Փաշինյանը նախորդ իշխանությունների ձեռքբերումը վերագրում է իրեն. սա արդեն չափազանց է

Աշխարհը շարունակվում է  ցնցվել նոր կորոնավիրուսի հաղթարշավից, որի աշխարհագրությունը շարունակում է օրեցօր ընդլայնվել՝ ընդգրկելով շատ ավելի մեծ թվով մարդկանց, է՛լ ավելի շատ երկրներ:

Ըստ վերջին տվյալների՝ Իտալիան նոր տեսակի կորոնավիրուսից մահացության թվով աշխարհում առաջին տեղն է զբաղեցրել, ուր մահացածների թիվը կտրուկ աճել է ու մոտենում է 400-ի (7,3 հազար վարակակիրների մոտ 5%-ը): Երկրորդ տեղում ԱՄՆ-ն է, ուր, ըստ ամենաթարմ տվյալների, ավելի քան 500 մարդ է վարակվել նոր տեսակի կորոնավիրուսով, մահացել է 21-ը: Իսկ ահա Չինաստանում կորոնավիրուսի հետևանքով զոհերի թիվը հասել է 3119-ի, Իրանում էլ այդ թիվը մոտենում է 200-ի: Ի դեպ՝ Հայաստանի մյուս հարևան երկիր Վրաստանում նույնպես համապատասխան վիճակագրությունը հուսադրող չէ. վարակվածների թիվը 15-ն է, կարանտինի ռեժիմում են՝ 141-ը, հսկողության տակ գտնվում են 51 հոգի:

Մինչ մարդկությունը փորձում է անհույս պայքար մղել աշխարհացունց համաճարակի դեմ, այստեղ՝ Հայաստանում, Նիկոլ Փաշինյանն, իրեն հարազատ ոճով, ջանում է ստեղծված իրավիճակից առավելագույն քաղաքական դիվիդենտներ կորզել՝  հասարակությանը կրկին անգամ մանիպուլացնելով:

Ինչպես հայտնի է, օրերս վարչապետը ֆեյսբուքյան գրառման տեսքով մի  տեղեկություն էր հրապարակել՝ Հայաստանի գրանցած համապատասխան ցուցանիշը (90 միավորով Հայաստանն առաջ էր անցել անգամ ԱՄՆ-ից, Ֆինլանդիայից ու Շվեյցարիայից) ներկայացնելով որպես մեր երկրի կողմից համաճարակների դեմ ներկայումս տարվող պայքարի գերարդյունավետության ապացույց: Հետո, սակայն, պարզվել էր, որ վիճակագրությունն իրականում 2016թ-ի է և ոչ մի կերպ առնչություն չունի մեր օրերի և, առավել ևս, նոր տիպի կորոնավիրուսի հետ.  տվյալները վերցվել էին ԱՀԿ-ի՝ Հայաստանում 2016-ին կայացած առաքելության հաշվետվությունից, որը հրապարակվել էր 2017-ին:

Այն, որ նախորդների ձեռքբերումները սեփականելու, դրանք «սպիտակեցնելու» հարցում ներկայիս իշխանություններն իսկապես անգերազանցելի են, թերևս անվիճելի ճշմարտություն է: Ներկայացնելով հնացած վիճակագրություն՝ Նիկոլ Փաշինյանը, փաստորեն, փորձել է մարդկանց վրա հերթական անգամ տպավորություն թողնել՝ միաժամանակ իր այդ «ազնիվ» մղումը կյանքի կոչելու ճանապարհին սեփական թիմին վերագրելով նախորդ իշխանությունների ձեռքբերումները: Ի՞նչ կապ կարող էր ունենալ նույն Արսեն Թորոսյանը Առողջապահության նախարարության կողմից տարված քաղաքականության հետ 2016-ին, երբ այդ ժամանակ իշխանության ղեկին բոլորովին այլ մարդիկ էին՝ այլ ազգանուններով:

