Դիվանագիտական ոլորտում հսկայական անելիք ունենք, այստեղ բոլոր միջոցները չենք սպառել, պետք է լարենք բոլոր ուժերը՝ հասնելու Արցախի ժողովրդի պաշտպանությանն ու հաղթանակին. Արմեն Սարգսյան

Արցախն այսօր մի քանի պատերազմ է մղում՝ առաջինը՝ սկսել է Ադրբեջանը սեպտեմբերի 27-ին, երկրորդը՝ այդ պատերազմում աջակցում է Թուրքիան, սա նոր պատերամ է, և երրորդ պատերազմը համաճարակն է: Այս մասին հանրային հեռուստատեսության եթերում ասաց ՀՀ նախագահ Արմեն Սարգսյանը:

Նա նշեց, որ այս ամենից բխելու է տնտեսական դժվարություն, տնտեսական խնդիրներ ունենալու ենք, այս ամենից հետո, ըստ ՀՀ նախագահի, սթափություն է հարկավոր. պետք է լինել սթափ, կազմակերպված, կարգապահ՝ գնահատելով և՛ դրականը, և՛ բացասականը:

Խոսելով պատերազմում կողմերի մոտիվացիայի մասին՝ Արմեն Սարգսյանը նշեց, որ մեր և Ադրբեջանի նպատակները տարբեր են. «Մենք պայքարում ենք մեր կյանքի համար, ադրբեջանական կողմը պայքարում է տարածքի, հողի համար, անվանելով դա տարածքային ամբողջականություն: Չգիտես թե որտեղից են դա վերցրել, «տարածքային ամբողջականություն» ասվածը տրվել է իրենց որպես նվեր ընկեր Ստալինի կողմից 70 տարով, դրանից առաջ Ադրբեջանի կազմում Ղարաբաղը չի եղել: Մեր կռվելու նպատակը հայի կյանքի համար է, իրավունքի համար այն հողի հանդեպ, որտեղ ծնվել ես, որտեղ քո նախնիներն են ապրել, որտեղ մշակույթ է ստեղծվել»,- նշեց նա:

Արմեն Սարգսյանը ընդգծեց՝ 5 օրվա պատերազմը ապացուցեց, որ Ադրբեջանը պատերազմով Արցախին հաղթել չի կարող, 5 օրվա պատերազմի արդյունքով ապացուցվեց, որ այս պատերազմի արդյունքում այսօր Թուրքիան ունի լրիվ ազդեցություն:

Անդրադառնալով Թուրքիայի՝ պատերազմին մասնակցելու դրդապատճառներին՝ ՀՀ նախագահը նախ թվեց Թուրքիայի բերած պատճառները:  

«Թուրքերն ասում են՝ եկել են օգնեն իրենց էթնիկ եղբայրներին. նրանք էթնիկ եղբայրներ ունեն ամենուր, այս բացատրութամբ նշանակում է, որտեղ իր էթնիկ եղբայրները խնդիրներ ունենան միջնադարյան ձևերով պետք է գնան միջամտե՞ն, ուստի իրենց այս պատճառաբանությունն անհեթեթ է: Երկրորդ պատճառով, նշում են թե Հայաստանում կան քրդական զինվորներ, դա լրիվ անիմաստ արտահայտություն է, որովհետև կես հոգի էլ չկա:

Հաջորդը՝ իբր պաշտպանում են գազամուղը, դա որևէ տրամաբանություն չունի, այդ գազատարը ռմբակոծելը, եթե արվեր, պետք է արվեր 20 տարի առաջ, դրանով կկանխեին դրա կառուցումը, ուստի այդ պատճառը ևս աբսուրդ է»,- ասաց ՀՀ նախագահը:

Անդրադառնալով Թուրքիայի մասնակցության իրական պատճառներին, նախագահը նշեց, որ ժամանակը ընտրված է հստակ. «ԱՄՆ-ն զբաղված է իր ընտրություններով, Ռուսաստանն իրենց գնահատմամբ զբաղված է Բելառուս, Եվրոպա և այլ խնդիրներով, կա համաճարակը և բոլորի ուշադրության կենտրոնից հեռու է լինելու»,- նշեց նա:

Խոսելով միջազգային հանրության արձագանքի մասին, մասնավորապես երեք երկների՝ ՌԴ, Ֆրանսիա, ԱՄՆ նախագահների արված հայտարության մասին, Արմեն Սարգսյանն ասաց.«Միջազգային հանրությունը միամտորեն դեռ կարծում է, թե խոսքը գնում է Արցախի հարցի մասին՝ տարածքային ամբողջականություն, ինքնորոշման իրավունքի դիմաց, հետևաբար իրենց կոչերը երկկողմանի են՝ ուղղված և՛ Ադրբեջանին, և Հայաստանին՝ դադարեցնել ռազմական գործողութունները: Ես կարծում եմ՝ շատ կարճ ժամանակում բոլոր միջոցները պետք է նեդրնել, որ բացատրենք միջազգային հանրությանը, որ գործ ունենք լրիվ ուրիշ իրավիճակի հետ, որը վտանգավոր է ոչ միայն Արցախի ու Հայաստանի համար, այլ ամբողջ տարածաշրջանի համար: Մեր պաշտոնական դիվանագիտությունն ամեն ինչ պետք է անի Հայաստանը դեռ իր բոլոր քարտերը չի խաղացել»:

Ըստ նախագահի՝ պետք է կարողանալ իրական իրավիճակը բացատրել, որովհետև սեպտեմբերի 27-ից հետո պատմության լրիվ նոր փուլ ենք մտել  և այդ պատության նոր փուլը պետք է բացատրենք և մեր բարեկամներին, և նրանց, ովքեր ինչ-ինչ պատճառներով բարեկամ են Թուրքիայի և Ադրբեջանի հետ: «Մեր դիվանգիտության միջոցով այս բացատրությունները պետք է տանել, սպասել, որ վաղը պատերազմը վերջանալու է, ես դա չեմ տեսնում, բայց որ վաղը չէ մյուս օրն այս պատերազմն ավարտվելու է, պետք է դիվանգիտական միջոցով արվեն այդ բացատրությունները և իհարկե այս պատերզամն ավարտվելու է հաղթանակով մեզ համար»,- ընդգծեց նա: