«ԼՂ խնդրի շուրջ բանակցություններն ավելի ինտենսիվ են դառնում, Մնացականյանն ու Մամեդյարովը խոսեցին երկու օր և էլի են ուզում». «Կոմերսանտ»

Ռուսական «Կոմերսանտ» պարբերականն անդրադարձել է Լեռնային Ղարաբաղի հակամարտության կարգավորման վերաբերյալ բանակցային գործընթացին, մասնավորապես՝ Հայաստանի և Ադրբեջանի արտգործնախարարների վերջին ժնևյան հանդիպմանը:

Անդրադարձի հեղինակ Կիրիլ Կրիվոշեևը նշում է, որ երկօրյա բանակցությունների արդյունքում տարածվել է բավականին ընդհանրական հայտարարություն, որից ակնհայտ է հետևյալը՝ թեև հիմնական խնդիրները շարունակում են չլուծված մնալ, սակայն կողմերը մտադիր են շարունակել նախորդ տարի սկսված «փոքր քայլերը»: Խոսքը լրագրողների և հասարակական գործիչների փոխադարձ այցերի մասին է: Բացի այդ, և՛ Երևանը, և՛ Բաքուն ցանկանում են պահպանել նախորդ տարվա տեմպը, երբ երկու պետությունների արտաքին քաղաքական գերատեսչությունների ղեկավարները հինգ հանդիպում են ունեցել:

«Ինչ վերաբերում է նոր սկսված տարում Զոհրաբ Մնացականյանի և Էլմար Մամեդյարովի առաջին հանդիպմանը, ապա այն արտասովոր երկար է տևել: Հունվարի 29-ին այն ավելի քան յոթ ժամ է տևել, իսկ հաջորդ օրը՝ ևս չորս ժամ: Բացի այդ, հիմնական բանակցությունների նախօրեին նախարարներից յուրաքանչյուրը հանդիպել է Մինսկի խմբի համանախագահների հետ»,- գրում է Կրիվոշեևը:

Ըստ հեղինակի՝ սա չի կարելի ռեկորդ անվանել, քանի որ ԼՂ հակամարտության երկարատև բանակցային գործընթացի պատմության մեջ ավելի տևական բանակցություններ էլ են եղել, սակայն Բաքվում վերջին հանդիպումն անվանել են վերջին տարիների ընթացքում ամենաինտենսիվը:

«Այնուհանդերձ՝ ակնարկ առ այն, որ այս հանդիպումն ինչ-որ բանով տարբերվել է նախորդներից, եղել է. հունվարի 29-ին Ադրբեջանի նախագահ Իլհամ Ալիևն ու ԵԱՀԿ Մինսկի խմբի համանախագահ երկրներից մեկի՝ Ֆրանսիայի նախագահ Էմանուել Մակրոնը հեռախոսազրույց են ունեցել: Հենց զրույցի փաստը շատ բանի մասին է խոսում, քանի որ համանախագահող երկրների նախագահները հազվադեպ են ակտիվություն ցուցաբերում բանակցային գործընթացի ժամանակ»,- նկատում է հեղինակը:

Նշվում է, որ Մնացականյան-Մամեդյարով ժնևյան հանդիպումը տեղի է ունեցել արտգործնախարարների դեկտեմբերյան հանդիպումից երկու ամիս անց: Այն ժամանակ հանդիպումը կայացել էր Բրատիսլավայում. Մամեդյարովն այնտեղ էր մեկնել ՌԴ արտգործնախարար Սերգեյ Լավրովի հետ հանդիպումից անմիջապես հետո: Հեղինակը հիշեցնում է, որ հենց Լավրովն է պնդում բանակցային գործընթացում «փոքր քայլերի» սկզբունքով առաջնորդվելու կարևորությունը՝ բացատրելով, որ դա կարող է նվազեցնել լարվածության մակարդակն ու մոտեցնել հակամարտության լուծմանը:

«Նախորդ տարի արձանագրված համեստ, սակայն հոգեբանական տեսանկյունից էական հաջողություններին հնարավոր է եղել հասնել բանակցությունների ինտենսիվացման շնորհիվ. արտգործնախարարները հանդիպել են 5 անգամ: Այս տարի կողմերը մտադիր են պահպանել տեմպն ու պայմանավորվել են մոտ ապագայում կրկին հանդիպել»,-եզրափակել է հեղինակը:

Ինչպես ավելի վաղ հայտնել էր Tert.am-ը, ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա), Էնդրյու Շոֆերը (ԱՄՆ) ԵԱՀԿ գործող նախագահի անձնական ներկայացուցիչ Անջեյ Կասպրչիկի միջնորդությամբ հունվարի 28-30-ն առանձին և համատեղ հանդիպումներ են ունեցել Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հետ Ժնևում: Հանդիպումների ավարտին նրանք հանդես են եկել համատեղ հայտարարությամբ: 

«Եռօրյա ինտենսիվ քննարկումների ընթացքում համանախագահները և նախարարները քննարկել են հետևյալ օրակարգային հարցերը՝ 2019-ին քննարկված առաջարկների և համաձայնագրերի իրագործումը և բնակչությանը խաղաղության պատրաստելուն ուղղված հաջորդ հնարավոր քայլերը, ապագա կարգավորման հիմքում ընկած տարրերը և սկզբունքները, կարգավորման գործընթացի առաջխաղացման օրակարգն ու ժամկետները:

Համանախագահները վերահաստատել են իրենց լիակատար հավատարմությունը հակամարտությանը խաղաղ լուծում գտնելու համար կողմերին օգնելու հարցում, ինչպես նաև կարգավորման գործընթացում գաղտնիության սկզբունքին և արդար և երկարատև խաղաղություն հաստատելու համար փոխզիջումային և ստեղծագործ ոգուն:

Նախարարները համաձայնել են կրկին հանդիպել մոտ ապագայում՝ համանախագահների հովանու ներքո»: