Հայ-ռուսական հարաբերություններում կան հարցեր, որոնց մասին պետք է խոսել, քննարկել. Ալեքսեյ Սանդիկով (տեսանյութ)

Պետդումայի մեր պաշտոնյաներից քանիցս լսել ենք իրենց դիրքորոշումն առ այն, որ, այնուամենայնիվ, «Գազպրոմ»-ը, ի հեճուկս հասարակության ներսում տիրող կարծրատիպերի, մասնավոր ընկերություն է և Հայաստանին մատակարարվող գազի գինը տնտեսական առումով շատ ավելի շահավետ է, քան շատ ու շատ այլ երկրների համար: Այս մասին Tert.am-ի հետ զրույցում ասաց Ազգային ժողովում Հայաստանի ռուսական համայնքը ներկայացնող, «Իմ քայլը» խմբակցության պատգամավոր Ալեքսեյ Սանդիկովը:

«Ռուսաստանի ներսում տեղի ունեցող փոփոխությունները, մասնավորապես՝ վարչապետ Դմիտրի Մեդվեդևի հրաժարականն ու նոր ժամանակավոր կառավարության նշանակումը, առաջին հայացքից անսպասելի թվացին և «ինտրիգների» նախադրյալներ ստեղծեցին, բայց հետո համոզվեցինք, որ որևիցե ռադիկալ փոփոխություններ տեղի չունեցան: Կառավարությունը ղեկավարում է բարձր պրոֆեսիոնալ, տեխնոկրատ և ոչ ստանդարտ լուծումների սիրահար Միշուստինը: Կարծում եմ, որ եթե այդ ամենին նայենք հայ-ռուսական հարաբերությունների պրիզմայից, ապա Հայաստանի և Ռուսաստանի միջև հարաբերությունների հիմնասյունները հանդիսացող երկու առանցքային՝ արտաքին գործերի և պաշտպանության նախարարություններում փոփոխություններ չեղան, ինչը, կարծում եմ, ենթադրում է հարաբերությունների նույն տեմպի, դինամիկայի պահպանում»,- ասաց Սանդիկովը:

Դիտարկմանը, թե նախկինում Ռուսաստանին բազմիցս քննադատած՝ այժմ արդեն վարչապետ Նիկոլ Փաշինյանը խոսում էր Ռուսաստանի հետ Հայաստանի հարաբերություններն ավելի ամուր և արդյունավետ դարձնելու մասին, և հարցին, թե ի՞նչ արդյունք ենք գրանցել հիմա, Ալեքսեյ Սանդիկովը պատասխանեց.

«Արդյունավետության չափելիության չափանիշներից և գործոններից մեկը կարող էր լինել կնճռոտ հարցերը պարզ, շիտակ, իրար աչքերի մեջ նայելով քննարկելը: Գիտեք, որ Հայաստանի և Ռուսաստանի միջև մշտապես բանակցության թեմաներից է Ռուսաստանում աշխատող հայերի վարորդական իրավունքների հարցը: Քանիցս ինքս էլ առիթ եմ ունեցել տարբեր ձևաչափերով ներգրավված լինել այդ հարցերի քննարկմանը: Այդ հարցերը բարձրացվել են, դրանց մաքսիմալ լուծում է տրվում»,-ասաց նա:

Սանդիկովը չի կարծում, որ Ռուսաստանը Հայաստանի նոր իշխանությունների համար բարդ գործընկեր է. «Բացի պետական, աշխատանքային հարաբերություններից, մեզ միավորում են նաև եղբայրական, դարավոր պատմական հարաբերությունները, որոնք հաճելի և պարարտ հող են ստեղծում այժմյան հարաբերությունների համար: Բայց, ինչպես ասացի, կան հարցեր, որոնց մասին պետք է խոսել, քննարկել, բայց դա չի նշանակում, որ մեր հարաբերությունները վատն են»,- նշեց Սանդիկովը և հավելեց՝ մեր ռուս գործընկերները նկատում են իշխանության եկած նոր թիմի պատրաստակամությունը ցանկացած հարցի արագ լուծումն ապահովելու, ցանկացած հարցի շուրջ անկեղծ, շիտակ բանակցություններ իրականացնելու ուղղությամբ:

Խոսելով մեկ այլ «կնճռոտ հարցի»՝ ռուսական գազի սակագնի հնարավոր բարձրացման վերաբերյալ՝ ԱԺ պատգամավորը նշեց, որ այդ հարցը մշտապես կլինի երկու երկրների ուշադրության կենտրոնում: Նա նշեց, որ չի կարծում, որ Ռուսաստանը խնդիրն օգտագործում է որպես լծակ Հայաստանին ճնշելու համար:

«Պետական դումայի մեր պաշտոնյաներից քանի անգամ լսել ենք իրենց դիրքորոշումն առ այն, որ, այնուամենայնիվ, «Գազպրոմ»-ը, ի հեճուկս հասարակության ներսում տիրող կարծրատիպերի, մասնավոր ընկերություն է և Հայաստանին մատակարարվող գազի գինը տնտեսական առումով շատ ավելի շահավետ է, քան շատ ու շատ այլ երկրների համար»,- ասաց նա:

Պատասխանելով դիտարկմանը, թե արդյոք Ռուսաստանի հետ «քաղաքական փայլուն հարաբերությունները», ինչպես բնորոշում են ՀՀ իշխանությունները, չե՞ն կարող գազի սակագնի բարձրացման հարցը վերջնականապես լուծել՝ ի նպաստ Հայաստանի, հայ ժողովրդի, Սանդիկովը նշեց, որ քաղաքական դեմքերը չեն կարող իրենց լծակներն օգտագործել և ազդել մասնավոր ընկերության՝ գազի սակագնի բարձրացման որոշման վրա:

Մանրամասները՝ տեսանյութում.

Հռիփսիմե Հովհաննիսյան