Մյուս կողմից՝ եթե նույնիսկ ենթադրենք էլ, որ Փաշինյանի հայտնած «ավետիսը» ոչ թե մտածված մանիպուլյացիա է, այլ՝ «տեխնիկական սխալմունք», ապա դա նույնպես, խոշոր հաշվով, հարցի սրությունը չի մեղմում: Ինչո՞ւ և կամ ովքե՞ր են հանդգնում   Նիկոլ Փաշինյանին «արջի ծառայություն» մատուցել՝ նրան տրամադրելով իրականության հետ ոչ մի կապ չունեցող վիճակագրություն կամ տվյալներ: Վարչապետի ֆեյսբուքյան էջում հրապարակված վիճակագրական մյուս տվյալներն է՞լ են նման կասկածելի ծագման, տնտեսական աննախադեպ աճ ավետող ցուցանիշներն է՞լ են նախորդ իշխանությունների կառավարման շրջանից վերցված, թե՞ բացառապես Արսեն Թորոսյանին պարզերես անելու մղումն է, որ ստիպել է ոմանց ցանկալին իրականության տեղ մատուցել:

Ամենացավալին, սակայն, այն է, որ Արսեն Թորոսյանի վարկանիշն անգամ մանիպուլյացիաներն ի վիճակի չեն փրկել, քանի որ Հայաստանն, ըստ էության, միայն երջանիկ պատահականությամբ է, որ դեռևս չի դարձել COVID-19-ի ճարակ. կորոնավիրուսի մեջ ոչ մի արտառոց բան չնշմարած նախարարն  այդ ամենի հետ այնքան էլ կապ չունի, ինչպես և ողջ կառավարությունը, և, ըստ էության, ահա դա է, որ Փաշինյանը փորձել է քողարկել, այն վերագրել սեփական թիմի ջանասիրությանը, հանրաքվեից առաջ միամիտ մարդկանց վրա ազդեցություն գործել:

Ի դեպ՝ մի հետաքրքական փաստ ևս, որին արժե ուշադրություն դարձնել: Վերջին օրերին համացանցային տիրույթում «Ո՞ր երկրներն են ավելի լավ պատրաստ համաճարակներին» վերտառությամբ մի աղյուսակ է տարածում ստացել, որից պարզ է դառնում, որ աշխարհի բազմաթիվ երկրների շարքում Հայաստանը համաճարակներին արագ արձագանքելու առումով 26-րդ հորիզոնականն է  զբաղեցնում՝ առաջ անցնելով, մասնավորապես, Գերմանիայից ու Ճապոնիայից: Իսկ ահա բոլոր կետերով Հայաստանը զբաղեցրել էր 44-րդ տեղը 195 երկրների շարքում:

Միևնույն ժամանակ, ինչպես նկատել էր կոնֆլիկտաբան Արթուր Մարտիրոսյանն, այս ամենով հանդերձ  հայտնի չէ, թե որտեղից են այդ տվյալները և որ ժամանակահատվածով են թվագրվում: Կոնֆլիկտաբանը նկատել էր, որ «Իրական ժամանակ» հեռուստաալիքի գործադիր պրոդյուսեր Քենան Ալիևը, որ հստակ դեր է ունեցել այս տվյալների հանրայնացման գործում, ժամանակին գլխավորել է Բաքվում «Ազատություն» ռադիոն՝ նախքան ադրբեջանական իշխանությունների կողմից այն փակելը: Ակնհայտ է, որ Բաքվին խոցելի ներկայացնող (բոլոր 6 չափանիշներով Ադրբեջանը զբաղեցրել է 117-րդ տեղը), իսկ Հայաստանը շահեկան դիրքերից մատուցող վիճակագրությունն իրականում քարոզչական հնարք է՝ նախատեսված ադրբեջանական լսարանի համար:

Ասել կուզի՝ այս կամ այն անհայտ ծագման վիճակագրությամբ հանրային կարծիքի վրա ազդելու, այն ուղղորդելու փորձեր արվում են նաև դրսում, և այդ իմաստով, ցավոք, մենք նույնպես բացառություն չենք. հատկապես կորոնավիրուսի տարածման ու այդ փաստը սեփական շահերին ծառայեցնելու որոշակի մարդկանց ձգտումներն առաջ են բերում մանիպուլացվելու իրական վտանգ:

Ինչ վերաբերում է Հայաստանին, ապա, ցավոք, մեզանում այս խնդիրը նույնպես առկա է ու մինչ օրս էլ մնում է առկախված: Ավելին՝ որոշ դեպքերում հենց նմանատիպ արհեստական հնարքների միջոցով է, որ իշխանությունները փորձում են իրենց համար լուծել այսրոպեական խնդիրներ, ազդել հասարակական հոգեբանության վրա հատկապես որ դրա անհրաժեշտությունն իսկապես առկա է՝ պայմանավորված ապրիլյան հանրաքվեով:

Վռամ Սուքիասյան