխանությունները, կարծես, ըմբռնումով են մոտենում այն փաստին, որ Հայաստանի իշխանություններն ադեկվատ չեն և իրենց պատասխան քայլերում մաքսիմալ սրման չեն գնում, կարծում եմ, զուտ ունենալով դրական վերաբերմունք հայ ժողովրդի և Հայաստանի պետականության հանդեպ: Այսինքն՝ իրապես բարիդրացիական, եղբայրական հարաբերությունների այդ կապիտալն այսօր Նիկոլ Փաշինյանն օգտագործում է իր սեփական անձնական ամբիցիաները վերհանելու համար»,-ասաց նա և նշեց, որ ՀՀ իշխանությունը  չմտածված ճանապարհով մեր վստահության կրեդիտը վատնելու քաղաքականություն է վարում:

Հրանտ Մելիք-Շահնազարյանը վստահություն հայտնեց, որ Ռուսաստանի կողմից քաղաքական գնահատականներ կլինեն Հայաստանի այս քայլին, ինչ-որ ծրագրեր կկասեցվեն: Քաղաքագետը միաժամանակ հույս հայտնեց, որ նախկին փորձի պես այս անգամ էլ ռուսական կողմը մինչև վերջ հետևողական չի լինի իր դիրքորոշումը արտահայտելու հարցում:

«Այստեղ նաև երկրորդ կարևոր գործոնը կա: Ես կասկածում եմ, որ քաղաքական ապաստան տալը դա Հայաստանի իշխանությունների որոշումն է: Ամենայն հավանականությամբ, դա արևմտյան ֆոնդերի՝ հիմնականում Սորոսի ֆոնդի կողմից Հայաստանի ձեռքով Ռուսաստանին ապտակ հասցնելուն ուղղված քայլն էր: Ըստ էության մենք տեսանք, թե ովքեր են եղել միջնորդողները, որ փախստականի կարգավիճակ տրվի այդ քաղաքացուն»,-ասաց նա:

Քաղաքագետը նշեց, որ սա ցույց է տալիս, որ Հայաստանը միջազգային հարթակներում գործում է սեփական շահերի դեմ, ուրիշի՝ հիմնականում «Սորոս»-ի թելադրանքով: «Սա ոչ սուվերեն որոշում էր, պարտադրված, որը անմիջապես մեր ազգային շահերին է վնասում»,-ասաց նա:

Հրանտ Մելիք-Շահնազարյանը հիշեցրեց, որ Ռուսաստանը Հայաստանի գլխավոր գործընկերն է մի շարք ոլորտներում` տնտեսություն, անվտանգային հիմնախնդիրներ, էներգետիկ համակարգ. «Կարելի է ասել, որ այդ գործընկերությունը մեզ համար կենսական նշանակություն ունի և բոլոր այս ոլորտներում ցանկացած փոքր խոչընդոտի ի հայտ գալը վնասում է Հայաստանի բոլոր տիպի շահերին` քաղաքական, տնտեսական և անվտանգային: Այսինքն՝ ապաստան տալ մեկին, ով որևէ ազդեցություն, քաղաքական կշիռ չունի և վտանգել մեր կենսական շահերը, դա տգիտություն է: Դրանով Փաշինյանը իր ամբիցիաներն է ցույց տալիս, որ ինքը համաշխարհային մակարդակի լիդեր է և կարող է որոշումներ կայացնել, օրինակ, ի հակակշիռ Ռուսաստանի որոշման` Միհրան Պողոսյանին ապաստան տալու»:

Հիշեցնենք, որ Ռուս ակտիվիստ, Կալուգայում «ռուսական երթերի» կազմակերպիչ, Ռուսաստանում արգելված «Ռուսներ. էթնոքաղաքական միավորման» Կալուգայի մասնաճյուղի նախկին ղեկավար Վիտալի Շիշկինը փախստականի կարգավիճակ է ստացել Հայաստանում: «Ես շնորհակալ եմ Հայաստանին՝ ինձ՝ Ռուսաստանի իշխանությունների կողմից քաղաքական դրդապատճառներով հալածվող քաղաքական գործչիս, փախստականի կարգավիճակ տալու համար»,- Facebook-ի իր էջում գրել է Շիշկինը:

Ըստ Շիշկինի՝ ապաստան հայցողի խնդրագրում հրապարակված լուսանկարի՝ նա Հայաստանի իշխանություններից ապաստան է խնդրել 2019 թվականի փետրվարին: Այնտեղ նաև նշված է, որ նա մշտապես բնակվում է Հայաստանի երկրորդ քաղաքում՝ Գյումրիում: Վիտալի Շիշկինի էջի տեղեկությունների համաձայն՝ վերջինս հանդիսանում է «Քաղբանտարկյալների երեխաներին օգնություն ցուցաբերելու միջազգային բարեգործական հիմնադրամի» և «Ո՛չ ապօրինություններին, խոշտանգումներին և ստրկությանը» միջազգային հասարակական կոմիտեի նախագահը: Վիտալի Շիշկինը կալանավորված է եղել 2015 թվականի փետրվարի 13-ից մինչև 2019-ի հունվարի 10-ը՝ «Զանգվածային անկարգությունների կոչերի», «Ատելության և թշնամանքի սերմանմանն ուղղված գործողությունների» մեղադրանքներով: Նշենք, որ Շիշկինը հակակառավարական ցույցերի է մասնակցել Ռուսաստանում, Ուկրաինայում, Հայաստանում, Թուրքիայում, Մոլդովայում: